متى 10
10
سِيذِيثْنغ عِيْسَى يخْضَر ثنْعَاش ن اَرُّسُل
1ئِڒَاغَا-د عِيْسَى خ ثنْعَاش نِّي ن يمحْضَارن نّس يُوْشَا-ٱسن سُّلْطَا إِي زِي غَا سُوْفْغن جْنُوْن اَذ سْݣنْفَان مَارَّا ڒهْڒَاشَاث ذ ڒحْرِيقَاث ن يِوْذَان. 2ذ يِيْنَا ذ يسمَاون ن ثنْعَاش ن اَرُّسُل: أَمزْوَارُو نْسن قَّارن-اَس سِمْعَان مَعْرُوْف س بُطْرُس ذ وُوْمَاس قَّارن-اَس أَنْدْرُوْس، ذ مِّيس ن زَبَادِي قَّارن-اَس يَعْقُوْب ذ وُوْمَاس قَّارن-اَس يُوْحَنَّا، 3ذ فِيلِيپَّـاس، ذ بَرْتُلُمَاي، ذ تُوْمَا، ذ مَتَّى زݣ يعشَّارن، ذ يَعْقُوْب مِّيس ن حَلْفَى، ذ تَدِّي، 4ذ سِمْعَان ؤُمِي قَّارن <لْمُنَاضِل>، ذ يَهُوْذَا إِسْخَرْيُوطِي يعْنِي ونِّي يزّنْزن عِيْسَى.
سِيذِيثْنغ عِيْسَى يسّكّ اَرُّسُل اَذ حدّْثن
5ثنْعَاش-أَ ن يرْيَازن يسّكّ-يثن عِيْسَى يوصَّا-ثن ينَّا-ٱسن: "وَار تْرَاحم شَا غَار ثْمُوْرَا ن ڒݣْنُوْس. وَار تِيذْفم بُو ثِندَّام#10.5 ثِندَّام نِثنْتِي ذ ثِنْدِينِين. ن ثْمُوْرْث ن سَامَرْيَا. 6لَّا، رُوْحث غَار يحُوْڒِيْين نِّي يودَّارن يعْنِي يوْذَان ن أَيث-إِسْرَائِيل. 7خْمِي غَا ثْرَاحم، حدّْثم س ڒْمُلْك وجنَّا اَقَا يُوْذس-د. 8سْݣنْفَام يمهْڒَاش، سْفَاقم-د يِنِّي يمُّوْثن، سِيصْفَام يِنِّي إِݣ يدْجَا جْذَام، سُوْفْغم جْنُوْن. مَانَايَا يمُّوْش-اَوم بَاطڒ، ؤُڒَا ذ كنِّيو ؤُشم-ث بَاطڒ! 9وَار دبَّرم وَالُو: لَّا دّْهب، لَّا نُّقَارْث، لَّا نّحَّاس ذݣ وحزَّام نْوم. 10وَار دبَّرم بُو وقْرَاب خ وبْرِيذ ؤُڒَا ذ ثْنَاين يتْشَامِّيرن، ؤُڒَا ذ ثِسِيڒَا، ؤُڒَا ذ اَعكَّاز. مِينْزِي ونِّي يتْبشَّارن غَارس ڒْحَقّ اَذ يتْخَاڒس اَغْرُوْم نّس. 11خْمِي غَا ثَاذْفم شَان ثنْدِينْت نِغ شَان دْشَار، رْزُوْم خ ونِّي كنِّيو غَا يقبْڒن غَار ثدَّارْث نّس. قِّيمث ذَايس اَڒ غَا ثُوْيُوْرم سّنِّي. 12خْمِي غَا ثَاذْفم غَار شَان ثدَّارْث، سدْجْمم خ اَيثْبَاب نّس. 13مڒَا قبْڒن-كنِّيو اَيثْبَاب نّس، أَتَاف اَكِذْسن ثِيڒِي لْبَرَكَا نْوم. مڒَا وَار كنِّيو قْبِيڒن شَا، أَتَاف وَار كِسن تْغِيمِي شَا لْبَرَكَا نْوم. 14مڒَا وَار كنِّيو قْبِيڒن شَا ذِي شَان ثدَّارْث نِغ ذِي شَان ثنْدِينْت نِغ مڒَا وَار خْسن اَغَارْوم صنّْطن، فّْغث سّنِّي مسْحث ثَعجَّاشْت زݣ يضَارن نْوم. 15أَقَا تسْڒَام ڒْحَقّ: ذِي يُوْم لْحِسَاب ذ لْعِقَاب اَذ يِيڒِي لْعِقَاب ن ثنْدِينْت نِّي كْتَار زِي لْعِقَاب ن ثنْدِينْت ثَعفَّانْت ن سَادُوْم ذ ثنْدِينْت ثَعفَّانْت ن عَمُّوْرَا.
