Mako 3
3
OYesu akutamba omuntu owa mukono ogusaraire
(Mat 12:9-14; Luk 6:6-11)
1Omulundi ogundi, oYesu nʼaingira omwikumbaaniro. Era omwo mwalimu omuntu owa mukono ogusaraire. 2Omwikumbaaniro mwalimu abantu abamwei abaali bakwendya okujunaana oYesu. Ni bamuwanga amaiso, babone oba yatamba omuntu oyo oku Sabbiiti. 3OYesu nʼakoba owa mukono ogusaraire nti, “Iza oyemeere ani, omu maiso gʼabantu.” 4Ale nʼabuulya abaaliwo ati, “Kiki ekiikirizibwa omu Mateeka gaiswe okukola oku Sabbiiti? Kukola busai, oba kukola bubbi? Kutamba bwomi oba kubuwerekeerya?” Baitu bo ni basirika cei cei cei. 5OYesu nʼaberuguurya amaiso nʼabagongereire, era niyeenatiire olwa bubbani bwa mitima gyabwe, nʼakoba omuntu oyo ati, “Golola omukono gwamu!” Nʼagugolola ni gutambirwa kimwei. 6Amangu ago aBafarisaayo ni bawuluka, ni beeyimbya amwei nʼabasagiki ba Kerode, bateese nka nibaita oYesu.
Abantu abaakumbaaniire oku nyanja
7Awo oYesu, amwei nʼabeegesebwa baamwe, nʼayaba oku nyanja ya Galiraaya. Abantu baingi, abaaligire omu Buyudaaya, 8nʼomu kibuga Yerusaalemu nʼomu kitundu ekya Idumeya, nʼenseeri wa Yoludaani, nʼomu kitundu ekyerereire ebibuga oTiiro nʼoSidoni ni bamusengeerya. Abantu bani boona boona baayabire gyali kubba baali bawuliire byakukola. 9Olwa bantu okwakaliirya obwingi, oYesu nʼalagira abeegesebwa baamwe bamuteerewo obwato ekibiina kyʼabantu kitamumigiirya. 10Abalwaire boona boona baali bakwemigiirya okumwikaku leke bamukwateku, kubba yaali atambire abantu baingi 11Abantu abaaliku emizumu nibaamubonangaku, ni bagwa ansi omu maiso gaamwe, ni bakukokooma bati, “Niiwe Mwana wa Kanca!” 12Baitu oYesu nʼagaanira kimwei emizumu okumwatula.
OYesu akukomya abakwenda eikumi nʼababiri
(Mat 10:1-4; Luk 6:12-16)
13Awo oYesu nʼatemba oku lusozi, nʼayeta beyayenderye. Nibaayabire egyali, 14nʼakomyamu ikumi nʼababiri beyafoire abakwenda, leke babbenge naye, era abatumenge okubuulira oku bukama bwamwe. 15Nʼabaweerya obuyinza okupekanga emizumu oku bantu. 16Eikumi nʼababiri beyakomerye nibo bani:
oSimooni gweyayalikire erya Peetero; 17oYakobo nʼomugande oYokaana, abataani ba Zebbedaayo, beyayalikire erya “Bowaneruge” (ekimanyisya nti, “Ababbwabbwanuka nkʼonkuba”), 18Andereya, oFiripo, oBatulumaayo, oMatayo, oTomasi oYakobo omutaani wʼAlufaayo, oTadaayo, nʼoSimooni oMulwaniiri wa iyanga ryamwe, 19nʼoYuda Isikariyooti, eyaliiraine oYesu.
OYesu nʼoBbeeluzebbuli
(Mat 12:22-32; Luk 11:14-23; 12:10)
20Awo oYesu nʼairayo gyebaabbanga. Abantu baingi ni bairamu okukumbaanira waali. Ye nʼabeegesebwa baamwe ni babulwa nʼakaire okulya emere. 21Abaluganda lwamwe nibaakiwuliire, ni bakoba bati, “Agwire iralu.” Ni baaba okumwiyayo. 22Abeegesya bʼamateeka gʼaBayudaaya abaali bazwire e Yerusaalemu ni bakoba bati, “Aliku oBbeeluzebbuli omukulu wa mizumu, era akolesya buyinza bwʼoyo okugipeka oku bantu,” 23Awo oYesu nʼayeta abantu nʼabaza nabo omu nfumo ati, “OSetaani asobola atyai okwepeka oku bantu? 24Obukama nibwetiicaamu, ni bulwanangana, obukama obwo buwereekeera. 25Nʼeka, niyeetiikyamu nʼerwanangana ewereekeera 26NʼoSetaani niyeerwanisya omwenyenere era ni yeegabaniamu, tamamaala awereekeera. 27Ndoowo asobola kwingira mu nyumba ya muntu omunyamaani nʼanyaga ebintu byamwe, ateekereire kumukwata nʼamubbwa, ale nʼanyaga ebya mu nyumba yaamwe. 28Kambakobere amananu; abantu basobola okusaasirwa ebibbi byona, era basobola okusaasirwa embazo egibbi eya buli ngeri. 29Baitu buli alizuma oMwoyo Akwera, talisaasirwa kubba abba akoore ekibbi ekitaliwaawo.” 30Kini oYesu yakibazire kubba waaliwo abaali bakukoba bati, “Aliku omuzumu.”
Abaganda ba Yesu nʼoma waamwe
(Mat 12:46-50; Luk 8:19-21)
31Awo abaganda ba Yesu nʼonyina, ni baiza gyali ni beemeera enzai, ni bamutumira nibakumweta. 32Ekibiina kyʼabantu kyali kiikaire nikimweruguriirye, ni bamukoba bati, “Bona, omaawo nʼabagandaabo bali enzai, bakwendya okukubona.” 33OYesu nʼabairamu ati, “Abennyeta oma wange nʼabaganda bange nibo banaani?” 34Awo niyaroore abantu abaali baikaire awo nibamweruguriirye, nʼakoba ati, “Oma wange nʼabaganda bange nibo bani: 35Buli akola oKanca byayendya niye muganda wange, niye munyaanya wange, niye ma wange.”
Nke Ahọpụtara Ugbu A:
Mako 3: RUULI-NYALA
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye