Mateo 21
21
O Jesus ando Jerusalem
Mk 11.1-11; Lk 19.28-40; Jn 12.12-19
1Kana avile pasa o Jerusalem llele ande Betfage kai o burdo e Maslinkengo, o Jesus bichalda duie disipulonen, 2ta phenda lenge:
Llan ando forichi kai si angla tumende ta oma ka malaven iek magarcha phangli ta iek magarchichi laia. Mukliaren la ta anen len mande, 3a vareko te phenela tumenge vareso, phenen leke kai e gazda trubun le ta oma vou ka iril len. 4Sa gala ezgode nakhle te sai cherdol so phendaia o profeta:
5Phenen e chaurrenge katar o Sion:#Zak 9.9.
Dikhen tumaro Charo,
ni avel tumende barimaia
avel besindo pe iek magarcho,
pe iek magarchichi.
6Ondaka e disipulura llele ta cherde sar phendaia lenge o Jesus te cheren. 7Ande e magarcha ta lake minone ta thode upral pe lende pe gertacha ta o Jesus beslo upral. 8But llene sea kote ta inzarena pe gertacha po drom, a aver chinena krangura katar e kasta ta inzarena len po drom. 9Ta o sueto kai llala anglal katar o Jesus ta i o sueto kai llala palal urkina ta phenena:#Sal 118.25-26.
¡Osana Chavo e Davideko! ¡Blagosime gua kai avel ando anav e Devleko! ¡Osana upre ando miloso!
10Kana o Jesus dia ando Jerusalem sa o foro jolailo ta phenena:
¿Ko si gava?
11A o sueto phenela:
Gava si o Jesus, o profeta katar o Nazaret katar e Galilea.
O Jesus chistol e Devleko cher
Mk 11.15-19; Lk 19.45-48; Jn 2.13-22
12O Jesus dia andre ando cher e Devleko ta tradia avri sa golen kai chinena ta bichinena ta dia tele moia e stalia golenge kai pharruvena e love e suetoke, ta i e estoliche golenge kai bichinena e gulubura, 13ta phenda lenge:#Is 56.7; Jer 7.11.
Ando Pisipe phenel gia: Mo cher ka ikhardol cher molimako, a tumen cherden letar iek than kai gurudon e chorane.
14Avile pasa o Jesus ando cher e Devleko korre ta i bange ta vou sastarda len. 15A e mai preche popura ta i e kovacha e zakonoke jolaile kana dikhle e bare ezgode kai cherela ta sar blagosina le e ternorre ando cher e Devleko ta sar phenena: ¡Osana e Chaveke katar o David!. 16Ta phende e Jesuseke:#Sal 8.2.
¿Asune so phenen gala?
O Jesus phenda lenge:
Ea ¿a tumen nikada ni chitisarden?:
Katar o mui e ternorrengo
ta katar o mui e minonengo kai pien chuchi,
tu thodan o blagosipe.
17Ta kana o Jesus mukla len, llelo avri katar o foro ande Betania, ta kote nakhla e riat.
O Jesus del armaia
Mk 11.12-14,20-26
18Thiarinako kana irisailo ando foro, bokhailo. 19Ta kana dikhla iek kas simochinengo pasa o drom, avilo pasa le ta dikhla kai ni saia niso po kas samo patrina, ondaka phenda e kasteke:
¡Te na barion nikada pe tute septelie! 20Kana e disipulura dikhle gaia ezgoda, chudisaile ta phenena:
¿Sar sukilo o kas isto kote?
21Ondaka o Jesus phenda lenge:#Mt 17.20; 1 Kor 13.2.
Chachimaia phenav tumenge kai te avela tumen pachape ta te na avela tumen o mislo kai nasti cherdol, ni ka cheren samo gava katar o kas simochinengo, soke ka phenen gale burdoke:
Le tut ta chude tut ande mora ta gia ka avelpe. 22Ta sa so mangena ando molipe pachamaia, ka len le.
O Jesus ta leki zor
Mk 11.27-33; Lk 20.1-8
23Mapalal katar gala ezgode o Jesus dia ando cher e Devleko. Ta kana vou sikavela e llenen, e mai preche popura ta e phure katar o foro avile pasa le ta puchle le:
¿Save gazdarimaia chere gala ezgode? ¿Ta ko dia tut gava gazdaripe?
