ꠁꠘ꠆ꠎꠤꠟ ১: ꠝꠕꠤ 6
6
ꠖꠣꠘ-ꠈꠄꠞꠣꠔꠞ ꠛꠦꠙꠣꠞꠦ ꠔꠣꠟꠤꠝ
1“ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠝꠣꠘꠡꠞꠦ ꠖꠦꠈꠣꠘꠤꠞ ꠟꠣꠉꠤ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠤꠅ ꠘꠣ, ꠁꠟꠣ ꠇꠞꠟꠦ ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠉꠦꠍ ꠕꠣꠇꠤ ꠇꠥꠘꠥ ꠙꠥꠞꠥꠡ꠆ꠇꠣꠞ ꠙꠣꠁꠔꠣꠄ ꠘꠣꠄ।
2“ꠇꠥꠘꠥ ꠝꠣꠘꠡꠞꠦ ꠖꠣꠘ-ꠈꠄꠞꠣꠔ ꠖꠤꠟꠦ ꠜꠘ꠆ꠒ ꠅꠇꠟꠞ ꠟꠣꠈꠣꠘ ꠖꠤꠅ ꠘꠣ। ꠔꠣꠞꠣ ꠔ ꠝꠣꠘꠡꠞ ꠉꠦꠍ ꠕꠣꠇꠤ ꠔꠣꠞꠤꠚ ꠙꠣꠁꠔꠣ ꠇꠞꠤ ꠝꠍꠤꠖꠅ-ꠝꠘ꠆ꠖꠤꠞꠅ ꠀꠞ ꠙꠕꠦ-ꠊꠣꠐꠦ, ꠒꠥꠟ-ꠒꠙꠇꠤ ꠛꠣꠎꠣꠁꠀ ꠟꠤꠟ꠆ꠟꠣ-ꠎꠇꠣꠔ ꠖꠦꠁꠘ। ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠔꠣꠞꠣꠞ ꠙꠥꠞꠥꠡ꠆ꠇꠣꠞ ꠔ ꠔꠣꠞꠣ ꠙꠣꠁꠟꠤꠍꠦ। 3ꠅꠁꠟꠦ ꠔꠥꠝꠤ ꠇꠥꠘꠥ ꠖꠣꠘ-ꠈꠄꠞꠣꠔ ꠖꠤꠟꠦ, ꠔꠥꠝꠣꠞ ꠒꠣꠁꠘ ꠀꠔꠦ ꠛꠤꠟꠣꠁꠟꠦ ꠛꠣꠃ ꠀꠔꠦ ꠎꠣꠘꠥ ꠘꠣ ꠎꠣꠘꠦ। 4ꠅꠃꠟꠣ ꠟꠥꠇꠣꠁꠀ ꠖꠣꠘ ꠇꠞꠤꠅ। ꠔꠦꠃ ꠔꠥꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ, ꠎꠦꠁꠘ ꠟꠥꠇꠣꠁꠀ ꠢꠇꠟꠔꠣ ꠖꠦꠈꠂꠘ, ꠔꠣꠁꠘꠃ ꠔꠥꠝꠣꠞꠦ ꠙꠥꠞꠥꠡ꠆ꠇꠣꠞ ꠖꠤꠛꠣ।
ꠖꠥꠀ ꠇꠞꠣꠞ ꠛꠦꠙꠣꠞꠦ ꠔꠣꠟꠤꠝ
