ꠁꠘ꠆ꠎꠤꠟ ১: ꠝꠕꠤ 10
10
ꠛꠣꠞꠅꠎꠘ ꠍꠣꠢꠣꠛꠤꠞꠦ ꠙꠍꠘ꠆ꠖ ꠀꠞ ꠔꠣꠟꠤꠝ (১০:১-৪২)
ꠛꠣꠞꠅꠎꠘ ꠍꠣꠢꠣꠛꠤꠞꠦ ꠔꠛꠟꠤꠉꠅ ꠙꠣꠑꠣꠘꠤ
1ꠛꠣꠖꠦ ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠒꠣꠇꠣꠁꠀ ꠀꠘꠟꠣ, ꠀꠘꠤꠀ ꠎꠤꠘ-ꠜꠥꠔ ꠍꠣꠠꠣꠘꠤ, ꠀꠞ ꠢꠇꠟ ꠎꠣꠔꠞ ꠛꠦꠝꠣꠞꠤꠞꠦ ꠜꠣꠟꠣ ꠇꠞꠣꠞ ꠈꠦꠝꠔꠣ ꠖꠤꠟꠣ। 2ꠅꠃ ꠛꠣꠞꠅꠎꠘ ꠍꠣꠢꠣꠛꠤ ꠅꠁꠟꠣ,
ꠍꠣꠁꠝꠘ ꠃꠞꠚꠦ ꠙꠤꠔꠞ ꠀꠞ ꠔꠣꠘ ꠜꠣꠁ ꠀꠘ꠆ꠖꠞꠤꠀꠍ,
ꠎꠤꠛꠥꠖꠤꠀꠞ ꠙꠥꠀꠂꠘ ꠁꠀꠇꠥꠛ ꠀꠞ ꠢꠣꠘ꠆ꠘꠣꠘ,
ꠚꠤꠟꠤꠚ ꠀꠞ ꠛꠞ꠆ꠕꠟꠝꠄ,
3ꠕꠥꠝꠣꠍ ꠀꠞ ꠈꠣꠎꠘꠣ ꠔꠥꠟꠞꠣ ꠝꠕꠤ,
ꠀꠟꠚꠤꠞ ꠙꠥꠀ ꠁꠀꠇꠥꠛ ꠀꠞ ꠕꠖ꠆ꠖꠦ,
4ꠝꠥꠇ꠆ꠔꠤꠎꠥꠖ꠆ꠖꠣ ꠍꠣꠁꠝꠘ ꠀꠞ ꠁꠢꠥꠖꠣ ꠁꠡ꠆ꠇꠣꠞꠤꠀꠔ।
ꠅꠃ ꠁꠢꠥꠖꠣꠄ ꠛꠣꠖꠦ ꠛꠦꠁꠝꠣꠘꠤ ꠇꠞꠤꠀ ꠁꠍꠣꠞꠦ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠍꠤꠟ।
5ꠅꠃ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠁꠍꠣꠄ ꠢꠥꠇꠥꠝ ꠖꠤꠟꠣ, ꠇꠁꠟꠣ, “ꠔꠥꠝꠤꠔꠣꠁꠘ ꠔꠛꠟꠤꠉꠅ ꠎꠣꠅ, ꠅꠁꠟꠦ ꠇꠥꠘꠥ ꠛꠤꠗꠞ꠆ꠝꠤꠞ ꠉꠦꠍꠦ ꠛꠣ ꠡꠝꠞꠤꠀ ꠎꠣꠔꠤꠞ ꠇꠥꠘꠥ ꠉꠣꠃꠔ ꠎꠣꠁꠅ ꠘꠣ, 6ꠈꠣꠟꠤ ꠛꠘꠤ ꠁꠍꠞꠣꠁꠟꠞ ꠀꠞꠣꠁꠟ ꠝꠦꠠꠣ ꠅꠇꠟꠞ ꠉꠦꠍꠦ ꠎꠣꠅ। 