Ínachoxü̃xü̃chiga 21
21
Mugü i puracütanüxü̃ i naxca̱x nataxexü̃chiga
(Dt. 15.12-18)
1-2Rü ñu̱xũchi nüma ya Cori ya Tupana rü Moichémaxã nüxü̃ nixu rü ñanagürü: —Ñaagü tá nixĩ i ngẽma mugü i ngẽma Iraétanüxü̃maxã nüxü̃ quixuxü̃: Rü ngẽxguma wüxi i puracütanüxü̃ i Ebréuca̱x cutaxegu, rü 6 ya taunecü tá nixĩ i cuxü̃́ napuracüxü̃. Natürü norü 7 ya taunecügu rü tá ínanguxuchi. Rü taxuxü̃táma naxütanü naxca̱x nax ínanguxuchixü̃.
3-4Rü yexguma nüxicatama yéma nanguxgux, rü nüxica tá ínaxũxũ. Rü yexguma naxãma̱xãcü yéma nanguxgu rü yíxema naxma̱xmaxã tá ínaxũxũ. Natürü ngẽxguma norü cori naxüxma̱xgu, rü nüxü̃́ taxãxacüxgux, rü ngẽxguma i ngĩma rü ñu̱xũchi ngẽma ngĩnegü rü tá norü coriarü nixĩgü. Rü ngẽma puracütanüxü̃ rü nüxica tátama ínaxũxũ.
5-6Natürü ngẽxguma ngẽma puracütanüxü̃ rü tama nanaxwa̱xegu nax ínanguxuchixü̃ erü naxma̱xü̃ rü nanegüxü̃ rü ñu̱xũchi norü corixü̃ nangechaü̃, rü ngẽmaca̱x i ngẽma norü cori rü Tupanape̱xewa tá nanaga. Rü ĩã̱xgu rüe̱xna ĩã̱xpenüxü̃gu tá nananguxẽxẽ. Rü ñu̱xũchi wüxi i ãmaguxü̃maxã tá nayapaipetüpachinü. Rü ngẽmaãcü rü guxü̃gutáma norü coriarü puracüruxü̃ tá nixĩ.
7Rü ngẽxguma texé puracüruxü̃ tümaxacümaxã taxegux, rü ngĩma rü taxũtáma tauxchaãcü ínguxuchi i ngẽma puracütanüxü̃ i iyatüxü̃rüxü̃.
8Rü ngẽxguma ngẽma cori i tümaca̱x taxexü̃ tama nangĩxwa̱xegu nax naxma̱x tixĩxü̃ca̱x, rü name i ngĩtanüxü̃axü̃́ nanatauxchaxẽxẽ nax ngĩxü̃ naxütanügüxü̃ca̱x nax ngẽmaãcü ínanguxuchixü̃ca̱x. Natürü ngẽxguma ngẽma cori tama nangĩxwa̱xegu nax naxma̱x tixĩxü̃ca̱x, rü taxucürüwa wüxi i duü̃xü̃ i to i nachixü̃anewa ne ũxü̃xü̃ ngĩmaxã nataxe.
9Rü ngẽxguma nanemaxã ngĩxü̃ naxütegu, rü ñoma wüxi i naxacürüxü̃ tá ngĩxü̃ nangechaü̃.
10Rü ngẽxguma ngĩrü cori ngĩmaxã naxãxma̱xgu rü nawena nai i ngexü̃maxã naxãxma̱xgu rü taxucürüwa ínanaxĩxẽxẽ i norü ngü̃xẽxẽ ngĩxca̱x i ngẽma ngĩxíraxü̃cü i naxma̱x, rü bai i õnawa rü bai i naxchiruwa rü bai i norü ngúchaü̃wa.
11Natürü ngẽxguma ngĩrü cori tama yanguxãgu i ngẽma tomaepü̱x i ngü̃xẽxẽ, rü ngĩxü̃́ natauxcha nax nüxna yaxũgachixü̃ rü tama ngĩxü̃́ naxãtanüxü̃ nax nüxna ínaxũxũxü̃.
Mugü i máetagüxü̃ca̱x ueguxü̃
12Rü texé ya tümamücüxü̃ imáxe rü tüma rü tá ta noxtacüma tayu.
13Natürü ngẽxguma texé wüxíexü̃ ima̱xcüraxü̃gu rü woetama Tupana ngẽmaãcü tümamaxã nanaxuegu nax ngẽmaãcü tayuxü̃ca̱x, rü tá cumaxã nüxü̃ chixu nax ngextá tá yanacúxü̃ nax tama yama̱xgüãxü̃ca̱x.
