ລະບຽບ^ພວກເລວີ 13

1ພຣະເຈົ້າຢາເວໄດ້ມອບລະບຽບການຕ່າງໆ ດັ່ງຕໍ່ໄປນີ້ໃຫ້ໂມເຊແລະອາໂຣນ. 2ຖ້າຜູ້ໃດຜູ້ໜຶ່ງມີອາການເຈັບປວດຕາມຜິວໜັງ ຫລືໂພງຂຶ້ນ ຫລືບວມທີ່ອາດຈະກາຍເປັນພະຍາດຂີ້ທູດ ຜູ້ນັ້ນຕ້ອງຖືກນຳຕົວໄປຫາປະໂຣຫິດ ທີ່ສືບເຊື້ອສາຍມາຈາກຄອບຄົວອາໂຣນ. 3ປະໂຣຫິດຈະກວດເບິ່ງອາການເຈັບປວດນັ້ນ ແລະຖ້າຂົນທີ່ຜິວໜັງຫງອກ ແລະພະຍາດກໍຢູ່ເລິກກວ່າຜິວໜັງລົງໄປ ໃຫ້ນັບຜູ້ນັ້ນວ່າເປັນພະຍາດຂີ້ທູດ ແລະປະໂຣຫິດຕ້ອງປະກາດວ່າຄົນນັ້ນເປັນມົນທິນ. 4ແຕ່ຖ້າຜິວໜັງຊື່ບ່ອນທີ່ເຈັບປວດນັ້ນຂາວ ແລະພະຍາດບໍ່ກິນເລິກລົງໄປກວ່າຜິວໜັງ ພ້ອມທັງຂົນໃນບໍລິເວນນັ້ນກໍບໍ່ຫງອກ ປະໂຣຫິດຈະຕ້ອງກັກຕົວຜູ້ນັ້ນໄວ້ຢູ່ຕ່າງຫາກເຈັດວັນ. 5ປະໂຣຫິດຈະຕ້ອງກວດເບິ່ງລາວອີກໃນວັນທີເຈັດ ແລະຖ້າປະໂຣຫິດເຫັນວ່າອາການເຈັບປວດຍັງຄືເກົ່າ ແລະບໍ່ໄດ້ຂະຫຍາຍອອກໄປ ຜູ້ນັ້ນຈະຕ້ອງຖືກກັກຕົວໄວ້ຢູ່ຕ່າງຫາກອີກເຈັດວັນ. 6ປະໂຣຫິດຈະຕ້ອງກວດເບິ່ງຜູ້ນັ້ນອີກໃນມື້ທີເຈັດ ແລະຖ້າອາການເຈັບປວດເບົາບາງລົງ ແລະພະຍາດນັ້ນບໍ່ໄດ້ແຜ່ລາມອອກໄປ; ປະໂຣຫິດຕ້ອງປະກາດວ່າ ຜູ້ນັ້ນບໍ່ໄດ້ເປັນມົນທິນຕາມກົດບັນຍັດ. ມັນເປັນພຽງອາການເຈັບປວດເທົ່ານັ້ນ. 7ແຕ່ຖ້າອາການເຈັບປວດນັ້ນແຜ່ລາມອອກໄປ ຫລັງຈາກທີ່ປະໂຣຫິດໄດ້ກວດເບິ່ງ ແລະປະກາດວ່າຜູ້ນັ້ນສະອາດດີແລ້ວ ລາວຕ້ອງກັບຄືນມາຫາປະໂຣຫິດອີກ. 8ປະໂຣຫິດຈະກວດເບິ່ງລາວຕື່ມອີກ ແລະຖ້າພະຍາດນັ້ນແຜ່ລາມອອກໄປແທ້ ປະໂຣຫິດຈະປະກາດວ່າຜູ້ນັ້ນເປັນມົນທິນ ຍ້ອນພະຍາດຂີ້ທູດຂອງຜູ້ກ່ຽວ.

