एजकेल 14
14
बिधाता निं कंज़रैई मंदअ
1इज़राईली सैणैं मांझ़ै आऐ एकी धैल़ै मुंह पुछ़दै संघा बेठै मुंह आजू धरनीं। 2बिधाता बोलअ मुखा इहअ, 3“मणछा, ईंयां मणछ झ़ूरा मुहुर्ती पूज़णा लै तेता का सुआई किज़ै होर सोठदै ई आथी। ईंयां आसा एऊ पापा करने ज़ज़ाल़ा दी शाचै दै। ईंयां कै सोठा कि मुंह इने गल्लो ज़बाब दैई हेरनअ?
4“ऐबै खोज़ तूह इना का इहअ कि हुंह मालक बिधाता बोला तिन्नां लै इहअ, ‘तम्हैं इज़राईली ज़ुंण मुहुर्ती पूज़णा लै झ़ूरा अर एऊ पापा करने ज़ज़ाल़ा दी आसा शाचै दै! अर ज़ुंण तम्हैं गूरा सेटा मुंह पुछ़दै आसा आऐ दै, मुंह बिधाता दैणअ तिन्नां लै थारी खास्सी मुहुर्तीए साबै ज़बाब! 5एता करै फरेऊंणअ मुंह इज़राईलीओ मन्न आप्पू बाखा बापस ज़ुंण इना मुहुर्तीए पूज़ा करनै पिछ़ू मुंह छ़ाडी दूर आसा डेऊऐ दै।’
6“ऐबै लअ तूह इज़राईली का खोज़ी कि हुंह मालक बिधाता बोला इहअ, ‘इज़राईलीओ! आपणैं पापो प्राश्त करा, इना च़िल़्हखरी मुहुर्ती का हटा पिछ़ू, पाप करने पाआ छ़ाड़। तम्हैं फिरा मुंह बाखा लै बापस।
7“‘ज़ै तम्हां इज़राईली मांझ़ै एक ज़ण्हअ बी, तम्हां जैंदरी बस्सै दै परदेसी मांझ़ै बी कुंण एक ज़ण्हअ बी मुखा दूर हई मुहुर्ती पूज़ा करना लै झ़ूरे अर एऊ पापा करने ज़ज़ाल़ा दी होए शाचै दै, तेखअ ज़ै तिंयां मेरै गूरा सेटा मेरी सलाह पुछ़दै एछे, मुंह बिधाता दैणअ तम्हां लै तेतो ज़बाब! 8मुंह हणअ तेऊए खलाफ, सह हणअ इहअ नछ़ैण ज़ेता का होर लोग बी सबक शिखल़े, तेऊए नाओंऐं बणनी आजू लोगा जैंदरी कहाबत। सह करनअ मुंह परज़ा मांझ़ा का दूर। तेखअ जाणअ तम्हां का थोघ लागी कि हुंह आसा बिधाता।
9“‘ज़ै कुंण गूर धोखै दी तेऊ मणछा लै मुंह बाखा झ़ुठअ समाद खोज़े, तिंयां गल्ला करनी मुंह बिधाता ई झ़ुठी अर मुंह डाहणअ सह गूर ई धोखै दी चैल़ी। मुंह दैणीं तेऊ गूरा लै सज़ा अर सह करनअ मुंह आपणीं इज़राईली परज़ा मांझ़ा का दूर। 10सह गूर अर तेऊ का मेरी सलाह पुछ़णै आल़अ सह मणछ, तिन्नां दुही भेटणीं एही ई सज़ा। 11मुंह दैणीं तिन्नां लै सज़ा ताकि मेरी इज़राईली परज़ा मुंह छ़ाडी दूर नां डेओए अर नां तिंयां पाप करी छ़ोतलै होए। तैही हणैं तिंयां मेरी खास परज़ा अर हुंह हणअ तिन्नों परमेशर।’” परमेशर बिधाता बोली ईंयां सोभै गल्ला।
नूह दानिएल अर आयूब