5“ꠔꠥꠝꠞꠣ ꠎꠦꠛꠟꠣ ꠖꠥꠀ ꠇꠞꠅ, ꠅꠃ ꠡꠝꠄ ꠜꠘ꠆ꠒ ꠅꠇꠟꠞ ꠜꠣꠛ ꠗꠞꠤꠅ ꠘꠣ। ꠔꠣꠞꠣ ꠝꠣꠘꠡꠞꠦ ꠖꠦꠈꠣꠘꠤꠞ ꠟꠣꠉꠤ ꠝꠍꠤꠖꠅ-ꠝꠘ꠆ꠖꠤꠞꠅ ꠀꠞ ꠙꠕꠞ ꠝꠥꠈꠅ ꠃꠛꠣꠁꠀ ꠖꠥꠀ ꠇꠞꠦ। ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠁꠔꠣꠄ ꠔ ꠔꠣꠞꠣꠞ ꠙꠥꠞꠥꠡ꠆ꠇꠣꠞ ꠙꠣꠁꠟꠤꠍꠦ। 6ꠅꠁꠟꠦ ꠔꠥꠝꠤ ꠖꠥꠀ ꠇꠞꠣꠞ ꠛꠣꠟꠣ ꠊꠞꠞ ꠖꠞꠎꠣ-ꠎꠣꠘꠣꠟꠣ ꠟꠣꠉꠣꠁꠀ ꠖꠥꠀ ꠇꠞꠤꠅ, ꠀꠞ ꠔꠥꠝꠣꠞ ꠘꠤꠞꠣꠇꠣꠞ ꠛꠣꠚ, ꠎꠦꠘꠞꠦ ꠖꠦꠈꠣ ꠘꠣ ꠉꠦꠟꠦꠅ ꠀꠎꠤꠞ ꠀꠍꠂꠘ, ꠢꠃ ꠀꠟ꠆ꠟꠣꠞ ꠉꠦꠍꠦ ꠌꠣꠁꠅ। ꠔꠣꠁꠘ ꠔ ꠉꠥꠙꠘ ꠢꠇꠟꠔꠣ ꠖꠦꠈꠂꠘ, ꠔꠣꠁꠘꠃ ꠔꠥꠝꠣꠞꠦ ꠚꠟ ꠖꠤꠛꠣ।
7“ꠔꠥꠝꠞꠣ ꠎꠦꠛꠟꠣ ꠖꠥꠀ ꠇꠞꠅ, ꠅꠃ ꠡꠝꠄ ꠖꠥꠘꠤꠀꠞ ꠝꠣꠘꠡꠞ ꠟꠣꠈꠣꠘ ꠈꠣꠝꠈꠣ ꠛꠦꠞ-ꠛꠦꠞꠤ ꠇꠞꠤꠅ ꠘꠣ। ꠔꠣꠞꠣ ꠝꠘꠅ ꠇꠞꠂꠘ, ꠛꠦꠡꠤ ꠛꠦꠡꠤ ꠇꠁꠟꠦ ꠀꠟ꠆ꠟꠣꠄ ꠔꠣꠞꠣꠞ ꠖꠥꠀ ꠇꠛꠥꠟ ꠇꠞꠛꠣ। 8ꠔꠥꠝꠞꠣ ꠔꠣꠞꠣꠞ ꠟꠣꠈꠣꠘ ꠅꠁꠅ ꠘꠣ, ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠞ ꠉꠦꠍꠦ ꠌꠣꠅꠀꠞ ꠀꠉꠦꠃ, ꠔꠣꠁꠘ ꠎꠣꠘꠂꠘ ꠔꠥꠝꠞꠣꠞ ꠇꠤꠔꠣ ꠖꠞꠇꠣꠞ। 9ꠄꠞꠟꠣꠉꠤ ꠔꠥꠝꠞꠣ ꠅꠟꠣꠈꠣꠘ ꠖꠥꠀ ꠇꠞꠤꠅ,
ꠅ ꠛꠣꠛꠣ, ꠀꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ,
ꠔꠥꠝꠣꠞ ꠘꠣꠝ ꠙꠣꠇ-ꠙꠛꠤꠔ꠆ꠞ ꠝꠣꠘꠣ ꠅꠃꠇ।
10ꠖꠥꠘꠤꠀꠁꠔ ꠔꠥꠝꠣꠞ ꠛꠣꠖꠡꠣꠁ ꠎꠟꠖꠤ ꠀꠃꠇ,
ꠡꠛ ꠔꠥꠝꠣꠞ ꠝꠞ꠆ꠎꠤ ꠝꠣꠚꠤꠇ ꠇꠞꠣ ꠎꠣꠃꠇ,
ꠛꠦꠢꠦꠡ꠆ꠔꠅ ꠎꠦꠟꠣ ꠅꠃꠟꠣ ꠖꠥꠘꠤꠀꠁꠔ,
ꠛꠦꠢꠦꠡ꠆ꠔꠅ ꠎꠦꠟꠣ ꠅꠃꠟꠣ ꠖꠥꠘꠤꠀꠁꠔ।
11ꠅ ꠛꠣꠛꠣ, ꠀꠁꠎꠇꠥꠞ ꠈꠣꠘꠤ ꠀꠁꠎꠇꠥ ꠖꠦꠅ,
ꠝꠣꠚ ꠇꠞꠅ ꠀꠝꠞꠣꠞ ꠢꠇꠟ ꠅꠙꠞꠣꠗ,
12ꠎꠣꠞꠣ ꠀꠝꠞꠣꠞ ꠛꠤꠞꠥꠖ꠆ꠖꠦ ꠇꠞꠍꠦ ꠙꠣꠙ,
ꠀꠝꠞꠣ ꠔ ꠔꠣꠞꠣꠞꠦ ꠖꠤꠟꠣꠁꠍꠤ ꠝꠣꠚ।
13ꠚꠣꠟꠣꠁꠅ ꠘꠣ ꠀꠝꠞꠣꠞꠦ ꠙꠞꠤꠇ꠆ꠇꠣꠔ,
ꠡꠄꠔꠣꠘꠞ ꠇꠛꠎꠣ ꠕꠣꠇꠤ ꠇꠞꠅ ꠈꠣꠟꠣꠍ॥
14ꠢꠥꠘꠅ, ꠔꠥꠝꠞꠣ ꠎꠥꠖꠤ ꠀꠞꠇ ꠎꠘꠞ ꠅꠙꠞꠣꠗ ꠝꠣꠚ ꠇꠞꠅ, ꠔꠦ ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄꠅ ꠔꠥꠝꠞꠣꠞ ꠅꠙꠞꠣꠗ ꠝꠣꠚ ꠇꠞꠤ ꠖꠤꠛꠣ। 15ꠅꠁꠟꠦ ꠔꠥꠝꠞꠣ ꠎꠥꠖꠤ ꠅꠁꠘ꠆ꠘꠞꠦ ꠝꠣꠚ ꠘꠣ ꠇꠞꠅ, ꠔꠦ ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚꠦ ꠔꠥꠝꠞꠣꠞꠦꠅ ꠝꠣꠚ ꠇꠞꠔꠣ ꠘꠣꠄ।
ꠞꠥꠎꠣꠞ ꠛꠦꠙꠣꠞꠦ ꠔꠣꠟꠤꠝ
16“ꠔꠥꠝꠞꠣ ꠎꠦꠛꠟꠣ ꠞꠥꠎꠣ ꠞꠣꠈꠅ, ꠅꠃ ꠡꠝꠄ ꠜꠘ꠆ꠒ ꠅꠇꠟꠞ ꠟꠣꠈꠣꠘ ꠝꠥꠈ ꠇꠣꠟꠣ ꠇꠞꠤꠅ ꠘꠣ। ꠔꠣꠞꠣ ꠞꠥꠎꠣ ꠞꠣꠈꠍꠂꠘ, ꠅꠈꠣꠘ ꠖꠦꠈꠣꠘꠤꠞ ꠟꠣꠉꠤ ꠌꠃꠈ-ꠝꠥꠈ ꠇꠣꠟꠣ ꠇꠞꠤ ꠞꠣꠈꠂꠘ। ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠁꠔꠣꠄ ꠔ ꠔꠣꠞꠣꠞ ꠙꠥꠞꠥꠡ꠆ꠇꠣꠞ ꠙꠣꠁꠟꠤꠍꠦ। 17ꠅꠁꠟꠦ ꠔꠥꠝꠤ ꠞꠥꠎꠣ ꠞꠣꠈꠟꠦ ꠝꠥꠈ-ꠀꠔ ꠗꠁꠅ, ꠝꠣꠕꠣꠔ ꠔꠦꠟ-ꠙꠣꠘꠤ ꠖꠤꠅ, 18ꠎꠦꠟꠣ ꠝꠣꠘꠡꠦ ꠛꠥꠎꠔ ꠘꠣ ꠙꠣꠞꠦ, ꠔꠥꠝꠤ ꠞꠥꠎꠣ ꠞꠣꠈꠍ। ꠔꠦꠃ ꠔꠥꠝꠣꠞ ꠘꠤꠞꠣꠇꠣꠞ ꠛꠣꠚ, ꠎꠦꠘꠞꠦ ꠖꠦꠈꠣ ꠘꠣ ꠉꠦꠟꠦꠅ ꠀꠎꠤꠞ ꠀꠍꠂꠘ, ꠢꠃ ꠀꠟ꠆ꠟꠣꠄꠃ ꠁꠔꠣ ꠖꠦꠈꠛꠣ। ꠔꠣꠁꠘ ꠔ ꠉꠥꠙꠘ ꠢꠇꠟꠔꠣ ꠖꠦꠈꠂꠘ, ꠔꠣꠁꠘꠃ ꠔꠥꠝꠣꠞꠦ ꠚꠟ ꠖꠤꠛꠣ।
ꠀꠈꠦꠞꠣꠔꠞ ꠗꠘ ꠇꠣꠝꠣꠅ
19“ꠁ ꠎꠤꠘ꠆ꠖꠦꠉꠤꠔ ꠔꠥꠝꠞꠣ ꠘꠤꠎꠞ ꠟꠣꠉꠤ ꠅꠔ ꠗꠘ-ꠡꠝ꠆ꠙꠖ ꠎꠝꠣꠁꠅ ꠘꠣ। ꠖꠥꠘꠤꠀꠞ ꠡꠝ꠆ꠙꠖꠞ ꠝꠣꠎꠦ ꠎꠋꠉꠣꠞꠦ ꠗꠞꠦ, ꠙꠥꠇꠦ ꠈꠣꠄ ꠀꠞ ꠢꠤꠋ ꠈꠥꠖꠤꠀ ꠌꠥꠞꠦ ꠘꠦꠄ। 20ꠅꠁꠟꠦ ꠛꠦꠢꠦꠡ꠆ꠔꠞ ꠝꠣꠎꠦ ꠘꠤꠎꠞ ꠟꠣꠉꠤ ꠍꠣꠝꠣꠘꠣ ꠎꠝꠣꠅ, ꠢꠤꠘꠅ ꠎꠋꠉꠣꠞꠦ ꠗꠞꠦ ꠘꠣ, ꠙꠥꠇꠦꠅ ꠈꠣꠄ ꠘꠣ ꠀꠞ ꠌꠥꠞꠤꠅ ꠅꠄ ꠘꠣ। 21ꠝꠘꠅ ꠞꠣꠈꠤꠅ, ꠔꠥꠝꠣꠞ ꠗꠘ ꠎꠦꠘꠅ, ꠝꠘꠅ ꠢꠘꠅ ꠞꠄ।
22“ꠎꠣꠘ ꠔ, ꠌꠃꠈ ꠅꠁꠟ ꠡꠞꠤꠟꠞ ꠛꠣꠔ꠆ꠔꠤ। ꠔꠥꠝꠣꠞ ꠌꠃꠈ ꠎꠥꠖꠤ ꠜꠣꠟꠣ ꠅꠄ, ꠔꠦ ꠔꠥꠝꠣꠞ ꠀꠡ꠆ꠔꠣ ꠡꠞꠤꠟꠅ ꠌꠇꠌꠇꠣ ꠚꠞ ꠅꠁꠛ। 23ꠅꠁꠟꠦ ꠔꠥꠝꠣꠞ ꠌꠃꠈ ꠎꠥꠖꠤ ꠈꠣꠞꠣꠙ ꠅꠄ, ꠔꠦ ꠀꠡ꠆ꠔꠣ ꠡꠞꠤꠟꠃ ꠇꠣꠟꠣ ꠀꠘ꠆ꠖꠣꠁꠞ ꠅꠁꠎꠤꠛ। ꠔꠥꠝꠣꠞ ꠖꠤꠟꠞ ꠛꠣꠔ꠆ꠔꠤ ꠀꠘ꠆ꠖꠣꠁꠞ ꠅꠁꠟꠦ, ꠁ ꠀꠘ꠆ꠖꠣꠁꠞ ꠛꠠ ꠛꠦꠎꠥꠁꠔꠣ।
24“ꠎꠣꠘ ꠘꠤ, ꠇꠥꠘꠥ ꠉꠥꠟꠣꠝꠦꠃ ꠖꠥꠁ ꠝꠥꠘꠤꠛꠞ ꠈꠦꠎꠝꠔ ꠇꠞꠔ ꠙꠣꠞꠦ ꠘꠣ, ꠢꠦ ꠄꠇꠎꠘꠞꠦ ꠊꠤꠘ꠆ꠘꠣꠁꠛ ꠀꠞꠇꠎꠘꠞꠦ ꠜꠣꠟꠣ ꠙꠣꠁꠛ। ꠀꠞꠘꠣꠄ ꠄꠇꠎꠘꠞ ꠛꠣꠄ ꠈꠤꠀꠟ ꠇꠞꠛ, ꠀꠞꠇꠎꠘꠞꠦ ꠄꠟꠣꠝꠤ ꠇꠞꠛ। ꠔꠦ ꠔꠥꠝꠞꠣꠅ ꠀꠟ꠆ꠟꠣ ꠙꠣꠇ ꠀꠞ ꠗꠘ-ꠍꠣꠝꠣꠘꠣ, ꠖꠥꠁꠅꠔꠣꠞ ꠈꠦꠎꠝꠔ ꠄꠇꠟꠉꠦ ꠇꠞꠔꠣꠄ ꠙꠣꠞ ꠘꠣ।
25“ꠄꠞꠖꠣꠄ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠇꠤꠟꠣ ꠈꠣꠁꠔꠣꠝ ꠀꠞ ꠇꠤꠟꠣ ꠚꠤꠘ꠆ꠖꠤꠔꠣꠝ, ꠁꠔꠣ ꠟꠁꠀ ꠌꠤꠘ꠆ꠔꠣ ꠇꠞꠤꠅ ꠘꠣ। ꠈꠣꠘꠤ ꠕꠣꠇꠤ ꠎꠣꠘ ꠛꠠ, ꠇꠣꠙꠠ-ꠌꠥꠙꠠ ꠕꠣꠇꠤ ꠡꠞꠤꠟ ꠛꠠ।
26“ꠀꠍꠝꠣꠘꠞ ꠅꠃ ꠙꠣꠈꠤꠘ꠆ꠔꠞ ꠛꠣꠄ ꠌꠣꠅ, ꠔꠣꠞꠣ ꠎꠣꠟꠣꠅ ꠛꠣꠁꠘ ꠇꠞꠦ ꠘꠣ, ꠚꠡꠟꠅ ꠇꠣꠐꠦ ꠘꠣ, ꠃꠉꠣꠞꠅ ꠇꠥꠘ꠆ꠔꠣ ꠎꠝꠣꠄ ꠘꠣ, ꠈꠣꠟꠤ ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄ ꠔꠣꠞꠣꠞ ꠈꠥꠞꠣꠇ ꠖꠦꠁꠘ। ꠔꠦ ꠔꠥꠝꠞꠣ ꠇꠥꠘꠥ ꠁꠔꠣ ꠕꠣꠇꠤ ꠀꠞꠅ ꠖꠣꠝꠤ ꠘꠣꠄ ꠘꠤ? 27ꠇꠅ ꠌꠣꠁꠘ, ꠔꠥꠝꠞꠣꠞ ꠝꠣꠎꠦ ꠇꠦꠃ ꠌꠤꠘ꠆ꠔꠣ-ꠜꠣꠛꠘꠣ ꠇꠞꠤꠀ ꠔꠣꠞ ꠢꠣꠄꠀꠔꠤ ꠄꠇꠈꠣꠘ ꠊꠘ꠆ꠐꠣ ꠛꠣꠠꠣꠁꠔ ꠙꠣꠞꠛ ꠘꠤ?
28“ꠚꠤꠘ꠆ꠘꠞ ꠇꠣꠙꠠꠞ ꠟꠣꠉꠤ ꠌꠤꠘ꠆ꠔꠣ ꠇꠞ ꠇꠦꠘꠦ? ꠔꠥꠝꠞꠣ ꠅꠃ ꠎꠋꠟꠤ ꠚꠥꠟꠞ ꠛꠣꠄ ꠌꠣꠁꠀ ꠖꠦꠈꠅ, ꠁꠔꠣ ꠇꠔ ꠛꠦꠡꠤ ꠡꠥꠘ꠆ꠖꠞ! ꠁꠔꠣꠄ ꠔ ꠘꠤꠎꠞ ꠡꠥꠘ꠆ꠖꠞꠞ ꠟꠣꠉꠤ ꠇꠥꠘ꠆ꠔꠣꠃ ꠇꠞꠦ ꠘꠣ, ꠇꠥꠘꠥ ꠞꠋꠉꠅ ꠡꠤꠟꠣꠁ ꠇꠞꠦ ꠘꠣ, ꠛꠣꠁꠘꠅ ꠇꠞꠦ ꠘꠣ, ꠄꠝꠘꠦꠃ ꠅꠄ। 29ꠔꠦ ꠀꠝꠤ ꠇꠁꠞꠣꠝ, ꠛꠣꠖꠡꠣ ꠍꠥꠟꠣꠁꠝꠣꠘ ꠅꠔ ꠎꠣꠇ-ꠎꠝꠇꠞ ꠝꠣꠎꠦ ꠞꠁꠟꠦꠅ ꠔꠣꠘ ꠟꠦꠛꠣꠍ ꠔ ꠅꠔꠣ ꠄꠉꠥ ꠎꠋꠟꠤ ꠚꠥꠟꠞ ꠟꠣꠈꠣꠘꠅ ꠡꠥꠘ꠆ꠖꠞ ꠀꠍꠤꠟ ꠘꠣ। 