24O Jesus phenda lenge:
I me ka puchau tumen iek ezgoda:
A te phenena so si, i me ka phenav tumenge ko dia man o gazdaripe te cherav gala ezgode. 25¿Ko bichalda e Juane te kristil, o Del, o e manusa?
Von thode te janpe maskar pete, ta phenena: Te phendam, katar o del, ka phenel amenge: ¿A soke ni pachaien le? 26A nasti phena kai bichalde le e manusa, soke si amenge dar katar o foro, soke sa pachan kai o Juan saia iek profeta. 27Goleke von phende e Jesuseke:
Ni llana.
Ondaka vou phenda lenge:
Ni me ni ka phenav tumenge save gazdarimaia cherav gala ezgode.
E paramichi katar e dui phlal
28O Jesus puchla len:
¿So mislin tumen katar gaia paramichi? iek manus saia le dui chaurre ta avilo pasa iek ta phenda leke: Chaurrea lla allive te radi ande mo vostano drakhako. 29Vou phenda:
¡Ni kamam! A mai angle keime llelo. 30Ta kana avilo o dad kai o gua chaurro phenda leke isto gola alava, a o chaurro phenda leke:
Ea, gazda, ka llau. A ni llelo. 31¿Savo chaurro katar e dui cherda e volia pe dadeki? Von phende:
O purvo.
O Jesus phenda lenge:
Chachimaia phenav tumenge kai e publikanura ta i e kurvichke llan mai anglal tumendar ande charoina e Devleki. 32Soke avilo tumende o Juan po drom chachimako ta ni pachaien le, a e publikanura ta e kurvichke pachaie le. A tumen i kana dikhlen sa gala ezgode ni keisailen te sai pachan le.#Lk 3.12; 7.29-30.
E paramichi katar e bilache esluge
Mk 12.1-12; Lk 20.9-19
33Asunen aver paramichi: saia iek manus kai saia dad katar iek familia kai thoda te barion drakha ande iek vostano, ta phangla o vostano truial ta lacharda iek than te cherel mol ta vazdia iek cher ta mukla gua vostano drakhako kai iek manus te cheren buchi ta llelotar dur.#Is 5.1-2. 34Kana avilo o vreme katar e septelie bichalda pe eslugen te sai lel so perelale katar gola drakha. 35A e llene kai radina ande gua vostano drakhako lie gole eslugen, iekhe marde, avere mundarde ta avere chalade le e barrenchar. 36Bichalda pale avere eslugen, mai but neko ogola, ta cherde isto gia sar cherde ogolenchar.
37Pala sa gala ezgode bichalda pe chaurre, ta phenda:
Chachimaia ka den liubao me chaurre. 38A e llene kai radina ando vostano drakhako kana dikhle leke chaurre, phende maskar pete: Gava si o lleno kai ka achel leke sa e love leke dadeke, aide, mundara le ta la sa leke love. 39Ta istarde le, chudie le avri katar o vostano drakhako ta mundarde le.
40Kana ka avel o gazda katar gua vostano drakhako, ¿So ka cherel gole eslugenge?
41Von phende leke:
E bilachen ka zatril bi zalbako, ta po vostano drakhako ka del le kai aver llene kai radin te sai den le ando vreme so perel le.
42Ondaka o Jesus puchla len:#Sal 118.22-23.
¿Nikada ni chitisarden so phenel o Pisipe?
O barr kai ni thode leke sama e llene kai vazden chera
cherdilo o barr mai preche.
Gava cherda o Del, ta amen chudi amen.
43Goleke me phenav tumenge kai e charoina e Devleki ka avel ikandi tumendar ta ka avel dini e llenenge kai ka den septelie. 44Ko perela pe gava barr ka achel sa pe kotora, ta o barr te perela pe vareka, ka cherel le prajo.
45Kana asunde leki paramichi e mai preche popura ta e fariseura acharde kai dela orba lendar. 46A kana mangle te phanden le, daraile katar o foro soke o sueto pachala kai o Jesus saia profeta.
Nke Ahọpụtara Ugbu A:
Mateo 21: BACHRO
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Biblia ande chib Romani © Sociedad Bíblica Chilena, 2018.