Galasi munu 6
6
’Ka bɔ ka ke va kɔné sina
(Rom 15:1–2; 12:3; 1 Ts 5:14)
1Bwenu, dé ka a ye léé, mi do saanwe kɛlɛ, ka lé ka ke lélimunu nya, ’ka bɔ ’bɛzan va bli drɔɔ nya yé é dɔ é dɔbɛ gi. Ka faa ’é yuɛ pa kabozen va do do, dé wo da ka gi dan. 2’Ka dɔ ka ke lé we tɔntɔn kɔnénu wuo, a zo lé ka dan Krist lé bélidɔwe lɛ sɔɔ lɛ.
3Dé é dɔ mian gi léé, ’é a blɛn, dɔlé té é ’ka we do kpen nya lo, ’té é a ébozen saanna é wo. 4Mi do do faa ébozen kɛlɛwenu va gini ma, yé é dan ébo tɔ zin femawe ye lɛ ébozen lé we ma; té ébo zé dan mi bɛ zé ma lo ma. 5Naa, é a lé mi faa do do ébozen lé kɔné si.
6Mian woo we paan a gi, ’é é leefɛnu faa guli mian éé we paan a gi, yee valé ’bɛ ma ma.
7Té ka kabo saan we ’ko gi lo; wo ’ka bɔa dabli kɛlɛle lɛ Kazambale lɛ lo. Mi éé fɛan vɔa, yee duo lé é dan a gyɛ lɛ é ziin. 8Mian éé fɛ vɔa é dɔbɛ kyɛn zé nya, é dan fɛ vɔnle ye lɛ ézé tɔnɔ nya; naa, mian éé fɛ vɔa Kazambale Léli zé nya, vole é yuɛma lé a glɛ ’ka lo, é dan a ye lɛ léli zé tɔnɔ nya. 9Té kaa wɔlɛgi é nyaan kaa ma wezin kɛlɛle nya lo; naa, dé a bléyi bɔ, kaa dan a tɔnɔ ye lɛ, ’té dé kaa fuu ’ka si lɛ kaa ta lo. 10Bɛwemalé, bléyian va lé a se a kaa lɛ, kaa wezin kɛlɛ mi faa lɛ ma, naa, bwenu lé wo ke Kazambale lé we gi, kaa wozé kɛlɛ kiɛre yé é mini mi bɛnu zé ta ma.
Weplale valé weale voélazan
11Sɛbɛwɔlɛ blɛɛn ’konu ’ko, ka wo yee? Maa ɛ ke wo gyɛna anbozen bɛ nya.
12Munu faa lé é sɔ wo lɛ léé, ’wobo lé we kɛlɛ néné munu yuɛ va, wo ɛ ke a va léé, ’wo ka gane dɔ gla nya, té munu é nyané pa ’wo ta Krist lé yiliblan lé we ma lo we gi. 13Naa, ganedɔmunu bozen ’ka tawona bélidɔwe ta lo, naa, é sɔ wo lɛ léé, ’wo ka gane dɔ wobo ze vɔle we gi, amalé wo léé, ’ka kɛlɛ. 14Naa, dé é a maa nya, dé é ’ka Kaazan Jézu Krist lé yiliblan lé we nya lo, ’té an ’ka anbo ze vɔa we do kpen gi lo. A nya lé tɛrɛlafɛnu ga yiliblan ta an vazia, bélé fɛan zo lé an ga yiliblan ta tɛrɛlafɛnu vazia, a zo. 15Naa, dé mi gane a é dɔleoo, dé a gane ’ka é dɔle looo, ’bɛ ’ka we do kpen nya lo; kɛlɛle mi dɛrɛ nya ɛ ke we nya. 16Munu faa lé wo ke tawona bélidɔwe ’ko ta, é valé Kazambale zé Izraɛlnu, Bale ’é wo vo drɔɔ yé a nyanai ’é zén wo ta ma.
17É sia bléyi ’ko va, té mi do kpen é ganedɔwe bɛ fe an lɛ é dɛrɛ lo; naa, Jézu ta manɔn pɔlɛ ɛ ke an kɔlɛ ma ’ko.
18Bwenu, Kaazan Jézu Krist lé zin ’é vo ka léli ta ma. Amɛɛn.
Pilihan Saat Ini:
Galasi munu 6: GOURU
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Alliance Biblique de Cote d'Ivoire 1979