أَعدّب إِݣ يتكّن خ يمحْضَارن
16نش اَقَا سّكِّيغ-كنِّيو اَمشْنَاو يحُوْڒِيْين جَار وُوْشَّانن. إِڒِيم ثْفَاقم اَمشْنَاو يفِيغرَان، إِڒِيم ذ نِّيّث اَمشْنَاو يذْبِيرن. 17حْضَام يخف نْوم زݣ يِوْذَان. أَكنِّيو سلّْمن إِ لْمَحْكَامَاث؛ أَكنِّيو ؤُوْثن ذِي ثمْزِيذَاوِين نْسن. 18أَكنِّيو جَرّن غَار لْحُكَّام ذ يزدْجِيذن عْلَاحْسَاب يسم ينُو حمَا اَخَافِي ثْشهْذم غَار نِثْنِي ذ يِنِّي زِي ڒݣْنُوْس. 19خْمِي كنِّيو غَا سلّْمن، بْڒَا مَا ٱذ تيْسِيم اَمْنُوْس ذِي ڒَعْقُوْڒَاث نْوم مِين غَا ثِينِيم نِغ ذ مَامّش إِي غَا ثسِّيوْڒم؛ لَّا، أَوَاڒن نِّي إِي غَا ثِينِيم ذ أَربِّـي إِي ذَاوم ثن غَا يُوْشن ذِي ثْسَعَّات نِّي. 20وَار يدْجِي بُو ذ كنِّيو إِي غَا يسِّيوْڒن؛ لَّا، ذ أَرُّوْح ن بَابَاثْوم إِي غَا يسِّيوْڒن ذݣ ومْشَان نْوم. 21ؤُمَاس اَذ يسلّم ؤُمَاس إِ ڒْموْث. بَابَاس اَذ يسلّم مِّيس. ثَارْوَا اَذ رَاحن ضد لْوَالِيدِين نْسن، أَثن سلّْمن إِ يِنِّي إِي ثن غَا نْغن. 22أَكنِّيو عِيفّن مَارَّا عْلَاحْسَاب يسم ينُو، وَلَكِن ونِّي غَا يصْبَارن غَار ونݣَّارُو اَتَاف اَذ ينْجم. 23مڒَا عَدّْبن-كنِّيو ذِي شَان ثنْدِينْت، اَروْڒم غَار ثْنّغْنِي. أَقَا تسْڒَام ڒْحَقّ: أَذ د يَاس مِّيس ن بْنَاذم، أَتَاف كنِّيو عَاذ وَار ثْكمّْڒم خ مِين كنِّيو وصِّيغ ذِي ثْندَّام ن أَيث-إِسْرَائِيل.
24أَمحْضَار وَار يدْجِي شَا ذ اَمقّْرَان ح لْمُعَلِّم نّس. أَخدَّام وَار يدْجِي شَا ذ اَمقّْرَان خ ؤُوقَّاف نّس. 25بَرَكَا غِير اَذ يِيڒِي ومحْضَار اَم لْمُعَلِّم نّس، أَذ يِيڒِي وخدَّام اَم ؤُوقَّاف نّس. مڒَا ڒَاغَان إِ بَاب ن ثدَّارْث <آ إِبْڒِيس>،#10.25 أَوَاڒ-أَ س ثَيُوْنَانِيث نتَّا ذ <بْعَلْزَبُول.> إِيوَا مَامّش غَا ڒَاغَان إِ ڒحْبَاب ن ثدَّارْث نّس؟
ثِيݣّْوْذِي زِي أَربِّـي
26وَار تݣّْوْذم شَا زَّايْسن. مَارَّا مِين يتْوَاسْنُوْفَّرن اَذ د ينفْضح. مَارَّا مِين ينُوْفَّرن اَذ يتْوَاسّن! 27مِين ذَاوم قَّارغ ذِي ثَادْجسْت، عَاوْذم-اَس ذِي ثْفَاوْث ن نْهَار. مِين تسْڒَام س ڒْحسّ، عيّْضث زَّايس خ ثْزقَّا. 28وَار تݣّوْذث شَا زݣ يِنِّي ينقّن دَّات وَار زمَّرن اَذ نْغن ؤُڒَا ذ ڒَعْمَر؛ لَّا، ݣّْوْذث زِي أَربِّـي يعْنِي ونِّي يزمَّرن اَذ يدمَّر دَّات ذ ڒَعْمَر ذِي جَهنَّمَا. 29مَا وَار تْمنْزِين ثْنَاين ن يزَاوْجِيون#10.29 ئِزَاوْجِيون نِثْنِي ذ يجْضَاض. س دُوْرُو؟ وَلَكِن، وَار زَّايْسن يوطِّي ؤُڒَا ذ يجّن غَار ثْمُوْرْث مڒَا وَار يخِيس شَا بَابَاثْوم. 30ؤُڒَا ذ يزُوْطَّان إِي غَارْوم خ وزدْجِيف نْوم يحْسب-يثن أَربِّـي مَارَّا. 31وَار تݣّْوْذم شَا. كنِّيو ثْسݣّْوَام كْتَار س وَاطَّاس خ يزَاوْجِيون.
ونِّي يشهّْذن خ سِيذِيثْنغ عِيْسَى
32ونِّي زَّايِي غَا يشهْذن نش زَّاث إِ يِوْذَان، أَتَاف اَزَّايس شهْذغ نش زَّاث إِ بَابَا يدْجَان ذݣ وجنَّا. 33ونِّي ذَايِي غَا ينْكَرن زَّاث إِ يِوْذَان، أَتَاف اَث نْكَرغ نش زَّاث إِ بَابَا يدْجَان ذݣ وجنَّا.
34وَار تْفكَّرم شَا بلِّي ؤُسِيغ-د اَذ ݣّغ ڒهْنَا ذِي دُّنشْت-أَ. وَار د ؤُسِيغ شَا اَذ ݣّغ ڒهْنَا؛ لَّا، ؤُسِيغ-د اَذ ݣّغ اَمنْغِي. 35ؤُسِيغ-د اَذ سْمنْغغ مِّيس اَك بَابَاس، ذ يدْجِيس اَك يمَّاس، ذ ثْسْڒِيث اَك لَالَّاس. 36أَذ يِيڒِي ڒَعْذُو ن بْنَاذم ذ ڒحْبَاب إِي كِس يزدّْغن ذِي ثدَّارْث نّس."#10.36 خْزَر مِيْخَا 7:6.
37"ونّي خف يعِيزّ بَابَاس نِغ ذ يمَّاس كْتَار زَّايِي نش، أَتَاف وَار ذَايِي يسْذِيهدْج شَا. ونِّي خف يعِيزّ مِّيس نِغ ذ يدْجِيس كْتَار زَّايِي نش، أَتَاف وَار ذَايِي يسْذِيهدْج شَا. 38ونِّي يتَاݣِين اَذ ييْسِي صَّلِيب نّس#10.38 ذِي ڒْوقْث نِّي ن سِيذِيثْنغ عِيْسَى اَرُّوْمَانُوْس نقّن يوْذَان ذِي صَّلِيب، ئِوْذَان تْعدَّابن اَطَّاس ذَايس. ونِّي يذفَّارن سِيذِيثْنغ عِيْسَى يخصَّا-يَاس وَار يتݣّْوذ شَا زِي صَّلِيب نِّي، يعْنِي زِي ڒْموْث ؤُڒَا زݣ وعدّب. اَذَايِي يذْفَار نش، أَتَاف وَار ذَايِي يسْذِيهدْج شَا. 39ونِّي غَا يربْحن ثُوْذَارْث نّس، أَتَاف أَت يخْسَر. ونِّي غَا يخْسَرن ثُوْذَارْث نّس خ سَّبَاب ينُو، أَتَاف أَت يرْبح.
لْأَجَار
40ونِّي كنِّيو يقبّْڒن، أَتَاف يقْبڒ-اَيِي. ونِّي ذَايِي يقبّْڒن، أَتَاف يقْبڒ ونِّي ذَايِي د يسّكّن. 41ونِّي يقبّْڒن شَان ن نَّبِي ڒَاحقَّاش يسّكّ-يث-يذ أَربِّـي، أَتَاف اَغَارس يِيڒِي لْأَجَار اَمشْنَاو شَان ن نَّبِي. ونِّي يقبّْڒن شَان ن ڒْمُوْمن ڒَاحقَّاش ذ ڒْمُوْمن، أَتَاف اَغَارس يِيڒِي لْأَجَار اَمشْنَاو شَان ن ڒْمُوْمن. 42أَقَا تسْڒَام ڒْحَقّ: ونِّي غَا يُوْشن غِير ڒْكَاس ن وَامَان ذ اَسمَّاض إِ شَان يِجّن زݣ يمزْيَانن-أَ ڒَاحقَّاش ذ اَمحْضَار ينُو، أَتَاف اَذ يَاوِي لْأَجَار نّس وَار ث يتْضيِّيع شَا."
Nke Ahọpụtara Ugbu A:
متى 10: ريف
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye