Matta 22
22
Lemtel n wid ittwaɛerḍen
(Lq 14.15-24)
1Yemmeslay-asen-d daɣen Yasuɛ s lemtel, yenna-yasen :
2Tagelda n igenwan tcuba ɣer yiwen n ugellid i ixedmen tameɣṛa i mmi-s. 3Iceggeɛ iqeddacen-is ad ssiwlen i wid yettwaɛerḍen, meɛna ugin ad d-asen. 4Yerna iceggeɛ-asen iqeddacen nniḍen ad sen-inin : Heggaɣ imensi, zliɣ izgaren-iw d wakraren-iw, kullec ihegga, aset-d ɣer tmeɣṛa ! 5Meɛna widak-nni ittwaɛerḍen ur as-fkin ara azal, yal yiwen ilha d ccɣel-is, wa iṛuḥ ɣer yiger-is, wa ɣer ssuq-is. 6Wiyaḍ ṭṭfen iqeddacen-nni, regmen-ten, nɣan-ten. 7Agellid-nni ikcem-it zzɛaf d ameqqran, dɣa iceggeɛ lɛeskeṛ-is nɣan iqettalen-nni, sseṛɣen tamdint-nsen. 8Imiren yenna i yiqeddacen-is : Imensi n tmeɣṛa ihegga, meɛna widak-nni ittwaɛerḍen ur t-uklalen ara ; 9ṛuḥet ɣer izenqan, tɛerḍem-d ɣer tmeɣṛa wid akk ara tafem deg iberdan. 10Iqeddacen-nni ṛuḥen ɣer izenqan jemɛen-d wid akk ufan, ama d amcum ama d win yelhan, s wakka axxam n tmeɣṛa iččuṛ-d d lɣaci. 11Mi d-ikcem ugellid ad iwali inebgawen, iwala yiwen wergaz ur yelsi ara llebsa n tmeɣṛa. 12Yenna-yas : Ay ameddakel, amek i d-tkecmeḍ ɣer dagi mebla llebsa n tmeɣṛa yettwaheggan i yinebgawen ? Argaz-nni issusem, ur yufi d acu ara as-yini. 13Agellid-nni yefka lameṛ i yiqeddacen-is yenna-yasen : Cuddet-as ifassen d iḍarren, tḍeggrem-t ɣer ṭṭlam n beṛṛa, anda llan imeṭṭawen d nndama tameqqrant. 14Axaṭer aṭas i yettwaɛerḍen, meɛna drus ara yettwiqeblen.
Lexlaṣ n tebzert i Qayṣar
(Mq 12.13-17; Lq 20.20-26)
15Imiren ṛuḥen ifariziyen ad mcawaṛen amek ara d-sseɣlin Yasuɛ deg wawal.
16Ceggɛen-as kra seg inelmaden-nsen akked kra si terbaɛt n Hirudus, nnan-as : A sidi, neẓra-k d bab n lḥeqq i telliḍ, tesselmadeḍ iberdan n Yillu s tidett, ur tuggadeḍ ula d yiwen, ur txeddmeḍ ara lxilaf gar yimdanen. 17Ini-yaɣ-d ihi d acu twalaḍ : D leḥlal neɣ d leḥṛam ad nxelleṣ tabzert (leɣṛama) i ugellid Qayṣar ? 18Meɛna Yasuɛ yeẓran tiḥila-nsen, yenna-yasen : Ay at sin wudmawen ! Acuɣer i tebɣam ad iyi-tjeṛṛbem ? 19Sseknet-iyi-d iṣurdiyen s wacu ttxelliṣen tabzert ! Fkan-as-d aṣurdi. 20Dɣa isteqsa-ten : Udem akked tira yellan deg uṣurdi-agi, wi ten-ilan ? 21Rran-as : N Qayṣar ! Imiren yenna-yasen : Rret ihi i Qayṣar ayen yellan n Qayṣar, terrem i Yillu ayen yellan n Yillu ! 22Mi slan i yimeslayen-agi, wehmen, dɣa ṛuḥen ǧǧan-t.
