प्रेरितां चे काम 18
18
कुरिन्थुस शहर मां पौलुस
1ऐचे बाद पौलुस एथेंस शहरा नु छोड़ती कर कुरिन्थुस शहरा मां गेला। 2ओठे ओची मुलाकात हेक अक्विला नांवे चे यहूदी जवाना लारे हुली, जाया जनम पुन्तुस मां हुला तां, ते ओ आपणी घराआली प्रिस्किल्ला चे लारे इटली कनु आला, कांकि राजा क्लौदियुस ने सारे यहूदी लौका नु रोम महु निकलती जाणे ची आज्ञा ङिली हुती। पौलुस वानु मिलणे वास्ते गेला। 3पौलुस ते अक्विला चा हेक ही धन्धा हुता, ऐवास्ते ओ जती कर वांचे लारे रेहला, ते वांचा धन्धा तम्बू बणावणे चा हुता।
4पौलुस हर सब्त चे ङिओ यहूदी प्राथनाघरा मां जती कर बहस-बाजी करती कर यहूदिया नु ते यूनानिया नु समझाता। 5जिसे बेले मकिदुनिया कनु सीलास ते तीमुथियुस आले, ते पौलुस पूरा समय वचन सुणावणे ची धोन्न मां लाग़ती कर यहूदी लौका नु हा ग़वाही ङिता कि ईशु ही मसीह छै। 6जिसे बेले वाणे ओचा विरोध करला ते ओची निन्दा करली, ते पौलुस ने आपणी ओढ़णी झाड़ती कर वानु केहले कि, “तम्चे लुहीं तम्चे ही ठोङा उपर ही हो! मैं तां निर्दोष छै। हमा मैं नेरीया जातिया चे गोढु जई।”
7बल्ति पौलुस यहूदी प्राथनाघरा कनु टुरती पला, ते तीतुस यूस्तुस नांवा चे बन्दे चे घरा मां आला, जको नरीकारा उपर विश्वास राखता, जाये घर यहूदी प्राथनाघरा चे गोढु हुते। 8बल्ति यहूदी प्राथनाघरा चा सरदार क्रिस्पुस ने आपणे पुरे कुणम्बे समेत प्रभु उपर विश्वास करला। ते ब़ोहत सारे कुरिन्थुस वासीया ने वचन सुणती कर विश्वास करला ते बपतिस्मा गेहला।
9हेक राती नु पौलुस नु खाबा मां नरीकारा ने केहले, “हमा ङर ना, वचन चा प्रचार करता जा, ते चोप-चाप ना रेह। 10कांकि मैं दुधे लारे छै, कुई वी दुधे उपर हमला करती कर तनु नुकसान ना पुचा सग़ी, कांकि ऐह शहरा मां माये घणे सारे विश्वासी लौक छी।” 11ऐवास्ते पौलुस कुरिन्थुस शहरा मां ङोढ साला तक नरीकारा चे वचना ची शिक्षा ङिता रेहला।
पौलुस उपर यहूदिया चे जरिये मुकदमा
12जिसे बेले गल्लियो अखाया प्रदेस चा राज्यपाल हुता, ते ओ बेले यहूदी लौक ऐका करती कर पौलुस चे विरोध हुती गेले, ते ओनु पकड़ती कर न्यां आसण चे सामणे खड़े करती ते किहुं लाग़ले कि, 13“हा लौका नु यूं करती कर समझावे, नरीकारा ची अराधना इसड़ी रीति लारे करा, जको व्यवस्था चे विरोध छै।”
14जिसे बेले पौलुस आपणी सहायता वास्ते कहीं केहणे ही आला हुता, ते गल्लियो ने यहूदी बन्दा नु केहले कि, “हे यहूदी लौक, अगर हा कुई अन्याय जा दुष्टता ची बात हुवीया तां ठीक हुते, ते मैं तम्ची सुणे हा। 15पर हा वाद-विवाद शब्दा, ते नांवा, ते तम्ची इठे ची व्यवस्था चे बारे मां छै तां, तम्ही ही जाणा, कांकि मैं यां बाता चा न्यांयी ना बणने चाहवी।” 16ते ओणे वानु न्यां आसण चे सामणे कनु कढ़वाती छोड़ले।