14Natürü ngẽma namücümaxã nuxü̃ rü woetama tüxü̃ imáxchaü̃xü̃, rü tá noxtacüma yu namaxã cuxuegu woo ãmarearü guruü̃wa nañaxgu nax tama nayuxü̃ca̱x.
15Rü ngẽma nanatüxü̃ rüe̱xna naéxü̃ napi̱xẽẽxü̃, rü name i noxtacüma yu namaxã cuxuegu.
16Rü yíxema wüxi ya duẽxẽca̱x ngĩ́xẽ rü tüxü̃ icúxe rü tá yu namaxã cuxuegu woo naxü̃tawa tangexmagu rüe̱xna marü tümamaxã nataxegu.
17Rü yíxema tümanatümaxã rüe̱xna tümaémaxã chixexü̃ ixugüxe rü noxtacüma tá yu namaxã cuxuegu.
18-19Rü ngẽxguma taxre i duü̃xü̃gü nügü daixgu rü ngẽma wüxi rü nutamaxã napi̱xẽẽãgu i ngẽma to rüe̱xna wüxi i dagümaxã yadaxawexẽẽãgu rü norü pechicaxü̃gu naxãũxẽẽãgu natürü tama nayu̱xgu, rü ngẽma napi̱xẽẽxü̃ rüe̱xna yadaxawexẽẽxü̃ rü taxũtáma napoxcu ega naxca̱x nataanegu rü norü caxü̃maxã inachixgu nax düxétüwa naxũxü̃ca̱x. Natürü tá nüma nanaxütanü i norü üxü̃xü̃gü rü naétü i ngẽma ngunexü̃gü i tama nagu napuracüxü̃.
20Rü ngẽxguma texé tümaarü puracütanüxü̃ ya ngexe rüe̱xna yatüexü̃ naimaxã tüxna nacua̱i̱xcagu rü tayu̱xgu, rü nanaxwa̱xe nax tapoxcuxü̃.
21Natürü ngẽxguma wüxi rüe̱xna yexeraxü̃ i ngunexü̃ tama tayu̱xgu rü taxũtáma napoxcu i ngẽma tümaarü cori, erü yíxema puracütanüxü̃ rü woetama norü duü̃xü̃ tixĩ.
22Rü ngẽxguma taxre i yatügü nügü daixgu rü ngĩxü̃ yanguxẽẽgu i wüxi i nge i ãxacücü rü ngẽmaca̱x nayuxacüxgu, rü yíxema ngĩxü̃ yuxacüxẽẽ́xẽ rü tanaxwa̱xe i tanaxütanü i ngẽma diẽru i ngĩte ngĩxca̱x ícacü rü ãẽ̱xgacügü ngĩgu unetagücü nax ngẽxgumaepü̱x yixĩxü̃.
23Natürü ngẽxguma yíxema ngexe rü taturaxüchigu rü yíxema ngĩxü̃ yuxacüexẽxẽ rü tümaarü maxü̃maxã tá tanaxütanü.
24-25Rü ngẽxguma texé wüxíexü̃ ticháixetüxẽẽgu, rü cháixetümaxã tá ta tüxü̃́ naxãtanü. Rü ngẽxguma texé wüxíexü̃ tibüepütaxẽẽgu, rü büepütamaxã tá ta tüxü̃́ naxãtanü. Rü ngẽxguma texé wüxíexü̃ tipoyeme̱xẽgux, rü poyeme̱xẽmaxã tá ta tüxü̃́ naxãtanü. Rü ngẽxguma texé wüxíexü̃ tipoyecutügu rü poyecutümaxã tá ta tüxü̃́ naxãtanü. Rü ngẽxguma texé wüxíexü̃ tigu̱xgu, rü gumaxã tá ta tüxü̃́ naxãtanü. Rü ngẽxguma texé wüxíexü̃ tapi̱xẽẽgu, rü pi̱xẽẽmaxã tá ta tüxü̃́ naxãtanü. Rü ngẽxguma texé wüxíena tanacua̱i̱xcagu, rü cua̱i̱xcamaxã tá ta tüxü̃́ naxãtanü.
26Rü ngẽxguma wüxi i cori norü mugüruxü̃ ya ngexexü̃ rüe̱xna yatüxexü̃ yama̱xgu rü tüxü̃ yacháixetüxẽẽgu rü name nax tümaarü cori tüxü̃ yangexü̃ natanü ya tümaxetü.
