मती 12
12
ईसू लोड़ोनराः दिनरीग परबू हवे
(मरकूस 2:23-28; लूका 6:1-5)
1दो हनानाः दिनरे ईसू अरू आँयगरिकुःआ चेलाकू दोहोड़ तला दूरतेकू सेना। अरू हना दिन लोड़ोनराः दिन दोहोना। दो चेलाकू रंगेगतेडकुःआ अरू बली सीडतेडखनकू जोम इदीया।#दो. नि. 23:25 2मनदो हना ञेलकेडखन फरीसी होड़कू ईसू एचेरेकू कताया, “ञेलमे, आमरिकुःआ चेलाकू, अबूराः नियम इया लोड़ोनराः दिनरे मेरबू एचेता, हनाकू एचेयतना।”
3दो ईसू फरीसी होड़कू एचेरेय कतातेरा, “अपे भगवानराः कागदरे मेरपे बछावगना जा, दाऊद राजा अरू आँयगरिकुःआ सउंगताकू रंगेगतेड मेला चिलाकू एचेतेरा? 4हाँय भगवानराः मरंग टपइर ओड़ाःरेय बोलोयान अरू पुजउरीकू एकला जोम अवेयता हना सुद रुटीय जोमतेरा, अरू आँयगरिकुःआ सउंगताकू होंय एमेवातेरा।#1 समु 21:1-6; लेवी 24:9 5अरू अपे भगवानराः कागदरे मेरपे बछावगना जा, भगवानराः ओड़ाःरिकुःआ पुजउरीकू लोड़ोनराः दिनकू टड़ावतेरा। मनदो हँकू बेगर गारबारतेकू दोहोना, माःआन? 6अपे ईंगपे अयूम! नंडा भगवानराः ओड़ाः अते मरंग होड़ इदानिया। 7ईंग बलिदान मेरिंग चहाःतना, मनदो होड़कू सोगागोड होड़ेंगकू लगायिंग चहाःतना।#होसे 6:6 नाःआ कता अपे नपायतेपे सुदीय होले बेगर गारबार होड़कू अपे ओरोपे फड़ियावतेडकुःआ।
8हाव, मनुवारीग बेटात लोड़ोनराः दिनरीग परबू हवे।”
तिःई कोकोड़ावतो होड़राः नपायगुः
(मरकूस 3:1-6; लूका 6:6-11)
9हनते ईसू हंडा अते तोराय अरू एहूदाकूराः अरजी ओड़ाःरेय बोलोयान। 10हंडा मी होड़ होड़ दोहोना। हाँयराः तिःई कोकोड़ावतो दोहोना। दो फरीसी होड़कू ईसू बदीगेय लगाकू ञामा अरूकू होंबोरतिरिया, “अबूराः नियम इया तोनोंगीग होड़ लोड़ोनराः दिनरे एटाः होड़े नपाय अवेयता जा?”
11दो ईसू हँकू एचेरेय कतातेड, “ओंगोलगेपे! अपे अते तोनोंगीग होड़ एचेरे मीटोंग भेड़ा इदा अरू हाँयग भेड़ा लोड़ोनराः दिनरे मीटोंग डोडहारेय कसड़ बोलो जुवाःतान दो अपे हाँयग भेड़ा हना डोडहाते अपे मेरपे उडुंगेयता जा? 12दो मी होड़राः जीव मीटोंग भेड़ाराः जीव अते मुनुरुक मइद इदा। हनालगा लोड़ोनराः दिनरे नपाय बुताय बुता दो, नियम इयाय एचेयता।”
13हनते तिःई कोकोड़ावतो होड़ एचेरे ईसू कताया, “आम तिःई लंबावगेमे।” दो हाँयग होड़ अनँयग तिःईय लंबावतेरा अरू हाँयराः एटाः तिःई इया हना तिःई हों नपाययान। 14मनदो फरीसी होड़कू हंडा अते तोराकू अरू ईसू ञेड एंडाय लगाकू ओंगोलतेरा।
15दो ईसू नाःआ कताय सुदीगोतेड अरू हाँय हंडाते एटाः ततेर तोराय। अरू मुरुक बगरा होड़कू हाँय देह दूरकू ओतोंग वेगा अरू हाँय हँकुःआ जमा होड़कू अँकूराः बेमरियातेय नपायतेडकुःआ। 16हनते हाँय हँकूय सेतावतेडखने कताया, “अपे ईंग बदीरे तोनोंगीग एचेरे अहापे कता उदुःगे।” 17भगवानराः बड़रा कता होड़ एसयाह मड़ंगरेय कतातेरा हना पुरावगे लगा नाःआ इया होयाकिया;
18अयुमेपे! नाँय ईंग सुनावकेरा ईंगरीग सेवकिया हवे,
ईंग हाँयिंग दुलारगेयता अरू हाँय सुदा ईंग मुरुक राजू नमा इदानिंगा।
