Kaabka 26
26
1<< <Ni kan nye bɔgta yaase ni ti ŋanmɛɛnta a zaani yaase tuilum tintana a te ni dega, abe ni ka peesi tintain ni tɛŋka po a koori a zuli. Mi ale Naawen ni Wenni.
2<< <Ni kpesi a zuli mi Vuusum daaŋa abe ni a zuli m yenni. Mi ale Naawen.
3<< <Ni daa va m ŋmarisika ale kpesi a chali m buusaŋa, 4m le basi ate ŋmoruk a jam diipo ale magsi ku jam la, ate tɛŋka ŋanborintaŋa a bɛ abe tiisaŋa a yɔni yɔna. 5Ni le kasim a fɔbi ŋanta ka dila a ga paari, yɔna gbesika, ate yɔna gbesika a kasim boro dila a ga paari ŋanta borika. Ni le dɛ ŋandiin tii meena ate ni a yaali la abe ni bo tɛŋka po sɔŋsɔŋŋoa.
6<< <M le basi ate suiyɔgni a bo tɛŋka po, ate ni doa ale ge waai a kan nye ate yɔgsum a yik ni. M le yeeri gɔi duŋsa tɛŋka po, ate gebik a kan va ni tɛŋka po a taamu. 7Ni le vi ni dachaasa, a ko ale gebik a lɔnsi ni niŋ. 8Ni nuruba banu ale vi nuruba kook, ate ni nuruba kook a vi nuruba tusa pi (10,000), ate ni dachaasaŋa a lo ni niŋ.
9<< <M le nya ni zuk ale ŋmanteka abe m basi ate ni biak a pusi, abe m ta m nɔiyeŋka ale ni. 10Ni le diem a dɛ ka diim benni ŋandiinta alege ku magsi ni yeeri ba abe le ge suik a nyo ŋan paala du. 11M le pai m viuku a basi ni suŋsuŋ, m be kan kisi ni. 12M le kasim a cheŋ ni suŋsuŋ, abe m chim ni Wen, abe nama mɛ a chim m nuruba. 13Mi ka Naawen ni Wenni, waai ale ta ni nyini Ejipiti a nyini ayen ni kan ŋman chim Ejipiti yɔmma. Mi wɛ da tii ale a nye ase niiga daata la kama alege basi ate ni baga a zak ni zuima ŋmai.
14<< <Alege ni dan kan wom mi ale ta sinsaŋŋa de meena 15ale zɛri m ŋmarisika ale kisi m buusaŋa an va m wieŋa meena ale a zuli m nɔiyeŋka, 16M nin nye ni diila ale nna: M le ta yɔgsum a jam diiri ni. M le ta nyiŋtuila ale nyiŋ toliŋka ate ŋa kaasi ni nyaasim ale kaasi ni boka. Ni le bori kinla, dii nyiŋla ni dachaasaŋa ale dɛ. 17M le pai m nina a dueni ni zuk ate ni dachaasaŋa a nak dɛ ni. Baai ale kisi ni la ale ba a nya ni zuk ate ni a chali alege waai a kan vi ni.
18<< <Ŋade meena ŋaaŋnyiŋ ni dan kan wom mu, m le namsi ni ni biemu nyiŋ ku nɔi buyopɔi. 19M le kaasi ni tukpari kanjantaŋa abe m basi ate wenzukku a nye ase kutuk la, abe tɛŋka a nye ase kutuk mɔnuŋ la. 20Ni le pai ni pagrim a tom kinla dii nyiŋla ni tɛŋka a kan nye ŋandiinta, yaase tɛŋka tiisaŋa yɔni yɔna.
21<< <Ni dan kasim kisi mi ale zɛri kan wom mu, m le basi ate ni ninammu a piisi ku nɔi buyopɔi a magsi ni biemu. 22M le basi ate gɔi duŋsa a jam ta chaab ale ni ate si vari ni bisaŋa, abe si kaasi ni niiŋa, a basi ate ni pɔsima ate ni manpalaŋa a wari doa.
23<< <Wieŋa de meena ni dan kaa siak mi sinsaŋŋa alege kasim kisi mu, 24mi dek le namsi ni ni biemu nyiŋ ku nɔi buyopɔi. 25M le ta gebik a jam ni zuk a tuni ni le kaasi nɔiyeŋka la. Ni dan yeeri nidek a jo tɛŋsaŋa po, m le te daanika a jam ni suŋsuŋ, a pai ni nyo ni dachaasaŋa nisa po. 26Ase m dan gebi ni boroboroku a basi, nipooba pi ale baga a nye ni boroboroku dɔk yeoŋ po. Ba le chari ku a magsi ku dobrim. Ni le ŋɔbi ku alege ni kan chagi.
