I KƆRINTI DIMA 4
4
1Tɔ, ka dinŋɔna see ka ba nyari ti, ni, Kirisita tuntumniba, ni seeba Naawunni ŋɔn zaŋŋi u yɛlisɔ'ara fukumsi n‑niŋi ba nuu ni. 2Din kpalim ka ba boori tuntumniba saani nyɛ la, ni, ba zɛ yummu n‑tumna. 3Man mun ba'a ka ni, ni, yarima yi katti n sariya, bee ninsaalidima kootu sɛseelli yi katta; halli m mammaŋŋa gba - man bu katti n yɛla sariya. 4M bu nya teesibeeri n sufu ni, amaa lala ku toaai n‑kyɛ ka n niŋi yɛlimaŋni daana; ti Dugma kɔkɔ nin ti kari ma sariya. 5Lala zugu yan di daŋŋi n‑kari sariya ka saha maa na bu paai na; halli ni ti Dugma kyɛnni na. Ŋɔna nin kyɛ ka din sɔ'ai zibsim ni zaa nin ti yi paalu na, ka wulisi saalidima sufu ni teesa an bɛ seem. Di saha ka sɔkam zaa nin ti nya pɛ'abu din sumsi u, Naawunni saani.
6M mabiisi, yarima zugu ka n zaŋŋi man ni Apɔloosi yɛla wa n‑wulisiri ya, ni ya baŋŋi yɛligu wa gbinni ŋɔn nyɛ seem, ni#:- “See ka ya ti dɔli din sɔbi n‑dooli seem, ka ku yakki Naawunni ŋɔn zaali seem.” Ni, yan di gyeemni sɔ ka laa n‑zeemni u taraana. 7Bɔ n wulisi, ni, ya wɔligiya ni ka kyɛ ya taaba? Bɔ ka ya mara, di yi pa la ya daa deaai ka la piini? Ka ya yi deaai piini maa, bɔ n kyɛ ka ya nyuuri bara, hoo yan bu deaai di zaa? 8Ni, bundaandima n nyɛ ya, fa! Ni, ya tigiya ka bu kɔŋŋi seela. Ni, ya pun di naam ka kyɛ ti. Tɔ: ya yi siri di naam, di veela! - dama ti gba naa n‑la'am n‑di naam maa. 9N teesi, ni, Naawunni zaŋŋi tirima, u tuumudima maa, ka labsi ti yɛla nyaaŋŋa. Ti ŋmanni la hoo ninvugseeba ban kari ti sariya n‑lusi ti, ni, ti sum la kum; ka ti diri lala wahala ni sɔkam ti gɔsira - halli malaakadima ni ninsaalidima zaa gba. 10Tirima siri nyɛ la gyɛra, Kirisita zugu; ka yarima mun wulisiri ninneesim Kirisita saani, fa! Bumbugsa n nyɛ ti, ka ya mun mari kpeeŋŋu. Ya nyari gyirima, ka ti mun nyari fiiliŋŋu. 11Halli ni zuna ti kpiiri la kɔm ni kɔnyuuri, n‑ka bunyeera, ka laa n‑nyari mugsigu ti gyiliŋŋu la puuni. 12Ti namsiri n‑tumni tuma ni ti nuusi. Ka niriba tuuri ti, ka ti mun kaari kasuma n‑tiri ba; ba namsiri ti ni, ka ti mun bu za'asiri ba yuubu. 13Ba tɔ'asiri yɛttɔ'abeeri n‑niŋni ti, amaa ti kpaŋŋi ti maŋŋa n‑sakki n‑ti ba baalimm. Ti ŋmanni la duniya zaa sa'ari, hoo ninsaalidima maa sa'atampuuri, halli ni zuna.
14M bu sɔbri wa ni n ti diisi ya la vi, amaa n kpaamni ya ni hoo m biwutta. 15Dama halli ya yi mari ya karimbadima tusa tusa zaŋŋi n‑kpa Kirisita ziiya gba, ya ka badima pam, see yinni kɔkɔa. Yɛlimaŋni, mani n nyɛ sɔ ŋɔn daa dɔ'ai ya zaŋŋi n‑kpa lahabasuŋŋu beesigu ziiya ka di nyɛ la Kirisita Yisa saani. 16Lala zugu ka n susiri ya, ni, ya dɔli n beesigu soori. 17Dinŋɔ zugu ka n tum Timɔti ya saani na; u nyɛ la m biwuttigu ni yɛlimaŋni, ka laa n‑nyɛ sɔ ŋɔn zɛ yummu ti Dugma yɛla zugu. Ŋɔna nin toaai n‑teaari ya man Kirisita beesigu sɔya yɛla, hoo man ŋɔn wulisi seem lugri kam man la'amni ni Naawunni niriba zaa. 18Man na bu kyɛ ya saani na zugu ka ya seeba mari karimbaani. 19Amaa di siri ku yuui ka n nin kaai ya na, Naawunni yi ti ti ma lala soori. Di saha n nin baŋŋi karimbaani dima maa gbinni, pa ba yɛttɔ'a yɛla kɔkɔa, amaa ni ba yiiko ŋɔn bɛ seem. 20Dama Naawunni naam pa la yɛttɔ'a kɔkɔa, amaa yiiko ni gba. 21Bɔ ka ya boora? - N kyɛm na nti darigi ya tuba? - bee, n zaŋŋi Sii maa wurilim ni nirilim n‑kyɛ ya saani na?
Nke Ahọpụtara Ugbu A:
I KƆRINTI DIMA 4: maw
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2002, Wycliffe Bible Translators, Inc. All rights reserved.