7ꠎꠣꠅꠀꠞ ꠙꠕꠦ ꠔꠛꠟꠤꠉ ꠇꠞꠤ ꠇꠞꠤ ꠎꠣꠁꠅ, ꠇꠁꠅ, ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠗꠣꠞꠅ ꠀꠁꠌ꠆ꠍꠦ। 8ꠀꠞ ꠔꠥꠝꠞꠣ ꠛꠦꠝꠣꠞꠤ ꠅꠇꠟꠞꠦ ꠜꠣꠟꠣ ꠇꠞꠤꠅ, ꠝꠞꠣꠞꠦ ꠎꠤꠘ꠆ꠖꠣ ꠇꠞꠤꠅ, ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤꠞꠦ ꠜꠣꠟꠣ ꠇꠞꠤꠅ, ꠀꠞ ꠎꠤꠘ-ꠜꠥꠔ ꠍꠣꠠꠣꠁꠅ। ꠔꠥꠝꠞꠣ ꠎꠦꠟꠣ ꠛꠤꠘꠣ ꠐꠦꠇꠣꠄ ꠙꠣꠁꠍ, ꠅꠃꠟꠣ ꠛꠤꠘꠣ ꠐꠦꠇꠣꠄꠃ ꠖꠤꠅ। 9ꠎꠣꠅꠀꠞ ꠡꠝꠄ ꠟꠉꠦ ꠇꠞꠤ ꠐꠦꠇꠣ-ꠙꠄꠡꠣꠞ ꠕꠟꠤ, ꠡꠥꠘꠣ-ꠞꠥꠙꠣ ꠛꠣ ꠄꠇꠐꠣ ꠡꠤꠇꠤꠅ ꠘꠤꠅ ꠘꠣ। 10ꠔꠥꠝꠞꠣ ꠙꠕꠞ ꠟꠣꠉꠤ ꠟꠣꠑꠤ, ꠉꠣꠁꠐ-ꠛꠥꠍꠇꠤ, ꠎꠥꠔꠣ, ꠛꠣ ꠖꠥꠁꠐꠣ ꠇꠥꠞ꠆ꠔꠣꠅ ꠟꠉꠦ ꠘꠤꠅ ꠘꠣ। ꠎꠦ ꠎꠘꠦ ꠇꠣꠝ ꠇꠞꠦ, ꠢꠦ ꠈꠣꠅꠀ-ꠚꠤꠘ꠆ꠖꠣ ꠙꠣꠅꠀꠞ ꠎꠥꠇꠣ। 11ꠔꠥꠝꠞꠣ ꠎꠦ ꠉꠣꠃꠔ ꠢꠣꠝꠣꠁꠛꠣꠄ, ꠅꠃ ꠉꠣꠃꠞ ꠄꠇꠎꠘ ꠎꠁꠉ꠆ꠉ ꠝꠣꠘꠡꠞꠦ ꠔꠥꠇꠣꠁꠀ ꠛꠣꠞ ꠇꠞꠤꠅ, ꠁ ꠉꠣꠃ ꠍꠣꠠꠤꠀ ꠎꠣꠅꠀꠞ ꠀꠉ ꠙꠞ꠆ꠎꠘ꠆ꠔ ꠄꠘ ꠛꠣꠠꠤꠔꠃ ꠞꠁꠅ। 12ꠛꠣꠠꠤꠞ ꠜꠤꠔꠞꠦ ꠢꠣꠝꠣꠘꠤꠞ ꠛꠣꠟꠣ ꠔꠣꠞꠣꠞꠦ ꠍꠣꠟꠣꠝ ꠖꠤꠅ। 13ꠁ ꠛꠣꠠꠤ ꠎꠥꠖꠤ ꠍꠣꠟꠣꠝ ꠙꠣꠅꠀꠞ ꠎꠥꠇꠣ ꠅꠄ, ꠔꠦ ꠔꠥꠝꠞꠣꠞ ꠖꠦꠅꠀ ꠅꠃ ꠡꠣꠘ꠆ꠔꠤ ꠔꠣꠞꠣ ꠙꠣꠁꠛꠣ, ꠀꠞ ꠎꠥꠇꠣ ꠘꠣ ꠅꠁꠟꠦ ꠔꠥꠝꠞꠣꠞ ꠡꠣꠘ꠆ꠔꠤ ꠔꠥꠝꠞꠣꠞ ꠉꠦꠍꠦꠃ ꠚꠤꠞꠤꠀ ꠀꠁꠛ। 