يوحنا 5
5
سِيذِيثْنغ عِيْسَى يسْݣنْفَا يجّن ن ونشْرُوْف
1منْبَعْد إِ مَانَايَا يݣَعّذ عِيْسَى غَار ثنْدِينْت ن لْقُدْس ذݣ يِجّن ن ڒْعِيذ ن أَيث-إِسْرَائِيل. 2ذِي لْقُدْس زَّاث إِ ثوَّارْث وحُوْڒِي ذِنِّي طَّارْف نّس يجّن ن صَّرِيج قَّارن-اَس س وَاوَاڒ ن أَيث-إِسْرَائِيل بَيْت حِسْدَا، غَارس خمْسَا ن يسقِّيفن. 3تْغِيمَان ذِنِّي اَطَّاس ن يمهْڒَاش ذ يضَرْغَاڒن ذ يزحَّافن ذ ينشْرُوْفن،#5.3 أَنشْرُوْف نتَّا زݣ يِنِّي يشَرّْفن زݣ يضَارن نِغ زݣ وعْرُوْر وَار زمَّرن شَا اَذ ؤُيُوْرن. {تْرَاجَان اَمَان ن صَّرِيج اَذ نْهزّن. 4ثْهوَّا-د يجّن ن لْمَالَائِكَا ن أَربِّـي غَار صَّرِيج نِّي ثْسنْهزَّا اَمَان نّس. ونِّي غَا يهْوَان ذ اَمزْوَارُو ذݣ وَامَان نِّي خْمِي تنْهزَّان اَتَاف اَث سْݣنْفَان زِي ڒهْڒَاش نّس مَامّش مَا يݣَّا.}
5ذِنِّي يجّن ن ومهْرُوْش ثْمنْيَا أُو ثْرَاثِين يسݣّْوُوْسَا نتَّا يهْڒش. 6يُوْفِي-ث عِيْسَى يزّڒ ذِنِّي، ئِسّن قَا اَطَّاس ن ڒْوقْث زݣ وَامِي نتَّا يهْڒش. ينَّا-ٱس: "مَا ثخْسذ اَذ تݣنْفِيذ؟"
7ينَّا-ٱس ومهْڒُوْش نِّي: "آ سِيذِي، وَار غَارِي وِي ذَايِي غَا يسرْسن ذِي صَّرِيج خْمِي تنْهزَّان وَامَان. نش مڒْمِي مَا رزُّوْغ اَذ هْوِيغ، تِيزْوَارن-اَيِي ينّغْنِي."
8أُوْشَا ينَّا-ٱس عِيْسَى: "كَّر، إِيْسِي ثَاسُّوْث نّش، ؤُيُوْر." 9ڒخْدّنِّي يݣنْفَا ورْيَاز نِّي، ييْسِي ثَاسُّوْث نّس يُويُوْر. ذِي نْهَار ن سّبْث ن لْعِبَادَا إِݣ يوْقع مَانَايَا.
10كَّرن يسْرَائِيلِيْين نَّان-اَس إِ ونِّي يݣنْفَان: "نْهَارَا ذ نْهَار ن سّبْث ن لْعِبَادَا، وَار غَارك بُو ڒْحَقّ اَذ تيْسِيذ ثَاسُّوْث نّش."
11ينَّا-ٱسن: "ونِّي ذَايِي يسْݣنْفَان ينَّا-ٱيِي إِيْسِي ثَاسُّوْث نّش، ؤُيُوْر."
12نَّان-اَس: "وِي ذَاش ينَّان إِيْسِي ثَاسُّوْث نّش، ؤُيُوْر؟"
13أَرْيَاز نِّي وَار يسِّين شَا مِين يعْنَا ونِّي إِي ث يسْݣنْفَان مِينْزِي عِيْسَى يودَّار ذِي ڒْغَاشِي نِّي.
14منْبَعْد إِ مَانَاينِّي عِيْسَى يُوْفَا ونِّي يݣنْفَان اَقَاث ذِي ثمْزِيذَا ثَمقّْرَانْت ن أَيث-إِسْرَائِيل ينَّا-ٱس: "أَقَاش ثْݣنْفِيذ، وَار تݣّ بُو ڒْمُعْصِيَاث عَاوذ حمَا وَار ذَاش يتوْقِيع كْتَار زِي مِين تُوْغَا ذَايش."
