मत्ती 22

ब्या का जिमणार की निती-कथा

(लूका 14:15–24)

1ईसु बानै एक ओर मिसाल दिनी, 2“ईस्बर नगरी को राज बि राजा की जंय्यां ह। जखो आपका बेटा का ब्या की रोटी की त्यारी करी। 3अर बो आपका दासानै भेज्यो क बे बा मिनखानै जानै नूतो दिओ गयो हो बानै जिमबा ताँई बुलार ल्यावीं। पण बे कोनी आया। 4बो राजा ओज्यु आपका दासानै आ ओडार भेज्यो क, ‘बाकन जार खेवो क पेसारो#22:4 अठै पेसारा ताँई बैल अर पाळेड़ा ज्यानबरानै काट्यो जातो हो क्युं क यहूदि मिनख बैल को मास खावीं हीं। त्यार ह, इ ताँई आओ अर जिमो।’ 5जद जार बे दास बानै खया जणा बे बाकी बाता प गोर कोनी दिआ। अर आप-आपका खेत म अर काम-धंधा प चलेग्या। 6अर कई मिनख तो बा दासा क सागै मारा पिटी कर बाकी जान लेली। 7अर जद राजानै इ बात को बेरो चाल्यो जणा बो झाळ्या म भरगो अर आपका सिपाईड़ानै भेजर बा कुटिचर मिनखानै मरवा दिओ अर बाकी नगरी म आग लगवा दिनी। 8जणा राजा दासाऊँ बोल्यो, ‘पेसारो तो त्यार ह पण जिमबाळाई कुटिचर निकळ्या।’ 9इ ताँई बो आपका दासानै बोल्यो, ‘थे गळी-कुचळ्या म जायो अर जत्ताबी मिनख थानै बठै मिलै बानै जिमबा ताँई बुलार ल्याओ।’ 10बे दास गया अर बानै जत्ता बी भला-बुरा मिनख मिल्या बा सगळानै लेर आया अर बाऊँ तम्मू भरगो। 11राजा बानै देखबा ताँई मांयनै आयो जणा बो बठै एक मिनखनै देख्यो जखो बे गाबा कोनी पेर राख्यो हो जखा ब्या म आबाळा म्हेमानानै सिमा'र दिआ गया हा, 12जणा राजा बिनै बोल्यो, ‘तू ब्या हाळा गाबा#22:12 ब्या हाळा गाबा बा दिना म राजा नूतेड़ानै ब्या का जिमणवार म सामिल होबा ताँई गाबा देता हा पेर्या बिनाई मांयनै क्याले आगो।’ पण बो मिनख क्युंई कोनी बोल्यो। 13#मत्त 8:12; 25:30; लूक 13:28बिनै चुपचालो देखर राजा आपका दासानै ओडायो, ‘इका हात पगानै बांदके बारनै अँधेरा म फेक द्‍यो जठै ओ दांत पिससी अर बार घालसी।’” 14जणा ईसु बोल्यो, “इ निती-कथानै खेबा को मतबल ओ ह, क परमेसर बोळानै बुलाया ह पण टाळेड़ा क्युंकई ह।”

चुंगी देबा प सुवाल

(मरकुस 12:13–17; लूका 20:20–26)

15फरिसी भेळा होर बतळाबा लाग्या, “ईसुनै कंय्यांसिक बिकिई बात म फसायो जावै।” 16जणा बे हेरोद का गुट का क्युंक मिनखा क सागै आपका चेलानै ईसु कनै भेज्या। अर बे ईसुनै कह्या, “गरूजी म्हें जाणा हां थे सचा हो अर परमेसर आपणाऊँ काँई चावै बिनै खराईऊँ बताओ हो। म्हें आबी जाणा हां थे मुंडो देखर टिको कोनी काडो अर नइ खिकी परवा करो हो। 17इ ताँई थे म्हानै बताओ कैसरनै चुंगी देणी चाए क नइ?” 18बो बाकी चाल भापगो अर बाऊँ बोल्यो, “कपट्यो थे मनै क्युं बिचासो हो? 19थे मनै एक सीक्को दिखाओ। जिनै थे चुंगी म दिआ करो हो” जणा बे बिनै एक दिनार दि। 20अर ईसु बाऊँ बुज्यो, “इपै किको चितर अर किको आंक ह?” 21बे बोल्या, “रोम का समराट को” जणा ईसु बोल्यो, “जखो समराट को ह बो समराटनै द्‍यो अर जखो परमेसर को ह बो परमेसरनै द्‍यो।” 22आ सुणर बे ताजूब म पड़गा अर बठैऊँ चलेग्या।

ओज्यु जी उठबा प सुवाल

(मरकुस 12:18–27; लूका 20:27–40)

