Ínachoxü̃xü̃chiga 36
36
1Rü nüma ga Moiché rü ñanagürü: —Ñu̱xma nax mea yanguxü̃ca̱x ya yima Tupanapata rü norü ngẽmaxü̃gü, rü pema i Becharé rü Aoriáx tá nixĩ i ngẽma puracümaxã ipecuáxü̃. Rü guxãma ya texé ya tüxü̃́ natauxchaxe nax ta̱xacürü ngẽmaxü̃güarü üxü̃ cuáxe rü guxãma ya texé ya Tupana ngẽma puracüca̱x cua̱x tüxna ãxe, rü yíxema tá tixĩ ya pexü̃ rüngü̃xẽẽgüxe i norü üwa —ñanagürü.
Duü̃xü̃güarü ãmaregü rü ínayaxüxüchi
2Rü nüma ga Moiché rü naxca̱x naca ga Becharé rü Aoriáx, rü guxãma ga guxema tüxü̃́ natauxchaxe nax ta̱xacürü ngẽmaxü̃güarü üxü̃ cuáxe. Rü guxãma ga guxema Tupana yema puracüca̱x cua̱x tüxna ãxe rü tümaarü ngúchaü̃maxã tügü tixu.
3Rü nümagü ga yema puracütanüxü̃ rü Moichéxü̃tawa nanayauxgü ga yema yemaxü̃gü ga Iraétanüxü̃ ixãgüxü̃ nax naxügüã̱xü̃ca̱x ga guma Tupanapata rü norü yemaxü̃gü. Rü nüma ga Iraétanüxü̃ rü guxü̃ ga ngunexü̃gu norü ngúchaü̃maxã inayaxãgüxü̃ ga norü ãmaregü.
4-5Rü nümagü ga yema puracütanüxü̃ ga guma Tupanapata ügüxü̃ rü ínayachaxãchitanü nax Moichémaxã nüxü̃ yanaxugüexü̃ca̱x, rü ñanagürügü: —Ngẽma duü̃xü̃gü rü marü nanangupetüxẽẽxü̃chi nax toxü̃tawa nanaãxü̃ i norü ãmaregü naxca̱x ya yima Tupanapataarü puracü ga Cori ya Tupana nagu unetaxü̃ —ñanagürügü.
6-7Rü yexguma ga Moiché rü duü̃xü̃güxü̃tawa namuga nax marü yanguxü̃ ga ãmaregü yerü marü ínayaxüxüchi. Rü yemaca̱x tama nanaxwa̱xe nax inaxãgüãxü̃ ga norü ãmaregü ga iyatüxü̃ rü ingexü̃ naxca̱x ga guma Tupanapata. Rü yemaacü Moiché duü̃xü̃güxü̃ ínayachaxãchitanüxẽxẽ nax inaxãgüãxü̃ ga norü ãmaregü yerü yema ãmaregü rü meama ningu ñu̱xmata íyaxüxüchi.
Tupanapataarü üxchiga
(Éx. 26.1-37)
8Rü yema puracütanüxü̃ ga yema puracüxü̃ rücua̱xmaegüxü̃ nixĩ ga naxügüxü̃ ga guma Tupanapata. Rü 10 tachinü ga naxpü ga waxracharaxü̃ rü yáuxcharaxü̃ rü daucharaxü̃ ga línuchinaxca̱xwa nixĩ ga naxügüãxü̃ ga norü tüxeguruxü̃. Rü yema naxpütachinügü rü taxre ga dauxü̃cüã̱xchicüna̱xãgü i ixãxpe̱xatüxü̃maxã nayanga̱xãẽgü.
9Rü wüxichigü ga yema naxpütachinü rü 12 metruarü ngãxü̃gu nixĩ ga norü ma̱x, rü 2 metrugu nixĩ ga norü tatachinü. Rü guxü̃ma rü nawüxigumare ga norü ma̱xwa rü norü tatachinüwa.
10Rü 5 ga yema naxpütachinü rü nügüna nananga̱i̱xcu. Rü yexgumarüxü̃ ta ga yema to ga 5 tachinü rü nügüna nananga̱i̱xcu.