Asteqsi ɣef ḥeggu n lmeyytin
(Mq 12.18-27; Lq 20.27-40)
23Ass-nni, isaduqiyen i yellan d imdanen ur nettamen ara s ḥeggu n lmeyytin, usan-d ɣer Yasuɛ, steqsan-t, nnan-as : 24A sidi, Musa yenna-d : Ma yemmut wergaz d amengur, ilaq gma-s ad yaɣ taǧǧalt-nni i wakken ad d-isɛu yid-s dderya ara iweṛten gma-s-nni yemmuten#22.24 Walit Asmekti 25.5-6.. 25Yuɣ lḥal llan ɣuṛ-neɣ sebɛa watmaten, amezwaru izewǧen yemmut ur d-iǧǧi dderya, dɣa gma-s yerra (yuɣ) tameṭṭut-nni. 26Akkenni i teḍra d wis sin, d wis tlata, armi d wis sebɛa. 27Mi mmuten irkulli, temmut ula d tameṭṭut-nni ; 28ass n ḥeggu n lmeyytin anwa deg-sen ara tt-isɛun d tameṭṭut-is imi i tt-uɣen di sebɛa yid-sen ? 29Yasuɛ yerra-yasen : Tɣelṭem ! Axaṭer ur tefhimem Tira, ur tessinem tazmert n Yillu. 30Ass n ḥeggu n lmeyytin, irgazen d tilawin ur zewwǧen ara, meɛna ad uɣalen am lmalayek n Yillu deg igenni. 31Ɣef wayen yeɛnan ḥeggu n lmeyytin, ur teɣṛim ara acu i d-yenna Yillu : 32Nekk d Illu n Ibrahim, d Illu n Isḥaq, d Illu n Yaɛqub#22.32 Walit Tuffɣa 3.6 ; Lecɣal n Imceggɛen 7.32.. Illu, mačči d Illu n lmeyytin, meɛna d Illu n wid yeddren. 33Mi as-slan, lɣaci qqimen ttweḥḥiden deg imeslayen-is !
Anwa i d lameṛ ameqqran ?
(Mq 12.28-34; Lq 10.25-28)
34Mi slan ifariziyen d akken Yasuɛ yeɣleb isaduqiyen deg wawal, nnejmaɛen wway gar-asen. 35Yiwen deg-sen d amusnaw n usaḍuf, isteqsa-t i wakken ad t-ijeṛṛeb : 36A sidi, anwa i d lameṛ ameqqran meṛṛa di ṭawrat ? 37Yasuɛ yerra-yas : Ad tḥemmleḍ Ameɣlal Illu-inek seg wul-ik, s teṛwiḥt-ik, s wayen yellan di tezmert-ik#22.37 Walit Asmekti 6.5.. 38D wagi i d lameṛ yellan d amezwaru yerna d ameqqran akk. 39Atah wayeḍ yesɛan azal annect umezwaru-agi : Ad tḥemmleḍ lɣiṛ-ik am yiman-ik#22.39 Walit At Lawi 19.18 ; Matta 5.43, 19.19 ; At Ṛuma 13.9 ; At Galasya 5.14 ; Yaɛqub 2.8.. 40D sin lumuṛat-agi i d lsas n ṭawrat akked idlisen n lanbiya.
Lmasiḥ, d mmi-s n Dawed ?
(Mq 12.35-37; Lq 20.41-44)
41Mi llan ifariziyen nnejmaɛen, isteqsa-ten Yasuɛ yenna : 42D acu ara d-tinim ɣef Lmasiḥ ? Ansi ara d-ikk, yeɛni anwi i d lejdud-is ? Nnan-as : D mmi-s n Dawed. 43Yasuɛ yenna-yasen : Amek ihi i as-isemma Dawed s tezmert n Ṛṛuḥ imqeddes Sidi mi yenna :
44 Ameɣlal yenna i Ssid-iw :
Ṭṭef amkan ɣer tama-w tayeffust,
alamma rriɣ iɛdawen-ik seddaw iḍarren-ik.
45Ma yella ihi Dawed issawel-as sidi amek ara yili ihi d mmi-s ? 46Yiwen deg-sen ur izmir ad as-d-yerr awal, seg wass-nni ttaggaden ad t-steqsin.
Nke Ahọpụtara Ugbu A:
Matta 22: TiIq
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.