Meko 27
27
Vaũlo Aitwawa Loma na Meli
1Yĩla kwatwiwe kana nĩtũũthi na meli nthĩ ya Italĩa, nĩmamũnenganie Vaũlo vamwe na ovwa angĩ kũla kwĩ mũnene ũmwe wa asikalĩ ĩana weetawa Yuliasi. Mũnene ũsu aĩ wa kĩkundi kyeetawa kĩkundi kya Aukusito. 2Nĩtwaendie twalika melinĩ yaĩ ya kuma ndũanĩ ya Atilamitio, na yaĩ vakuvĩ kũkũsya ĩthi kũla meli iũngamaa kĩsionĩ kya Asia na twambĩĩa kyalo. Twaendanisye na Alisitaliko, mũndũ waumĩte ndũanĩ ya Thesalonika ĩla yĩ nthĩ ya Masendonia. 3Ũnĩ ũsu nĩtwavikie Sitoni. Yuliasi nĩwamwĩkie Vaũlo nesa kwa kũmũnenga mwanya athi kũla kwĩ anyanyae, makamũnenge kĩla waĩ na vata nakyo. 4Nĩtwaumie vau, na nũndũ kĩseve kyauutanaa kyumĩte kũla tũendete, twesĩla ngalĩko ĩla kĩseve kĩtauutanaa ya kĩthama kya Saivulasi. 5Nĩtwakĩlanĩlye ũkanga ũla ũkuumanĩte na nthĩ ya Vambilia na Silisia, twathi twavika ndũanĩ ya Mila ĩla yĩ kĩsionĩ kya Lisia. 6Vau, ũla mũnene wa asikalĩ ĩana nĩweethĩie meli yaĩ ya kuma Alekisandĩlĩa yakũasya ĩthi Italĩa, na kwoou atũlikya melinĩ ĩsu.
7Nĩtwaendie o kavola vandũ va mĩthenya mingĩ twavika na thĩna mwingĩ ndũanĩ ya Nindo. Nũndũ wa kwĩthĩwa kĩseve kĩyaatwĩtĩkĩlya tũendee na kyalo twĩsĩle ngalĩko ĩsu, nĩtwaendie twesĩla ngalĩko ĩla kĩseve kĩtauutanaa ya kĩthama kya Kĩlete vakuvĩ na Salimoni. 8Nĩtwaendie na mathĩna maingĩ tũkuumanĩte na kĩthama kĩu twavika vandũ vetawa Ũthũmũo Mũseo, vakuvĩ na Lasea.
9Nĩtwaanangĩie ĩvinda yĩasa vau, na kyalo kya kũthi na meli yu kyaĩ mũisyo nũndũ mũthenya mũnene wa Kũtĩĩa Kũya#27.9 mũthenya mũnene wa Kũtĩĩa Kũya: Mũthenya ũũ no w'o Mũthenya wa Ũekeo wa Naĩ, na weethĩawa vaa mwei wa kenda ũithela kana wa ĩkũmi ũyambĩĩa, na ĩvindanĩ yĩu kweethĩawa nzeve nthũku yatumaa kyalo kya kũthi na meli kĩthĩwa kĩ mũisyo waĩ ũnavĩta. Kwoou Vaũlo nĩwamataie amea atĩĩ, 10“Aũme, nĩona kyalo kĩĩ kĩĩthĩwa kĩ kya thĩna na wasyo mwingĩ, na tyo kwa mĩio na meli syoka, ĩndĩ o na kwa mathayũ maitũ.” 11Ĩndĩ ũla mũnene wa asikalĩ ĩana ndaamwĩthukĩĩsya Vaũlo; vandũ va ũu aatĩĩie ũtao wa mũtwai wa meli na mwene wayo. 12Nũndũ wa kwĩthĩwa vau meli syaũngamaa vayaĩ vaseo kwĩkala ĩvindanĩ ya mbevo, kĩla mũndũ endie tũendee na kyalo nongi kana nĩtũvika Voenike tũkekale kũu ĩvindanĩ ya mbevo. Vau Voenike vaĩ na vandũ meli syaũngamaa kĩthamanĩ kĩu kya Kĩlete vasyaĩtye ngalĩko ya ĩũlũ kwelekela wumĩlonĩ wa syũa.#27.12 Maandĩko angĩ ma tene ma Ndeto ya Ngai maĩtye ngalĩko ya ĩtheo kwelekela ũthũĩlonĩ wa syũa, kana ngalĩko ya ĩũlũ kwelekela ũthũĩlonĩ wa syũa