11Rü ñu̱xũchi yema nuxíraxü̃xü̃ ga 5 tachinücüwawa nananga̱i̱xcu ga naxmachinügü ga iyauxnütaxü̃. Rü yexgumarüxü̃ ta yema to ga 5 tachinücüwawa nananga̱i̱xcu ga naxmachinügü.
12Rü yemaacü yema nuxíraxü̃xü̃ ga 5 tachinücüwawa nananga̱i̱xcu ga 50 ga naxmachinügü. Rü yexgumarüxü̃ ta yema to ga 5 tachinücüwawa nananga̱i̱xcu ga 50 ga naxmachinügü. Rü yemaacü mea yema totachinümachinüarü we̱xwa nayexma ga naxmachinügü.
13Rü ñu̱xũchi 50 ga choruxü̃gü ga úirunaxca̱x ínaxüxü̃ nax yemaacü yema naxpütachinügü nügüwa nachocuãxü̃ca̱x. Rü yemaacü nixĩ ga naxügüãxü̃ ga guma Tupanapata.
14Rü ñu̱xũchi ga Becharé rü cabrata̱xawa nanaxü ta ga 11 tachinü ga norü tüétüruxü̃. Rü yemamaxã nanatüétü ga guma Tupanapata.
15Rü wüxichigü ga yema naxpütachinü rü 13 metruarü ngãxü̃gu nixĩ ga norü ma̱x, rü 2 metru nixĩ ga norü tatachinü. Rü guxü̃ma nawüxigumare ga norü ma̱xwa rü norü tatachinüwa.
16Rü yema 5 tachinü rü nügüna nananga̱i̱xcu. Rü yema to ga 6 tachinü rü yexgumarüxü̃ ta nügüna nananga̱i̱xcu.
17Rü ñu̱xũchi yema nuxíraxü̃xü̃ ga 5 tachinücüwawa nananga̱i̱xcu ga 50 ga naxmachinügü. Rü yexgumarüxü̃ ta yema to ga 6 tachinücüwawa nananga̱i̱xcu ga 50 ga naxmachinügü.
18Rü ñu̱xũchi nanaxü ta ga 50 ga choruxü̃gü ga bróũchenaxca̱x nax yemamaxã nügügu nachogüxü̃ca̱x ga yema norü tüétüruxü̃ ga guma Tupanapata.
19Rü nüma ga Becharé rü nanaxü ta ga to ga taxre ga tüétüruxü̃ ga guma Tupanapata. Rü wüxi nixĩ ga dauxü̃maxã ichagüxü̃ ga carnérucha̱xmüxü̃naxca̱x. Rü yema düxétüwaama üxü̃ rü to ga naxcha̱xmüxü̃ ga mexẽchixü̃naxca̱x nixĩ.
20Rü yemawena Tupanapataca̱x nanade ga mürapewagü ga acáchianaxca̱x. Rü ñu̱xũchi mea ínanatogüxẽẽãcüma nananucu.
21Rü wüxichigü ga yema mürapewa rü 4 metruarü ngãxü̃gu nixü ga norü ma̱x, rü 65 chentímetru nixĩ ga norü tatachinü.
22Rü wüxichigü ga yema mürapewagü rü taxre ga nguxcuruxü̃ nüxü̃́ nayexma ga naxpechinüwa nax yemaacü to ga mürapewamaxã nügüwa nangucugüaxü̃ca̱x. Rü guxü̃ma ga yema Tupanapataarü mürapewagü rü yemaacü nanaxügü.
23Rü Tupanapatacüwa ga súrwaama üxü̃ca̱x nanaxü ga 20 tachinü ga mürapewagü.
24Rü yexgumarüxü̃ ta nanaxü ga 40 ga nachipatügü ga diẽrumünaxca̱x nax yemawa nanuxcuãxü̃ca̱x ga yema mürapewagüpara. Rü wüxichigü ga yema mürapewagü rü taxre ga nachipatü nüxü̃́ nayexma naxca̱x ga yema taxre ga naparagü.
25Rü yexgumarüxü̃ ta to ga 20 tachinü ga mürapewa nade naxca̱x ga norü tocüwa ga nórtewaama üxü̃ ga guma Tupanapata.
26Rü 40 ga diẽrumünaxca̱x ga nachipatügümaxã nayaxüchipatü nax yemaacü wüxichigü ga mürapewape̱xetüxü̃wa nayexmaxü̃ca̱x ga taxre ga nachipatügü.
