Mako 1
1
OYokaana oMubatiza akuteekaniza omuwanda
(Mat 3:1-12; Luk 3:1-18; Yok 1:19-28)
1Gani nigo Amawuro Agasai agakwata oku Yesu Kurisito oMwana wa Kanca. 2Gaatandikire nkʼomulangi oIsaaya niyawandiikire ati,
“Ndituma omukwenda wange akwekeereyo
okukuteekaniriza omuwanda.#Mal 3:1
3Aliwo akwamiira omwirungu ati,
‘Musaayiirye omuwanda gwa Mukama,
mugolole emiwanda gyamwe.’#Isa 40:3”
4Omuntu oyo yaali Yokaana oMubatiza eyabonekeire omwirungu nakubuulira abantu beenenye babatizibwe leke basaasirwe ebibbi. 5Abantu baazwanga omu byalo ebya mu Buyudaaya bwona, nʼomu kibuga Yerusaalemu, ni baabanga gyali, ni baatula ebibbi byabwe. Ale oYokaana nʼababatiza omu mwiga Yoludaani.
6OYokaana yazwalanga ekizwalo ekyakoleibwe omu byoya bya nkaina, ni yeebbwanga olukobba olwa kyanzo omu nkende. Yaalyanga nzige nʼojuuru wa bwoki bwa mu kisiko. 7Yakobanga abantu ati, “Aliwo ankirisya obuyinza akwiza okwiza. Tinsemeire na kwinama kusandabula buguwa bwa nkaito zaamwe. 8Nje mbatiza na maizi, baitu ye alibabatiza na Mwoyo Akwera.”
Okubatizibwa kwa Yesu
(Mat 3:13-17; 4:1-11; Luk 3:21-22; 4:1-13)
9Ekiro kimwei, oYesu nʼazwa e Nazaaleesi omu nsi ya Galiraaya, nʼayaba oYokaana nʼamubatiza omu mwiga Yoludaani. 10OYesu niyaali nakuzwa omu maizi, amangu ago nʼabona eiguru niriswekukire, nʼoMwoyo Akwera nakwisana nkʼonkaiba, nʼasirimuka oku ye. 11Eiraka ni rizwa omwiguru ni rikoba riti, “Oli Mwana wange gwenyendya, era ogwensemereerwa.” 12Amangu ago oMwoyo Akwera nʼamutwala omwirungu. 13Eyo nʼamalayo ebiro amakumi anai nakwoyeerwa oSetaani, era nali amwei nʼebisolo bya mu kisiko baitu abamalaika ni bakumuweereza.
OYesu akutandika okwegesya omu Galiraaya
(Bona Mat 4:12-17; Luk 4:14-15)
14Awo oYokaana niyamaare okwigaarwa omu nkomyo, oYesu nʼayaba e Galiraaya, nʼabuulira abantu Amawuro Agasai aga Kanca, 15nʼakoba ati, “Ebiro biikire, oBukama bwa Kanca bwigereire. Mwenenye, era mwikirize Amawuro Agasai.”
Okwetebwa kwa bategi abanai
(Mat 4:18-22; Luk 4:14-15; 5:1-11)
16Awo oYesu niyaali akutambula oku lukeito lwa nyanja eya Galiraaya, nʼabona oSimooni nʼAndereya abaluganda, nibakunaga akatimba omu nyanja, kubba baali bategi, 17nʼabakoba ati, “Mwize mubbe basengeerya bange, ndibafoola abategi bʼabantu.” 18Amangu ago ni balekawo obutimba bwabwe, ni baaba naye. 19Niyeeyongeireku omu maiso kadooli, nʼabona oYakobo nʼomugande oYokaana, abataani ba Zebbedaayo, omu bwato nibakusaayiirya obutimba bwabwe. 20Amangu ago nʼabeeta. Ni baleka awo oite waabwe oZebbedaayo nʼabapakasi baamwe omu bwato, ni baaba naye.