12बिधाता दैनअ मुल्है समाद, 13तेऊ बोलअ इहअ, “मणछा, ज़ेभै कुंण देशे पाप करी मुंह संघै विश्वास घात करा, हुंह एछा आप्पै संघा दैआ हुंह तिन्नां लै एही सज़ा कि हुंह करा तिन्नें तेऊ मूल़ा ई खतम ज़िधा का तिन्नां ज़िणस भेटा। तिन्नां लै पाआ हुंह नकाल़ संघा करा तिन्नां तिन्नें डागै-चैणैं संघी खतम। 14ज़ै आझ़ एऊ देशै दानिएल, आयूब अर नूह बी ज़िऊंदै हंदै, तिन्नें धर्मीं कामां करै बी बच़णैं तै सिधै तिंयां चअन ज़ण्हैं आप्पू ज़िऊंदै, बाकी होरी निं तिंयां बच़ाऊई सकदै। अह गल्ल बोली मंऐं परमेशर बिधाता।
15“मणछा, ज़ै हुंह पापी देशे लोगा मारदै बणें ज़ीबा छ़ाडूं, ज़ुंण तैहा ज़ैगा पठी बरैबाद अर शुन्नीं करे कि तिन्नां ज़ीबा डरै निं तेस्सी बाती कोह एछदअ डेऊंदअ आथी, 16अर ज़ै तिधी नूह, दानिएल अर आयूब बी हंदै, तैबी सका तै ईंयां चअन धर्मीं मणछ आपणैं भलै कामां करै सिधी आपणीं ई ज़िन्दगी बच़ाऊई, तेता का लाऊआ निं तिंयां आपणैं शोहरू-शोहरी बी बच़ाई सकदै तै। हुंह मालक बिधाता खाआ आपणैं सोह! सिधै धर्मीं मणछ ई बच़णैं अर बाकी हणअ सारै देशो बनाश।
17“मणछा, ज़ै हुंह तेऊ पापी देशे बारै दुशमणे सैना लै बोलूं, ‘एऊ देशा लै पल़ा चुटी अर एथ बस्सै दै सोभी लोगा पाआ एकी बाढा का दुजै बाढा तैणीं तलबारा करै काटी मारी।’ ज़ै हुंह इहअ करै तेऊ देशे मणछ अर पशू पठी खतम करूं, 18तिधी ज़ै ईंयां चअन धर्मीं मणछ होए, हुंह खाआ आपणैं सोह! कि तैबी सका तै ईंयां चअन धर्मीं मणछ आपणैं भलै कामां करै सिधी आपणीं ई ज़िन्दगी बच़ाऊई, तेता का लाऊआ निं तिंयां आपणैं शोहरू-शोहरी बी बच़ाऊई सकदै तै। अह गल्ल बोली मंऐं परमेशर बिधाता।
19“मणछा, ज़ै हुंह तेऊ पापी देशै माहा मरी पाऊं अर रोश्शै हुंह खास्सै मणछ अर डागै-चैणैं मारी पाऊं, 20ज़ै तिधी नूह, दानिएल अर आयूब बी हंदै, हुंह परमेशर बिधाता काढा आपणैं सोह कि तैबी सका तै ईंयां चअन धर्मीं मणछ आपणैं भलै कामां करै सिधी आपणीं ई ज़िन्दगी बच़ाऊई, तेता का लाऊआ निं तिंयां आपणैं शोहरू-शोहरी बी बच़ाऊई सकदै तै।”
21तेखअ बोलअ परमेशर बिधाता, “ऐबै आसा मंऐं सोठी डाहअ द कि मुंह पाणीं एरुशलेम नगरी लै च़ार आफ़ता, जुध, नकाल़, बणें ज़ीब अर नबिज़री बमारी। एता करै हणैं तेऊ देशे मणछ अर पशू दुहै खतम।#प्रका. 6:8 22ज़ै तिन्नां मांझ़ै कुंण ज़िऊंदै बच़े अर आपणैं शोहरू-शोहरी ज़िऊंदै बच़ाऊए, तूह भाल़ै तिन्नां ज़ेभै तिंयां ताह सेटा लै एछे। तिन्नां भाल़ै कि तिंयां किहै कदुष्ट आसा, तेभै हणीं ताह दसल्ली कि मंऐं ज़ुंण तिन्नां लै सज़ा दैनी अर एरुशलेम नगरीए ज़ुंण हान्नी किई, सह किअ ठीक। 23तेखअ लागणअ ताखा थोघ कि ज़ुंण बी मंऐं किअ, तिहअ करनअ त असली दी ज़रूरी। अह गल्ल डाही मंऐं परमेशर बिधाता बोली।”
Pilihan Saat Ini:
एजकेल 14: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.