15ئِرُوْح ورْيَاز نِّي ينَّا-ٱسن إِ يسْرَائِيلِيْين قَا ذ عِيْسَى إِي ذَايِي يسْݣنْفَان. 16س مَانَاينِّي رزُّوْن يسْرَائِيلِيْين اَذ عدّْبن عِيْسَى مِينْزِي يتݣّ مَانَايَا ذِي نْهَار ن سّبْث ن لْعِبَادَا.
سِيذِيثْنغ عِيْسَى يسنْجَام يوْذَان يتِيشّ-اَسن ثُوْذَارْث
17ينَّا-ٱسن عِيْسَى: "بَابَا يخدّم ڒبْدَا، ؤُڒَا ذ نش خدّْمغ اَم نتَّا."
18س مَانَايَا يسْرَائِيلِيْين رزُّون كْتَار اَث نْغن. وَار يدْجِي بُو خ سَّبَاب ن نْهَار ن لْعِبَادَا أُو صَافِي، وَلَكِن عَاوذ خْمِي ذَاسن يقَّار بلِّي أَربِّـي ذ بَابَاس يتمْسَاوَا يخف نّس اَك أَربِّـي.
19ينَّا-ٱسن عِيْسَى: "أَقَا تسْڒَام ڒْحَقّ: مِّيس وَار يزمَّر اَذ يݣّ شَان ثْمسْڒَايْث س يِيخف نّس، غِير مِين يࢲرّ زِي بَابَاس اَقَا يتݣّ-يث. مِين مَا يتݣّ بَابَاس اَقَا يتݣّ-يث ؤُڒَا ذ مِّيس. 20بَابَاس يتخْس مِّيس، يسْبيَّان-اَس مَارَّا مِين يتݣّ. أَذَاس يسْبيّن ڒخْذَايم ثِمقّْرَانِين خ ثْمسْڒَايِين-أَ حمَا اَذ تْعجّْبم! 21مَامّش د يسْنكَّر بَابَاس يِنِّي يمُّوْثن يتِيشّ-اَسن ثُوْذَارْث، ؤُڒَا ذ مِّيس يتِيشّ-اَسن ثُوْذَارْث إِ يِنِّي يخس. 22بَابَاس وَار يتْحِسِّيب حَدّ، يُوْشَا-ٱس لْحِسَاب مَارَّا إِ مِّيس 23حمَا مَارَّا اَذ كَرْمن مِّيس اَمش تْكَرَّامن بَابَاس. ونِّي وَار يتْكَرِّيمن شَا مِّيس وَار يتْكَرِّيم شَا ؤُڒَا ذ بَابَاس إِي ثِيذ يسّكّن.
24أَقَا تسْڒَام ڒْحَقّ: ونِّي يتْسْڒَان إِ وَاوَاڒ ينُو يتَامن زݣ ونِّي ذَايِي د يسّكّن، أَغَارس ثِيڒِي ثُوْذَارْث ن ڒبْدَا وَار يتِيذف شَا ذِي لْعِقَاب، نتَّا اَذ يمُوْتِّي زِي ڒْمُوْث غَار ثُوْذَارْث. 25أَقَا تسْڒَام ڒْحَقّ: أَذ د تَاس ڒْوقْث اَقَا ڒخُّو ثُوْسَا-د، أَذ سْڒن يمتِّينن إِ صُّوْت ن مِّيس ن أَربِّـي أُو يِنِّي ذَاس غَا يسْڒن اَذ دَّرن. 26أَم بَابَاس غَارس ثُوْذَارْث ذݣ يِيخف نّس، أَمُّو إِي ذَاس يُوْشَا إِ مِّيس اَغَارس ثِيڒِي ثُوْذَارْث ذݣ يِيخف نّس. 27يُوْشَا-ٱس عَاوذ جّْهذ حمَا اَذ يحَاسب مِينْزِي نتَّا ذ مِّيس ن بْنَاذم.
28-29وَار تْعجِّيبم شَا خ مَانَايَا، قَا اَذ د تَاس ڒْوقْث ذَايس غَا سْڒن صُّوْت نّس مَارَّا يِنِّي يدْجَان ذݣ يمضْڒَان نِثْنِي اَذ د كَّرن. يِنِّي يݣِّين ثِمسْڒَايِين ثِصبْحَانِين اَذ رَاحن غَار ثُوْذَارْث. يِنِّي يݣِّين ثِمسْڒَايين ثِعفَّانِين اَذ د كَّرن اَذ رَاحن غَار لْعِقَاب. 30نش وَار زمَّرغ اَذ ݣّغ وَالُو زݣ يِيخف ينُو. مَامّش تسْڒِيغ، أَمُّو تْحَاسَابغ. لْحِسَاب ينُو ن ڒْحَقّ مِينْزِي نش وَار رزُّوْغ شَا مِين خْسغ؛ لَّا، رزُّوْغ مِين يخس ونِّي إِي ذَايِي-د يسّكّن."