हाँय एचेरे ईंगराः बिरुवा दोहोनता,
अरू हाँय बेगर एहूदाकू एचेरे हों नपाय फड़ियाव बदीरेय कता उदुःगेता।
19हाँय तोनोंयग सुदा ओरोय कड़ीगनेना अरू ओरोय खिररीनेना,
अरू हाँयराः अरो दूररे तोनोंगीग ओरोकू अयूमतेरा।
20जमा होड़कू नपायते मेरेय फड़ियावकू वरी,
हाँय लंजाःतो सरपी ओरोय टोटाःतेरा,
सहे मुटूराः सेंगेल ओरोय इडीगतेरा,
21जेमहा जमा जइत होड़कू हाँय एचेरेकू असरागोड ञवन।#एस 42:1-4
ईसू अरू दरहा
(मरकूस 3:20-30; लूका 11:14-23; 12:10)
22हनते तोनोंग तोनोंग होड़कू मी होड़ होड़ ईसू एचेरेकू अगूतिरिया। हाँयग होड़ कोंदा अरू अंधाय दोहोना। ईसू हाँये नपायतेरा अरू हाँय जमाकूने ञेला अरूय अयुमेःआ। 23दो जमा होड़कू बयावनेनखनकू होंबोरतेड, “होनायाःकून करे, नाँय दो दाऊद राजारीग नइड़-बाँस होड़ हवे जा?”
24मनदो फरीसी होड़कू नाःआ कता अयूमतेडखनकू कतातेड, “भूतकूरीग राजा दरहाते नाँय भूतकूय एचे उडुंगतना।”
25ईसू हँकुःआ होड़कूराः ओंगोल सुदीतेडखने कताया, “मिनी देसरिकुःआ होड़कू अँननकू अँकू रेडेग होड़ेंग दो हना देस लाय जुवाःता। हनन उड़ी मिनी ओड़ाःरिकुःआ होड़कू सहे सहररिकुःआ होड़कू रेडेग होड़ेंग दो हँकू होंकू बेगराव जुवाःता। 26दो कलउ अरू आँयगरिकुःआ सइनाकू अँननकू अँकू रेडेग होड़ेंग होले, हाँयराः राइज करा उड़ी दोहोनता? 27मनदो ईंग कलउराः जंगरते भूतकूयिंग उडुंगतान दो, अपेरिकुःआ चेलाकू इयेराः जंगरते भूतकूकू उडुंगता? हनालगा अपेरिकुःआ चेलाकू अँननपेरिकुःआ फड़ियावदारकू दोहोनता। 28ईंग भगवानराः जंगरते भूतकूयिंग उडुंगतान दो, भगवानराः राइज अपे तलारे बुँहड़ीकिया।”
29ईसू अरूय कताया, “मी होड़ जंगरदार होड़ अरीन तोल रहावगेय अते मड़ंग करा उड़ी एटाः होड़ हाँयग जंगरदार होड़राः ओड़ाःरे बोलोकियानखन हाँयराः जिनिसकूने उडुंग अवेयता? हाँयग होड़ मड़ंगरे हाँयग जंगरदार होड़े तोलता दो, हाँयग होड़राः जिनिसकूने उडुंग गोः अवेयता।
30ईंग सुदा कोवाया, हाँय ईंगरीग मुदइ होड़ हवे। अरू ईंग सुदा मेरेय सकलावगेता, हाँयग होड़ सितिर-बितिरगोडता। 31हनालगा ईंग अपे एचेरेयिंग कतायतना, होड़कू एचेयता हना जमा कसूरकून अरूकू कतायता हना ओपता बड़राकून, भगवान बराव एंडागोडता। 32अरू तोनोंगीग मनुवारीग बेटात बदीरे तोनोंगाः ओपता बड़राय कता हना कसूर हों भगवान बराव एंडागोडता। मनदो भगवानराः सुद बिरुवा बदीरेकू कतायता हना ओपता बड़रा, भगवान नाःआ जूगरे सहे दरवाःआ हना जूगरे हों कहियो ओरोय बराव एंडातेरा।”
नपाय अरू बेलूर जोःओते अउल-तउल
(लूका 6:43-45)
33“अपे सुदीयतना, नपाय जोःओ पवाः लगा होड़कू नपाय गछिकूनकू रोपाता। आडयना हना सींग दूब नपाय जोःओ ओरो जोःनेना। 34ने महुरा बींग उड़ी होड़कू, अपे बेलूर इदानपेःआ दो, करा उड़ी अपे नपाय नपाय बड़रापे कता अवेयता? अबूराः आहते उडुंगगुःता हना बड़राराः सोर अबूराः जीव हवे। 35नपाय होड़ अनँयगराः नपाय जीवते नपाय नपाये कतायता अरूय एचेयता। अरू आड होड़ अनँयगराः आड जीवते बेलूर बेलूर बड़राय कतायता अरूय एचेयता। 36बेगर लूरराः बड़राकू कतागोडता, हँकूके फड़ियावराः दिनरे भगवान एचेरे आभा एएमे पराःता। 37अपेराः बड़रा इया भगवान अपेय फड़ियावपेता सहे अपेय डंडियावपेता।”