Kĩuutani Kĩnene Kĩyũkĩlany'a Ũkanganĩ
13Yĩla kwookie kĩseve kĩuĩtye kuma ngalĩko ya ĩtheo, andũ asu nĩmasũanĩie kana mũvango woo nĩweanĩa, na kwoou mambatya nanga na matwaĩla meli vakuvĩ na ũtee wa ũkanga, ĩkuumanĩte na kĩthama kĩu kya Kĩlete. 14Ĩndĩ ĩtina wa kavinda kanini kĩseve kĩnene kyeetawa Kĩseve kya Ngalĩko ya Ĩũlũ nĩkyookie kĩuutanĩte kuma kĩthamanĩ kĩu. 15Kĩseve kĩu nĩkyakimie meli, na nũndũ nĩyaemie kũtwaĩka yelekele kũla kyumĩte, twamĩeka yatwawa nĩkyo. 16Twĩsĩlĩte ngalĩko ĩla kĩseve kĩtauutanaa ya kathama kamwe keetawa Kauta, nĩtweethĩiwe na ĩvinda yũmũ kwia kasiwa ka meli ĩsu ũsũvĩonĩ. 17Ĩtina wa andũ asu kũkatũlya ĩũlũ melinĩ, nĩmalũlũmĩĩlye meli kwa kwĩsĩlya makanda naku ungu, na maikĩa maikalũme kĩthangathĩnĩ kĩtawa Siliti, matheesya ngũa sya meli sya kũkwata kĩseve, na maeka matwawe nĩ kĩseve o kũla kĩkwenda. 18Kĩuutani nĩkyaendeeie kũtũthĩny'a, na kwoou ũnĩ ũsu mambĩĩa kwosa mĩio ĩla yaĩ melinĩ mayĩkya kĩw'ũnĩ. 19Mũthenyanĩ ũla waatĩĩe, andũ asu mo ene nĩmoosie mĩio ya meli mamĩkya kĩw'ũnĩ. 20Yĩla twaminie mĩthenya mingĩ tũtona syũa kana ndata, na kĩuutani nakyo kyaendeea na kũtũthĩny'a, wĩkwatyo wa kũvonoka nĩwathelile vyũ.
21Ĩtina wa andũ ala maĩ melinĩ kwĩkala matukũ maingĩ mataya lĩu, Vaũlo nĩwaũngamie mbee woo amea atĩĩ, “Aũme, mwaĩlĩte kwĩthĩwa mũmbĩthukĩĩisye tũkalea kuma Kĩlete, na twĩthĩwa tũtanakwata thĩna na wasyo ũũ. 22Ĩndĩ yu nĩngũmũkũlya mũikakw'e ngoo, nũndũ vai mũndũ o na ũmwe katĩ wenyu wĩkw'a; no meli ĩkwanangwa vyũ. 23Nĩasya ũu nũndũ ũtukũ ũũ ũvĩtũkie, mũlaĩka wa Ngai ũla nyie nĩ wake na nĩmũthaithaa, nĩwũkie aũngama vala nĩĩ 24na ambĩa atĩĩ, ‘We Vaũlo, ndũkethĩwe na w'ĩa! No nginya ũũngame mbee wa mũsumbĩ wa Loma, na kwondũ waku Ngai nũkũmasũvĩa andũ onthe ala wĩ namo melinĩ.’ 25Kwoou aũme mũikakw'e ngoo! Nĩngũĩkĩĩa Ngai kana kwĩĩthĩwa kũilyĩ o ũndũ nĩtaviw'e. 26Ĩndĩ vate ndĩi twĩamba kwĩkw'a tũkalũme vandũ kĩthamanĩ.”
