Galasi munu 1
1
Weale lé
1-2’Kaa léglizigimunu faa lé ka ke Galasi tɛrɛ la, ko we ka va. Maa Pɔl valé bwenu faa lé wo ke an va ’ko, ko ɛ ke sɛbɛ ’ko gyɛna ka lɛ. Maa Pɔl, maa a nwunvɔzan nya; munu ’ka an dɔ lɛ ’bɛ nya lo, yé mi do kpen ’ka an nwunvɔ lɛ lo. Naa, Jézu Krist valé Tibale lé é Jézu nwa gamunu va bɛ, wo ɛ an dɔ, yé wo ɛ an nwunvɔ. 3Kaa Ti Bale valé Mizan Jézu Krist ’wo zin kɛlɛ ka lɛ yé ’wo ka vo drɔɔ ma.
4Naa, Krist ébozen nɔ kaalé wenyanénu ma, kaa sile bléyi nyané ’ko gi we ma. É ébo nɔ kaalé wenyanénu ma kaa Ti Bale lé blibɔmawe nya. 5’Wo Bale tɔ bɔ lɛɛfaama, té a glɛ é dɔ lo ma. Amɛɛn.
Wenéné bɛ ’ka lo
(Gal 3:1–5; 4:9–20; 5:1–12)
6Mian é ka laa Krist lé zin nya, an gi vuru ka diérale ’bɛzan zuo é kele we ma, ka gole wenéné bɛ zuo we ma. 7É ’ka kɛlɛ lɛ léé, wenéné bɛ a lo, naa, mi kenu ana, é sɔ wo lɛ léé, ’wo Krist lé Wenéné nɔla yé ’bɛ gi bɔrɔ pa ka ma.
8Naa, dé é a kobozen nyaoo, dé é a lagi lanje nyaoo, dé wo wenéné bɛ fe ka lɛ, ’té é ’ka wenéné lé ko a fe ka lɛ bɛ, a nya lo, bale a é pale ’bɛzan ma ma. 9Ko a fe ka lɛ é kyɛn, yé sin maa a a taa fena ka lɛ é ziin; dé mian é wenéné bɛ fe ka lɛ, yé é ’ka Wenéné lé ka a nyi si, a nya lo, bale a é pale ’bɛzan ma ma.
10Yé lao, maa a a va léé, munu ɛ an ye mi zin nya laa, taa, Bale ɛ an ye mi zin nyaa? Taa, maa a kwa kulina léé, anlé we é sɔ munu lɛɛ? Dé maa a tan kwa kulina léé, anlé we é sɔ munu lɛ, ’té maa ’ka kɛla kɔɔn Krist wuozan nya lo.
Pɔl kinin nwunvɔzan nya fɛan zo
(Kw 22:3–16; 26:9–20; 9:1–20)
11Bwenu, maa lé ka lɛ léé, Wenéné lé maa a fe ka lɛ, é ’ka si lɛ munu va lo. 12Maa ’ka a ’ma lɛ mi ta lo; mi ’ka a paa lɛ an gi lo; naa, Jézu Krist ɛ gɔɔn an lɛ.
13An giébɛ a fɛan zo Juifinu lé bazorozi ta é kyɛn, ka ’bɛ ’ma. Yé fɛan zo lé an nyané pa Kazambale lé léglizigimunu ta é baba fɔɔ yé é gié é glɛ ta, ’té maa kwa kulian a sɛrɛle tata we ma, ka a gi dɔɔ. 14Yé fɛan zo lé maa Juifinu lé bazorozi ta tawo yé é mini munu lé ko valé wonu lɛɛ ke do, wo ta, é valé an bɛn gi munu zé ta bɛ, ka a gi dɔɔ. ’Té an fuu a an ta é baba an tranu gɔnɔlawe kɛlɛle gi. 15Naa, Bale lé sɔlɛwe yɛrama é an pa é yɛrama an bu lé an yaa bléyi va, yé é an laa élé zin nya. 16Yé é sɔ Bale lɛ léé, é ’é Be nagɔɔn an nya léé, maa ’bɛlé we fe bɛnnu worona. Kele tɔɔn maa ’ka we laa lɛ mi do kpen lee lo, 17yé maa ’ka go lɛ Jérusalɛm, munu lé wo ke é kyɛn nwunvɔzannu nya an ’lɛ, wo va lo, naa, an go Arabi tɛrɛ la. ’Bɛ zuo yé an da é ziin Damas.
18Lɛɛ yaa giéle zuo, an go Jérusalɛm, ’té é sɔ an lɛ léé, an Piɛri dɔɔ. An vo a va yi vu ta soru, 19naa, dé é ’ka Mizan zuané Jak nya lo, maa ’ka nwunvɔzan bɛ ye lɛ lo. 20Bé ye, ko faa a Kazambale ’lɛ; we lé maa a gyɛna ka lɛ, maa ’ka viéwona a gi monomono lo.
21’Bɛ zuo maa go Siri valé Silisi tɛrɛnu la. 22Yé Judé léglizigimunu lé wo ke Krist gi, wo ’ka tan an vinin ye lɛ lo. 23Wa ’ma saawo léé, mi lé é nyané pa ’wo ta é kyɛn bɛ, Kazambale lé we lé é a kwa kulina é kyɛn léé, ’é a sɛra, é a sin ’bɛlé we fena. 24Yé wo vo Kazambale tɔ bɔna anlé we ma.
Pilihan Saat Ini:
Galasi munu 1: GOURU
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Alliance Biblique de Cote d'Ivoire 1979