ئِشهّذ أَربِّـي خ سِيذِيثْنغ عِيْسَى
31"مَعْلِيك شهْذغ خ يِيخف ينُو، إِڒِي شْهَاذث ينُو وَار ثدْجِي بُو نِيشَان. 32ئِجّن نّغْنِي يشهّذ خَافِي. نش سّْنغ شْهَاذث إِي خَافِي يشهّذ نتَّاث نِيشَان إِي ثدْجَا.
33كنِّيو تُوْغَا ثْسّكّم-د غَار يَحْيَى، نتَّا يشْهذ خ لْحَقِيقَا. 34وَلَكِن نش وَار حْذِيجغ شَا شْهَاذث ن بْنَاذم. قَّارغ-اَوم مَانَايَا حمَا اَذ تْنجْمم. 35يَحْيَى يُوْسَا-د ذ ڒفْنَار يرقَّان يتشْرِيقن، كنِّيو ثخْسم اَذ تْفَرْحم شَان ڒِيَّام س نُّوْر نّس. 36وَلَكِن نش غَارِي يجّن ن شْهَاذث ذ ثَمقّْرَانْت خ ثنِّي ن يَحْيَى. مِين ذَايِي د يُوْشَا بَابَا اَثِيد سْبَانغ، ثِمسْڒَايِين-أَ س يِيخف نْسنْت شهّْذنْت خَافِي بلِّي يسّكّ-اَيِي-د بَابَا. 37بَابَا ذَايِي د يسّكّن ذ نتَّا إِي خَافِي يشهْذن. كنِّيو عمَّارْص وَار ثسْڒِيم شَا صُّوْت نّس، عمَّارْص وَار ثࢲْرِيم شَا ؤُذم نّس. 38أَوَاڒ نّس وَار ذَايوم يتْغِيمِي شَا مِينْزِي ونِّي إِي ثِيد يسّكّن وَار زَّايس تِيمْنم شَا. 39ثْرزُّوم ذِي لْكُتُب كنِّيو تْغِير-اَوم ذَايْسن ثُوْذَارْث ن ڒبْدَا. إِيوَا ؤُڒَا ذ يِيْنَا شهّْذن خَافِي. 40وَاخَّا اَمنِّي كنِّيو وَار ثْخِيسم شَا اَغَارِي د تَاسم حمَا اَغَارْوم ثِيڒِي ثُوْذَارْث.
41وَار حْذِيجغ شَا اَذَايِي سمْغَارن يِوْذَان. 42سّْنغ-كنِّيو بلِّي وَار ذَايْوم بُو ڒمْحِبّث ن أَربِّـي. 43نش ؤُسِيغ-د ذݣ يِيسم ن بَابَا، كنِّيو وَار ذَايِي ثقْبِيڒم شَا. وَلَكِن، مڒَا يُوْسَا-د شَان يِجّن نّغْنِي غَارْوم ذݣ يِيسم نّس نِّيث وَاهَا اَث ثْقبْڒم.
44مَامّش غَا ثݣّم اَذ تَامْنم؟ إِيوَا كنِّيو تخْسم لْعَظَمَا ن وَايَاوْيَا، وَار ثْرزُّوْم شَا خ لْعَظَمَا ن أَربِّـي اَوحْذَانِي. 45وَار تْفكَّرم شَا أَزَّايوم شثْشِيغ غَار بَابَا؛ لَّا، ونِّي إِي زَّايْوم غَا يشثْشَان نتَّا ذ مُوْسَى ونِّي ذِي ثݣِّيم لْأَمَال نْوم. 46مَعْلِيك كنِّيو ثُوْمْنم ذِي مُوْسَى، إِڒِي ثُوْمْنم ذَايِي ؤُڒَا ذ نش مِينْزِي نتَّا يُوْرَا خَافِي. 47مڒَا كنِّيو وَار ثُوْمِينم شَا زِي مِين يُوْرَا، مَامّش غَا ثݣّم اَذ تَامْنم ذݣ وَاوَاڒ ينُو؟"
Nke Ahọpụtara Ugbu A:
يوحنا 5: ريف
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye