युहन्ना 16
16
1“मे तुहुंं काजे जी आखी वात असु करीन कह्लु, छे की जत्यार माणसे तुहुंंक वेला पाड़से, तत्यार तुहुंं मार पर भुरसु छुड़ीन भटकाड़्यु घुण। 2माणसे तुहुंं काजे तुंद्रा भक्तीन घर मां सी नीकाळीन बाहर कर देसे, ने छाचलीन जी टेम आवणे बाजी रय की, माणसे ज समजीन तुहुंंक मारसे की हामु ईनुक मारीन भगवानेन सेवा चाकरी कर र्या। 3छाचलीन चे भगवान बासेक बी नी उळखे, ने मेसेक बी नी उळखे, ने चे तुंद्रे साते असा वेहवार करसे। 4मे तुहुंंक जी आखी वात असु करीन कह्लु छे, की जत्यार चे तुहुंंक वेला पाड़से, ती तुहुंं काजे आखी वात हेर#16:4 स्मरण आवणु चाहजे की, मे तुहुंंक जी वात पेहलुत कयदीन काठु करलु छे।” अतरा दाहड़ा मे तुंद्रे पुठ्ये हतलु करीन मे जी आखी वात सुरु मां नी कह्यु।
चुखली-आत्मान कामेन बारामां ईसु बताड़े
5बाकुन हाय मे तेरेन्चां जाणे हींडी र्यु, जु मेसेक मकेल्लु छे, ने तुंद्रे मायन काहनुक मेसेक बी छाचे मने ज नी पुछतु की तु कां जाणे हींड र्यु? 6मे तुहुंंक जी आखी वात कय देदु, करीन तुंद्रो मन सुच मां पड़ गुयो, ने तुहुंं मेसेक नी पुछता। 7बाकुन मे तुहुंंक छाचलीन कह्वो की, मे जाती रय्स ती तुंद्रे वाटे वारु रवसे काहाकी मे नी जाम ती तुहुंंक सात देण्यु तुंद्रेन्चां नी आवे बाकुन मे जायस ती तीना सात देण्या काजे तुंद्रेन्चां मकली दीस। 8जत्यार चु सात देण्यु चुखली-आत्मा आवसे ती ची ईनी कळीन माणसेक तींद्रा पापेन बारामां ने तींद्रा धरमेन बारामां ने तींद्रा नीयावेन बारामां पुरावु भेळु गुनु देखाड़ीन समजाड़से। 9कळीन माणसे मारे पर भुरसु नी करता, करीन चुखली-आत्मा तींद्रा पापेन बारामां तीनुक पुरावा भेळु गुनु समजाड़से। 10मेते भगवान बासेन्चां जाणे हींड र्यु, ने जत्यार मे जाती रय्स ती तुहुंं मेसेक नी देखु मारी आवजी पर चुखली-आत्मा तुंद्रे पुठ्ये रय्न कळीन माणसेक तींद्रा झुटा धरमेन बारामां पुरावा भेळु गुनु देखाड़ीन समजाड़से। 11ईनी कळीन मुख्यु भुतड़ान नीयाव हय गुयला छे ने तेरा पापेन डंड तीनाक छाटुस भुकेतणु पड़से ने चुखली-आत्मा कळीन माणसेक बी तींद्रा झुटा नीयावेन बारामां पुरावु भेळ गुनु देखाड़ीन समजाड़से।
12तुहुंंक कहंणे करीन अळी बेसकी वात मारा मन मां आय रय बाकुन हींताळ कयस ती तुहुंंक वेठाये नी। 13जत्यार चु छाचलीन जीव-आत्मा आवसे, ती चु तुहुंंक भगवानेन आखी छाचली वाटे ली जाणे अगवाय करसे काहाकी चु आपसे आवड़ते काय बी नी कह्वे, बाकुन चु ज काय मारे सी सामळसे चत कवसे ने आवणे वाळी वातेन बारामां बी तुहुंंक देखाड़से। 14चु मारी सेक-सींगार करसे, काहाकी ज काय मारो छे च बताड़से, ने आखी चीज जी बासेन छे ची मारी छे। 15तेरेमां मे कह्यु की ज काय भगवान बासेन छे, च आखो मारो छे चु तीनाक लेसे ने तुहुंंक बताड़से।
ईसुन चेलान दुख खुसी मां बदली जासे
16“ईसु आपसा चेलाक पेहलुत सी कह्तु गुयु, ईतरीक वार मां तुहुंं मेसेक नी देखु ने अळी ईतरीक वार मां मेसेक देख्सु।”
17ने ईसुन चेला मायन ईतराक चेला आपसा आपसात कह्या, “हयु आपणुक काय कय र्यु, च आपणुक समज मां नी आवतो हयु कह्यु की ईतरीक वार मां तुहुंं मेसेक नी देखु ने अळतेन अळी ईतरीक वार मां तुहुंं मेसेक देखसु चु ईतरीक वार पेहेले असु बी कह्लु, काहाकी मे भगवान बासेन चां जाणे हींडी र्यु।” ईनी दुय वातेन मतलब काय छे। 18चे कह्या हयु ईतरीक वार मां कहें च काय कहंवाये हामुक समज मां नी आवतो की हयु हामुक काय कय र्यु।