27Ũtukũnĩ wa mũthenya wa ĩkũmi na inya, o tũendee na kũtwawa kũũ na kũũ nĩ kĩseve ũkanganĩ wa Menditelenia, ta saa sita sya ũtukũ, andũ ala maũngamĩe meli nĩmatalĩthisye kana twaĩ vakuvĩ na nthĩ nyũmũ. 28Nĩmathimie ũliku wa kĩw'ũ meethĩa nĩ mita mĩongo ĩna; ĩtina wa kũendanga vanini, nĩmathimie ĩngĩ na meethĩa ũliku yu nĩ mita mĩongo ĩtatũ. 29Andũ asu maikĩa tũikathi tũlũme mavianĩ, nĩmatheeisye nanga inya sya ĩtina na mambĩĩa kũvoya kũkye mĩtũkĩ. 30Nĩvo ĩndĩ mayenda kũkĩa maume melinĩ, matheeisye kala kasiwa ka meli kĩw'ũnĩ, metw'ĩkĩthĩtye meenda kũtheesya nanga sya mbee sya meli kĩw'ũnĩ. 31Ĩndĩ Vaũlo nĩweeie ũla mũnene wa asikalĩ ĩana vamwe na asikalĩ atĩĩ, “Andũ aa malea kwĩkala melinĩ, inyw'ĩ mũyĩĩthĩwa mũtonya kũvonoka.” 32Nĩvo ĩndĩ asikalĩ asu matilile makanda ala makwete kasiwa na makaeka kathi.
33Kũkilĩlye kũkya, Vaũlo nĩwathing'ĩĩisye andũ onthe maye lĩu aimea atĩĩ, “Ũmũnthĩ nĩ mũthenya wa ĩkũmi na inya, o mweteelete mũteũya kĩndũ o na kĩmwe. 34Kwoou nĩngũmwĩsũva mũye lĩu, nũndũ nũmũtetheesya kwĩkala thayũ, nĩkwĩthĩwa vai ũmwe wenyu wĩĩka ũndũ.” 35Vaũlo amina kũneena ũu, nĩwoosie mũkate na atũngĩa Ngai mũvea onthe mene. Nĩwaũtilangile na ambĩĩa kũya. 36Nĩvo ĩndĩ onthe mathangaaie na kĩla ũmwe aya lĩu. 37Melinĩ ĩsu twaĩ andũ maana elĩ na mĩongo mũonza na thanthatũ.#27.37 andũ maana elĩ na mĩongo mũonza na thanthatũ: Maandĩko amwe ma tene ma Ndeto ya Ngai maĩtye andũ ta mĩongo mũonza na thanthatũ 38Andũ asu maya mavũna, nĩmekisye nganũ yonthe kĩw'ũnĩ nĩ kana meli ĩvũthĩwe.
Kũvunzũkanga kwa Meli
39Kwamina kũkya andũ asu mayaamanya nthĩ ĩsu nĩ yĩva, ĩndĩ nĩmoonie vandũ ũkanga wumĩtye mũthya ũkalika nthĩ nyũmũ wĩna kĩthangathĩ kingĩ ũtee waw'o. Nĩmavangie matwae meli makamĩlikye vo ethĩwa nĩveũtonyeka. 40Kwoou nĩmatilangile ila nanga maitia ũkanganĩ, na saanĩ o ũsu mathasya makanda ala moovete ilungu sya mĩtĩ ila syatũmĩawa kũkomoa meli. Nĩvo ĩndĩ mambatisye ngũa ya meli ya mbee ĩkwate kĩseve, na mathi melekele kĩla kĩthangathĩnĩ. 41Ĩndĩ meli ĩsu nĩyakimie kĩvumbu kya kĩthangathĩ kyaĩ kĩw'ũnĩ nthĩnĩ; mũthya wa mbee wayo nĩwalũmile ki weethĩa ndũthi, nayo ĩtina yavunzũkanga nĩ kũkimwa nĩ itulumo syĩ na vinya.
42Asikalĩ nĩmavangie moae ovwa nĩ kana maikathambĩe masembe mathi. 43Ũla mũnene wa asikalĩ ĩana, ayenda kũmũsũvĩa Vaũlo ndakoawe, nĩwamasiĩĩie maikeke ũu mavangĩte. Nĩwaumisye mwĩao ala meesĩ kũthambĩa meyĩkye kĩw'ũnĩ mbee na maithambĩa mainganĩsye, 44na ĩndĩ namo ala angĩ maitũmĩa mbwaũ kana ilungu ingĩ sya meli. Kwa nzĩa ĩsu kĩla mũndũ nĩwavikie ũtee wa ũkanga nesa vate thĩna.
