Mateo 22
22
O jape e biaveko
Lk 14.15-24
1O Jesus pale dia lenge orba paramichenchar ta phenela: 2E charoina e milosoki si sargo iek charo kai cherda iek baro biau pe chaurreke. 3Ta bichalda pe eslugen te ikharen e llenen po biau, a von ni kamle te aven. 4Pale bichalda avere eslugen ta phenda lenge: Phenen e llenenge kai si ikharde po biau kai e sinia si thodi. Bichaldem ta mundarde me guruven ta i me zivirinien ta sa cherdo si, aven po biau. 5A von ni thode leke sama. Iek lendar llelotar te radil e phuv, aver llelotar te radil ande aver buchi, 6ta aver, lie e eslugen marde len ta mundarde len. 7Kana o charo asunda gala ezgode, jolailo, ta bichalda pe boñikonen, ta mundarda gole bilache llenen ta phabarda lengo foro. 8Ondaka phenda pe eslugenge:
E sinia si thodi, a e gostura ni sea lache. 9Llan pe droma ta ikharen po biau saurren. 10Ondaka e esluge llele pe droma ta chidie sa golen kai malade, lachen ta i bilachen, ta o biau pherdilo gostura.
11Kana o charo dia te dikhel e llenen kai avile, dikhla iekhe manuse kai ni saia furiado e biaveke, 12ta phenda leke:
Amala ¿Sar dian kate bi te ave furiado e biaveke? A gua lleno ni phenda niso. 13Ondaka o charo phenda e eslugenge:#Mt 8.12; 25.30; Lk 13.28.
Phanden leke porrne ta i leke va ta chuden le avri ando truniariko, kote kai ka avel o roipe ta e bari dar. 14Soke but llene si ikharde, a cherricha esvirime.
E love kai chiden e kralioke
Mk 12.13-17; Lk 20.20-26
15Ondaka lleletar e fariseura ta puchena sar ka cheren te istaren e Jesuse pe varesavo alav te dosaren le. 16Ta bichalde leke pire disipulonen ta lenchar llele i e erodianura te phenen leke: Kovachi, llana kai san chacho ta kai sikave chachimaia o drom e Devleko, ta ni dara katar e llene kai asunen, ta ni phene lenge alava te perel lenge drago. 17Phen amenge akana, so misli: ¿Phen amenge si orta te pochina e love kai mangel o Sesar o iok?
18A o Jesus, sar pinllerela lengo kojaipe, phenda lenge:
¿Soke zumaven man? 19Sikaven mange o tolari kai morabi te den kai o Sesar. Von sikade leke iek denario. 20Ondaka vou puchla len:
¿Kako mui ta kako anav si pisime po tolari?
21Von phende:
E Sesareko.
A o Jesus phenda lenge:
Den e Sesare so si e Sesareko, a den e Devle so si e Devleko.
22Kana asunde gaia orba chudisaile, ta lleletar.
Puchen sar ka usten e mule
Mk 12.18-27; Lk 20.27-40
23Isto gua llive, nesave saduseura llele te dikhen e Jesuse. E saduseura phenen kai ni ka usten e mule, goleke puchle le.#Ech 23.8.
24Kovachi, o Moises phenda:#Dt 25.5.
Vareko te na avela le chaurre ta te merela, leko phlal morabi te zinilpe leke rromiaia te sai del chaurre pe phlale kai mulo. 25Kate maskar amende sea efta phlal:
O purvo zinisailo ta ni avila le minone ta mulo. Sar ni saia le minone lia la leko phlal. 26A i gua phlal mulo, mapalal o trito phlal, ta gia llik kai efta phlal. 27Pala sa gala ezgode muli i e rromi. 28Kana ka usten katar o meripe ¿Kaki rromi ka avel katar e efta phlal?
29O Jesus phenda lenge:
Tumen ni llanen, soke ni pinllarden o Pisipe ta ni e Devleki zor. 30Soke kana e mule ka usten, e murusa ta e diskinie ni ka zininpe, soke ka aven sargo e suechura kai si ando miloso. 31A katar e orba kai e mule ka usten, ¿tumen ni chitisarden kai isto o Del phenda: 32Me sem o Del katar o Abraam, katar o Isaak ta i katar o Jakob? ¡Ta vou inai Del e mulengo, vou si Del e llundengo!#Ek 3.6.
33Kana e llene asunde gaia orba, chudisaile pala so sikavela o Jesus.
O zakono mai baro
Mk 12.28-34
34E fariseura chidinaile kana asunde kai o Jesus cherdaia te achen e saduseura, 35ta iek kai saia kovachi katar o zakono puchla le te sai zumavel le:
36Kovachi ¿Savo si o alav mai baro ando zakono?
37O Jesus phenda leke:#Dt 6.5.
Volisar che Devle sa che liea, sa che zivotoia ta sa che misloia. 38Gava si o mai baro alav ta o purvo ando zakono. 39Ta o duito si sargo o purvo, phenel gia: Volisar avere sar voli tu tut.#Lv 19.18. 40Ande gala dui orbe si sa o zakono ta i e poraukura.#Lk 10.25-28.
Kako chavo si o Mesias
Mk 12.35-37; Lk 20.41-44
41Kana e fariseura sea chidine, 42o Jesus puchla len:
¿A so mislin tumen katar o Mesias? ¿Katar savi vicha avel?
Von phende leke:
Katar e vicha e Davideki.
43Ondaka o Jesus phenda lenge:
¿A sar o David ando Duo ikharda le Gazda? Soke o David phenda:
44O Gazda phenda me Gazdake:#Sal 110.1.
Bes pe mi rig e chachi,
llik kana me ka thovav che dusmanonen
telal tala che porrne.
45¿A sar sai avel o Mesias katar e vicha e Davideki kana isto o David ikharel le Gazda?
46Niko nasti dela le anglal, ta katar gua llive angle niko ni tromala te puchel le niso.
Nke Ahọpụtara Ugbu A:
Mateo 22: BACHRO
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Biblia ande chib Romani © Sociedad Bíblica Chilena, 2018.