19ईसु ज जाण लेदु की हया मेसेक मारी ईनीक वातेक लीन सवाल पुछणे हींडे की ईतरीक वार मां तुहुंं मेसेक नी देखु, ने अळी ईतरीक वार मां तुहुंं मेसेक देख्सु करीन ईसु तीनुक कह्यु, “तुहुंं आपसा-आपसा मारी ईनी वातेन बारामां वीच्यार काहा कर र्या? 20मे तुहुंंक छाची छाचीन ज कहं, ईतरीक वार मां तुहुंं रड़सु ने कलेपसु बाकुन ईनी कळीन माणसे खुस हवसे, ने हय तुहुंं दुखी हवसु ते खरा बाकुन अळतेन तुहुंं दुखी हवणु रहणीदीन खुस हय जासु।” 21“भारीस बायर फवरी हवणे वेळाय बेसकी वेला करीन कलपे, बाकुन जत्यार ची फवरी हय जाय ती, बेसकी खुस हवे। हय ईनी कळी मां एक पुर्यु पयदा#16:21 उत्पन्न हवलु, करीन ची एक वेलान वात काजे ईसरी जाय।” 22असात हय ते तुहुंं बी दुखी छे, बाकुन मे अळी तुहुंंक भेळु हय्स तत्यार तुंद्रा मन मां खुसी आय जासे, ने तुंद्री खुसी तुंद्रे सी कुय सी नी हापकाये।
23तीने दाहड़े तुहुंं मारे सी काय बी नी पुछु मे तुहुंं काजे छाची-छाची कह्वो, कदी तुहुंं भगवान बास सी मारे नावे दुवा करीन काय बी मांगसु, ती चु तुहुंं काजे आपसे। 24आज लग तुहुंं मारे नावे दुवा करीन काय बी नी मांग्या। मांगसु, ती भगवान तुहुंंक आपसे, असु करीन की तुंद्री खुसी पुरी हय जाय।
ईसु कळीक जीत लेदु
25“मे तुहुंं काजे जी आखी वात दाखलु दीन कह्लु छे। असी टेम आवणे बाजी रय की मे तुहुंं काजे अळी दाखलु दीन वात नी बताड़ो, बाकुन भगवान बासेन बारामां वात खुलीन बताड़ीस। 26तीने दाहड़े तुहुंं मारे नाव सी मांगसु ने मे तुंद्रे सी ज नी कवतु की मे तुंद्रे वाटे भगवान बास सी दुवा कर्यु। 27बाकुन भगवान बास आपसुत तुंद्रे सी परम करे, काहाकी तुहुंं मारे सी परम राखु ज भुरसु कर लेदला छे की मे भगवान बासेम सी आयु। 28मे भगवान बास सी नीकळीन कळी मां आय गुयु, ने अळी पछु कळी काजे छुड़ीन भगवान बास भीणी जाणे बाजी र्यु।”
29ईसुन चेला ईसु काजे कह्या, “देख, तु हय दाखलु दीन नी कवतु बाकुन चुखो झण कह्णे बाजी र्यु। 30हय हामु समजी गुयला छे की, तु आखो काय जाणे। हामु तुसेक ज पुछणे हींड र्या तीनी वातेक बी तु पेहल सीत जाणी लेय ने तु जी हेर नी करतु की कुय तुसेक पुछणु चाहजे, तारेम काय बी कसर नी हय ने हामु भुरसु करजे की तु भगवान बास सी आवलु छे।”
31ईसु तीनु काजे कह्यु, “काय तुहुंं हय भुरसु करु? 32बाकुन देखु! असी टेम आवणे बाजी रय ने आय गुयली छे, जत्यार तुहुंं आखा की आखा रावण्या-तीवण्या हय जासु ने मेसेक एखलुत छुड़ीन जाती रवसु। तेबी मे एखलु नी हय काहाकी भगवान बास मार पुठ्ये छे।” 33“हय, ईनी कळी मां तुहुंंक वेला करनु पड़से तेबी काठु जीव करजु, मे ईनी कळीक जीत लेदलु छे। मे तुहुंं काजे जी आखी वात असु करीन कह्लु छे की, आवणे वाळा दाहड़ाम दुख झेलता जाय्न बी तुहुंं मारेम छे ची सांती हात कर लेय।”
Nke Ahọpụtara Ugbu A:
युहन्ना 16: BSP25
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
The Bhilali Bible ©The Word for the World International and Bhilali Bhasha Samiti, Warvani, (M.P.) 2025.