मती 16
16
ईसू एचेरे मीटोंग चिनहाकू असेतेरा
(मरकूस 8:11-13; लूका 12:54-56)
1मी दिन फरीसी होड़कू अरू सदूकी होड़कू ईसू अंदजाव लगा हाँय एचेरे सेनेडखनकू कतातेड, “ने गुरुजी, आम सेरमो देसराः मीटोंग चिनहाम उदुःवाले।”
2दो ईसू हँकू एचेरेय कता कुदातेरा, “तिसिंग सिंगाड़ बदरी लाल इदान दो नपाय दोहोनता, माःआनपे कतायता। 3मनदो निंदावा बदरी लाल अरू धुः-धुमइल दोहोन दो अपे कतायता, तिसिंगाः दिन ओरो ढोपो इदा, माःआन। नाःआ इया अपे दिन बदीरे रितापे सुदीबाःगोडता। मनदो नाःआ जूगरे भगवान चिलाय एचेयतना हनाराः चिनहा अपे ओरोपे कता उदुः अवेतेरा। 4नाःआ जूगरिकुःआ बेलूर अरू सनहा-सनही होड़कू सेरमो अते चिनहाकूनकू ञामता। मनदो हँकू एवनाराः चिनहा#मती 12:39-40 अते अरू एटाः तोनोंगाः चिनहा ओरोकू पवावनेना।” हनते ईसू हँकू अड़ाःवाडखन एटाः अगीय सलावयान।
ईसू चेलाकूय सेतावतना
(मरकूस 8:14-21)
5ईसूरिकुःआ चेलाकू हुडिंग समुंदर अते मार परोमकू सोदोरनेन दो हँकू रुटी गोगोः लगाकू लिडिंगयान। 6दो ईसू हँकू एचेरेय कतातेड, “फरीसी होड़कू अरू सदूकी होड़कूराः सेबेल सोड़ा अते अपे सवासितीपे दोहोन।”
7हनते चेलाकूतेन अँननकू अँकू कता होड़ेंगा, “अबू रुटी मेरबू अगूगरा। हनालगा नाँय नाःआ इयाय कतावाबूतना।”
8दो ईसू नाःआ सुदीतेडखन चेलाकूतेने कतावाड, “ने गुनमिन बिसवास होड़कू, अपे अँननपे चिला लगापे ओंगलेतना, अबू एचेरे रुटी कोवानेःआ, माःआन। 9अपे नुँहूमिन हों मेरपे बुझावगान जा? अपे मेरपे उहियारगेतना जा, ईंग पाँचगोटोंग रुटीते पाँच हजार होड़कू जोम लगायिंग एमेवातेडकुःआ दो तुमिन दउड़ा रुटी बनसावतो दोहोनेना? 10अरू चइर हजार होड़कू जोम लगायिंग एमेवातेडकुःआ अरू हंडाःआ बनसावतो रुटी सातगोटोंग दउड़ारे मेरपे रेम जुमावगाड जा? 11अपे चिला लगा मेरपे बुझाःतना, ईंग अपे एचेरे रुटी बदीरे मेरिंग कतागरा। मनदो अपे फरीसी होड़कू अरू सदूकी होड़कूराः सेबेल सोड़ा अते सवासितीपे दोहोन लगायिंग कताया।” 12हनते हँकू बुझावयानकू, रुटीरेकू उपयोतगेता हना सेबेल सोड़ा बदीरे कोवान मनदो फरीसी होड़कू अरू सदूकी होड़कूराः चेड अते सवासितीबू दोहोन लगा ईसू कताया, माःआन।
ईसू, मसी हवे माःआन पतरस मनेवातिरिया
(मरकूस 8:27-30; लूका 9:18-21)
13ईसू कइसरिया पिलिपी छतररेय सोदोरनेन दो हाँय अनँयग चेलाकूतेन एचेरेय होंबोरतेरा, “होड़कू मनुवारीग बेटात इये हवे माःआनकू कतायता?”
14दो हँकू कतातेड, “अदोम होड़कू कतायता, आम बतिसमा एमेयीग होड़ एहुना हवे, माःआन। अरू अदोमकू कतायता, आम भगवानराः बड़रा कतायीग होड़ इलियाह हवे, माःआन। अरू अदोमकू कतायता, आम इरमिया सहे भगवानराः बड़रा कता होड़कू अते तोनोंगीग मी होड़ होड़ हवे, माःआन।”
15दो ईसू हँकूय होंबोरतेड, “अपे ओंगोलरे ईंग इये हवे?”
