I KƆRINTI DIMA 1
1
1Man Pɔla n‑sɔbri gbaŋŋu wa n‑ti ya, man ni ti mabii Sɔsitɛniisi. Man nyɛ sɔ Naawunni ŋɔn booli ma ni n ti leebi u tuumu, dama lala ka u sufu yuubu daa wulisi. 2N sɔbri n‑tiri yarima, yaseeba ban la'amni Kɔrinti tiŋŋa maa ni n‑gyeemni Naawunni: yan bɛ Yisa Kirisita Masiiya saani maa zugu n kyɛ ka ya nyɛ la Naawunni maŋtoori niriba. Lala zugu ka u boonni ya u saani, ka laa m‑paasiri ya zugu ninvugseeba ban leebi Naawunni dinni tiŋŋa kam zaa ni, ka ba zaŋŋi la Yisa Kirisita yuuri m‑puri ba, dama u nyɛ la ba Dugma, ni ti gba Dugma. 3Ti Ba Naawunni, ni ti Dugma Yisa Kirisita, zaŋŋma u piinisuma ni alaafɛ zaa n‑tisi ya.
4M puusiri Naawunni barika ya zugu sahakam, ŋɔn daa zaŋŋi u piinisuma n‑ti ya la zugu, ka di nyɛ la Kirisita Yisa saani. 5Dama ŋɔn saani ka ya pun deaai bunsuma pam gba - di nyɛ la yɛttɔ'a zaa, ni bamsim zaa, ziiya. 6Lala zugu ka ya beebu kur wulisiri, ni, lahabasuŋŋu zaŋŋi n‑kyaŋŋi Kirisita yɛla maa nyɛ la yɛlimaŋni deede. 7Dinzugu ya bu kɔŋŋi Naawunni piinisuma, halli yinni gba, ka kpalim n‑guusiri ti Dugma Yisa Kirisita Masiiya yiibu na saha. 8U siri nin mari ya suŋŋa halli nti paai di tɔriga, ka ya nin zɛ yummu ti Dugma Yisa dabsiri daari maa ni, galinseelli ka ni. 9Naawunni nyɛ la yɛdda daana, ka ŋɔna zugu ka ba daa booli ya, ni ya yi na n‑la'amni m‑bɛ u Bii Yisa Kirisita ti Dugma saani.
10Tɔ: ka n susiri ya, m mabiisi, ti Dugma Yisa Kirisita zugu, ni, ya zaa mari nangbanyinni ni taaba; yan di ŋmeeri nangbankpeemni n‑wɔligri ka kyɛri taaba. See ka ya kpamsiri taaba ka mari sufu yinni ni teesiyinni. 11M mabiisi wumma! N wumni ya yɛla Kloowi yiri dima maa saani, ni, zaba m bɛ ya saani. 12Man tɔ'asiri seem maa nyɛ la: ni, ya ninvugsɔ n yɛtti, ni, u dɔli la man Pɔla, ka sɔ yɛtti, ni, u dɔli la Apɔloosi, sɔ mun gba yɛtti, ni, Siifasi Piita ka u dɔla, halli ka sɔ yɛtti yaasa, ni, “Man mun dɔli la Kirisita!” 13Ammi, ba purigi Kirisita zii bunaasi? Ba daa kpaasi Pɔla n‑tabli dɔpulli zugu ni ya ti nya tuliginsim, bee? - Ay! pa lala. Bee, ba daa su ya Pɔla koom? - Ay, halli fiiŋ gba! 14Di niŋi ma nya'asim Naawunni zugu, ni, n daa bu su ya ninvugsɔ koom, na'ala Krispusi ni Gayusi kɔkɔa. 15Dama lala zugu ya ku toaai n‑yɛli, ni, n daa su ya koom m mammantoori yuuri zugu. 16(Ay, n tamna: Sitɛfanasi ni u yiri dima gba ka n daa su Naawunni koom. M bu laa n‑teaari suŋŋa: ni, n daa su ninvugsɔ m‑paasi ba zugu, bee, n daa bu su.) 17Ya bu nya? - di daa pa la koom suubu yɛla zugu ka Kirisita daa tum ma ya saani na, amaa lahabasuŋŋu mooligu zugu; ka m bu zaŋŋi ninsaala yɛm m‑moonna, dama lala kyɛ ka Kirisita dɔpulli zugu kum yɛla ti basi yɔri.
