Ínachoxü̃xü̃chiga 27:20-21

¡Rü namaxã nüxü̃ ixu i Iraétanüxü̃ nax cuxü̃tawa nangegüãxü̃ca̱x i oribuarü chíxü̃ nax ngẽmaãcü guxü̃guma yana̱i̱xgüxü̃ca̱x i chopataarü omügü! Rü nüma ya Aróü̃ rü nanegü tá nixĩ i nüxna daugüxü̃ i ngẽma omügü nax ngẽmaãcü guxü̃ma i chütaxü̃ chope̱xewa nanaigüechaxü̃ca̱x nawa ya yima chopata. Rü ngẽma baú i mugüchixü̃arü tüyepe̱xewaama tá nixĩ i inanaigüechaxü̃ i ngẽma omügü. Rü ñaa mu rü chanaxwa̱xe i guxü̃gutáma ngẽma Iraétanüxü̃ rü nataagü nagu naxĩ.