Ínachoxü̃xü̃chiga 15
15
Moiché rü Iraétanüxü̃ rü Cori ya Tupanaxü̃ nicua̱xüü̃gü
1Rü yexguma ga Moiché rü yema Iraétanüxü̃ rü Cori ya Tupanaxü̃ nicua̱xü̃gü namaxã ga ñaa wiyae, rü ñanagürügü:
—Choma rü tá chawiyae rü tá nüxü̃ chicua̱xüxü̃ ya Cori ya Tupana erü nüxü̃ narüporamae i tórü uanügü rü ngẽmaca̱x márgu nanayixẽxẽ i ngẽma churaragü rü norü cowarugü.
2Nagu chawiyae ya Cori ya Tupana erü nüma nixĩ i choxü̃ naporaxẽẽxü̃ rü choxü̃ namaxẽẽxü̃.
Rü nüma nixĩ i chorü Tupana yixĩxü̃ rü ngẽmaca̱x nüxü̃ chicua̱xüxü̃.
Rü nüma rü chaunatüarü Tupana nixĩ, rü ngẽmaca̱x chanataxẽxẽ.
3Rü nüma ya Cori ya Tupana nixĩ i daiwa naporaxü̃.
Rü Cori ya Tupana nixĩ i naéga.
4Rü nüma nixĩ ga márgu nayixẽẽãxü̃ ga Faraóü̃arü carugü rü churaragü.
Rü yexma Már ga Dauchíüxü̃gu nanayixẽxẽ ga yema nüxü̃ rücua̱xmaegüxü̃ ga Equítuanearü churaragüeru.
5Rü ñoma nuta yaxĩgüxü̃rüxü̃ yexma mártamagu nayi.
6Pa Cori ya Tupanax, cuma nixĩ i curü tügünechacüxü ya poranemaxã cunada̱i̱xü̃ i torü uanügü.
7Rü curü poramaxã cunadai i ngẽma cumaxã nügü nadaixchaü̃xü̃.
Namaxã cunu rü ñoma pacü ya maxẽ ixaxü̃rüxü̃ cuyaxĩgüxẽxẽ.
8Rü curü poramaxã nüxü̃ cucue ga dexá rü taxregu nixüye.
Rü gumá yuape rü ñoma ĩxtapü̱xrüxü̃ nixĩ.
Rü ínayachaxãchi ga dexá norü ngãxü̃tamawa.
9Rü ngẽma uanü rü norü ĩnüwa rü ñanagürü:
“Nawe tá change ñu̱xmatáta nüxü̃ ichayangau.
Rü ngẽxguma nüxü̃ ichayangauxgu rü tá chanayaxu i chorü tara rü chorü poramaxã tá chayama̱x.
Rü nüxna tá chanapuxü̃ i guxü̃ma i norü ngẽmaxü̃gü i chanaxwa̱xexü̃.
Rü tá ichayanu i ngẽma nüxna chapuxü̃xü̃”, ñaxü̃gu narüxĩnü.
10Natürü i cumax, Pa Cori Pa Tupanax, rü curü poramaxã nüxü̃ cucue ga már rü yema dexá rü naétü niñaxü̃chiü.
Rü yexma nayi ñoma mucawachirerüxü̃.
11Pa Chorü Cori ya Tupanax, rü ngẽma duü̃xü̃gü namaxã tupanaã́xü̃tanüwa rü nataxuma i ta̱xacü i cumaxã wüxiguxü̃.
Rü nataxuma i ta̱xacü i cuxrüxü̃ üünexü̃ rü nüxü̃ cua̱xüchixü̃.
Rü cuma cunaxü i ngẽma mexü̃gü i duü̃xü̃gü poraãcü namaxã baixãchiexü̃.
12Rü icunawe̱x ga curü pora rü yemaca̱x torü uanügüétügu nayagoxü̃chiü ga dexá ñoma waixü̃mü ínagagüxü̃rüxü̃.
13Rü ngẽma toxü̃ nax cungechaü̃xü̃gagu mea tomaxã icucua̱x rü Equítuanecüã̱xgüme̱xẽwa toxü̃ ícunguxü̃xẽxẽ.
Rü curü poramaxã tá toxü̃ quigagü nawa i ngẽma naane i mexü̃ i tomaxã icuxunetaxü̃.
14Rü ngẽxguma tá ngẽmaxü̃ nacuáchigagügu i ngẽma nachixü̃anegü rü tá muü̃maxã nidu̱xrue.
Rü ngẽma Firitéugü rü tá poraãcü namuü̃e.
15Rü ngẽma Edóü̃anearü ãẽ̱xgacügü rü tá namuü̃e, rü ngẽma Moáanearü ãẽ̱xgacügü rü tá muü̃maxã nidu̱xrue.
Rü guxü̃ma i ngẽma Canaáü̃anecüã̱xgü rü norü muü̃maxã tá nibuxmü.