14ꠁ ꠎꠣꠉꠣꠞ ꠇꠦꠃ ꠎꠥꠖꠤ ꠔꠥꠝꠞꠣꠞꠦ ꠇꠛꠥꠟ ꠘꠣ ꠇꠞꠦ, ꠔꠥꠝꠞꠣꠞ ꠇꠕꠣ ꠘꠣ ꠢꠥꠘꠦ, ꠔꠦ ꠁ ꠛꠣꠠꠤ ꠛꠣ ꠉꠣꠃ ꠕꠣꠇꠤ ꠛꠣꠞꠘꠤꠞ ꠛꠣꠟꠣ ꠔꠥꠝꠞꠣꠞ ꠙꠣꠅꠞ ꠗꠥꠁꠟ ꠏꠣꠠꠤꠀ ꠚꠣꠟꠣꠁꠀ ꠀꠁꠅ। 15ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠢꠣꠡꠞꠞ ꠖꠤꠘ ꠅꠃ ꠉꠣꠃꠞ ꠖꠡꠣ ꠕꠣꠇꠤ, ꠢꠃ ꠟꠣꠘ꠆ꠘꠔꠤ ꠍꠣꠖꠥꠝ ꠀꠞ ꠀꠝꠥꠞꠣ ꠐꠣꠃꠘꠞ ꠖꠡꠣ ꠛꠃꠔ ꠜꠣꠟꠣ ꠅꠁꠛ।
ꠍꠣꠢꠣꠛꠤ ꠅꠇꠟꠞꠦ ꠀꠉꠣꠝ ꠢꠥꠡꠤꠀꠞꠤ
16“ꠢꠥꠘꠅ, ꠞꠣꠁꠇ꠆ꠇꠡ ꠛꠣꠊꠞ ꠍꠣꠝꠘꠦ ꠝꠦꠠꠣꠞ ꠟꠣꠈꠣꠘ ꠀꠝꠤ ꠔꠥꠝꠞꠣꠞꠦ ꠙꠣꠑꠣꠁꠞꠣꠝ। ꠄꠞꠟꠣꠉꠤ ꠔꠥꠝꠞꠣ ꠢꠣꠚꠞ ꠟꠣꠈꠣꠘ ꠌꠣꠟꠣꠇ-ꠌꠔꠥꠞ ꠀꠞ ꠙꠣꠞꠅ ꠙꠣꠈꠤꠞ ꠟꠣꠈꠣꠘ ꠡꠞꠟ ꠅꠅ। 17ꠢꠥꠡꠤꠀꠞ ꠞꠁꠅ, ꠝꠣꠘꠡꠦ ꠔꠥꠝꠞꠣꠞꠦ ꠗꠞꠤꠀ ꠀꠖꠣꠟꠔꠅ ꠡꠝꠎꠣꠁꠛꠣ, ꠀꠞ ꠔꠣꠞꠣꠞ ꠝꠍꠤꠖꠅ ꠘꠤꠀ ꠔꠥꠝꠞꠣꠞꠦ ꠍꠤꠋꠟꠣꠖꠤ ꠝꠣꠞꠛꠣ। 18ꠀꠝꠣꠞ ꠘꠣꠝ ꠟꠅꠀꠞ ꠟꠣꠉꠤ ꠔꠥꠝꠞꠣꠞꠦ ꠞꠣꠎꠣ-ꠛꠣꠖꠡꠣꠞ ꠍꠣꠝꠘꠦ ꠘꠦꠅꠀ ꠅꠁꠛ। ꠔꠥꠝꠞꠣ ꠄꠞꠣꠞ ꠍꠣꠝꠘꠦ ꠀꠞ ꠛꠤꠗꠞ꠆ꠝꠤ ꠅꠇꠟꠞ ꠉꠦꠍꠦ ꠀꠝꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠛꠣꠄ। 19ꠝꠣꠘꠡꠦ ꠎꠦꠛꠟꠣ ꠔꠥꠝꠞꠣꠞꠦ ꠗꠞꠣꠁ ꠖꠤꠛ, ꠅꠃ ꠡꠝꠄ ꠇꠤꠔꠣ ꠝꠣꠔꠔꠣꠄ ꠛꠣ ꠇꠤꠔꠣ ꠇꠁꠔꠣꠄ, ꠁꠔꠣ ꠟꠁꠀ ꠇꠥꠘꠥ ꠌꠤꠘ꠆ꠔꠣ ꠇꠞꠤꠅ ꠘꠣ। ꠢꠃ ꠡꠝꠄ ꠔꠥꠝꠞꠣꠞꠦ ꠁꠔꠣ ꠢꠤꠇꠣꠁ ꠖꠦꠅꠀ ꠅꠁꠛ। 