Kaabka 23
23
1Naawen a ŋman biisi ale Moosis ayen, 2<<Biisi ale Izirali demma a weeni ba ayen, <Naawen a lueri ka daa ayen ni pai te wa tuilum tigsuŋtaŋa. Da ŋala abe le nna:
3<< <Daa ŋayuebi ni pai tom tuima, alege daa ŋayopɔiwa danni ka kisuk ale ŋman chim Vuusum dai waai kan tom tuini. Ku ka tuilum tigsuŋ a te Naawen kauk kuui meena ate ni boro la.
4<< <Daaŋa de ate Naawen a te ni la. Ŋa ka vuusum daa ate wa te ni ayen ni a zuli wa ase da ŋala a nin paari. 5Piilimka chiika ka daa pi ale ŋanaansiwa danni ka Naawen Gaambasika tigini dai. 6Chiik kala dek ka daa pi ale ŋanu wa danni ka boroborok kuui ate ba an nyo dabinta dula tigi dai a te Naawen. Daa ŋayopɔi dai ni ŋɔbi boroborok kuui ale kan ta dabinta la. 7Piilim ka danni ni nye tuilum tigsuŋ, ni kan tom tuin pagri. 8Alege daa ŋayopɔi ni nye juka kaabka tiirim a te Naawen. Daa ŋayopɔiwa danni ni nye tuilum tigsuŋ, ni kan tom tuin pagri.> >>
9Ate Naawen a biisi ale Moosis ayen, 10<<Wa biisi ale Izirali demma ayen, <Ni dan jo tɛŋ kaai ate mi a yaali m te ni la po a che ka ŋantaŋa, ni ta ŋan baai ale dɛ niŋ a bɛ la jam te kaabteerɔwa. 11Wa yaa le zak tiirimu a sak Naawen ate wa tuesi bu. Kaabteerɔwa a nye dila ka da dii ale pa a saŋ Vuusum danni la. 12Dai dii danni ate ni te ŋandiin tii ale dɛ niŋka bɛ la tiirimu la, ku a magsi ka ni yik padiak kaai ale ta bein yeŋ la ale kan ta jomi la a nye juka kaabka a te Naawen. 13Wa ŋandiintaŋa tiirimu mɛ wa pai zom a sueri taasa ŋanaansi a pai kpaam a dam du a nye juka tiirim a te Naawen ale nyuka tiirim ale daam. 14Dai dila danni fi dan kan te Wen tiirimu fi kan dɛ ŋandiinta yaase fi ŋɔbi jabuui ale se bolim po la. Ku ka ŋmarisika a te ni gaŋsa meena kauk kuui ate ni boro la.
15<< <Nama mɛ dek magsi ka ni a chiimu a nyini daa dii ale pa a saŋ Vuusum danni la, dai dii danni ate ni te tiirimu la ate ku ga paari vuusum daa ŋayopɔi. 16Ni chiim a nyini daa pisinu a ta nyini dai dii ale pa a saŋ Vuusum da daa ŋayopɔiwa la, ni yaa ŋman pilim nye ŋandiin paala tiirim a te Naawen. 17Ni yaa ta borobotta tiye tii ate ba pai kpaam kolini geli a nye la a nyini ni yeeŋa a jam zak sak Naawen. Ni pai boroborok kuui ate ba pai zom naliŋ ale dabinta ase yɔna ŋaai ale dɛ niŋ a bɛ la te Naawen. 18Fi dan ta boroboroku cheena maa ta padaasa siyopɔi sii ale ta bein yeŋ ale kan ta jomi la ale lalik ale piisa ŋaye. Ni ju ba a te Naawen ale ŋandiinta tiirimu ale nyuka tiirimu ni ju ba meena ate nyummu a masa a te Naawen. 19Ku a magsi ka buuk sari a nye biem tiirim kaabka abe wa pai padaasa siye sii ale ta bein yeŋ la mɛ a nye suiyɔgni tiiritaŋa kaabka. 20Kaabteerɔwa a yaa le zak boroboroku ate ba nye a ta nyini ŋandiin tii ate ba dɛ niŋ nya la po ale padaasa siye a sak Naawen ase tiirim la ŋantaŋa ate kaabteerɔwa a te Naawen a magsi ka ba ta tuilum. 21Da dila danni dek ni mooli nalimnyiini ayen danni de ka tuilum tigsuŋ dai. Ni kan tom tuin pagri. Ŋmarisika de a magsi ka nama ale ni gaŋsaŋa meena kauk kuui meena ate ni a boro la.