17बल्ति सारा लौका ने यहूदी प्राथनाघरा चे सरदार सोस्थिनेस नु पकड़ती कर न्यां आसण चे सामणे मारले कोटले। पर गल्लियो ने यां बाता ची कुई वी चिन्ता कोनी करली।
पौलुस चे अन्ताकिया सनु जाणे
18बल्ति पौलुस घणा ङिहां तक ओठे रेहला, बल्ति विश्वासी भावां कनु विदा हुती कर जहाजा मां ब़ेसती कर सीरिया सनु टुरती पला ते प्रिस्किल्ला ते अक्विला वी ओचे लारे हुती। जाणे कनु पेहले ओणे किंख्रिया शहरा मां ऐवास्ते रोङा हुला हुता कांकि ओणे मनोती मांगली हुती। 19ते इफिसुस शहरा मां पुज़ती कर वानु उठी छोड़ती ङिले, ते आप खौद्द जती कर प्राथनाघरा मां यहूदिया लारे बहस-बाजी करु लाग़ती गेला। 20जिसे बेले वा बन्दा ने ओचे कनु विनती करली कि, “कोच्छ नेरी ङिहें इठे रेह।” पर पौलुस राजी कोनी हुला।
21पर ईं केहती कर वांचे कनु विदा हुला कि, “अगर नरीकार चाहवी तां मैं तम्चे गोढु दुबारा आवी।” ते बल्ति ओ इफिसुस शहर छोड़ती कर पाणीया आले जहाजा मां ब़ेसती कर चाह्ला गेला। 22बल्ति ओ कैसरिया शहर पुज़ती कर, यरुशलेम सनु गेला, ते कलीसिया नु नमस्कार करती कर। बल्ति ओ अन्ताकिया शहर सनु चाह्ला गेला।
पौलुस ची तीजी प्रचार-यात्रा ची शुरुआत
23अन्ताकिया शहर मां कोच्छ ङिहें रेहती कर, ओ उठु टुरला ते शहर-शहर यात्रा करता हुला सारे गलातिया प्रदेस ते फ्रूगिया इलाके मां सारा चैला नु पक्के करता फिरला।
इफिसुस मां अपुल्लोस
24अपुल्लोस नांवा चा हेक यहूदी जाया जनम सिकन्दरिया मां हुला तां जको विद्वान मर्द हुता ते जानु पवित्रशास्त्र चा बङा ज्ञान हुता। ओ इफिसुस मां आला। 25ओणे प्रभु चे मार्ग़ ची शिक्षा गेहली आली हुती, ते मन लाती कर ईशु चे बारे मां ठीक-ठीक सिखाता ते सुणाता, पर ओ सेर्फ यूहन्ना बपतिस्मा ङेणे आले ची ही बाता नु जाणता। 26अपुल्लोस प्राथनाघरा मां बेखौफ हुती कर ब़ोलु लाग़ला, जिसे बेले प्रिस्किल्ला ते अक्विला ने ओचे वचना नु सुणले ते ओनु आपणे ओठे गेहती गेला, ते ओठे वाणे अपुल्लोस नु नरीकारा ची शिक्षा नु साफ-साफ रीति लारे बावड़ले।
27जिसे बेले अपुल्लोस ने अखाया प्रदेस सनु जाणे चाह्ले, ते विश्वासी भावां ने ओची सहायता करली ते उठले चैला ने ओचा स्वागत करने चे वास्ते चिठ्ठी लिखती कर भेज़ती ङिली कि ओचे लारे आच्छी तरावें मिलो। जब ओ ओठे पुज़ला तब ओणे लौका ची घणी सहायता करली जेह्णे नरीकारा चे अनुग्रह लारे विश्वास करला हुता। 28कांकि अपुल्लोस ने आपणी शक्ति ते होशियारी लारे यहूदिया ची ब़ोलती बन्द करती ङिली पवित्रशास्त्र महु प्रमाण ङिती-ङिती कर कि ईशु ही मसीह छै।
Nke Ahọpụtara Ugbu A:
प्रेरितां चे काम 18: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0