Kaabka 22
22
1Naawen a biisi ale Moosis ayen, 2<<Weeni Aaron ale wa nidoabilisaŋa ayen ba kpesi badek a zuli tuilum tiirimu ate Izirali demma a gaari a te mi la, ate ba kan kaasi mi tuilum yuenni. Ka Mi ale Naawen.
3Weeni ba ayen, <Ŋaaŋbiik sii meena ale bo ŋaaŋ cheena la, ase ni gaŋsaŋa po waai a dan daŋ wadek ale cheŋ moata tiirim tii ale ta tuilum la ate Izirali demma a gaari a te Naawen la, kula nyɔnɔwa ku a fɛ ate ba yeeri wa a ta nyini Mi jigi. Ka Mi ale Naawen.
4<< <Nuru waai a dan nyini Aaron dɔkku po a ta nyiŋ gbaŋ tuem ate bu a chɔgsi yaase sim a nyini wa nyiŋka, wa kan dɛ tuilum tiirimu ŋandiintaŋa a ta ga paari diipo ate wa ale nala la. Wa daŋ kama ase wa nin tiri jabuui ate jakpiuk a taŋ la yaase waai ate sim a nyini wa nyiŋla, 5yaase wa nin tiri jabuui ale a kuuk ate dila a basi ate wa daŋ yaase nuru waai a nin nye ate wa daŋ. Ase wa daŋtaŋa a nin poom ka dii. 6Nuru waai ale tiri ŋantaŋa de la, a daŋ kama ate ku ga paari wen siŋka. Wa be ka suik a dɛ tuilum tiirim ŋandiintaŋa ka wa nin so wa nyiŋka. 7Alege wenbinni a dan siŋ, wa yaa ka nuru waai ale nala. Kula ŋaaŋnyiŋ wa baga a dɛ tuilum tiirimu ŋandiintaŋa kama, ba ka wa ŋandiinta. 8Wa kan ŋɔbi duŋ kaai ale kpi la yaase duŋ ka choa a ko ka la. Wa le chim ka waai ale daŋ wadek ase wa nin ŋɔbi ka. Ka Mi ale Naawen.
9<< <Kaabteerɔma abe ta m le weeni diila, ate ba kan nye kaasi ate ba kpi ba ni kaasi dii ate m weeni la nyiŋŋa. Ka Mi ale Naawen dii ale basi ate ba nye cheeri la.
10<< <Nuru waai ale kan nyini kaabteerɔma dɔkku po la an magsi ba dɛ tuilum tiirimu ŋandiintaŋa yaase kaabteerɔwa nichaanɔ yaase wa tuimtomdɔ a dɛ ti. 11Alege kaabteerɔwa a dan da yɔma ale ligra yaase ba biak yɔmawa yenni po, yɔma wala a baga dɛ wa ŋandiintaŋa kama. 12Ase kaabteerɔ lie a dan yali waai ale kan daa kaabteerɔ la, wa mɛ a ka suik a dɛ tiirim ŋandiintaŋa. 13Alege kaabteerɔ lie a dan chim pukɔgi yaase wa basi wa chorɔwa alege ka biik mɛ, ale ŋman kuli wa kowa yenni ale diem paala, wa baga a dɛ wa kowa ŋandiintaŋa kama. Alege waai ale kan daa kaabteerɔ la an baga dɛ ti.
14Alege nuru a dan dɛ tuilum tiirim ŋandiintaŋa alege zɛ, ku a magsi ka wa le dɛ diila wa te dila dekdek ate ku paari bunu a yaa pai tuilum tiirimu a te kaabteerɔwa. 15Ba kan kaasi tuilum tiirim buui ate Izirali demma a te Naawen la, 16abe ba namsi ba kaasuŋku nyiŋŋa ase ba le dɛ tuilum ŋandiintaŋa nyiŋŋa, ale ka Mi ale Naawen dii ale basi ate ba ta tuilum la.
17Naawen a yaa biisi ale Moosis ayen, 18<<Biisi ate Aaron ale wa nidoabilisaŋa ale Izirali demma meena a weeni ba ayen, <Nuru waai a dan nyini Izirali demma po yaase wa ka nichaanɔ a bo Izirali demma po waai ale te wa tiirim ku dan poom ka cheesika yaase badek yaalika tiirim ate ba pai te Naawen ase juka tiirim, 19buui ale bu basi ate wa nye vɔŋteka la, ku a magsika wa ta lalik yaase padiak yaase buduk kuui ale kan ta jomi la. 20Jaabuuri meena ale ta jomi la ni kan pai wa te, Naawen a kan tuesi tiirimu. 21Ase nuru a dan nye suiyɔgni tiirim kaabka a te Naawen ayen wa te wadek yaalika tiirim ase wa le puulim ayen wa te duŋ la. Duŋka a magsi ka kan ta jomi ya ate Naawen a tuesi ka. 22Duŋ sii ale kaa nya la yaase ka naŋ wɛ yaase ka gbariŋ yaase ka ta noruk ate nyam a nyini yaase kaai nyiŋ ale zagsa yaase kaai ale ta lauŋta la, ni kan pai ka a nye kaabka ate Naawen yaase ni pai sila kanyi a nye juka kaabka kuŋkuŋku zuk ate Naawen. 23Fi baga a yik padiak kaai yaase buduk kuui ale pagi la yaase ku koani la a te ase tiirim la kama alege dan ka pumpuulima ate fi nye Naawen a kan tuesi. 24Alege duŋ kaai kola ale gebi yaase ba je ka la ni kan pai ka a te Naawen yaase ni pai kala choa a nye kaabka ni tɛŋka po, 25yaase ni tuesi jaab ase dila la nichaanɔ jigi ase ŋandiinta la a te ni Wenni. Dii nyiŋla si daŋtaŋa a diem bo si po kama. Si an welema Naawen a kan tuesi si a te ni.> >>
26Naawen a ŋman biisi ale Moosis ayen, 27<<Ase naab yaase posuk yaase buuk a dan biak ja manni a magsi ka wa bo ale wa mawa ate ku paari daa ŋayopɔi, daa ŋayopɔiwa danni ni baga a pai wa a nye juka kaabka kama a te Naawen. 28Alege ka naab yoo posuk yoo ni kan ko ba meena da yeŋŋa.
29<<Ase fi dan nye kaabka ate ku ka jiam teka kaabka ate Naawen, ku a magsi ka fi nye ate Naawen a tuesi fi kaabka. 30Ku a magsi ka ba dɛ ŋandiintaŋa meena da dila danni dek ba kan basi ate vari veenti ŋandiintaŋa. Ka Mi ale Naawen.
31<<Dila nyiŋla ni bi ta m wieŋa abe ni a nye ŋa. Ka Mi ale Naawen. 32Ni be kan kaasi m tuilum yuenni, alege mi ale ta tuilum kama a bo Izirali demma dɛ po, ka Mi ale Naawen dii ale basi ate ni ta tuilum la, 33waai ale ta ni a nyini Ejipiti po a nyini ayen m chim ni Wen la. Mi ale Naawen.>>
Nke Ahọpụtara Ugbu A:
Kaabka 22: BWU
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2023, Ghana Institute of Linguistics, Literacy and Bible Translation