23 # काम 23:8 जनाड़ैई सदुकी बी ईसु कनै आया। बे मरेड़ा मऊँ ओज्यु जी उठबानै कोनी मानता हा। बे ईसुनै बुज्या, 24“गरूजी मूसा ओडायो ह, जिको भाईड़ो बिना आस ओलादई मर ज्यावै जणा बिको भाईड़ो बिकी लूगाईनै ब्याले। अर आपका भाईड़ा का वंसनै आगै बढावै। 25म्हारै अठै सात भाईड़ा हा बा मऊँ बडोड़ा को ब्या होयो अर क्युंक दिना क पाछै बो बिना आस ओलादई मरगो। जणा बिको छोटक्यो भाईड़ो बिकी लूगाईनै ब्याली। 26जणा बो दुसरो अर इकै पाछै तीसरो बी बिना आस ओलादई मरगो। अंय्यांई बा सात्यु भाईड़ा क सागै होयो। 27अर आखीर म बा लूगाई बी मरगी। 28जणा थे बताओ जद मिनख मरेड़ा मऊँ ओज्यु जी उठसी जणा बि लूगाई को मोट्यार बा सात्यु भाईड़ा मऊँ कूणसो होसी। क्युं क बे सात्युई बिनै ब्याली ही।” 29ईसु बाऊँ बोल्यो, “थे गळत हो। थे नइ तो सास्तरानै जाणो अर नइ परमेसर की सक्‍तिनै। 30सच तो ओ ह क मरेड़ा मऊँ ओज्यु जी उठबा क पाछै बा लूगाई बा मऊँ कोईसा किई लूगाई कोनी होसी। क्युं क ओज्यु जी उठबा क पाछै लूगाई-मोट्यारा म ब्या कोनी होवै पण बे ईस्बर नगरी दुता की जंय्यां होज्यासी। 31जठै ताँई मरेड़ा मऊँ ओज्यु जी उठबा को सुवाल ह, जणा के थे ओ कोनी बाच्यो? परमेसर खयो ह, 32‘म अब्राहम को परमेसर इसाक को परमेसर अर याकूब को परमेसर हूँ।’ बो मर्या खप्या को कोनी पण जीवता को परमेसर ह।” 33बे ईसु की इ सीखनै सुणर ताजूब म पड़गा।

सऊँ बडो हुकम

(मरकुस 12:28–34; लूका 10:25–28)

34जद फरिसी सुण्या की ईसु सदुकीयानै चोखो जुबाब देर बाको मुंडो बंद कर दिओ ह। जणा बे एक सागै भेळा होया। 35अर बामैऊँ एक यहूदि सास्तरी ईसुनै अळजाबा ताँई बुज्यो, 36“गरूजी नेम-कायदा म सऊँ बडो हुकम कूणसो ह?” 37ईसु बिऊँ बोल्यो, “तू तेरा परबु परमेसरऊँ सगळा हिया, सगळा पिराण अर सगळी बुदीऊँ परेम कर। 38ओई सऊँ बडो अर पेलो हुकम ह। 39अर दुसरो हुकम बी इ झिसोई ह थारा पड़ोसीऊँ जंय्यां तू खुदऊँ परेम करै ह बंय्‍यांई परेम करजे। 40#लूक 10:25–28नेम-कायदा अर परमेसर की खेबाळा की पोथ्या आ दो हुकमा पई टिकरी ह।”

मसी किको बेटो

(मरकुस 12:35–37; लूका 20:41–44)

41जद फरिसी भेळा हा, जणाई ईसु बाऊँ एक सुवाल बुज्यो, 42“मसी किको बेटो ह थे बिकै बारां म काँई सोचो हो?” बे बोल्या “दाऊद को बेटो ह।” 43जणा बो बाऊँ बोल्यो, “दाऊद पबितर आत्माऊँ भर'र बिनै परबु क्युं खेवै ह अर ओ मांडेड़ो बी ह;

44“परबु मेरा परबुऊँ खेवै ह तू मेरै दायणै हात बेठ्यो रेह जद ताँई म तेरा दुस्मनानै तेरै पगा तळै नइ कर द्‌युँ।

45“जद दाऊद बिनै परबु बोलै ह जणा बो बिको बेटो कंय्यां हो सकै ह?” 46ईसु की बातानै सुणर बाको मुंडो बंद होगो अर बि दिन क पाछै बामैऊँ कोईसाकी ईसुऊँ ओज्यु सुवाल बुजबा की हिमत कोनी होई।

Nke Ahọpụtara Ugbu A:

मत्ती 22: एस डब्लु वी

Mee ka ọ bụrụ isi

Kesaa

Mapịa