16Pa Cori Pa Tupanax, ¡ínaba̱i̱xgüe rü muü̃ nawa nanguxẽxẽ!
¡Rü curü poramaxã ñoma nutagürüxü̃ yaxĩgüxẽxẽ ñu̱xmatáta nachopetü i ngẽma Iraétanüxü̃ i curü duü̃xü̃güxü̃ cudexü̃!
17Pa Chorü Tupanax, ¡nawa toxü̃ nagagü ya yima ma̱xpǘne ya üünene nax ngéma tangexmagüxü̃ca̱x rü ngẽma naane i cumatama nüxü̃ cuxunetaxü̃ nax ngẽmawa tamaxẽxü̃ca̱x, rü nawa ya yima cupata ya cumatama cuxüxü̃ne!
18Pa Chorü Tupanax, cuma rü guxü̃gutáma ãẽ̱xgacü quixĩ
—ñanagürügü ga norü wiyaewa.
Maríaarü wiyae
19Rü yexguma márwa yachoü̃guchaü̃gu ga Faraóü̃arü carugü rü cowarugü, rü nüma ya Cori ya Tupana rü nügüna nanaxĩxü̃chíüxẽxẽ ga yema dexá. Rü yexma nanayixẽxẽ ga guma carugü rü cowarugü. Natürü nüma ga Iraétanüxü̃ rü paanemarexü̃wa nichoü̃.
20Rü yexguma ngĩma ga María ga Aróü̃eya̱x ga Tupana ngĩmaxã idexacü rü inayaxu ga wüxi ga panderu rü ipaxeta rü iwiyae. Rü yexgumarüxü̃ ta ga yema naigü ga ngecügü rü inapaxgü ga panderugü rü íyaxü̃ãchitanüxü̃.
21Rü ngĩma ga María rü yoxni nagu iwiyae ga ñaxü̃ ga wiyae:
—Nüxü̃ picua̱xüü̃gü ya Cori ya Tupana yerü narüporamae,
rü márgu nanayixẽxẽ ga cowarugü rü duü̃xü̃gü ga nagu ĩxü̃
—ñaxü̃gu iwiyae ga María.
Dexá i üxchiüxü̃chiga
22Moiché rü yema Iraétanüxü̃maxã yema Már ga Dauchíüxü̃na nixĩgachi. Rü chianexü̃ ga Chúxgu ãégaxü̃wa naxĩ. Rü tomaepü̱x ga ngunexü̃ inaxĩ rü tama dexáxü̃ inayangaugü.
23Rü yexguma Maráwa nangugügu, rü yexma dexáxü̃ inayangaugü, natürü taxucürüwama nawa naxaxegü yerü naxüxchiü. Rü yemaca̱x nixĩ ga Marágu naxüégagüãxü̃ ga yema nachica.
24Rü nüma ga duü̃xü̃gü rü inanaxügüe nax chixri Moichéchiga yadexagüxü̃. Rü nüxna nacagüe rü ñanagürügü: —¿Ta̱xacüwa tá ítaxaxegüxü̃? —ñanagürügü.
25Rü yexguma ga Moiché rü Cori ya Tupanaarü ngü̃xẽẽca̱x ínaca. Rü nüma ga Tupana rü Moichéxü̃ nanawe̱x ga wüxi ga naixacü ga metanüxü̃. Rü nüma ga Moiché rü nanawoochi ga yema naixacü rü natüchiüwa nanatae. Rü yemamaxã nüxü̃́ inayarüxo ga nax naxüxchiüxü̃ ga dexá. Rü yéma nixĩ ga Tupana ga Iraétanüxü̃xü̃ naxüxü̃ rü nüxna naxããxü̃ ga norü mugü nax yemaacü tá mea naxca̱x namaxẽxü̃ca̱x.
26Rü Tupana rü ñanagürü nüxü̃: —Ngẽxguma chi ipexĩnüegu i ngẽma pemaxã nüxü̃ chixuxü̃, rü penaxü̱xgu i ngẽma namaxã chataãẽxü̃, rü naga pexĩnüegu i ngẽma chorü ucu̱xẽgü, rü peyanguxẽẽ̱xgu i ngẽma mugü, rü taxuxü̃táma núma pexca̱x chanamu i ngẽma da̱xaweanegü ga Equítuanecüã̱xgüca̱x yéma chamuxü̃. Erü choma nixĩ i perü Cori ya Tupana i pexü̃ charümeexẽẽxü̃ chixĩxü̃ —ñanagürü.
27Rü yemawena rü wüxi ga nachica ga Eríü̃wa nangugü. Rü yéma nayexma ga 12 ga puchu rü 70 ga moru. Rü yexma dexáxü̃tagu napegü.
Nke Ahọpụtara Ugbu A:
Ínachoxü̃xü̃chiga 15: tcaP
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2022, Wycliffe Bible Translators, Inc. All rights reserved.