2 Korent 11
11
Pool n'aliikoolo ni kiŋki kajuus kaane boko epotor
1Áyine, ímaŋamaŋi árimuñalam íihaminuun diŋgilis naane esoŋ! Hee, árimuñalam! 2Ítumbatumba ífiir t'aruun káfiiru kéenuutina t'Atambatun. Ábuki isibaruunsibar bija t'ániine afeeneŋ eeemo u *Kiris, abe n'ímaŋi kaanuku huyoosan hu ifi hireeŋ, n'iŋ'isaanuuno naane ásuŋgute éemeyiit ániine, abe n'akuur but. 3Bare íkolakoleyi an atum'abin abuutuun éehinuun ariiwas kájeŋgin Kiris kájeŋgin keejoŋoore abe nu kukuur, naane yooŋ doon du dibine i dubuut Eef ni haajuus hu#11.3 A̱juk Kájabina ku 3.1-6,13.. 4Ábuki aŋ'árimuñal kiŋki kabin t'aruun keewaareuun ake Yesu eewayee ni i iriwaareuun u. Abe ake af'aane eewunuun bike búwejet beewayee nu Búwejet Beenabe b'aribaje bu, man yooŋ n'awaareuun hike hirim heewayee ni Hirim Heetoofe h'arijame hu t'uni, aŋ'árimuñalo.
5Bare eenaan siñaab soonuun sans'ariene boko kaamo «*epotor kómbokun», bokondu kahaŋutam tu doon fe! 6Arko múniyo iwatatawatato ti báhamin, iwatateit bare ti kámeyi kite buroon bite Atambatun, abe íriwufooruunwufoor bo akuur but tu doon areyi fe.
7H'iwaareuun hu Hirim Heetoofe hite h'Atambatun, íhinahin bo t'íkandijenutuun mayet érirem. Ítetianooratetianooro, aruun áriiyemi bakan kómbokun. Diyu fíya kaahoofoor? 8Íñje tu burok bu bija t'aruun, bakaake *kéeyilene ifi kajaamam sírirem, áruuniit. Abe sírirem sondu síkinineŋe fu n'íyiniuun kawaare#11.8 A̱juk yooŋ 2 Korent 8.1-4.. 9H'íyemie hu t'aruun, ibinabina ijahale, bare ibinut ílaaman mayet afeeneŋ t'aruun. Bakati úne kéenuutina ku Maseduwan kaje fu kabinam nu doon d'isawulee du#11.9 A̱juk yooŋ Fílip 4.15-18.. Íhinut an t'aruun éelaam t'íñje tu doon fe, abe it'iwas hikee an t'aruun éehin bo. 10Iisokuun bonde yooŋ tu múniyo mite mu Kiris meeemo mu t'íñje: bimb'isaŋgoor iye ne bo, an fe tu búsuk bite Akayi at'ákinineŋ n'iwas bo. 11Iŋi naŋ fíya? Butum fíya íñje ímaŋiituun? Atambatun ámoomi bare kaanuku ímaŋiuunmaŋi!
12Ibaa káhinu naane ii íhin hahiye. Iyu, kiŋki kaŋes kasaŋgoor ti kaanu ku karare n'uni tu burok bu iti kabaj bi kaware bukuuso te bo. 13Bokondu épotoriit bakate nu múniyo. Iŋi kajuus ésuk i tu burok booniin, abe n'iŋi kásik búnokoorum bite epotor bakate Kiris keebuut ésuk i#11.13 A̱juk yooŋ Májiye 7.15.. 14Abe bondu bijahalut an, ábuki Setani humuumo aŋ'ásik búnokoorum bite amalaka ite meejaaŋe. 15Náami buwarut yooŋ kajahal an kane eroka yite Setani kásik búnokoorum bite eroka yite meejake mu. Bare kámuje kooniin, boko kágalinee doon deejakut fe di karoke.
Sílaam su Pool ajuke su
16Iisooñ isok bo: an atum'ajokam naane esoŋ. Man yooŋ arko arijokamjok esoŋ, kame árimuñalam íñje yooŋ iimak dikee. 17B'ija bee kasoku, íñje káhamin káanukiiit naane Anahaan u ámaŋie i, bare iimak naane esoŋ. 18Makamu keehooje iŋi kamak naane bakate ku t'etaam ye, íñje yooŋ íihin naane boko. 19Ábuki aruun keejokooree ku naane kúwesina, uŋu hutoofuun aa kane árimuñal busoŋ bu! 20Aŋ'árimuñ kane káhinuun naane búsukateen, ni kane kameruun, ni kane kabuutuun, ni kane kaheebuun, ni kane karofaŋatuun. 21Uni bare iribajut sembe, írihinutuun iyu. Kame arija ariboŋket uni!
