Ínachoxü̃xü̃chiga 18
18
Yetrú rü Moichéxü̃tagu nanaxũane
1Rü nüma ga Yetrú ga Moichéna̱xtü rü chacherdóte nixĩ ga Madiáü̃anewa. Rü nüxü̃ nacuáchiga ga ñuxãcü Tupana rü Moichéxü̃ rü Iraétanüxü̃xü̃ nangü̃xẽẽxü̃. Rü yexgumarüxü̃ ta nüxü̃ nacuáchiga nax Tupana rü Iraétanüxü̃xü̃ ínanguxü̃xẽẽxü̃ ga Equítuanewa.
2-3Rü nüma ga Moiché rü yexguma Equítuanewa naxũxgu, rü Madiáü̃ca̱x tüxü̃ namuegu ga naxma̱x ga Chéfora rü yema taxre ga nanegü. Rü nüma ga na̱xtü ga Yetrú rü naxacüxü̃ rü ñu̱xũchi yema taxre ga nataaxü̃ nade. Rü wüxi ga yema Moiché nane rü Guerchóü̃ nixĩ ga naéga. Rü ngẽma naéga, rü “To i nachixü̃anecüã̱x chixĩ”, ñaxü̃chiga nixĩ.
4Rü yema to ga nane rü Eriéche nixĩ ga naéga yerü nüma ga Moiché rü ñanagürü: —Yimá chaunatüarü Tupana nixĩ ya choxü̃ rüngü̃xẽẽcü rü Faraóü̃arü tarawa choxü̃ ínguxuchixẽẽcü —ñanagürü.
5Rü nüma ga Moiché rü taxúema íxãpataxü̃wa nayexma ga Tupanaarü ma̱xpǘnexü̃tawa. Rü nüma ga Moichéna̱xtü ga Yetrú rü yéma naxũ ngĩmaxã ga Moiché naxma̱x ga Chéfora rü yema taxre ga Moiché nanegü.
6Rü Moichéxü̃ ñanagürü: —Choma i cu̱xtü i Yetrú rü nua chaxũ, rü cuxü̃ íchayadau ngĩmaxã i cuxma̱x i Chéfora rü ngẽma taxre i cunegü —ñanagürü.
7Rü yexguma nüma ga Moiché rü na̱xtüxü̃ nayaxu rü tümape̱xegu nanama̱xacuchi, rü tüxü̃ nachúxchametü. Rü yexguma marü nügü namoxẽgüguwena rü guma napata ga naxchirunaxca̱xgu nachocu.
8Rü nüma ga Moiché rü yéma na̱xtümaxã nüxü̃ nixu ga yema Faraóü̃maxã rü Equítuanecüã̱xgümaxã naxüxü̃ ga Tupana. Rü yexgumarüxü̃ ta nüxü̃ nixu nax ñuxãcü Tupana ínanguxü̃xẽẽxü̃ ga yema Iraétanüxü̃ nawa ga yema guxchaxü̃gü ga nüxü̃́ yexmagüxü̃ ga namawachigü ga yexguma Equítuanewa ínachoxü̃xgu.
9Rü nüma ga na̱xtü ga Yetrú rü nataãxẽ yerü ga Tupana rü Iraétanüxü̃maxã namecüma rü Equítuanecüã̱xgüme̱xẽwa Iraétanüxü̃xü̃ ínanguxü̃xẽxẽ.
10Rü yemaca̱x nüma ga Yetrú rü ñanagürü: —Name ya Iraétanüxü̃arü Tupana ya Faraóü̃me̱xẽwa rü Equítuanecüã̱xme̱xẽwa pexü̃ ínguxü̃xẽẽcü. Yerü nüma ga Tupana rü norü duü̃xü̃güxü̃ ínanguxü̃xẽxẽ naxme̱xwa ga yema chixri namaxã icua̱xgüxü̃.
11Rü ñu̱xmax rü nüxü̃ chacua̱x nax nüma ya Cori ya Tupana rü guxü̃ma i tupananetagüétüwa nangẽxmaxü̃, yerü nüma ya Tupana rü Iraétanüxü̃xü̃ ínanguxü̃xẽxẽ naxme̱xwa ga yema duü̃xü̃gü ga nagu idaucüraxü̃güxü̃ —ñanagürü.
12Rü yexguma ga nüma ga Yetrú rü wüxi ga carnéruxacü Tupanaca̱x tüxü̃ nigu. Rü yexgumarüxü̃ ta ínanagu ga togü ga ãmaregü. Rü ñu̱xũchi nüma ga Aróü̃ rü yema Iraétanüxü̃arü ãẽ̱xgacügü rü yéma Tupanape̱xewa Moiché na̱xtüxü̃tawa nayachibüe.
Moiché rü nüxü̃ naxuneta ga togü ga ãẽ̱xgacügü
(Dt. 1.9-18)
13Rü nawena ga yema ngunexü̃ rü nüma ga Moiché rü ínarüto nax yemaacü naxĩnüxü̃ca̱x rü namexẽẽãxü̃ca̱x ga yema Iraétanüxü̃arü guxchaxü̃gü. Rü yema duü̃xü̃gü rü guxü̃ma ga ngunexü̃ yexma Moichépe̱xegu nachigüecha nax Moichémaxã nüxü̃ yaxugüxü̃ca̱x ga norü guxchaxü̃ ñu̱xmata nachüta.