27Rü ngẽxguma wüxĩne ya tümapüta tibüegu, rü ngẽxgumarüxü̃ ta tüxü̃ ninge̱x i ngẽma tümaarü cori yima tümapütatanü.
Mugü i ngẽxguma wüxíe guxchaxü̃ üxgu
28Rü ngẽxguma wüxi i woca i yatüxü̃ rü wüxi ya yatüexü̃ rüe̱xna wüxi ya ngexexü̃ nacaxi̱xgu rü tüxü̃ nayuxẽẽgu, rü ngẽma woca i yatüxü̃ rü nutapütamaxã tá peyama̱x. Rü ngẽma namachi rü taxũtáma penangõ̱x. Natürü ngẽma woca i yatüxü̃arü yora rü taxũtáma penapoxcu.
29Natürü ngẽxguma ngẽma woca i yatüxü̃ nagu naxãcümagü nax duü̃xẽxü̃ nacaxixü̃, rü ngẽxguma texéxü̃ yama̱xgu rü nutapütamaxã tá ípenamuxũchi rü ngẽmaãcü tá peyama̱x. Rü ngẽxgumarüxü̃ tá ta nutapütamaxã peyama̱x i ngẽma norü yora ega marü nüxü̃ nacua̱xchire̱xgu nax yadüraxü̃ i norü woca i yatüxü̃ rü tama nüxna nada̱u̱xgu.
30Natürü ngẽxguma ngẽma natanüxü̃ i ngẽma yuxü̃ rü tama yama̱xgüchaü̃ãxgu i ngẽma woca i yatüxü̃arü yora rü diẽruca̱x ínacagügu, rü nüma i woca i yatüxü̃arü yora rü tá nüxü̃́ nanaxütanü i ngẽma diẽru i ngĩxca̱x ínacagücü natanü i norü maxü̃.
31Rü ngẽmatama mu tá nixĩ i nagu ingu̱xẽxẽxü̃ ega ngẽxguma ngẽma woca i yatüxü̃ rü wüxi i duü̃xü̃ nanexü̃ rüe̱xna wüxi i naxacüxü̃ nacaxi̱xgu i ngẽma woca i yatüxü̃.
32Rü ngẽxguma ngẽma woca i yatüxü̃ rü texéarü puracütanüxẽ ya yatüxexü̃ rüe̱xna ngexexü̃ yama̱xgu, rü name nax nutapütamaxã peyamáxü̃ i ngẽma woca i yatüxü̃. Rü ñu̱xũchi ngẽma woca i yatüxü̃arü yora rü yíxema puracütanüxü̃ ya yatüxe rüe̱xna ngexearü coriaxü̃́ tá nanaxütanü i 30 tachinü ya diẽru.
33-34Rü ngẽxguma texé tama tümaarü puchu rüngataxü̃gu rüe̱xna wüxi ya puchu tanaxü̱xgu rü ñu̱xũchi tama tanangataxü̃gu, rü ngẽxma nagu yangucuchigu i wüxi i woca rüe̱xna wüxi i búru, rü ngẽma puchuarü yora rü tá nüxü̃́ nanaxütanü i ngẽma naxü̃naarü yora. Natürü ngẽma woca i yuxü̃ rü ngẽma puchuarü yoraarü tá nixĩ.
35Rü ngẽxguma wüxíearü woca rü toguxe ya duü̃xẽarü wocamaxã nügü nadaixgu rü tüxü̃́ yamáagu, rü ngẽma woca i maxü̃xü̃ rü namaxã tá nataxegü rü yixema natanü ya diẽru rü ngãxü̃gu tá nügümaxã tüxü̃ nitoyegü. Rü ñu̱xũchi ngẽma woca i yuxü̃machi rü ngãxü̃gu tá ta nügümaxã nayayauyegü.
36Rü ngẽxguma norü yora nüxü̃ nacua̱xchire̱xgu nax ngẽma woca nax yadüraxü̃ rü tama nüxna nada̱u̱xgu, rü toguxearü woca yama̱xgu, rü name i yíxema woca i yuxü̃arü yorana nanamu i wüxi i woca i maxü̃xü̃ nachicüxü i ngẽma tümaarü woca i yuxü̃. Natürü ngẽma woca i yuxü̃ rü norü tá nixĩ i ngẽma woca i máetaxü̃arü yora.
Nke Ahọpụtara Ugbu A:
Ínachoxü̃xü̃chiga 21: tcaP
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2022, Wycliffe Bible Translators, Inc. All rights reserved.