9-10ຖ້າຜູ້ໃດຜູ້ໜຶ່ງເປັນພະຍາດຂີ້ທູດ ຜູ້ນັ້ນຈະຕ້ອງຖືກນຳຕົວໄປຫາປະໂຣຫິດໃຫ້ກວດເບິ່ງ. ຖ້າບໍລິເວນເຈັບປວດນັ້ນບວບມີສີຂາວ ຊຶ່ງເຮັດໃຫ້ຂົນໜັງຫງອກແລະມີໜອງໃນແຜ 11ກໍສະແດງວ່າເປັນພະຍາດຜິວໜັງຊໍ້າເຮື້ອ. ປະໂຣຫິດຈະຕ້ອງປະກາດວ່າຜູ້ນັ້ນເປັນມົນທິນ; ບໍ່ຈຳເປັນຕ້ອງກັກລາວໄວ້ຢູ່ຕ່າງຫາກອີກຕໍ່ໄປ ເພາະຮູ້ໄດ້ຢ່າງຄັກແນ່ແລ້ວວ່າລາວເປັນມົນທິນ. 12ຖ້າພະຍາດຜິວໜັງລາມໄປທົ່ວຮ່າງກາຍແຕ່ຫົວຫາຕີນ 13ປະໂຣຫິດຈະຕ້ອງກວດເບິ່ງລາວຄືນໃໝ່. ຖ້າປະໂຣຫິດພົບວ່າ ໂຣກນັ້ນໄດ້ແຜ່ລາມອອກໄປທົ່ວຮ່າງກາຍແທ້ ເພິ່ນຈະປະກາດວ່າຜູ້ນັ້ນບໍ່ເປັນມົນທິນຕາມກົດບັນຍັດ. ຖ້າໝົດທັງຕົວຂອງລາວຂາວດັ່ງຊ້າງເຜືອກ ລາວກໍບໍ່ເປັນມົນທິນຕາມກົດບັນຍັດ. 14ແຕ່ຖ້າອາການເຈັບປວດຕາມຜິວໜັງປາກົດໃຫ້ເຫັນເມື່ອໃດ ຕ້ອງໃຫ້ຖືວ່າລາວເປັນມົນທິນເມື່ອນັ້ນ. 15ປະໂຣຫິດຈະຕ້ອງກວດເບິ່ງອີກໃໝ່ ແລະຖ້າເພິ່ນເຫັນແຜໃໝ່ປາກົດຂຶ້ນມາ ເພິ່ນກໍຈະປະກາດວ່າຊາຍຜູ້ນັ້ນເປັນມົນທິນ. ແຜໃໝ່ນັ້ນເປັນມົນທິນເພາະມັນແມ່ນພະຍາດຂີ້ທູດ. 16ແຕ່ເມື່ອແຜໃໝ່ນັ້ນດີ ປ່ຽນເປັນສີຂາວອີກ ຕ້ອງໃຫ້ລາວໄປຫາປະໂຣຫິດ 17ເພື່ອຈະກວດເບິ່ງລາວຄືນອີກ. ຖ້າພະຍາດນັ້ນເປັນພະຍາດຜິວໜັງສີຂາວເທົ່ານັ້ນ ລາວກໍບໍ່ເປັນມົນທິນ ແລະປະໂຣຫິດຕ້ອງປະກາດວ່າ ລາວບໍ່ເປັນມົນທິນຕາມກົດບັນຍັດ.