Hahiyu íihamin naane esoŋ. An af'akañen kamaku ti bike, íñje yooŋ íyinooni káhinu bo. 22Eeman kaane boko Esuwif? Íñje yooŋ Asuwif. Eeman boko bakate *Israyel? Íñje yooŋ an ite Israyel. Eeman boko bakañi *Aburaham? Íñje yooŋ añi Aburaham#11.22 A̱juk yooŋ Fílip 3.5.. 23Boko eroka bakate *Kiris? Íihamin fu naane an éetumbe awen: ihaŋiinhaŋ káyemi aroka ite Kiris. Af'arko karokarok, ihaŋiinhaŋ; ihaŋiinhaŋ kámeyi ekulu; bímiñ bu t'íñje ti bihaŋe; ihaŋiinhaŋ yooŋ káheelin t'eket i. 24Keemo hutok, Esuwif i kasubenamsuben ásuf ti kafinu bija butuman nu sumoŋu nu hutok ni kibaakiir#11.24 *Eluwa yite Moyis eenaan an awarut kasubenee ayak abin áami kúsubenin ku kifaasaa bakan bákasuba. Náami Esuwif i iŋi kákasinan hifeeneŋ tu kúsubenin ku kaanuku itim kabin katin t'Eluwa i. A̱juk Buluwa bu 25.3.; 25keemo kíhaaji, bakate ku *Rom ni kámiñam nu kunuk; abe hike, enatoora íima ni kawiŋgam bujuju kaanuku keeyoolam#11.25 A̱juk Epotor i 16.22; 14.19.. Íyuusaa ti han keemo kíhaaji, abe haahu n'íyemi tu móhujo mu bújom tujon, tiyak yooŋ tifiit. 26Keehooje-hooj kane íyemi ti kátuki, iŋ'ijuk kúnuur tánotan: tu wuyelu wu kane kaasiiŋ ku kibin, ni t'énukenoora i. Iŋ'ijuk kúnuur ti bakanam Esuwif i, ni ti keenooto ku yooŋ Esuwif#11.26 A̱juk Epotor i 9.23; 14.5.. Iŋ'ijuk kúnuur tu búsuk bu, ni t'eramba i, ni ti han hu. Iŋ'ijuk kúnuur ti keenooto ku bakati úne nu múniyo. 27Irokarok burok beeniŋe, abe ífandaariit kaŋotu. Iŋ'ijoñjolat, búhujo bu yooŋ nu bujokam, abe aŋarko íbajaariit íihin ti haram. Kajokokana ku nere t'íñje, abe íbajaariit yooŋ wañ weeniŋe. 28Bike yooŋ bondu toko b'isokut: bo beemo fu hunak heenee hunak, naane ii iyinoor *kéeyilene ku kareyi fe, búmoomi t'íñje naane an eesejee aniŋee. 29Ake afut'áyilen ti Kiris ayanee, ehelam fe eŋ'ehabano; ake n'afin aney ti kaahoofoor, iŋ'ítaañian dómbokun.
30Makamu iwarawar kamaku, íñje kamaku tu buroon béewufoore bu kabajaate kúuma kite sembe su. 31Atambatun, Faaf ite Anahaan u Yesu ámoomi kaanuku ijuusut. Úsokorooro ko kireyi fe! 32H'íyemie hu Damas, águwernoor ite u bo kóyin áyi u Aretas asiiŋanasiiŋan esulaan tu wuruŋ wute hikinu hu kaanuku man ni kajokam. 33Bare bakanam ni kájaaŋannam ti kaajeŋgen ti hiñaan heeŋoloole hu hikinu hu, kéewanannam ti katekel keekobee ñúruuk. Iyu i ifako fii#11.33 Siferse su 32-33, a̱juk Epotor i 9.23-25..
Nke Ahọpụtara Ugbu A:
2 Korent 11: cwt
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 1999, Wycliffe Bible Translators, Inc. All rights reserved.