Pilihan Saat Ini:
Meko 27: KAMBA
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
BIBLE SOCIETY OF KENYA © 2011
Meko 27
27
Vaũlo Aitwawa Loma na Meli
1Yĩla kwatwiwe kana nĩtũũthi na meli nthĩ ya Italĩa, nĩmamũnenganie Vaũlo vamwe na ovwa angĩ kũla kwĩ mũnene ũmwe wa asikalĩ ĩana weetawa Yuliasi. Mũnene ũsu aĩ wa kĩkundi kyeetawa kĩkundi kya Aukusito. 2Nĩtwaendie twalika melinĩ yaĩ ya kuma ndũanĩ ya Atilamitio, na yaĩ vakuvĩ kũkũsya ĩthi kũla meli iũngamaa kĩsionĩ kya Asia na twambĩĩa kyalo. Twaendanisye na Alisitaliko, mũndũ waumĩte ndũanĩ ya Thesalonika ĩla yĩ nthĩ ya Masendonia. 3Ũnĩ ũsu nĩtwavikie Sitoni. Yuliasi nĩwamwĩkie Vaũlo nesa kwa kũmũnenga mwanya athi kũla kwĩ anyanyae, makamũnenge kĩla waĩ na vata nakyo. 4Nĩtwaumie vau, na nũndũ kĩseve kyauutanaa kyumĩte kũla tũendete, twesĩla ngalĩko ĩla kĩseve kĩtauutanaa ya kĩthama kya Saivulasi. 5Nĩtwakĩlanĩlye ũkanga ũla ũkuumanĩte na nthĩ ya Vambilia na Silisia, twathi twavika ndũanĩ ya Mila ĩla yĩ kĩsionĩ kya Lisia. 6Vau, ũla mũnene wa asikalĩ ĩana nĩweethĩie meli yaĩ ya kuma Alekisandĩlĩa yakũasya ĩthi Italĩa, na kwoou atũlikya melinĩ ĩsu.
7Nĩtwaendie o kavola vandũ va mĩthenya mingĩ twavika na thĩna mwingĩ ndũanĩ ya Nindo. Nũndũ wa kwĩthĩwa kĩseve kĩyaatwĩtĩkĩlya tũendee na kyalo twĩsĩle ngalĩko ĩsu, nĩtwaendie twesĩla ngalĩko ĩla kĩseve kĩtauutanaa ya kĩthama kya Kĩlete vakuvĩ na Salimoni. 8Nĩtwaendie na mathĩna maingĩ tũkuumanĩte na kĩthama kĩu twavika vandũ vetawa Ũthũmũo Mũseo, vakuvĩ na Lasea.
9Nĩtwaanangĩie ĩvinda yĩasa vau, na kyalo kya kũthi na meli yu kyaĩ mũisyo nũndũ mũthenya mũnene wa Kũtĩĩa Kũya#27.9 mũthenya mũnene wa Kũtĩĩa Kũya: Mũthenya ũũ no w'o Mũthenya wa Ũekeo wa Naĩ, na weethĩawa vaa mwei wa kenda ũithela kana wa ĩkũmi ũyambĩĩa, na ĩvindanĩ yĩu kweethĩawa nzeve nthũku yatumaa kyalo kya kũthi na meli kĩthĩwa kĩ mũisyo waĩ ũnavĩta. Kwoou Vaũlo nĩwamataie amea atĩĩ, 10“Aũme, nĩona kyalo kĩĩ kĩĩthĩwa kĩ kya thĩna na wasyo mwingĩ, na tyo kwa mĩio na meli syoka, ĩndĩ o na kwa mathayũ maitũ.” 11Ĩndĩ ũla mũnene wa asikalĩ ĩana ndaamwĩthukĩĩsya Vaũlo; vandũ va ũu aatĩĩie ũtao wa mũtwai wa meli na mwene wayo. 12Nũndũ wa kwĩthĩwa vau meli syaũngamaa vayaĩ vaseo kwĩkala ĩvindanĩ ya mbevo, kĩla mũndũ endie tũendee na kyalo nongi kana nĩtũvika Voenike tũkekale kũu ĩvindanĩ ya mbevo. Vau Voenike vaĩ na vandũ meli syaũngamaa kĩthamanĩ kĩu kya Kĩlete vasyaĩtye ngalĩko ya ĩũlũ kwelekela wumĩlonĩ wa syũa.#27.12 Maandĩko angĩ ma tene ma Ndeto ya Ngai maĩtye ngalĩko ya ĩtheo kwelekela ũthũĩlonĩ wa syũa, kana ngalĩko ya ĩũlũ kwelekela ũthũĩlonĩ wa syũa
Kĩuutani Kĩnene Kĩyũkĩlany'a Ũkanganĩ
13Yĩla kwookie kĩseve kĩuĩtye kuma ngalĩko ya ĩtheo, andũ asu nĩmasũanĩie kana mũvango woo nĩweanĩa, na kwoou mambatya nanga na matwaĩla meli vakuvĩ na ũtee wa ũkanga, ĩkuumanĩte na kĩthama kĩu kya Kĩlete. 14Ĩndĩ ĩtina wa kavinda kanini kĩseve kĩnene kyeetawa Kĩseve kya Ngalĩko ya Ĩũlũ nĩkyookie kĩuutanĩte kuma kĩthamanĩ kĩu. 15Kĩseve kĩu nĩkyakimie meli, na nũndũ nĩyaemie kũtwaĩka yelekele kũla kyumĩte, twamĩeka yatwawa nĩkyo. 16Twĩsĩlĩte ngalĩko ĩla kĩseve kĩtauutanaa ya kathama kamwe keetawa Kauta, nĩtweethĩiwe na ĩvinda yũmũ kwia kasiwa ka meli ĩsu ũsũvĩonĩ. 17Ĩtina wa andũ asu kũkatũlya ĩũlũ melinĩ, nĩmalũlũmĩĩlye meli kwa kwĩsĩlya makanda naku ungu, na maikĩa maikalũme kĩthangathĩnĩ kĩtawa Siliti, matheesya ngũa sya meli sya kũkwata kĩseve, na maeka matwawe nĩ kĩseve o kũla kĩkwenda. 18Kĩuutani nĩkyaendeeie kũtũthĩny'a, na kwoou ũnĩ ũsu mambĩĩa kwosa mĩio ĩla yaĩ melinĩ mayĩkya kĩw'ũnĩ. 19Mũthenyanĩ ũla waatĩĩe, andũ asu mo ene nĩmoosie mĩio ya meli mamĩkya kĩw'ũnĩ. 20Yĩla twaminie mĩthenya mingĩ tũtona syũa kana ndata, na kĩuutani nakyo kyaendeea na kũtũthĩny'a, wĩkwatyo wa kũvonoka nĩwathelile vyũ.
21Ĩtina wa andũ ala maĩ melinĩ kwĩkala matukũ maingĩ mataya lĩu, Vaũlo nĩwaũngamie mbee woo amea atĩĩ, “Aũme, mwaĩlĩte kwĩthĩwa mũmbĩthukĩĩisye tũkalea kuma Kĩlete, na twĩthĩwa tũtanakwata thĩna na wasyo ũũ. 22Ĩndĩ yu nĩngũmũkũlya mũikakw'e ngoo, nũndũ vai mũndũ o na ũmwe katĩ wenyu wĩkw'a; no meli ĩkwanangwa vyũ. 23Nĩasya ũu nũndũ ũtukũ ũũ ũvĩtũkie, mũlaĩka wa Ngai ũla nyie nĩ wake na nĩmũthaithaa, nĩwũkie aũngama vala nĩĩ 24na ambĩa atĩĩ, ‘We Vaũlo, ndũkethĩwe na w'ĩa! No nginya ũũngame mbee wa mũsumbĩ wa Loma, na kwondũ waku Ngai nũkũmasũvĩa andũ onthe ala wĩ namo melinĩ.’ 25Kwoou aũme mũikakw'e ngoo! Nĩngũĩkĩĩa Ngai kana kwĩĩthĩwa kũilyĩ o ũndũ nĩtaviw'e. 26Ĩndĩ vate ndĩi twĩamba kwĩkw'a tũkalũme vandũ kĩthamanĩ.”