18ຖ້າຜູ້ໃດຜູ້ໜຶ່ງເປັນຝີໃນຜິວໜັງແຕ່ດີແລ້ວ 19ແລະຫລັງຈາກນັ້ນ ຖ້າມີສີຂາວບວມຂຶ້ນມາ ຫລືຮອຍສີແດງປົນສີຂາວປາກົດຂຶ້ນໃນບໍລິເວນນັ້ນ ລາວຈະຕ້ອງໄປຫາປະໂຣຫິດ. 20ປະໂຣຫິດຈະກວດເບິ່ງລາວ ແລະຖ້າບໍລິເວນນັ້ນປາກົດວ່າ ເລິກກວ່າຜິວໜັງແລະຂົນທີ່ບໍລິເວນນັ້ນຫງອກ ປະໂຣຫິດຕ້ອງປະກາດວ່າລາວເປັນມົນທິນ. ອັນນີ້ແມ່ນພະຍາດຂີ້ທູດ ທີ່ໄດ້ເລີ່ມຟູຂຶ້ນຈາກແປ້ວຝີ. 21ແຕ່ຖ້າປະໂຣຫິດກວດເບິ່ງໂຣກນັ້ນແລ້ວແລະພົບວ່າ ຂົນໃນບໍລິເວນນັ້ນບໍ່ຫງອກ ແລະບໍລິເວນເຈັບປວດນັ້ນບໍ່ໄດ້ເລິກກວ່າຜິວໜັງແຕ່ມີສີຊີດໆ; ປະໂຣຫິດຈະຕ້ອງກັກຕົວຄົນນັ້ນໄວ້ຢູ່ຕ່າງຫາກເຈັດວັນ. 22ຖ້າພະຍາດແຜ່ລາມອອກໄປຕາມຜິວໜັງ ປະໂຣຫິດຈະຕ້ອງປະກາດວ່າຜູ້ນັ້ນເປັນມົນທິນ; ລາວໄດ້ເປັນພະຍາດຜິວໜັງແລ້ວ. 23ແຕ່ຖ້າບໍລິເວນນັ້ນຍັງຄືເກົ່າແລະບໍ່ໄດ້ແຜ່ລາມອອກໄປ ກໍເປັນພຽງບາດແຜທີ່ສືບມາຈາກຕຸ່ມຝີເທົ່ານັ້ນ ແລະປະໂຣຫິດຈະຕ້ອງປະກາດວ່າ ລາວບໍ່ເປັນມົນທິນຕາມກົດບັນຍັດ.

24ໃນກໍລະນີຂອງຄົນໜຶ່ງທີ່ຖືກໄຟໄໝ້ ຖ້າເນື້ອໃນບາດສົດທີ່ຊື່ກັບບໍລິເວນນັ້ນເປັນສີຂາວຊໍ້າ 25ປະໂຣຫິດຈະຕ້ອງກວດເບິ່ງລາວ. ຖ້າຂົນທີ່ບໍລິເວນນັ້ນຫງອກ ແລະບໍລິເວນນັ້ນກໍປາກົດວ່າເລິກກວ່າຜິວໜັງ ພະຍາດນີ້ແມ່ນພະຍາດຂີ້ທູດ ຊຶ່ງໄດ້ເລີ່ມໃຄ່ຂຶ້ນຕາມບໍລິເວນບ່ອນໄຟໄໝ້ນັ້ນ ແລະປະໂຣຫິດຈະຕ້ອງປະກາດວ່າ ລາວເປັນມົນທິນ. 26ແຕ່ຖ້າຂົນເຫຼົ່ານັ້ນບໍ່ຫງອກແລະບໍລິເວນນັ້ນບໍ່ເລິກກວ່າຜິວໜັງແຕ່ມັນເປັນສີຈາງໆ ປະໂຣຫິດຈະຕ້ອງກັກຄົນນັ້ນໄວ້ຢູ່ຕ່າງຫາກເປັນເວລາເຈັດວັນ. 27ປະໂຣຫິດຈະຕ້ອງກວດເບິ່ງລາວຄືນໃໝ່ໃນວັນທີເຈັດ ແລະຖ້າພະຍາດນັ້ນແຜ່ລາມອອກໄປ ກໍສະແດງວ່າລາວເປັນພະຍາດຂີ້ທູດ ແລະປະໂຣຫິດຈະຕ້ອງປະກາດວ່າລາວເປັນມົນທິນ. 28ແຕ່ຖ້າບໍລິເວນນັ້ນຍັງຄືເກົ່າ ແລະບໍ່ໄດ້ແຜ່ລາມອອກໄປ ພ້ອມທັງເປັນສີຊີດໆ ນັ້ນກໍບໍ່ແມ່ນພະຍາດຂີ້ທູດ. ປະໂຣຫິດຈະຕ້ອງປະກາດວ່າ ລາວບໍ່ເປັນມົນທິນຕາມກົດບັນຍັດ ເພາະວ່າມັນເປັນພຽງແຕ່ແປ້ວຈາກໄຟ້ໄໝ້ເທົ່ານັ້ນ.

29ເມື່ອຊາຍຫລືຍິງຜູ້ໜຶ່ງເປັນພະຍາດທີ່ຫົວຫລືທີ່ຄາງ 30ປະໂຣຫິດຈະຕ້ອງກວດເບິ່ງພະຍາດນັ້ນ. ຖ້າບໍລິເວນນັ້ນປາກົດວ່າເລິກກວ່າຜິວໜັງ ທັງຜົມຊື່ບໍລິເວນນັ້ນເຫລືອງ ແລະບາງກໍສະແດງວ່າອາການເຊັ່ນນັ້ນແມ່ນພະຍາດຜິວໜັງ. ປະໂຣຫິດຈະຕ້ອງປະກາດວ່າຄົນນັ້ນເປັນມົນທິນ. 31ຫລັງຈາກປະໂຣຫິດກວດເບິ່ງລາວແລ້ວ ຖ້າບໍລິເວນບ່ອນເຈັບປວດນັ້ນບໍ່ປາກົດວ່າ ເລິກກວ່າຜິວໜັງທັງຜົມຍັງບໍ່ດຳຂຶ້ນຄືນ ປະໂຣຫິດຈະຕ້ອງກັກຜູ້ນັ້ນໄວ້ຢູ່ຕ່າງຫາກເປັນເວລາເຈັດວັນ. 32ປະໂຣຫິດຈະກວດເບິ່ງພະຍາດຄືນໃໝ່ໃນວັນທີເຈັດ ແລະຖ້າພະຍາດນັ້ນບໍ່ແຜ່ລາມອອກໄປ ແລະບໍ່ມີຂົນເຫລືອງແລະບໍ່ປາກົດເຫັນວ່າ ທີ່ບໍລິເວນນັ້ນເລິກກວ່າຜິວໜັງ 33ຕ້ອງໃຫ້ແຖຜົມຄົນນັ້ນອ້ອມບ່ອນທີ່ລາວເຈັບປວດ. ແຕ່ປະໂຣຫິດຈະຕ້ອງກັກຕົວລາວໄວ້ຢູ່ຕ່າງຫາກເຈັດວັນ. 34ໃນວັນທີເຈັດ ປະໂຣຫິດຈະຕ້ອງກວດເບິ່ງຄືນໃໝ່ ແລະຖ້າມັນບໍ່ແຜ່ລາມອອກໄປ ທັງບໍ່ປາກົດໃຫ້ເຫັນວ່າເລິກກວ່າຜິວໜັງ ປະໂຣຫິດຈະຕ້ອງປະກາດວ່າ ລາວບໍ່ເປັນມົນທິນຕາມກົດບັນຍັດ. ລາວຈະຕ້ອງຊັກເຄື່ອງນຸ່ງ ແລະລາວກໍຈະໝົດເປັນມົນທິນ. 35ແຕ່ຖ້າພະຍາດນັ້ນແຜ່ລາມອອກໄປ ຫລັງຈາກທີ່ລາວໄດ້ຖືກປະກາດວ່າບໍ່ເປັນມົນທິນ 36ປະໂຣຫິດຈະຕ້ອງກວດເບິ່ງຄືນອີກ. ຖ້າອາການເຈັບປວດນັ້ນແຜ່ລາມອອກໄປ ບໍ່ຈຳເປັນຕ້ອງເບິ່ງຜົມຂອງລາວວ່າເຫລືອງຫລືບໍ່; ຄົນນັ້ນເປັນມົນທິນຢ່າງຈະແຈ້ງແລ້ວ. 37ແຕ່ຖ້າປະໂຣຫິດເຫັນວ່າ ຄວາມເຈັບປວດນັ້ນບໍ່ໄດ້ແຜ່ລາມອອກໄປ ແລະມີຜົມດຳປົ່ງຂຶ້ນມາໃນບໍລິເວນນັ້ນ ກໍສະແດງວ່າພະຍາດນັ້ນໄດ້ດີແລ້ວ. ປະໂຣຫິດຈະຕ້ອງປະກາດວ່າ ຄົນນັ້ນບໍ່ເປັນມົນທິນຕາມກົດບັນຍັດ.