27-28Rü naxtacu̱xrüxü ga oéstewaama üxü̃ca̱x nanade ga 6 tachinü ga mürapewa. Rü naétü taxre ga mürapewa nade nax nacüwagüpe̱xewa nanucuãxü̃ca̱x.
29Rü yema taxre ga mürapewagü ga nacüwagüpe̱xewa ügüxü̃ rü nixãmücü. Rü ñu̱xũchi norü dauxü̃pe̱xewa wüxi ga naxmachinümaxã nügüna nayaxũ̱xgü. Rü yemaacü nanaxü namaxã ga yema taxre ga mürapewagü ga nacüwagüpe̱xewa ügüxü̃.
30Rü yemaacü nayexma ga 8 tachinü ga mürapewa namaxã ga 16 ga nachipatü ga diẽrumünaxca̱x. Rü wüxichigü ga yema mürapewape̱xetüxü̃wa rü taxre ga nachipatü nüxü̃́ nayexma.
31-32Rü ñu̱xũchi ga Becharé rü nanade ga 5 ga naixmena̱xã ga acáchianaxca̱x nax nawa nanucuãxü̃ca̱x ga yema mürapewagü ga norü wüxicüwawa ga guma Tupanapata. Rü yexgumarüxü̃ ta nanade ga nai ga 5 ga naixmena̱xãgü nax nawa nanucuãxü̃ca̱x ga yema mürapewagü ga norü tocüwawa ga Tupanapata. Rü ñu̱xũchi nanade ga 5 ga naixmena̱xã nax nawa nanucuãxü̃ca̱x ga yema mürapewagü ga naweama ügüxü̃ ga oéstewa.
33Rü yexgumarüxü̃ ta nanaxü ga guma naixmena̱xã ga mürapewatachinügüarü ngãxü̃wa üxü̃ne rü norü tocüwawa nguxü̃ne.
34Rü yemawena úirumaxã nayatügütachinü ga yema mürapewagü. Rü úiruwa nanaxü ga naxmachinügü nax yema mürapewawa nanucuãxü̃ca̱x rü yemawa yawe̱xgüxü̃ca̱x ga guma naxpawerugü ya marü úirumaxã itügümena̱xã́ne.
35Rü ñu̱xũchi nanaxü ga Tupanapataarü tüyemachiãruxü̃ nawa ga naxpütachinü ga waxracharaxü̃ rü naxpütachinü ga yáuxcharaxü̃ rü naxpütachinü ga daucharaxü̃, rü naxpütachinü ga línuchinaxca̱x. Rü nananga̱xãxẽ ga yema tüyemachiãruxü̃ namaxã ga taxre ga dauxü̃cüã̱xchicüna̱xãgü ga ĩã̱xpe̱xatüxü̃.
36Rü acáchianaxca̱x nanaxü ga ãgümücü ga caxtagü rü úirumaxã nayatümena̱xã. Rü ãgümücü ga nachipatü ga diẽrumünaxca̱xwa nanangucu. Rü ñu̱xũchi nayaxüarü choruxü̃ã̱x ga úirunaxca̱x. Rü yemagu nanachogü ga yema tüyemachiãruxü̃.
37Rü guma Tupanapataarü ĩã̱xwaama üxü̃ ga norü tüã̱xruxü̃ nanaxü nawa ga naxpütachinü ga waxracharaxü̃ rü naxpütachinü ga yáuxcharaxü̃ rü naxpütachinü ga daucharaxü̃, rü naxpütachinü ga línuchinaxca̱x. Rü ñu̱xũchi meama nanaxümatütachinü norü nga̱xãẽruxü̃.
38Rü ñu̱xũchi nanaxü ta ga 5 ga caxtagü namaxã ga 5 ga norü choruxü̃gü rü 5 ga nachipatügü ga bróũchenaxca̱x. Rü guma caxtagüarü dauxü̃pe̱xewaama úirumaxã nayatügüpe̱xe. Rü yexgumarüxü̃ ta úirumaxã nayatügü ga yema naxmachinügü ga yema ĩã̱xarü tüã̱xruxü̃.
Nke Ahọpụtara Ugbu A:
Ínachoxü̃xü̃chiga 36: tcaP
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2022, Wycliffe Bible Translators, Inc. All rights reserved.