Omuntu aliku omuzumu
(Luk 4:31-37)
21Awo oYesu nʼabeegesebwa baamwe, ni baika omu kibuga Kaperenawumu. Oku kiro kya Sabbiiti, oYesu nʼaingira omwikumbaaniro nʼayegesya. 22Abantu abaawuliire, ni beewuunya muno engeri gyeyayegeseryemu. Kubba yayegeserye kʼomunyabuyinza, baitu ti nkʼabeegesya bʼamateeka gʼaBayudaaya.
23Amangu ago omwikumbaaniro ryabwe omuntu eyaaliku omuzumu, nʼakokooma ati, 24“Okutujunaana ki we oYesu oMunazaaleesi? Oizire kutuwereekeerya? Nkumaite we oli Mweru wa Kanca.” 25OYesu nʼaboigoora omuzumu ati, “Sirika mangu, nʼomuntu oyo muzweku!” 26Omuzumu ni gukankania omuntu oyo, ni gumuzwaku nigukukokooma. 27Boona boona abaaliwo ni bawuniikiira, ni babuulyangana bati, “Kini kiki? Enyegesya gini giyaaka, eizwire obuyinza, era alagira emizumu ni gimuwura!” 28Okuzwa olwo, obumanyiki bwamwe ni bwika omu nsi eya Galiraaya yoona yoona.
OYesu akutamba abalwaire abaingi
(Bona Mat 8:14-17; Luk 4:38-41)
29OYesu niyazwire omwikumbaaniro, nʼayaba nʼoYakobo nʼoYokaana omu eka ya Simooni nʼAndereya. 30Niyaali yaakaika, ni bamukobera nti, onyibyala wa Peetero ali mu kitabu ekiswija kikumuluma. 31OYesu nʼayaba waali, nʼamukwata oku mukono, nʼamwimula. Amangu ago ekiswija ni kimuwonaku, nʼatandika okubaweereza. 32Akasweko eisana nirigwire, ni bamuleetera abalwaire boona boona, nʼabaaliku emizumu. 33Era abantu aba mu kibuga ekyo boona boona ni bakumbaanira oku mulyango gwa nyumba. 34OYesu nʼatamba baingi abaalina endwaire eza buli ngeri, nʼabaaliku emizumu nʼagibapekaku, nʼatagiikiriza kubaza, kubba gyali gimumaite.
OYesu akubuulira omu Galiraaya
(Luk 4:42-44)
35Omu kibbambya, obwire nibucaali kubonia, oYesu nʼaimuka nʼawuluka, nʼayaba omu kifo ekitaalimu bantu, nʼabba eyo nakusaba. 36OSimooni na baira baamwe, ni baaba okumutooleerya. 37Nibaamuboine, ni bamukoba bati, “Buli muntu akukutoolya.” 38OYesu nʼabairamu ati, “Twabe omu byalo ebyerereire ani, yoona mbuulireyo, kubba ekyo nikyo naiziriire.” 39Olwʼekyo nʼatambula oGaliraaya yeena yeena, nʼakubuulira omu makumbaaniro gaabwe, era abantu abaaliku emizumu nʼagibapekaku.
OYesu akutamba omugenge
(Mat 8:1-4; Luk 5:12-16)
40Awo omugenge nʼayaba egiri oYesu, nʼakubba amajwi nʼamwesengeerya ati, “Mukama, niwaabba okwendya osobola okuntamba.” 41OYesu nʼamukwatirwa ekisa, nʼagolola omukono nʼamukwataku, nʼamukoba ati “Nkwendya, tambwa.” 42Amangu ago ebigenge ni bimuligaku nʼawona. 43OYesu nʼamulaga nʼakumukunkuniririza kimwei ati, 44“Kini otokikoberaku muntu gonze omwei, baitu oyabe weerange ewa kabona era oweeryeyo ekiwongwa nkʼoMusa niyalagiire,#Lev 14:1-32 leke bakakatye nti owonere.” 45Baitu omusaiza oni niyayabire, nʼatandika okurarangya woona, nkʼoYesu niyaali amutambire. Olwʼekyo oYesu nga tacaasobola kwingira mu kibuga rubona, okwiyaku okubba oku ntando, omu bifo ebitalimu bantu, baitu era abantu baaliganga woona woona ni baaba gyali.
Nke Ahọpụtara Ugbu A:
Mako 1: RUULI-NYALA
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye