Galasi munu 4
4
Pɔl Krétiɛnnu lé we gi bɔrɔ pa
(Rom 8:14–17; 2 Kor 11:2–3)
1Wean maa a fé, yee lé ke ’ko: bléyian va lé zarablezan a tan né kiéné nya, alé we ’ka é sile luu zé ma lo, dɔlé ’té é a fɛnu faazan nya; 2é a wepaamigizannu valé weyuɛgibomunu wuo fɔɔ bléyi lé a ti a dɔ, yé ’é bɔ. 3A bɛ duo gi lé kaazé ke é ziin. Bléyian va lé kaa ke nénu nya, ’té kaa a tɛrɛlamunu lé we vininnu lé luu nya. 4Naa, a bléyi lɛ sɔɔ aan wo, Kazambale é Be pa zia; le do a yaa bélidɔwe wuozan nya; 5é a pa zia, munu lé wo ke bélidɔwe wuo, wo tabole we ma, kaa kɛlɛle a benu nya we gi.
6Ka a benu nya, bɛwemalé Kazambale é Be Léli pa kaa bli gi, ’té éé siaan: Aba, ’bɛ gi léé, an ti. 7Bɛwemalé i ’ka luu nya é dɛrɛ lo; i a a be nya. Yé dé i a a be nya, ’té i a tɔnɔblezan nya é ziin, Kazambale lé zin lé we ma.
8É li, ’té ka ’ka Kazambale dɔɔa lo, ’té balenu lé wo ’ka bale bozennu nya lo, ’té ka wo bɔa. 9Naa lao, ka Kazambale dɔɔ. ’Bɛ ta loru, Kazambale ɛ ka dɔɔ. Yé é kɛlɛ kaa yé ka nɔla boawe tɔɔtɔɔ vininzannu ’ko vaa? É kɛlɛ kaa yé ka kɛlɛle wolé luu nya nyi si é ziin? 10Yinu koo, monénu koo, bléyinu koo, lɛɛnu koo, ka a wolé we kɛlɛna. 11Maa a kanana léé, Nyanama faa lé maa a pa kalé we ma bɛ, dé a tɔnɔ ’ka kɛla loo?
12Bwenu, kalé zanté; ’ka kɛlɛ bélé an zo ma. Naa, maa é ziin, an kɛlɛ bélé ka zo.
13Ka ’ka wenyané do kpen kɛlɛ lɛ an lɛ lo. Ka a gi dɔɔ léé, an kɔlɛ ma gyɛ lé we ma lé maa Wenéné fe ka lɛ é vinin. 14An kɔlɛ ma gyɛ kɛlɛ ka gidanwe nya, naa, ka ’ka an ye lɛ boami nya lo; ka ’ka serele bo lɛ an ma lo. Ka an bɛn si é zima bélé Kazambale lé lanje do zo; bélé Jézu Krist bozen zo. 15Ka gi nanale lé é ke é kyɛn, é a sin kyɛɛn? Maa ka ze vɔ léé, dé é vo lé wo vo wo yuɛ sona a gi, ’té ka ka yuɛ so ’bɛ bléyi va, yé ka a nɔ an lɛ. 16Webozen fele ka lɛ ma lé an kɛlɛ ka nyanézan nyaa?
17Mi kenu éé ka ze vɔa, naa, wo ’ka a kɛla ’wo bli tegele nya lo. É sɔ wo lɛ léé, wo ka si ko zuo, ka gole ’wo zuo we ma. 18É a é zima léé, ka fuu ’é dɔ ka ta wezin kɛlɛle gi bléyi faa ma; maa a ka va bléyian va, té ’é kɛlɛ ’bɛ bléyi saa nya lo, naa, ’é kɛlɛ bléyi faa zé nya ma. 19Ka a anlé nénu nya; kalé we ma lé maa a nyané blena é ziin né yaale lé nyanéblelenu zo, fɔɔ yé Krist ’é kɛlɛ ka bli gi. 20É sɔ an lɛ sin léé, an kɛlɛ ka va, yé an dére drɔɔ fe ka lɛ, naa, kalé we éé gi bɔrɔ paan an ma.
Agaa valé Sara lé we magɔné vɔle
(WP 21:1–12; Ébr 12:18–24)
21Maa léma: ’kaa lé, é sɔ ka lɛ léé, ka kɛlɛ bélidɔwe wuo bɛ, ka ’ka tɔné dɔa bélidɔwe lɛ loo? 22Wa gyɛ a gi léé: Abraam négɔné fié yaa; a do a luudané be nya, yé a do a miné lu be nya. 23Wo luudané be yaa tɛrɛlamunu lé né yaabɛ yɛrama, naa, wo miné lu be yaa blivolɛdére yɛrama. 24Wegɔnévɔle lé ke bɛ. Le fié ’konu a bélé gipawe fié zo. A do lé éé sié Sinai gɔ va, yé é né yaa luu bɛn nya, Agaa lé. 25Naa, Agaa ’ko, é a Sinai gɔ nya Arabi tɛrɛ la. Jérusalɛm lé é ke ana sin, é a ’bɛ tɔmase nya. Yee valé élé nénu a luunu nya ’bɛna. 26Naa, lagi loru Jérusalɛm a miné lu nya. Yee ɛ ke kaa bu nya. 27Naa, é a é gyɛle Kazambale lé sɛbɛ gi léé:
Bii lé i ke sɔnzan nya, ’té i ’ka né yaan lo, i gi ’é nana ma.
Bii lé i ’ka né yaale lé nyanéblele gi dɔɔ lɛ lo, ’i kun siaale ma gi nanale nya ma.
Naa, le bɔrale lé nénu kiɛre
É dan mini lɛ bosizan zé ta.
28Naa, an bwenu, wo ka yaa Kazambale lé blivolɛdére ma munu nya, bélé Izak zo. 29Naa, fɛan zo lé mi lé wa yaa tɛrɛlamunu lé né yaabɛ yɛrama bɛ, é nyané pa mi lé wa yaa léli yɛrama, a ta é vinin fɛan zo bɛ, a zo duo lé kyɔ zé ke. 30Naa, Kazambale lé sɛbɛ lé nɔɔ? É léé: ’I luudané valé é be bin, naa, luudané be ’ka dan zarafɛ ble lɛ miné lu be va lo. 31Bɛwemalé, bwenu, kaa ’ka luudané lé nénu nya lo; kaa bu lé ke miné lu nya.
Pilihan Saat Ini:
Galasi munu 4: GOURU
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Alliance Biblique de Cote d'Ivoire 1979