Rom 14
14
Tovi fateza ihei
1Ghotolu mala toghoza mae ihei te theome hneta noa fatutu'ani ie, ni tovi magra balugna magne gnadi nafnata puhi te theome kahe gaoghatho ghotolu balugna magne ie. 2Noa fatutu'ani kahe mae ie, sakreza magne mala ngamu gea gobigna nafnata gano. Ni mae te ghatho paupalu ka hna te keli harira nanoni khilo'au re, magne theome ngamu gano te nafnahi. 3Mae ihei te lase ngamu gobigna nafnata gano ie, theome mala lepo fapariza mae ihei te theome lase ngamu gano te nafnahi ie. Ni eulanauwa mae ihei te theome lase ngamu gano te nafnahi ie, theome mala lepo fapariza ihei te lase ngamu gobigna nafnata gano ie. Eigna God kafua keli tagnara hui lana noa nanonire. 4Ba, ghoe ihei ia, mala lepo fapariza ghoe noa mae gloku keha mae ie? Eigna noa mae funei magne lana te tangomana lepoza te mae teugne ne ei gloku te keli ba the'o teuwe. Ni mae gloku teugne kaina eiza fakeli fatheve noa gloku ie, eigna Lod kaina toghoza magne ka hna te eiza magne ie.
5Gaoghathodi keha nanonire, kahe naga'e ie ke uludini keha naga'e re, euwateuwe gaoghathodi keha nanonire, naga'e te hui re kahe nanaba lana. Soasopa nanoni ie mala ghaoghatho fakeliza igne ka gnagnafagna ie. 6Mae ihei te ghathoza te kahe naga'e ke fua uludini keha naga'e re teuwe, magne eiza igne eigna magne ghatho boheza Lod. Eulanauwa, mae ihei te ngamu gobigna nafnata gano ie, magne eiza igne eigna magne ghatho boheza Lod, ni magne eulanauwa lepo fakeliza God gna gano teuwae. Euwateuwe, mae ihei te theome ngamu gobigna nafnata gano ie, magne eiza igne eigna magne ghatho boheza lanau Lod, ni lepo fakeliza God gna gano teuwae. 7The'o kaheni ka tati te kahra ba leme hariza thaigna ie. 8Kate kahra te au tati ie, tati kahra mala lepo fakeliza Lod. Euwateuwe, kate leme tati ie, tati eulanauwa mala lepo fakeliza Lod. Eume, neubane leme ba kahra tati, tati noa nanoni Lod. 9Eigna Kraes neke leme, euwateuwe ke kegra fapulo, mala nodi Lod nanoni fate'o te kahra na te au ba ihei tela leme hui re.
10Eume tati the'o kahe noda noilaghi te mala fateza tabusignada ka khilo'au gne. Ne fahneuwa ghoe te fatera ni kofu faparira teu keha mae kheramu ka khilo'au gnadi hna te ngamu hatimare ie gnea? Tati te hui kaina ie kegra ke ulugna God, euwateuwe magne kaina fateghita tati hui. 11Eigna hna te lepoza ka i'ini te blahi ie eu'ani,
“Rei lana nakahra ie. Nanoni te hui re kaina mei turununu ke ulugu rei,
ni kaina lepoza te rei God ie.”#14:11 Aesaea 45:23.
12Eume kheragura, tati te hui ie kaina mala lepo fataklera puhidare ka God.
Tovi batuza kheramu ie ka nakhibo
13Eume, funu gignoa igne, tati tovi fateza kherada fafaudu ie, ni tovi eiza kahe puhi te mala batu fadi'aza magne ka nakhibo. 14Eigna rei mei tela kaheni balugna Lod Jisas gne, rei tufuni laseza te the'o kahe gano te ngamu tati te di'a ka nathagna Lod ie. Ni ihei te ghathoza te keha nafnata ganore blahi teuwe, magne thokagna ie tovi ngamu lana gano teuwae. 15Jame kahe kherami ka khilo'au theome hneghaza gano te ngamu ghotolu ie, teuwae gaoghathogna ie ghotolu theome leghuza lana puhi mala farinahmai ie. Kraes neke leme mala fakahriza nanoni teuwae, eume ghotolu theome mala choghaza magne ka gano te ngamu ghotolu ie. 16Ghotolu tovi eiza kahe puhi te mala tangomana keha nanonire te lepo fadi'ara u puhimi ghotolu te keli re. 17God theome funei frunira nakahrada re, eigna te ngamu tati keha nafnata gano ba kho'u te ko'u tatire. The'o. Ni God funei frunighita tati kate eiza tati hna te kohlo ka nathagna magne ie, au ka keliphari, ni hneahnegha ka Tharunga te Blahi. 18Ihei te loku hariza Kraes ka nafnata puhi ire, God kaina hneahnegha ka magne, euwateuwe nanonire kaina eulanauwa hneahnegha ka magne.
19Eume, tati mala tufuni eira hna te tangomana mala toghoghita te hui re mala au ka keliphari ni mala heta ka fatutu'ani. 20Tovi sakrera gano te ngamu ghotolu re mala re'oza noa gloku God ie. Gano te hui re kafua keli hui lana te mala ngamu ie, ni te sapla ie jame te ngamu ghotolu gano te theome keli ka gaoghathodi keha nanonire, ni choghara teu nodi fatutu'ani re. 21Te keli ie tovi ngamu nafnahi, ni tovi ko'u waen ni tovi eiza kahe puhi te tangomana choghaza noa fatutu'ani kahe kheramu fafaudu ka khilo'au gne.
22Nou fatutu'ani ghoe gnadi gano ire, farihotenimu ghoe thaimu ni God eu lana. Ni ihei te eiza hna te ghathoza magne ne kohlo, ni theome di'agnagnafa ka eiza teuwe, magne hneahnegha lana. 23Ni ihei te ghatho paupalu neigna gano te ngamu magne ie, magne nakhibo hui, eigna magne tufuni theome fatutu'aniza ne kohlo teuwe. Eume, te fatutu'aniza ghotolu hna te eiza ghotolu ie theome kohlo ka nathagna God teuwe, teuwae nakhibo hui lanauwa euwa.
© 2025 SIL Solomon Islands