18Dama dɔpulli maa lahabaari muna - ninvugseeba ban bɛ baasiyɔri soori ni maa yi ti wum di, ba yɛtti, ni, gyɛrilim; amaa tirima mun ban bɛ tuliginsim soori maa ni la saani ka di mari la Naawunni yiiko. 19Dama di sɔbi n‑dooli, ni#:-
“N nin sa'am yɛm dima bamsim maa;
N nin gbarigi ba miilinsi.”
20Tɔ, ka yɛm daana la lee? Bamsim daana la lee? Ŋɔn viisiri m‑baŋŋni pampaŋŋɔ duniya beesigu yɛla la bɛ la yani? Naawunni n zaŋŋi duniya wa yɛm n‑leebi gyɛrilim, bee, m ma'ari ni? 21Naawunni mammaŋŋa yɛm zugu daa kyɛ ka duniya wa dima daa zaŋŋi ba toori yɛm ni ba ti baŋŋi u yɛla n‑kɔŋŋi. Ka u sufu yuubu zugu ka baseeba ban wum lahabaari mooligu din ŋmani hoo gyɛrilim la n‑niŋi yɛdda la muna - ban nyari fa-m‑basi. 22Tɔ: Yɛhudiya dima maa boori la alahazibu tuma nyaabu, ka Griika dima maa mun boori yɛm yɛla wumpu; 23amaa tirima ŋɔn moonni lahabaseaa maa nyɛ la Yisa Kirisita Masiiya yɛla: ni, ba daa kpaasi u n‑tabli dɔpulli zugu. Ka Yɛhudiya dima maa yɛtti, ni, din kyisiri nla; ka Griika dima maa mun yɛtti, ni, gyɛrilim n nyɛ di. 24Amaa Naawunni ŋɔn booli seeba la ŋɔna, u siri nyɛ la Masiiya n‑ti ba, ka laa n‑nyɛ Naawunni yɛm ni u yiiko gba - halli ba yi nyɛ Yɛhudiya dima, ni Griika dima zaa. 25Dama Naawunni gyɛrilim mari yɛm n‑gaari saalidima yɛm, ka Naawunni bugsim mari yaa n‑gaari saalidima yaa.
26M mabiisi, ya teesima yan daa bɛ seem ka ba daa booli ya. Ya sunsukkuni ya ka niriba pam ban mari duniya wa yɛm; ya ka niriba pam ban mari yiiko, bee, n‑yi naam zuliya ni. 27Amaa Naawunni yiisi la bunseesi an mari gyɛrilim duniya wa dima saani, ka mari a n‑diisiri yɛm dima maa vi: Naawunni yiisi la an nyɛ bumbugsa duniya wa dima saani, ka mari a n‑diisiri yaa dima maa vi. 28U yiisi la tarimma, ni niriba ŋɔn zeemni bunseesi, halli bunseesi an ka ni gba, ka mari a n‑kyɛ ka bunseesi an bɛ ni maa ti basi yɔri. 29Ka lala kyɛ ka sɔ ku toaai n‑nyu bara ŋɔn Naawunni saani. 30Ŋɔn Naawunni zugu ka ya bɛ Yisa Kirisita ni; ŋɔna ka Naawunni kyɛ ka u leebi yɛm n‑ti ti, ni yɛlimaŋni, ka u laa n‑kyɛ ka ti leebi Naawunni mammaŋŋa niriba kasi kasi, ka laa n‑nya fa-m‑basi. 31Dizugu - hoo din pun sɔbi n‑dooli - “Ŋɔn ya n‑nyu bara zaa, kyɛ ka u nyuuri a ni Naawunni yuuri zugu kɔkɔa.”
Nke Ahọpụtara Ugbu A:
I KƆRINTI DIMA 1: maw
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2002, Wycliffe Bible Translators, Inc. All rights reserved.