ईसू चिनहा उदुःगे लगाकू असेया
(मरकूस 8:11-12; लूका 11:29-32)
38हनते अदोम नियम चेडदार होड़कू अरू फरीसी होड़कू ईसू एचेरेकू कतातेड, “ने गुरुजी, आम अते मीटोंग चिनहा ञेल लगाले चहाःतना।”
39मनदो ईसू कता कुदातेरा, “भगवान मेरकू मनेवायता हँकुःआ होड़कू अरू बेलूर ओंगोलरिकुःआ होड़कू चिनहाकूनकू ञामता। मनदो भगवानराः बड़रा कतायीग होड़ एवनाराः चिनहा अते अरू एटाः तोनोंगाः चिनहा ओरोपे पवावनेना। 40एवना पेय दिन अरू पेय रइत मरंग हँकूराः दोंगे पेंदारेय दोहोना। हनन इया मनुवारीग बेटात पेय दिन अरू पेय रइत ओत पेंदारेय दोहोनता।#एवना 1:17 41निनवे सहररिकुःआ होड़कू एवनाराः परसार अयूमवाडखन कसूर अते जीवकू कुदातेरा।#एवना 3:5 हनालगा निनवे सहररिकुःआ होड़कू फड़ियावराः दिनरे नाःआ जूगरिकुःआ होड़कूराः बदीरे चड़ाँवाडखन हँकूकू जाःता। अरू नुँहू एवना अते हों मरंगीग ईंग नंडा इदानिंगा। 42दखिन देसरीग रानी, सुलइमान राजाराः कनहून अयुमे लगा मुरुक लंकातेय वेगनेना। नुँहू सुलइमान राजा अते मरंगीग ईंग नंडा इदानिंगा। हनालगा दखिन देसरीग रानी फड़ियावराः दिनरे नाःआ जूगरिकुःआ होड़कूराः बदीरे चड़ाँवाडखन हँकूय जाःता।#1 राजा 10:1-13; 2 कहड़ी 9:1-12
43मी होड़ अते मीटोंग भूत उडुंगगुःतान दो, भूत लोड़ोन लगा टयंगाब ततेररेय दँड़ाःगोड ञवनता। मनदो हाँय तोनोंग ततेर मेरेय पवाःता। 44दो हाँय अनँयग आँयगतेय बड़राता, ईंग उडुंगकिया हाँयग होड़ एचेरेयिंग कुदा सेनता। हाँयग भूत कुदा सेनतान दो, हनाँयग होड़ रिंग-रोंग अरू मड़ी-मलेंग ओड़ाः इयाय पवाःता। 45हनते हाँय सेनेवाडखन हाँय अते, अरू बेलूर बेलूर सातगोटोंग भूतकूय अगूता अरू हाँयग होड़ एचेरेकू समसाव जुवाःता। हनते हाँयग होड़राः जीव मड़ंग अते अरू बेलूर जुवाःता। ननानाः इया नाःआ जूगरिकुःआ बेलूर होड़कूराः जीवरे होयाःता।”
ईसूराः सताय मइछुवा
(मरकूस 3:31-35; लूका 8:19-21)
46दो ईसू होड़कू सुदाय बुतुड़ु मेला आँयगरीग एंगात अरू बोपोहकूतेन हाँय सुदा जुमाः लगाकू वेजेडा अरू हँकू हाँय सुदा बुतुड़ु लगाकू चहाःआ। 47दो तोनोंगीग ईसू एचेरेय कतातेड, “आम एंगाम अरू बोपोहकूताम आम सुदा बुतुड़ु लगाकू चहाःतना।”
48दो ईसू हाँयग होड़ एचेरेय कता कुदातेरा, “इये ईंगरीग अया हवे? ईंगरिकुःआ बोपोहकू इये इयेकू हवे?” 49हनते हाँय अनँयग चेलाकू अगी तिःई उदुःतेडखने कताया, “ईंग अया अरू बोपोकूतिंग नँकुःआ होड़कू हवे। 50सेरमो देसरे इदानिया ईंगरीग अपांगराः ओंगोल इयाकू जियाःता हँकुःआ होड़कू ईंग अया अरू बोपोकूतिंग अरू मेमेसकूतिंग हवे।”
Nke Ahọpụtara Ugbu A:
मती 12: kfp
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© (Active) Wycliffe Bible Translators, Inc. All rights reserved.