14Rü yexguma yemaxü̃ nada̱u̱xgu ga Moichéna̱xtü ga Yetrú rü Moichéxü̃ ñanagürü: —¿Tü̱xcüü̃ cuxicatama cunaxü i guxü̃ma i ngẽma puracü? Ngẽma duü̃xü̃gü rü pa̱xmama cuxü̃tawa naxĩ ñu̱xmata nayáuane. ¿Rü tü̱xcüü̃ cuxicatama cunamexẽxẽ i norü guxchaxü̃gü? —ñanagürü.
15-16Rü yexguma nüma ga Moiché rü na̱xtüxü̃ nangãxü̃ rü ñanagürü: —Ngẽma duü̃xü̃gü rü chauxü̃tawa naxĩ nax Tupanaarü ngü̃xẽẽca̱x íyacagüxü̃ca̱x i ngẽxguma ta̱xacürü guxchaxü̃ nügüca̱x ínangugüxẽẽgu. Rü ngẽmaca̱x nixĩ i chauxü̃tawa naxĩxü̃ nax choma chanangugüxü̃ca̱x nax texé tixĩxü̃ ya yíxema aixcümaxü̃ ixuxe. Rü ngẽxguma i choma rü nüxü̃ nüxü̃ chacua̱xẽxẽ i ngẽma mugü rü ngu̱xẽẽtaegü i Tupanaarü ixĩxü̃ —ñanagürü.
17-18Natürü nüma ga Moichéna̱xtü ga Yetrú rü ñanagürüama: —Ngẽma cuxüxü̃ rü tama name, erü düxwa tá quipa rü tá cuyapaexẽxẽ i ngẽma duü̃xü̃gü i cuxü̃tawa ĩxü̃. Ngẽma puracü rü wüxi i puracü i taxüchixü̃ nixĩ rü taxuacütáma cuxica cunaxü.
19¡Dücax, irüxĩnü i ñaa chorü ucu̱xẽ i tá cumaxã nüxü̃ chixuxü̃, rü Tupana cuxü̃ rüngü̃xẽxẽ! ¡Rü cuma rü Tupanape̱xewa nüxü̃ ixu i ngẽma duü̃xü̃güarü guxchaxü̃gü!
20¡Rü ngẽma duü̃xü̃gü rü nangúexẽxẽ i ngẽma Tupanaarü mugü rü norü ngu̱xẽẽtaegü rü namaxã nüxü̃ ixu nax ñuxãcü tá namaxẽxü̃ rü ta̱xacü tá naxügüxü̃!
21¡Rü Iraégütanüxü̃wa yadexechi i yatügü nax curü ngü̃xẽẽruü̃gü yaxĩgüxü̃ca̱x! ¡Rü naxca̱x nadau i duü̃xü̃gü i nüxü̃ cua̱xgüxü̃ rü Tupanaga ĩnüexü̃, rü tama idorata̱xagüxü̃, rü tama diẽruca̱xmare daugüxü̃! Rü nüxü̃ naxuneta i ñuxre nax 1,000 i duü̃xü̃gümaxã inacúachigüxü̃ca̱x, rü togü i 100 i duü̃xü̃gümaxã inacúachigüxü̃ca̱x, rü togü i 50 i duü̃xü̃gümaxã inacúachigüxü̃ca̱x, rü togü i 10 i duü̃xü̃gümaxã inacúachigüxü̃ca̱x.
22Rü nümagü i ngẽma duü̃xü̃gümaxã icua̱xgüxü̃ rü tá nanamexẽẽgü i ngẽma guxchaxü̃gü i tauxchaxü̃. Natürü ngẽxguma nangẽxmagu i guxchaxü̃gü i guxchaxüchixü̃ nax namexẽẽxü̃ rü cumaxã tá nüxü̃ nixugü nax cuma cunamexẽẽxü̃ca̱x. Rü ngẽmaãcü tá cuxü̃́ natauxcha i ngẽma puracü, erü nümagü tá cuxü̃ narüngü̃xẽxẽ.
23Rü ngẽxguma chi ngẽmaãcü cunaxü̱xgu rü chi Tupana naxwa̱xegu, rü taxũchima quipa rü taãẽãcü chi napataca̱x nawoegu i ngẽma duü̃xü̃gü —ñanagürü ga Yetrú.
24Rü nüma ga Moiché rü na̱xtüga naxĩnü rü nanaxü ga guxü̃ma ga yema namaxã nüxü̃ yaxuxü̃.
25Rü nayadexechi ga yema Iraétanüxü̃ ga iyatüxü̃ ga yexera cua̱x nüxü̃́ yexmagüxü̃ nax yemaacü namaxã inacua̱xgüxü̃ca̱x ga 1,000 chigü, rü 100 chigü, rü 50 chigü, rü 10 chigü ga duü̃xü̃gü.
26Rü yemagü nixĩ ga guxü̃guma duü̃xü̃güaxü̃́ namexẽẽxü̃ ga norü guxchaxü̃gü. Rü yema guxchaxü̃gü ga guxchaxüchixü̃ rü Moichéme̱xẽwa nanangegü, natürü yema guxchaxü̃gü ga tauxchaxü̃ rü nümagütama nanamexẽẽgü.
27Rü yemawena rü nüma ga Moiché rü na̱xtü ga Yetróxü̃ narümoxẽ. Rü nüma ga Yetrú rü nachixü̃aneca̱x nataegu.
Nke Ahọpụtara Ugbu A:
Ínachoxü̃xü̃chiga 18: tcaP
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2022, Wycliffe Bible Translators, Inc. All rights reserved.