22<< <Ase ni dan che ale pisi ni ŋantaŋa ni tɛŋka po, ni kan che abe ni pisi jaab meena ni tattaŋa po yaase ni yiisi ba meena. Ni tali ba a te niwomma ale nichamma ka Mi ale Naawen ni Wenni.> >>
23Naawen a ŋman biisi ale Moosis ayen, 24<<Wa biisi ale Izirali demma ayen, <Chiisa siyopɔi wa po, dai dii ale dɛ niŋka la ni vuusi jabuui ale ku basi ate ni teeri la ale nna, ni dan wom ale damunsa a peeri, ni seba ayen ka tuilum tigsuŋ dai. 25Ni kan tom tuin pagri alege ni nye juka tiirim a te Naawen.> >>
26Naawen a biisi ale Moosis ayen, 27<<Chiisa siyopɔiwa de po ka daa piika danni ka biem duisi basika dai. Di magsi di chim ka tuilum tigsuŋ dai a te ni. Ni be zɛri nidek a nye biem duisi basika a te Naawen. 28Ni kan tom tuini danni de po ale di ka biem duisi basika dai ayen ni nye biem duisi basika nidek nyiŋ a te Naawen ni Wenni. 29Nuru waai a dan kan ta wadek a siŋ tɛŋa danni de po, ni yeeri wa a ta nyini wa nuruma po a nyini. 30Alege waai ale a zɛri ale tomu tuini danni de po la, nuru wala m le ko wa kama. 31Ni kan bola a tom tuini danni de po. Ŋmarisika de a magsi ka nama ale ni gaŋsaŋa meena kauk kuui meena ate ni a boro la. 32Di magsi di chim ka kisuk ale Vuusum dai a te ni. Ni zɛri nidek chiika ka da neokku danni wenbalinni geŋsa. A zaani wenbalinni a ŋman ta ga paari wenbalinni ni kasim a teeri kisukku danni.>>
33Naawen a ŋman biisi ale Moosis ayen, 34<<Wa biisi ale Izirali demma ayen, <Chiik kaai ale saari siyopɔi la ka daa pi ale ŋanuwa danni ni pai nye Viita Tigini ate ku paari daa ŋayopɔi a te Naawen. 35Dai dii ale piilim la ka tuilum tigsuŋ dai. Ni kan tom tuin pagri. 36Daa ŋayopɔi ni nye juka tiirim a te Naawen. Daa naanika danni ni nye tuilum tigsuŋ a yaa nye juka tiirim a te Naawen, ku ka tigsuŋ. Ni kan tom tuin pagri.
37<< <Daaŋa de ale da ŋaai ate Naawen a lueri ayen ni mooli ayen ŋa ka da weleŋsa la, ate ni pai ŋala a nye juka kaabka ale ŋandiinta kaabka ale nyuka kaabka tiirim a te Naawen. Ni pai dai yeŋ meena a nye dila. 38Tiiritaŋa de a gum chaab ale ka Naawen Vuusum Daaŋa kaabka tiirimu ale nidek yaalika tiirimu ale ni le pɛ ayen ni te tiirim buui la ale ni cheesika tiirimu ate ni te Naawen la.
39<< <Chiik kaai ale saari siyopɔiwa la ka daa pi ale ŋanuwa danni ni dan tigsi ŋandiintaŋa ni tɛŋka po ni pai daa ŋayopɔi a dɛ Naawen tigini abe dai dii ale piilim la da naanika danni ni vuusi. 40Da dii ale dɛ niŋka la yaali yɔna ŋaai ate fi a yaali yegayega la ale kpinkpatta vaata ale saŋsa a ta ga yuk ate ku sak ayen fi sui a peenti kama ni le boa dɛ tigini la. 41Ni de ku ase tigi la a te Naawen daa ŋayopɔi bein meena po. Ŋmarisika de a magsi ka nama ale ni gaŋsaŋa meena kauk kuui meena ate ni a boro la. Ni dɛ di chiisa siyopɔiwa po. 42Ni bo ni viitaŋa po ate ku paari daa ŋayopɔi. Baai meena ale ka Izirali dem la a bo ba viitaŋa po, 43ate ni buuni po meena a seba ayen m basi ate Izirali demma meena a bo ka viita po m ta ba nyini Ejipiti po a jam basi ka viita po. Mi ale Naawen ni Wenni.> >>
44Moosis a jam weeni Izirali demma da ŋaai ate Naawen a te ba la kama.
Nke Ahọpụtara Ugbu A:
Kaabka 23: BWU
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2023, Ghana Institute of Linguistics, Literacy and Bible Translation