38ເມື່ອຊາຍຫລືຍິງຜູ້ໜຶ່ງມີຮອຍສີຂາວໆທີ່ຜິວໜັງ 39ປະໂຣຫິດຈະຕ້ອງກວດເບິ່ງຜູ້ນັ້ນ. ຖ້າຮອຍຂາວທີ່ຜິວໜັງນັ້ນເປັນສີຂາວໝົ່ນ ຮອຍນັ້ນກໍເປັນແຕ່ພຽງຂີ້ກ້ຽນທີ່ຟູຂຶ້ນຕາມຜິວໜັງເທົ່ານັ້ນ; ຄົນນັ້ນບໍ່ໄດ້ເປັນມົນທິນຕາມກົດບັນຍັດ.

40-41ຖ້າຊາຍຄົນໃດຜົມຫລົ່ນ ບໍ່ວ່າທາງດ້ານໜ້າຫລືດ້ານຫລັງກໍຕາມ ຄົນນັ້ນບໍ່ໄດ້ເປັນມົນທິນ 42ແຕ່ຖ້າບໍລິເວນຊື່ຫົວລ້ານນັ້ນ ປາກົດມີອາການບວມແດງປົນຂາວແລະເຈັບປວດ ອັນນີ້ກໍສະແດງວ່າແມ່ນພະຍາດຂີ້ທູດ. 43ປະໂຣຫິດຈະຕ້ອງກວດເບິ່ງລາວ ແລະຖ້າບໍລິເວນນັ້ນມີອາການບວມແດງຊໍ້າປົນຂາວແລະເຈັບປວດ 44ປະໂຣຫິດຈະຕ້ອງປະກາດວ່າຜູ້ນັ້ນເປັນມົນທິນ ເພາະພະຍາດຂີ້ທູດທີ່ຫົວຂອງລາວ.

45ບຸກຄົນໜຶ່ງທີ່ເປັນພະຍາດຂີ້ທູດ ຕ້ອງໃສ່ເຄື່ອງນຸ່ງຂາດ, ປ່ອຍຜົມໃຫ້ຫຍຸ້ງ, ອັດຮີມສົບດ້ານເທິງໄວ້ ແລະຮ້ອງໄປວ່າ, “ເປັນມົນທິນ! ເປັນມົນທິນ!” 46ຄົນນັ້ນຈະເປັນມົນທິນຕາບໃດທີ່ລາວຍັງເປັນພະຍາດນີ້ຢູ່ ແລະລາວຕ້ອງຢູ່ນອກຄ້າຍພັກຫ່າງຈາກຄົນອື່ນໆ.

47ເມື່ອໃດມີຂີ້ເຮື້ອນ ຕິດຢູ່ຕາມເຄື່ອງນຸ່ງຫົ່ມ ບໍ່ວ່າຈະເປັນເຄື່ອງນຸ່ງຫົ່ມທີ່ເປັນຂົນສັດຫລືເປັນຜ້າປ່ານ 48ຫລືຕິດຢູ່ຕາມຜ້າປ່ານຕ່ອນໃດຕ່ອນໜຶ່ງ ຫລືຜ້າຂົນສັດ ຫລືໜັງສັດ ຫລືສິ່ງໃດໆທີ່ເຮັດດ້ວຍໜັງສັດ; 49ຖ້າພະຍາດນັ້ນເຮັດໃຫ້ເຄື່ອງນຸ່ງຫົ່ມມີສີຂຽວຫລືສີແດງ ກໍສະແດງວ່າແມ່ນຂີ້ເຮື້ອນທີ່ກຳລັງແຜ່ລາມອອກໄປ ແລະຕ້ອງນຳສິ່ງຂອງນັ້ນໄປສະແດງຕໍ່ປະໂຣຫິດ. 50ປະໂຣຫິດຈະກວດເບິ່ງ ແລະເອົາສິ່ງຂອງທີ່ເປັນພະຍາດນັ້ນ ໄປໄວ້ຕ່າງຫາກເຈັດວັນ. 51ໃນວັນທີເຈັດ ເພິ່ນຈະກວດເບິ່ງອີກ ແລະຖ້າໂຣກຂີ້ເຮື້ອນນັ້ນແຜ່ລາມອອກໄປ ສິ່ງຂອງນັ້ນກໍເປັນມົນທິນ. 52ປະໂຣຫິດຈະຕ້ອງຈູດສິ່ງເຫຼົ່ານັ້ນ ເພາະມັນມີຂີ້ເຮື້ອນທີ່ກຳລັງແຜ່ລາມອອກໄປ ຈົ່ງໃຫ້ຈູດໄຟຖິ້ມເສຍ.