20ꠀꠍꠟꠦ ꠔꠥꠝꠞꠣꠞ ꠝꠥꠈꠖꠤ ꠎꠦꠘ ꠔꠥꠝꠞꠣ ꠘꠤꠎꠦ ꠝꠣꠔꠛꠣꠄ, ꠁꠈꠣꠘ ꠘꠣꠄ, ꠔꠥꠝꠞꠣꠞ ꠛꠣꠔꠥꠘꠤ ꠛꠣꠚꠞ ꠎꠦ ꠞꠥꠢꠥ ꠔꠥꠝꠞꠣꠞ ꠜꠤꠔꠞꠦ ꠀꠍꠦ, ꠢꠃ ꠞꠥꠢꠦꠃ ꠁꠔꠣꠞ ꠎꠥꠀꠙ ꠖꠤꠛꠣ।
21“ꠜꠣꠁꠄ ꠜꠣꠁꠞꠦ ꠀꠞ ꠛꠣꠚꠦ ꠙꠥꠀꠞꠦ ꠈꠥꠘ ꠇꠞꠣꠘꠤꠞ ꠟꠣꠉꠤ ꠗꠞꠣꠁ ꠖꠤꠛ। ꠙꠥꠀ-ꠙꠥꠠꠤꠄꠅ ꠔꠣꠞꠣꠞ ꠝꠣ-ꠛꠣꠚꠞ ꠛꠤꠙꠇ꠆ꠇꠦ ꠉꠤꠀ ꠔꠣꠞꠣꠞꠦ ꠈꠥꠘ ꠇꠞꠣꠁꠛ। 22ꠀꠝꠣꠞ ꠇꠣꠞꠘꠦ ꠢꠇꠟ ꠝꠣꠘꠡꠦ ꠔꠥꠝꠞꠣꠞꠦ ꠊꠤꠘ꠆ꠘꠣꠁꠛ, ꠅꠁꠟꠦ ꠢꠦꠡ ꠙꠞ꠆ꠎꠘ꠆ꠔ ꠎꠦ ꠐꠤꠇꠤꠀ ꠞꠁꠛ, ꠢꠦ-ꠃ ꠞꠦꠢꠣꠁ ꠙꠣꠁꠛ। 23ꠇꠥꠘꠥ ꠉꠣꠃꠞ ꠝꠣꠘꠡꠦ ꠔꠥꠝꠞꠣꠞꠦ ꠎꠥꠟꠥꠝ ꠇꠞꠟꠦ, ꠁ ꠉꠣꠃ ꠍꠣꠠꠤꠀ ꠅꠁꠘ꠆ꠘ ꠉꠣꠃꠔ ꠎꠣꠁꠅꠉꠤ। ꠢꠥꠘꠅ, ꠀꠝꠤ ꠢꠣꠍꠣ ꠇꠕꠣ ꠇꠁꠞꠣꠝ, ꠁꠍꠞꠣꠁꠟ ꠖꠦꠡꠞ ꠢꠇ꠆ꠇꠟ ꠐꠣꠃꠘ ꠀꠞ ꠉꠣꠃꠔ ꠔꠥꠝꠞꠣꠞ ꠔꠛꠟꠤꠉ ꠡꠦꠡ ꠅꠀꠞ ꠀꠉꠦꠃ ꠛꠤꠘ-ꠀꠖꠝ ꠢꠤꠞꠛꠣꠞ ꠀꠁꠛꠣ।
24“ꠝꠘꠅ ꠞꠣꠈꠤꠅ, ꠃꠡ꠆ꠔꠣꠖ ꠕꠣꠇꠤ ꠡꠣꠉꠞꠤꠖ ꠛꠠ ꠘꠣꠄ, ꠀꠞ ꠝꠥꠘꠤꠛ ꠕꠣꠇꠤ ꠔꠣꠞ ꠉꠥꠟꠣꠝ ꠛꠠ ꠘꠣꠄ। 25ꠔꠦ ꠡꠣꠉꠞꠤꠖ ꠔꠣꠞ ꠃꠡ꠆ꠔꠣꠖꠞ ꠡꠝꠣꠘ, ꠀꠞ ꠉꠥꠟꠣꠝ ꠔꠣꠞ ꠝꠥꠘꠤꠛꠞ ꠡꠝꠣꠘ ꠅꠀꠃ ꠎꠕꠦꠡ꠆ꠐ। ꠢꠥꠘꠞꠣꠄ ꠘꠤ, ꠊꠞꠞ ꠝꠥꠘꠤꠛꠞꠦ ꠎꠦꠛꠟꠣ ꠜꠥꠔꠞ ꠛꠣꠖꠡꠣ ꠛꠦꠟ-ꠍꠛꠥꠟ ꠇꠁꠞꠣ, ꠔꠦ ꠊꠞꠞ ꠛꠣꠇꠤ ꠢꠇꠟꠞꠦ ꠔꠣꠞꠣ ꠀꠞꠅ ꠇꠔꠔꠣ ꠇꠁꠛꠣ!
26“ꠅꠁꠟꠦ ꠔꠥꠝꠞꠣ ꠔꠣꠞꠣꠞꠦ ꠒꠞꠣꠁꠅ ꠘꠣ, ꠇꠣꠞꠘ ꠁꠟꠣ ꠉꠥꠙꠘ ꠇꠥꠘ꠆ꠔꠣꠃ ꠘꠣꠁ ꠎꠦꠔꠣ ꠎꠣꠁꠞ ꠅꠁꠔ ꠘꠣꠄ। ꠁꠟꠣ ꠟꠥꠇꠣꠁꠟꠅ ꠇꠥꠘ꠆ꠔꠣ ꠘꠣꠁ ꠎꠦꠔꠣ ꠇꠦꠃ ꠢꠥꠘꠔ ꠘꠣꠄ ꠛꠣ ꠎꠣꠘꠔ ꠘꠣꠄ। 27ꠀꠝꠤ ꠀꠘ꠆ꠖꠣꠞꠤꠞ ꠝꠣꠎꠦ ꠎꠦꠔꠣ ꠔꠥꠝꠞꠣꠞꠦ ꠇꠁꠍꠤ, ꠔꠥꠝꠞꠣ ꠁꠔꠣ ꠚꠞꠞ ꠝꠣꠎꠦ ꠇꠁꠅ। ꠎꠦꠔꠣ ꠇꠣꠘꠦ ꠇꠣꠘꠦ ꠢꠥꠘꠍ, ꠁꠔꠣ ꠍꠣꠐꠞ ꠃꠙꠞꠦ ꠉꠤꠀ ꠎꠥꠞꠦ ꠎꠥꠞꠦ ꠄꠟꠣꠘ ꠇꠞꠤꠅ। 28ꠎꠣꠞꠣ ꠝꠣꠘꠡꠞ ꠇꠣꠄꠀꠞꠦ ꠛꠤꠘꠣꠡ ꠇꠞꠔ ꠙꠣꠞꠦ, ꠅꠁꠟꠦ ꠞꠥꠢꠥꠞꠦ ꠇꠥꠘ꠆ꠔꠣ ꠇꠞꠔ ꠙꠣꠞꠦ ꠘꠣ, ꠔꠣꠞꠣꠞꠦ ꠒꠞꠣꠁꠅ ꠘꠣ। ꠎꠦꠁꠘ ꠇꠣꠄꠀ ꠀꠞ ꠞꠥꠢꠥ ꠖꠥꠁꠅꠔꠣꠞꠦ ꠖꠥꠎꠈꠅ ꠎꠣꠟꠣꠁꠔꠣ ꠙꠣꠞꠂꠘ, ꠈꠣꠟꠤ ꠔꠣꠘꠞꠦꠃ ꠒꠞꠣꠁꠅ। 29ꠢꠥꠘꠅ, ꠖꠥꠁꠐꠣ ꠌꠠꠣ ꠙꠣꠈꠤ ꠈꠣꠟꠤ ꠖꠥꠁ ꠐꠦꠇꠣꠄ ꠛꠤꠇꠦ ꠘꠣ ꠘꠤ? ꠅꠁꠟꠦ ꠔꠥꠝꠞꠣꠞ ꠛꠣꠔꠥꠘꠤ ꠛꠣꠚ ꠀꠟ꠆ꠟꠣꠞ ꠢꠥꠇꠥꠝ ꠘꠣ ꠅꠁꠟꠦ ꠅꠔꠣ ꠄꠉꠥ ꠌꠠꠣ ꠙꠣꠈꠤꠅ ꠝꠣꠐꠤꠔ ꠙꠠꠦ ꠘꠣ। 30ꠎꠣꠘ ꠔ, ꠔꠥꠝꠞꠣꠞ ꠝꠣꠕꠣꠞ ꠌꠥꠟꠉꠦꠍꠣꠁꠘꠅ ꠉꠘꠣ ꠀꠍꠦ। 31ꠄꠞꠖꠣꠄ ꠔꠥꠝꠞꠣ ꠒꠞꠣꠁꠅ ꠘꠣ। ꠔꠥꠝꠞꠣꠞ ꠖꠣꠝ ꠔ ꠛꠃꠔ ꠌꠠꠣ ꠕꠣꠇꠤꠅ ꠛꠦꠡꠤ।
32“ꠡꠝꠣꠎꠞ ꠍꠣꠝꠘꠦ ꠎꠦ ꠎꠘꠦ ꠀꠝꠣꠞꠦ ꠇꠛꠥꠟ ꠇꠞꠦ, ꠀꠝꠤꠅ ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠍꠣꠝꠘꠦ ꠔꠣꠞꠦ ꠇꠛꠥꠟ ꠇꠞꠝꠥ। 33ꠅꠁꠟꠦ ꠎꠦ ꠝꠣꠘꠡꠦ ꠡꠝꠣꠎꠞ ꠍꠣꠝꠘꠦ ꠀꠝꠣꠞꠦ ꠅꠡ꠆ꠛꠤꠇꠣꠞ ꠇꠞꠛ, ꠀꠝꠤꠅ ꠔꠣꠞꠦ ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠞ ꠍꠣꠝꠘꠦ ꠅꠡ꠆ꠛꠤꠇꠣꠞ ꠇꠞꠝꠥ।
34“ꠔꠥꠝꠞꠣ ꠝꠘꠅ ꠇꠞꠞꠣꠄ ꠘꠤ, ꠀꠝꠤ ꠖꠥꠘꠤꠀꠔ ꠡꠣꠘ꠆ꠔꠤ ꠖꠤꠔꠣꠝ ꠀꠁꠍꠤ? ꠘꠣ, ꠝꠥꠐꠦꠃ ꠘꠣꠄ, ꠀꠝꠤ ꠔ ꠖꠥꠘꠤꠀꠔ ꠄꠇ ꠝꠔꠜꠦꠖ ꠟꠣꠉꠣꠘꠤꠔ ꠀꠁꠍꠤ। 35ꠀꠝꠤ ꠛꠣꠚꠦ-ꠙꠥꠀꠄ, ꠝꠣꠄ-ꠙꠥꠠꠤꠄ, ꠀꠞ ꠢꠠꠤꠄ-ꠛꠃꠄ ꠛꠤꠛꠣꠖ ꠟꠣꠉꠣꠘꠤꠔ ꠀꠁꠍꠤ। 36ꠝꠣꠘꠡꠞ ꠘꠤꠎꠞ ꠙꠞꠤꠛꠣꠞꠞ ꠎꠘꠦꠃ ꠔꠣꠞ ꠟꠉꠦ ꠖꠥꠡꠝꠘꠤ ꠇꠞꠛ।
37“ꠎꠦ ꠝꠣꠘꠡꠦ ꠀꠝꠣ ꠕꠣꠇꠤ ꠔꠣꠞ ꠝꠣ-ꠛꠣꠚꠞꠦ ꠛꠦꠡꠤ ꠝꠣꠄꠀ ꠇꠞꠦ, ꠢꠦ ꠀꠝꠣꠞ ꠃꠝ꠆ꠝꠔ ꠅꠁꠔ ꠙꠣꠞꠔ ꠘꠣꠄ। ꠀꠞ ꠎꠦ ꠎꠘꠦ ꠀꠝꠣ ꠕꠣꠇꠤ ꠔꠣꠞ ꠙꠥꠀꠞꠦ ꠛꠣ ꠔꠣꠞ ꠙꠥꠠꠤꠞꠦ ꠛꠦꠡꠤ ꠝꠣꠄꠀ ꠇꠞꠦ, ꠢꠦ-ꠅ ꠀꠝꠣꠞ ꠃꠝ꠆ꠝꠔꠞ ꠎꠥꠇꠣ ꠘꠣꠄ। 38ꠎꠦ ꠎꠘꠦ ꠘꠤꠎꠞ ꠖꠥꠈ-ꠇꠡ꠆ꠐꠞ ꠍꠟꠤꠛ ꠛꠁꠀ ꠟꠁꠀ ꠀꠝꠣꠞ ꠈꠞꠦ ꠘꠣ ꠀꠄ, ꠢꠦ-ꠅ ꠀꠝꠣꠞ ꠎꠥꠇꠣ ꠘꠣꠄ। 39ꠎꠦ ꠎꠘꠦ ꠔꠣꠞ ꠘꠤꠎꠞ ꠎꠣꠘ ꠛꠣꠌꠣꠁꠔ ꠌꠣꠄ, ꠢꠦ ꠔꠣꠞ ꠀꠍꠟ ꠎꠤꠘ꠆ꠖꠦꠉꠤ ꠈꠥꠀꠁꠛ। ꠅꠁꠟꠦ ꠎꠦ ꠎꠘꠦ ꠀꠝꠣꠞ ꠟꠣꠉꠤ ꠔꠣꠞ ꠎꠣꠘ ꠇꠥꠞꠛꠣꠘꠤ ꠖꠤꠟꠣꠄ, ꠢꠦ ꠀꠍꠟ ꠎꠤꠘ꠆ꠖꠦꠉꠤ ꠙꠣꠁꠛ।
