Engaado 2
2
Emikabo ky'amakesi
1Mwaana waange, noota omwooyo hu mboosi chaange,
mani wadiira amalako kaange mu bulamu bwao,
2noowuliraanga emboosi ch'amakesi,
haandi omwooyo kwao nikuteemaho ohubimanya;
3eee, niwekongooya ohunyoola amakesi
haandi wasiingisa ekono lyao aakulu ohunyoola ohumanya,
4nokoonya amakesi koti lu wahakoonya efeesa
mani wakakoonya koti lu wahakoonya engaanga yakiswa;
5ao mani wahamanye ohutya Omwaami
haandi wahanyoole ohumanya Nasaae.
6Olwohuba Omwaami niye oberesa amakesi;
ohumanya neende ohuchwichwiisa, ebitula mu munwa mwae;
7abiihira abaluungifu amakesi kadyeeri;
mani yaliinda abo abebwaaba ohwonoona,
8anyale ohuliindaanga obwadyeeri
haandi ohulehaangao abo abahola bi adaha.
9Ao mani ochia ohumanya obuluungifu neende obwadyeeri
neende obutakwiira omuundu, neende buli siindu sy'ohoyera ohuhola;
10olwohuba makesi achia ohwiicha mu mwooyo kwao,
haandi ohumanya huchia ohusaangaasa obulamu bwao.
11Ohubaasa bulai huchia ohuhuliinda;
ohumanya huchia ohuhuliinda;
12huhuwonie ohuhola ebiindu bibi,
huhuwonie abaandu balomaloma ebiindu bidoondobania abaandu.
13Abo abalehana neende engira ch'obuluungifu
hu bakeendere mu ngira ch'esiirima,
14abasangaalira mu huhola ebyonoono
haandi abeehoyera mu budoondobanu bw'ebibi;
15abaandu bahyaamu
haandi abataali neende obweesikwa.
16Ochia ohuwona omuhasi mucheke,
oteemaho ohuhusendaseenda neende ahalimi hae halai.
17Omuhasi w'engeri eyo aleka omusaacha wae wo buraaga
mani yeebirira bi Nasaae yawulirisania nae.
18Ohuchia mu nyuumba yae, oba wekoonyera emakoombe,
engira chae chihuyira mu hufwa;
19Abulao owamukeniya yaakobola naali bulai
noomba baakobola hu ngira y'obulamu.
20Mani loondakanaanga neende esyohuboneraho sy'abaandu balai
haandi liindaanga esaambo ch'abaandu baluungifu.
21Olwohuba abaluungifu nibo abachia ohuyira esyaalo,
haandi abasaacha batali badoondobanu nibo abachia ohudoong'a mu syaalo.
22Nae abahola-mbi bachia ohumalwa hu syaalo,
haandi ababi bachia ohwiiywamo koti lu baheeya ebilime mu loba.
©Bible Society of Kenya, 2019
©Bible Society of Uganda, 2019