SALMOS 145
145
1Wká'n ẕena' Le', Dios chia'.
Nako' Le' Benne' Wnná Bia' Ẕen chia'.
Wká'n ẕénteza' La la'y chio' to chi'ize.
2Tža tža wká'n ẕena' Le'.
Wká'n ẕénteza' La la'y chio' to chi'ize.
3Ẕente nak X̱anžo Dios, na' nak chie' we ḻáwtezežo Ḻe'.
Batkle gak gónbia'žo ka ẕente nake'.
4Yógo'te kwe' benne' chio' ka' yéngekle' da' beno' Le'
na' wzéngekle' yezika' benách ka nak da' ẕente na'.
5Wláb ḻaža'a ka nak yeḻa' ẕen che yeḻa' wak chio',
na' ka nak da' ẕente ka' da' beno'.
6Yógo'te benne' ka' wcháljgake' ka nak yeḻa' wak che da' ẕente da' beno',
na' neda' wzenla' ḻégake' ka nak yeḻa' ẕen chio'.
7Wzéngekle' ljéžgake' ka' ka nak yeḻa' ži'i ḻaže' ẕen chio',
na' góḻtezegake' kan nako' Le' chawe'.
8X̱anžo Dios nake' ži'i ḻaže',
na' žeyache' ḻáže'le' benne' chie' ka'.
Nake' ẕen ḻaže', na' žeyache' ḻáže'ḻe'ele' žo'o.
9X̱anžo Dios žon chawe'e yógo'te benne' ka',
na' žeyache' ḻáže'le' yógo'te
da' zóagaken nbángaken, da' ka' bene' Ḻe'.
10Yógo'te da' ka' beno' wká'n ẕéngaken Le', X̱anto' Dios
na' benne' chio' ka' we ḻáwgake' Le'.
11Ẕcháḻjgake' ka ẕente nak yeḻa' wnná bia' chio'.
Ẕcháḻjgake' ka nak yeḻa' wak ẕente chio'
12nich wzéngekle' yógo'te benne' ka' ka zej nak da' ẕente ka' da' beno',
na' ka nak yeḻa' ẕen che yeḻa' wnná bia' chio'.
13Yeḻa' wnná bia' chion' sóatezen,
na' nna bi'o yógo'te kwe' benách ka'.
14Nox̱w X̱anžo Dios yógo'te benne' ka' žejchégwgake'.
Žechise' yógo'te benne' ka' zej ndo'e ḻo žin waḻe.
15Yógo'te benne' ka' ẕbézgake' Le' gákḻeno' ḻégake',
na' Le' wneẕjo' da' gáwgake' kate' gaḻa' chen.
16Ḻo yeḻa' ži'i ḻaže' chio' ẕze no'o.
Ẕneẕjo' da' žiážjegekle yógo'te da' zóagaken nbángaken.
17Chawe' nak X̱anžo Dios ḻo yógo'te da' žone',
na' ḻi ḻaže' zej nak yógo'te da' žone' Ḻe'.
18X̱anžo Dios zóateze' gákḻene' yógo'te benne' ka' žḻížgake' Ḻe',
yógo'te benne' gax̱jw ḻaže' ka' žḻížgake' Ḻe'.
19Gone' da' žak ḻáže'gak benne' ka' ẕžébegake' Ḻe'.
Ḻezka' yenle' chégake' kate' wḻížgake' Ḻe', na' yeslé' ḻégake'.
20X̱anžo Dios žape chi'ikze' yógo'te benne' ka' zej nži'ile' Ḻe',
san wžía yi'e yógo'te benne' ka' ẕbej yíchjgake' Ḻe'.
21Dot ḻaža'a wká'n ẕena' X̱anžo Dios.
Yógo'te benne' ka' žaḻa' we ḻáwgake' La la'y chie' to chi'ize.
Nke Ahọpụtara Ugbu A:
SALMOS 145: zty
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2002, Wycliffe Bible Translators, Inc. All rights reserved.