40“ꠎꠦ ꠎꠘꠦ ꠔꠥꠝꠞꠣꠞꠦ ꠇꠛꠥꠟ ꠇꠞꠦ, ꠢꠦ ꠀꠝꠣꠞꠦꠃ ꠇꠛꠥꠟ ꠇꠞꠦ, ꠀꠞ ꠎꠦ ꠀꠝꠣꠞꠦ ꠇꠛꠥꠟ ꠇꠞꠦ, ꠢꠦ ꠀꠍꠟꠦ ꠢꠃ ꠀꠟ꠆ꠟꠣꠞꠦꠃ ꠇꠛꠥꠟ ꠇꠞꠦ, ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ। 41ꠇꠦꠃ ꠎꠥꠖꠤ ꠇꠥꠘꠥ ꠘꠛꠤꠞꠦ ꠘꠛꠤ ꠇꠁꠀ ꠇꠛꠥꠟ ꠇꠞꠦ, ꠔꠦ ꠅꠃ ꠘꠛꠤꠄ ꠎꠦ ꠙꠥꠞꠥꠡ꠆ꠇꠣꠞ ꠙꠣꠁꠛꠣ, ꠢꠦ-ꠅ ꠅꠃ ꠙꠥꠞꠥꠡ꠆ꠇꠣꠞ ꠙꠣꠁꠛ। ꠇꠥꠘꠥ ꠀꠟ꠆ꠟꠣꠞꠣꠁꠀ ꠝꠣꠘꠡꠞꠦ ꠇꠦꠃ ꠎꠥꠖꠤ ꠀꠟ꠆ꠟꠣꠞꠣꠁꠀ ꠇꠁꠀ ꠇꠛꠥꠟ ꠇꠞꠦ, ꠔꠦ ꠅꠃ ꠀꠟ꠆ꠟꠣꠞꠣꠁꠀ ꠝꠣꠘꠡꠦ ꠎꠦ ꠙꠥꠞꠥꠡ꠆ꠇꠣꠞ ꠙꠣꠁꠛꠣ, ꠢꠦ-ꠅ ꠅꠃ ꠙꠥꠞꠥꠡ꠆ꠇꠣꠞ ꠙꠣꠁꠛ। 42ꠀꠞ ꠀꠝꠣꠞ ꠃꠝ꠆ꠝꠔ ꠎꠣꠘꠤꠀ ꠇꠦꠃ ꠎꠥꠖꠤ ꠔꠥꠝꠞꠣꠞ ꠝꠣꠎꠞ ꠄꠇ ꠘꠉꠁꠘ꠆ꠘ ꠎꠘꠞꠦꠅ ꠄꠇ ꠉꠦꠟꠣꠡ ꠙꠣꠘꠤ ꠈꠣꠅꠀꠄ, ꠔꠦ ꠢꠦ ꠇꠥꠘꠥꠝꠘ꠆ꠔꠦꠃ ꠄꠞ ꠙꠥꠞꠥꠡ꠆ꠇꠣꠞ ꠕꠣꠇꠤ ꠛꠣꠖ ꠙꠠꠔ ꠘꠣꠄ।”
Nke Ahọpụtara Ugbu A:
ꠁꠘ꠆ꠎꠤꠟ ১: ꠝꠕꠤ 10: sylN
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Ahle Kitab Society. All rights reserved.