30ꠖꠦꠈꠞꠣꠄ ꠘꠤ, ꠎꠋꠉꠟꠞ ꠝꠣꠎꠦ ꠅꠃ ꠎꠦꠔꠣ ꠡꠥꠘ꠆ꠖꠞ ꠚꠥꠟ ꠅꠈꠘ ꠀꠍꠦ, ꠇꠣꠁꠟ ꠅꠁꠟꠦꠃ ꠝꠣꠘꠡꠦ ꠁꠔꠣ ꠖꠣꠞꠥ ꠛꠣꠘꠣꠁꠀ ꠀꠉꠥꠁꠘꠖꠤ ꠎꠣꠟꠣꠁꠛ। ꠀꠟ꠆ꠟꠣꠄ ꠎꠥꠖꠤ ꠅꠃ ꠎꠋꠉꠟꠞꠦ ꠅꠟꠣ ꠡꠥꠘ꠆ꠖꠞ ꠇꠞꠤ ꠢꠣꠎꠣꠁꠍꠂꠘ, ꠔꠦ ꠅ ꠇꠝꠎꠥꠞ ꠁꠝꠣꠘꠖꠣꠞ ꠅꠇꠟ, ꠔꠥꠝꠞꠣꠞꠦꠅ ꠔꠣꠁꠘ ꠡꠥꠘ꠆ꠖꠞ ꠇꠞꠤ ꠢꠣꠎꠣꠁꠔꠣ ꠘꠣꠄ ꠘꠤ? 31ꠄꠞꠖꠣꠄ ꠇꠤꠔꠣ ꠈꠣꠁꠔꠣꠄ ꠀꠞ ꠇꠤꠔꠣ ꠚꠤꠘ꠆ꠖꠤꠔꠣꠄ, ꠁꠔꠣ ꠟꠁꠀ ꠌꠤꠘ꠆ꠔꠣ ꠇꠞꠤꠅ ꠘꠣ। 32ꠁ ꠖꠥꠘꠤꠀꠞ ꠝꠣꠘꠡꠦ ꠈꠣꠟꠤ ꠅꠔꠣ ꠟꠁꠀꠃ ꠗꠣꠘ꠆ꠖꠣ ꠇꠞꠦ। ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄ ꠔ ꠎꠣꠘꠂꠘꠃ, ꠁꠔꠣ ꠢꠇꠟꠔꠣ ꠔꠥꠝꠞꠣꠞ ꠎꠞꠥꠞ ꠀꠍꠦ। 33ꠄꠞꠟꠣꠉꠤ ꠔꠥꠝꠞꠣ ꠙꠄꠟꠣꠃ ꠀꠟ꠆ꠟꠣꠞ ꠝꠞ꠆ꠎꠤ ꠎꠥꠉꠣꠁꠀ ꠌꠟꠅ, ꠔꠣꠘ ꠛꠣꠖꠡꠣꠁꠞ ꠗꠣꠘ꠆ꠖꠣꠔ ꠞꠅ। ꠔꠦꠃ ꠁꠔꠣ ꠢꠇ꠆ꠇꠟꠔꠣꠅ ꠔꠥꠝꠞꠣ ꠙꠣꠁꠛꠣꠄ। 34ꠇꠣꠁꠟꠇꠥꠞ ꠌꠤꠘ꠆ꠔꠣ ꠇꠞꠤꠅ ꠘꠣ, ꠇꠣꠁꠟꠇꠥꠞ ꠛꠦꠙꠣꠞ ꠇꠣꠁꠟꠇꠥꠞ ꠃꠙꠞꠦ ꠍꠣꠠꠤ ꠖꠦꠅ। ꠖꠤꠘꠞ ꠀꠎꠣꠛ ꠖꠤꠘꠞ ꠟꠣꠉꠤ ꠎꠕꠦꠡ꠆ꠐ।
Nke Ahọpụtara Ugbu A:
ꠁꠘ꠆ꠎꠤꠟ ১: ꠝꠕꠤ 6: sylN
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Ahle Kitab Society. All rights reserved.