53ແຕ່ເມື່ອກວດເບິ່ງແລ້ວ ຖ້າປະໂຣຫິດເຫັນວ່າ ຂີ້ເຮື້ອນບໍ່ໄດ້ແຜ່ລາມອອກໄປເຖິງສິ່ງຂອງ, 54ເພິ່ນກໍຈະສັ່ງໃຫ້ເອົາໄປຊັກລ້າງແລະປະໄວ້ຕ່າງຫາກອີກເຈັດວັນ. 55ເມື່ອຊັກແລ້ວປະໂຣຫິດຈະກວດເບິ່ງ ແລະຖ້າບໍລິເວນບ່ອນເປັນຂີ້ເຮື້ອນບໍ່ປ່ຽນສີ ແມ່ນວ່າບໍ່ແຜ່ລາມອອກໄປກໍຕາມ ມັນກໍຍັງເປັນມົນທິນຢູ່ ຈົ່ງຈູດສິ່ງຂອງນັ້ນເສຍ ບໍ່ວ່າຂີ້ເຮື້ອນນັ້ນຈະຕິດແປດຢູ່ຂ້າງໃນ ຫລືຢູ່ຂ້າງນອກສິ່ງຂອງກໍຕາມ. 56ແຕ່ຫລັງຈາກທີ່ປະໂຣຫິດໄດ້ກວດເບິ່ງອີກແລ້ວ ຖ້າບໍລິເວນທີ່ເປັນຂີ້ເຮື້ອນມີສີຊີດໆລົງ ປະໂຣຫິດຕ້ອງຈີກບໍລິເວນທີ່ຕິດໂຣກນັ້ນອອກຈາກເຄື່ອງນຸ່ງ ຫລືອອກຈາກໜັງສັດ. 57ຕໍ່ມາ ຖ້າຂີ້ເຮື້ອນປາກົດຂຶ້ນມາອີກ ແລະແຜ່ລາມອອກໄປຕາມສິ່ງຂອງເຫຼົ່ານັ້ນ. ຜູ້ເປັນເຈົ້າຂອງຈະຕ້ອງຈູດສິ່ງຂອງເຫຼົ່ານັ້ນເສຍ. 58ຖ້າລາວຊັກສິ່ງຂອງເຫຼົ່ານັ້ນແລ້ວ ແລະຈຸດທີ່ປາກົດນັ້ນໝົດໄປ ຕ້ອງໃຫ້ລາວຊັກຕື່ມອີກ ແລ້ວຈຶ່ງໃຫ້ຖືວ່າເຄື່ອງນັ້ນບໍ່ເປັນມົນທິນຕາມກົດບັນຍັດ.

59ອັນນີ້ ແມ່ນລະບຽບການກ່ຽວກັບຂີ້ເຮື້ອນ ບໍ່ວ່າເກີດນຳຂົນສັດ ຫລືຜ້າປ່ານ ຫລືໃນຜ້າປ່ານ ຫລືໃນເຄື່ອງນຸ່ງທີ່ເປັນຂົນສັດ ຫລືສິ່ງໃດໆກໍຕາມທີ່ເຮັດດ້ວຍໜັງສັດ; ອັນນີ້ແມ່ນລະບຽບເພື່ອຕັດສິນວ່າ ເປັນມົນທິນຫລືບໍ່ເປັນມົນທິນຕາມກົດບັນຍັດ.

Amaokwu Akwụkwọ Nsọ Ndị Ama Ama siteré na
ລະບຽບ^ພວກເລວີ 13

Akwụkwọ Nsọ:

ລາວ

Udi: ພຣະຄຳພີສັກສິ - ພຄພ