Mako 2
2
OYesu akutamba omulwaire wa kusarala
(Mat 9:1-8; Luk 5:17-26)
1Niwaayakairewo ebiro bidooli, oYesu nʼaira omu kibuga kya Kaperenawumu. Abantu nibaawuliire ngʼaizire omweka egimwei obundi mweyabbanga, 2ni bakumbaana baingi, ni baizulya enyumba, nga nʼomu lubuga tibacaaloomamu. OYesu niyaali akubuulira ekigambo kya Kanca, 3ni waizawo abaamuleeteire omulwaire asaraire, niyeetiikiibwe abantu banai. 4Nibaalemerwe okumwica awali oYesu, olwa bwingi bwʼabantu, ni boowa ekitundu kya lukanga lwa nyumba oYesu mweyaali, ni baakalya omulwaire oyo omu kiwulu ekyo, nabbasirye oku kaara kwebaamuleeteire. 5OYesu niyaboine nga balina okwikiriza, nʼakoba asaraire ati, “Mwana wange, ebibbi byamu bikusaasiirwe.” 6Olwo abeegesya bʼamateeka abaali baikaire awo, ni balowooza omu mutima gwabwe bati, 7“Oni asobola atyai okubaza atyo? Azumire Kanca? We ale naani alina obuyinza okusaasira ebibbi, okwiyaku oKanca?” 8Amangu ago oYesu ni yeeteja omu mwoyo gwamwe byebaali bakulowooza. Nikwo okubakoba ati, “Lwaki mukulowooza mutyo omu mitima gyanywe? 9Ekikusingaku obwangu nikyo kiri ayi, okukoba asaraire nti, ‘Ebibbi byamu mbikusaasiire,’ oba nti, ‘Yemeera weetiike akaara kaamu, otambule?’ 10Ati buni muleke mbalange nti oMwana wa Muntu alina obuyinza oku nsi okusaasira ebibbi.” Awo nʼakoba asaraire ati, 11“Yemeera. Weetiike akaara kaamu, oireyo e waanywe.” 12Amangu ago omusaiza nʼayemeera, boona boona nibakubona. Nʼaimula akaara kaamwe nʼawuluka boona boona nibarolereire. Ni bawuniikiira ni bawaisya oKanca, ni bakoba bati, “Kini titukibonangaku!”
OYesu akweta oLeevi
(Mat 9:9-13; Luk 5:27-32)
13Awo oYesu nʼairayote oku lukeito lwa nyanja eya Galiraaya. Abantu ni baiza baingi muno, nʼatandika okubeegesya. 14Niyaali nakutambula, nʼabona omusoroorya wa musolo oLeevi omutaani wʼAlufaayo, naikaire webaasorooleryanga omusolo. OYesu nʼamukoba ati, “Nsengeerya.” OLeevi nʼaimuka nʼamusengeerya. 15Oluzwannyuma, oYesu niyaali nʼabeegesebwa baamwe ewa Leevi oku kiibulo, abasoroorya ba musolo baingi nʼabasiisi abandi ni baikala nabo okulya. 16Abamwei oku beegesya bʼamateeka ga Kiyudaaya aba mu kibiina kyʼaBafarisaayo, nibaaboine oYesu nakuliira amwei nʼabasiisi nʼabasoroorya ba musolo, ni bakoba abeegesebwa baamwe bati, “Lwaki aliira amwei nʼabasoroorya ba musolo nʼabasiisi?” 17OYesu niyawuliire kyebakubuulya, ye omwenyenere nʼabairamu ati, “Aboomi tibataka musawu, abalwaire nibo bamutaka. Abaikiiri ti nibo naizire okweta, naizire kweta basiisi.”
OYesu bakumubuulya oku kusiiba
(Mat 9:14-17; Luk 5:33-39)
18Ekiro kimwei, abeegesebwa ba Yokaana oMubatiza nʼaBafarisaayo nibaali bakusiiba, abantu abamwei ni baiza egiri oYesu, ni bamubuulya bati, “Lwaki abeegesebwa ba Yokaana oMubatiza nʼabeegesebwa bʼaBafarisaayo basiiba, baitu abaamu nibatasiiba?” 19OYesu nʼabairamu ati, “Abeete oku bugenyi bwa bugole tibasobola butalya, ngʼabandwire acaali na bo. Ebiro byamala na bo tibasiiba. 20Baitu ebiro biriika, asweire omugole abaiyibweku. Olwo nimwo balisiiba. 21Omu lugoye olukaire, omuntu tabaziiramu kiraka kiyaaka, kubba nikyemiima kyonola olugoye, ekiwulu ni kyeyongera obukooto. 22Era oiyeera wa viini, tasukibwa mu nsawu za byanzo ezikaire. Kini nikikolebwa, azikaakula nʼasukuka nʼensawu ni zisiisikala. Baitu oiyeera oyo asukibwa mu nsawu ziyaaka.”
OMukama wa Sabbiiti
(Mat 12:1-8; Luk 6:1-5)
23Ekiro kya Sabbiiti ekimwei, oYesu niyaali akwakala omu muwanda ogwayakalanga omu ndumiro za ŋaano, abeegesebwa baamwe abaali baakaire naye, ni baaba bawulula oku ŋaano. 24ABafarisaayo abamwei nibaakiboine ni bakoba oYesu bati, “Lwaki abeegesebwa baamu bakola ekitaikirizibwa omu Mateeka gaiswe oku Sabbiiti?” 25Ye nʼabairamu ati, “Timusomangaku oDawudi kyeyakoore, ye nʼebeyaali nabo ni baalumirwe enzala? 26Yaingiire omu nyumba ya Kanca, nʼalya oku migaati egyali giwairweyo egiri oKanca.#1Sam 21:1-6 Kini yakikoore Abbyasaali niyaali nga niye Saabakabona. Emigaati egyo gyali gitaikirizibwa kuliibwaku bantu bandi okwiyaku abakabona bonkai. Baitu oDawudi yagiriireku, era nʼaweeryaku nʼabaali naye.” 27Awo oYesu nʼakoba aBafarisaayo abo ati, “Ekiro kya Sabbiiti kyatairwewo lwa busai bwa muntu, baitu omuntu Sabbiiti. 28Olwʼekyo oMwana wa Muntu niye Mukama wa Sabbiiti.”
Nke Ahọpụtara Ugbu A:
Mako 2: RUULI-NYALA
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye