1 Korent 16
16
Sírirem su sunsu sukuukanee bija ti kéeyilene ku
1Útif hahiyu ti bite sírirem su sunsu sukuukanee bija ti bakan kite Atambatun bakate ku Serusalem#16.1 A̱juk Rom 15.25-26.. Isokasok bakate ku Galasi *kéeyilene ku buŋ bi kaware fu káhinu. Aruun yooŋ, iyu a ariware fu káhinu. 2Erimaas-rimaas fe, huruw fe t'aruun aliik tu doon d'abaje du, n'aŋ'anuutan sírirem anaŋ t'enuuf te o. Iyu, if'ija ibin, man aŋk'arisawulo bija bateg. 3Abe if'íreeŋin, n'iŋ'iboñ Serusalem bakan k'ariyak ku kajifan keeja ni sírirem s'aritege su, ni bileetar yooŋ b'ija bu kaboñiiin. 4Arko bijarajar íñje yooŋ n'ija, kame n'iŋ'iriboor.
Pool n'aane o kátuki
5Íñje bibin t'aruun kane ikan Maseduwan (ábuki íñje kaŋaasu tu búsuk bite bo#16.5 A̱juk Epotor i 19.21.). 6Mánoman íñje bifiyo t'aruun dikee, maske yooŋ haajam hu hireyi. N'aŋ'áriyiniam káyokunan iiyuun t'iware du bija. 7Honde, ímaŋiituun kajuku iye kep abe n'iyuun. Aaa, ímaŋamaŋi biriiko t'aruun afiyo dikee t'Anahaan u aane hee.
8Bare íñje biriiko beebe Efees bija *t'efeet ite Pantakot, 9ábuki ibaja bítim beejake-jak bite káhinu burok bómbokun bija t'Atambatun#16.9 Siferse su 8-9, a̱juk Epotor i 19.8-10.. Enatoora i bare kahoojahooj beebe.
10Timote af'áreeŋin#16.10 A̱juk 1 Korent 4.17., árihin wáhowah ariijoko áwariee man hikawo nu hutoof, ábuki aŋ'áhin yooŋ burok bite Anahaan u naane íñje. 11An atum'áwiiniano. Áriyokunano kep man n'áyini bíbatikeina ti káasuumaay, ábuki íñj'endio ti kanahan ni *kéeyilene ku.
12Útif hahiyu t'ati úne Apolos#16.12 A̱juk Epotor i 18.24.. Ilawolaw abe n'isooñoor kaanuku man n'abin t'aruun akina ni kéeyilene ku, bare átumbut ámaŋi bibin hahiye. O bibin kane bítimo biŋaas.
Karimu ku, ni kasaafu kiraanu ku
13Áriniyo, abe n'arisiiŋo ayan faŋ ti káyilen ku. Atum'aŋ'árikoleyi, bare aribaj sembe. 14Árihin doon fe ni kámaŋi.
15Kújakuwe, árimoomi kaanuku Sitefanas nu butoŋo#16.15 A̱juk 1 Korent 1.16. kaamo fu Ekarjen étiyar i t'ésuk ite Akayi, abe káhabaneinohabanein tu burok bu bija ti bakan k'Atambatun akino ku. Náami iilawuun bonde: 16árijeŋgin bakan naane bokondu, ni kiŋki karok nu boko káhabanein.
17Hikawam hutoofatoof dómbokun naane Sitefanas, nu Forutunatus, n'Akayikus#16.17 Mánoman bákahaaji kondu kaje fu tu Pool n'eleetar yi bakate ku Korent kakiñjo i. kabinam i kajuku. Anokooreenokoor kite aruun kumuumuun ariemo fee diye. 18Káhinahin ehelam yeerooŋo naane káhine i yooŋ soonuun su seerooŋo. Bakan naane bokondu, arijokiin nu sumoŋu súsuba.
19Bakate ku Asi *kéeyilene ku kasaafuun. Akilas ni Pirisil#16.19 A̱juk Epotor i 18.2., ni kéeyilene ku fe kiŋki kakuukanooro tu boko kasaafuun dómbokun tu huruwu hite Anahaan u. 20Kéeyilene ku keeemo ku beebe fe kasaafuun.
Arisaafoor ti káfoonoor kite baatiaay.
21Íñje Pool isaafuun. N'emoŋiam n'inoŋke fu iikiñj kasaafu konde#16.21 Kóŋkeyin, an af'asaan ake eekiñjo eleetar, af'ahaban, n'aŋ'ásik hikiñju hu eekiñj kike kirim, éewufoor kaanuku múniyo te o t'énuutina fu..
22An afut'ámaŋi Anahaan u, Atambatun aja áwuumoo!
A̱bin, awe Anahaan ite uni#16.22 A̱bin, awe Anahaan ite uni: kirim konde, Pool asokasok ko ti *kiarameyeŋ. Aanaan: «Marana ta». A̱juk yooŋ Kafeeñal ku 22.20.!
23Anahaan u Yesu aja ásoniyanuun.
24Ímaŋiuunmaŋi arireyi fe ti naane úhine i t'afeeneŋ ni Yesu *Kiris.
Nke Ahọpụtara Ugbu A:
1 Korent 16: cwt
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 1999, Wycliffe Bible Translators, Inc. All rights reserved.