27<< <Alege dila meena ni dan kan diem a wom mu alege diem kisi mu, 28m suipuurum po m le kisi ni, ate mi dek namsi ni ni biemu nyiŋ ku nɔi buyopɔi. 29Ni le ŋɔbi ni nidoabilisaŋa ale ni liema nyiŋsaŋa. 30M le kaasi ni bɔgluk kpientaŋa, abe m kaasi ni ŋan baai nyum ale masa la kuŋkuŋtaŋa abe m tigsi ni kpiema a vi bɔgluk tii ale kan ta nyuvuri la zuk, abe m kisi ni. 31M le basi ate ni tɛŋsaŋa a tulim kaasi abe ni tuka jiŋŋa a doa kinla. M niŋ kan bo ni ŋan baai nyum ale masa la tiiritaŋa po. 32M le basi ate tɛŋka a doa kinla, ate ni dachaasaŋa ale bo dula la ku kan nye ba masimmoa. 33M le basi ate ni waaŋ tɛŋsaŋa meena abe m yeeri m gebika a vi ni. Ni tɛŋka ale doa kinla, abe ni tɛŋsaŋa a kaasi meena a doa. 34Ate tɛŋka ale nya ka Vuusum benaŋa masim diipo meena ate ka doa kinla la, alege ate ni bo ni dachaasaŋa tɛŋka la. Tɛŋka yaa le vuusi abe ka nya masim Vuusum benaŋa po. 35Diipo meena ate tɛŋka doa kinla la, tɛŋka ale vuusi vuusum buui ate ka an vuusi Vuusum benaŋa ate ni jam bo ka po la.
36<< <Baai ale tali la, m le basi ate yɔgsum yik ni ni dachaasaŋa tɛŋsaŋa po ate ni dan poom wom viok choaka ni le chali. Ba le chali ase ba nya gebik a chali la. Ba be ni lo alege waai a kan vi ba. 37Ba le chali a nak chaab ase ba nya gebik a chali a bɛ la, alege waai a kan vi ba. Ni kan baga a zaani ni dachaasaŋa niŋŋa. 38Ni le kpi tɛŋsaŋa po, ni dachaasaŋa tɛŋsaŋa ale kaasi ni. 39Ni baai ale tali la, m le yuk ni basi ni dachaasaŋa tɛŋsaŋa po ni wabaataŋa nyiŋ. Ni koma wabaataŋa mɛ nyiŋ m le yuk ni a basi.
40<< <Alege ba dan siak a weeni ba wabaataŋa ale ba koma wabaataŋa, ale ba le kan ta sui ale mu la, ale ta chaab ale mu la, 41ate dila basi ate mi mɛ a ta chaab ale ba a basi ate ba cheŋ ba dachaasaŋa tɛŋka la ate ba yik badek a tagri ba suiniimaŋa a tuni ba wabaataŋa, 42M le teeri nɔiyeŋka ale Jekob ale Aizik ale Abrayam abe m teeri tɛŋka wari. 43Diila tɛŋka ba le zɛri ka ate ka nya masim Vuusum benaŋa po, diipo ate ka doa kinla alege ate ba karo la. Ba le tuni ba wabaataŋa dii nyiŋla ba zɛri mi buusaŋa kama ale kisi mi ŋmarisika. 44Alege kude ba dan poom bo ba dachaasaŋa tɛŋka, m kan zɛri ba yaase m kisi ba ayen m ko ba meena chessi a kaasi m nɔiyeŋka ale ba. Mi ale Naawen ba Wenni. 45Alege ba nyiŋ m le teeri m nɔiyeŋka ale ba kokpieŋsaŋa baai ate m ta ba nyini Ejipiti a nyini tɛŋsa nimbie po ayen m chim ba Wen la. Mi ale Naawen.
46Ŋmarisika ale buusaŋa ale sinsaŋŋa ale nna ate Naawen a ta va Moosis a te Sinai Guuku zuk ate ŋa bo wadek ale Izirali demma suŋsuŋ la.
Nke Ahọpụtara Ugbu A:
Kaabka 26: BWU
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2023, Ghana Institute of Linguistics, Literacy and Bible Translation