16दो सिमोन पतरस कता कुदातेरा, “आम मसी हवे, जीयत इदानिया हाँयग भगवानरीग बेटात हवे।”
17हनते ईसू कता कुदातेरा, “ने एवनारीग बेटात सिमोन, भगवान आम जीवे नपायकेरा। तोनोंगीग मनुवा अगीते कोवान, मनदो सेरमो देसरे इदानिया ईंगरीग अपांग भगवान, नाःआ कता अनँयग आमे कता उदुःवाडमेःआ। 18आम ईंगमे अयूम! आम परतस#16:18 उनानी भासीरे पतरसराः मतलोब चटइन हवे। हवे, अरू नाःआ दिरिरे ईंग ईंगराः कलसियायिंग तुलाता अरू नरगराः तोनोंग इयाःआ जंगर हना अते ओरो जीताव अवेनेना। 19ईंग आम लगा भगवानराः राइजराः चाभीकूनिंग एमेवामता अरू जे हों सकालाः नाःआ चउंदीसरेम तोल, हान सेरमो देसरे हों तोलतो दोहोनता। अरू जे हों सकालाः आम चउंदीसरेम गीगगे, हान सेरमो देसरे हों गीगतो दोहोनता।” 20हनते ईसू सेतावतेडकूखन चेलाकूतेन एचेरेय कतातेड, “अपे तोनोंगीग एचेरे ईंग बदीरे, माँय मसी हवे, माःआन अलोपे कताय।”
ईसू अनँयग गुजुः बदीरेय कताया
(मरकूस 8:31-33; लूका 9:22-27)
21हना वरीते ईसू अनँयग चेलाकूतेने कता उदुःआ, “ईंग एरुसलेम सहररे सेन लगा इदा अरू एहूदाकूरिकुःआ मूक होड़कू, मरंग पुजउरीकू अरू नियम चेडदार होड़कू मुरुककू संतावगींगता अरूकू ञेड एंडागोडिंगता। मनदो ईंग पेय दिनरेयिंग जियाव रिमुःता।”
22दो पतरस ईसू एटाः अगीय गोःयाडीग अरू डंटाव घड़ीने कताया, “ने परबू, नाःआ इया कोवान। आम सुदा नाःआ इया कहियो ओरो होयानेना।”
23दो ईसू ञेल उलटावतेडखन पतरसे कतावाड, “ने कलउ, ईंग मड़ंग अते तोरेनमे। आम ईंगराः दूरमे रेड लगा ओंगलेता। आम भगवानराः कता इया कोवान, मनदो होड़कूराः कता इयाम ओंगोलतना।”
ईसूराः तयोम ओतोंगराः मतलोब
(मरकूस 8:34–9:1; लूका 9:23-27)
24ईसू चेलाकूतेन एचेरेय कतातेड, “तोनोंगीग ईंग तयोम अगी वेग लगाय ओंगले दो, हाँय अनँयगराः जीव अड़ाःवाडखन अनँयग कुरूस रेमकेडखन ईंग देह दूरे ओतोंग वेग। 25मनदो तोनोंगीग अनँयग जीव बनसाव लगाय ओंगले दो, हाँय आँयगराः जीवे ञेल केड़े एंडागोडता अरू तोनोंगीग ईंग लगा अनँयग जीवे अड़ाःगोडता दो, हाँयराः जीव बनसाव जुवाःता। 26तोनोंगीग होड़ चउंदीसराः जमा जिनिसकूने पवाव जुवाः अरू अनँयग जीवे लायगोडता दो, हाँयके हनारे चिला नफा होयाःता? मी होड़ अनँयग जीव बदलारे चिलाय एमे अवेयता? 27मनुवारीग बेटात, सेरमो देसरिकुःआ बराहीलकू सुदा अपांग भगवानराः विड़चेड़तो मरसलरेय वेगता अरू हना बेला जमा होड़कू लगा अँनकूराः बुता बनीय एमेवाकूता। 28अपे ईंगपे अयूम! नंडा चड़ाँत इदानकुःआ नँकुःआ होड़कू अते अदोम होड़कू, मनुवारीग बेटातराः राइज बुँहड़ीत अरीनकू ञेल वरी ओरोकू गोएगनेना।”
Nke Ahọpụtara Ugbu A:
मती 16: kfp
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© (Active) Wycliffe Bible Translators, Inc. All rights reserved.