Galasi munu 5
5
’Ka vo miné nya
(Kw 15:1–10, 24–29; Gal 3:1–14)
1Krist kaa si luu gi, kaa kɛlɛle miné nya we ma. Bɛwemalé ’ka dɔ gligli; té ka nyi si léé, ka wɔra wolé luubale gi é dɛrɛ lo.
2Bé ye, maa Pɔl, maa lé ka lɛ léé, dé wo ka gane dɔ, ’té tɔnɔ do kpen ’ka Krist ma kazé nya lo. 3Munu faa lé wo gane ke é dɔle, maa we plaan wo lɛ wéiin léé, é a lé wo bélidɔwe faa kɛlɛ. 4Ka‐an ka kɛlɛle tegele naginian bélidɔwe va, ka faa kan kini Krist ma, yé ka ’ka Bale lé zin va é dɛrɛ lo. 5Naa, ko, Kazambale Léli éé bɔa ko va, yé ko a blivolɛdére lɛsɔɔle lɛbɛnna, yee lé ke léé, ’wo ko ye tegele ko blipale ma. 6Dé mi a Jézu Krist gi, ganedɔle valé ganedɔlo tɔnɔ ’ka lo; naa, blipale lé éé we kɛla sɔlɛle nya, yee ɛ tɔnɔ ke.
7É kyɛn ka a vlan buruna é zima; de ɛ ka dɔ léé, té ka webozen lɛdɔma loo? 8Bɔngikiniwe lé wo ka sia ana a nya bɛ, é ’ka sié mi lé éé ka laan, a va lo. 9Lévɛn kiéné éé buruyɔɔ faa nwaan. 10Mizan gi, an bli vo ka lɛ léé, ka ’ka dan saan lɛ we ’ko gi lo. Naa, mian éé ka ’wuo nɔlaan, dé é a miomian nya, Bale é dan we lɛdɔ lɛ ’bɛzan gi. 11An bwenu, dé maa a tan ganedɔle lé we fena ’té mɛmalé wa nyané pana an ta é ziin? ’Té tɔ nyané si Jézu lé yiliblan ma é woo? 12Wo lé wo ke ka ’wuo nɔlana bɛ, dé é a ’bɛ zo, ’wobo kɛlɛ miblalenu nya ma.
13Bwenu, wo ka laa ka vole kaboma we ma. Naa, té é kɛlɛ ka dɔna nya yé ka ka dɔbɛ kyɛn lé blibɔmawe kɛlɛ lo; naa, ’ka kɛlɛ ka ke wuozannu nya lɔrɔpale nya. 14Naa, bélidɔwe faa lɛ a é sɔɔle dére do kpen gi léé, ’i bɔluzan lɔrɔ pa bélé biibozen zo. 15Naa, dé ka a yifaama blén zana gyɛna, ’ka yuɛ pa kabozen va, dé ka da ka ke kulu ga.
Mi dɔbɛ kyɛn kɛlɛwenu valé Kazambale Léli lé wenu
(Rom 8:1–14; Éf 5:1–12; Kol 3:5–15)
16Wean maa ke a fena, yee lé ke ’ko: ’ka tawo Kazambale Léli yɛrama, yé ka ’ka dan ka dɔbɛ kyɛn lé blibɔmawe kɛlɛle lɛ sɔɔ lɛ lo. 17Naa, mi dɔbɛ kyɛn lé blibɔmawe a Kazambale Léli lé blibɔmawe ma é yɛrama, yé Kazambale Léli zé a é ziin mi dɔbɛ kyɛn zé ma é yɛrama; wa za kɛlɛna. Amalé wenu lé é sɔ ka lɛ léé, ka wo kɛlɛ bɛ, ka ’ka bɔa wo kɛlɛle lɛ lo. 18Naa, dé Kazambale Léli éé goo ka nya, ’té ka ’ka bélidɔwe ta lo. 19Mi faa mi dɔbɛ kyɛn kɛlɛwenu dɔɔ. Wo lé ke ’ko: pɛnpɛnnégyɛle koo, we tiridɔle koo, we vɔnle koo, 20miyili banle koo, zɔɔ tanle koo, nyanézan kɛlɛle koo, zɔdɔle koo, maawole koo, zapale koo, zavɔle koo, kan kinile koo, 21palu kɛlɛle koo, bli bɔle fɛ ma koo, nwɛ lé mi gyɛle koo, kɛlɛle bun‐anzan nya koo, ’bɛ zoɛ we bɛnu koo, woo lé. Maa a lɛ kini ka lɛ, fɛan zo lé maa a fe ka lɛ é kyɛn, a zo, léé, munuan woo ’bɛ zoɛ wenu kɛla, wo ’ka dan tɔnɔ ble lɛ Kazambale lé fuatɛrɛ la monomono lo.
22Naa, wenu lé woo sié Kazambale Léli va, wo lé ke ’ko: sɔlɛle koo, ginanale koo, vole drɔɔ koo, bli tiéé koo, wezin kɛlɛle koo, bli zin koo, yarapale we la koo, 23bli drɔɔ koo, kɛlɛle i kɔlɛzan nya koo, woo lé. Bélidɔwe ’ka we ’konu ma lo.
24Munu lé wo ke Jézu Krist zé nya, wo ’wo dɔbɛ kyɛn gyɛ yiliblan ta, é valé élé blibɔmawenu valé é lɔrɔ nya. 25Dé kaa voo é yuɛma Kazambale Léli nya, kaa tawo é ziin Kazambale Léli lé we yɛrama ma.
26Té kaa kaabo kɛlɛ blɛn é boa lo, té kaa kaa ke ’léé wɛɛ lo; té kaa maawo kaa ke va lo.
Pilihan Saat Ini:
Galasi munu 5: GOURU
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Alliance Biblique de Cote d'Ivoire 1979