27Ũtukũnĩ wa mũthenya wa ĩkũmi na inya, o tũendee na kũtwawa kũũ na kũũ nĩ kĩseve ũkanganĩ wa Menditelenia, ta saa sita sya ũtukũ, andũ ala maũngamĩe meli nĩmatalĩthisye kana twaĩ vakuvĩ na nthĩ nyũmũ. 28Nĩmathimie ũliku wa kĩw'ũ meethĩa nĩ mita mĩongo ĩna; ĩtina wa kũendanga vanini, nĩmathimie ĩngĩ na meethĩa ũliku yu nĩ mita mĩongo ĩtatũ. 29Andũ asu maikĩa tũikathi tũlũme mavianĩ, nĩmatheeisye nanga inya sya ĩtina na mambĩĩa kũvoya kũkye mĩtũkĩ. 30Nĩvo ĩndĩ mayenda kũkĩa maume melinĩ, matheeisye kala kasiwa ka meli kĩw'ũnĩ, metw'ĩkĩthĩtye meenda kũtheesya nanga sya mbee sya meli kĩw'ũnĩ. 31Ĩndĩ Vaũlo nĩweeie ũla mũnene wa asikalĩ ĩana vamwe na asikalĩ atĩĩ, “Andũ aa malea kwĩkala melinĩ, inyw'ĩ mũyĩĩthĩwa mũtonya kũvonoka.” 32Nĩvo ĩndĩ asikalĩ asu matilile makanda ala makwete kasiwa na makaeka kathi.
33Kũkilĩlye kũkya, Vaũlo nĩwathing'ĩĩisye andũ onthe maye lĩu aimea atĩĩ, “Ũmũnthĩ nĩ mũthenya wa ĩkũmi na inya, o mweteelete mũteũya kĩndũ o na kĩmwe. 34Kwoou nĩngũmwĩsũva mũye lĩu, nũndũ nũmũtetheesya kwĩkala thayũ, nĩkwĩthĩwa vai ũmwe wenyu wĩĩka ũndũ.” 35Vaũlo amina kũneena ũu, nĩwoosie mũkate na atũngĩa Ngai mũvea onthe mene. Nĩwaũtilangile na ambĩĩa kũya. 36Nĩvo ĩndĩ onthe mathangaaie na kĩla ũmwe aya lĩu. 37Melinĩ ĩsu twaĩ andũ maana elĩ na mĩongo mũonza na thanthatũ.#27.37 andũ maana elĩ na mĩongo mũonza na thanthatũ: Maandĩko amwe ma tene ma Ndeto ya Ngai maĩtye andũ ta mĩongo mũonza na thanthatũ 38Andũ asu maya mavũna, nĩmekisye nganũ yonthe kĩw'ũnĩ nĩ kana meli ĩvũthĩwe.
Kũvunzũkanga kwa Meli
39Kwamina kũkya andũ asu mayaamanya nthĩ ĩsu nĩ yĩva, ĩndĩ nĩmoonie vandũ ũkanga wumĩtye mũthya ũkalika nthĩ nyũmũ wĩna kĩthangathĩ kingĩ ũtee waw'o. Nĩmavangie matwae meli makamĩlikye vo ethĩwa nĩveũtonyeka. 40Kwoou nĩmatilangile ila nanga maitia ũkanganĩ, na saanĩ o ũsu mathasya makanda ala moovete ilungu sya mĩtĩ ila syatũmĩawa kũkomoa meli. Nĩvo ĩndĩ mambatisye ngũa ya meli ya mbee ĩkwate kĩseve, na mathi melekele kĩla kĩthangathĩnĩ. 41Ĩndĩ meli ĩsu nĩyakimie kĩvumbu kya kĩthangathĩ kyaĩ kĩw'ũnĩ nthĩnĩ; mũthya wa mbee wayo nĩwalũmile ki weethĩa ndũthi, nayo ĩtina yavunzũkanga nĩ kũkimwa nĩ itulumo syĩ na vinya.
42Asikalĩ nĩmavangie moae ovwa nĩ kana maikathambĩe masembe mathi. 43Ũla mũnene wa asikalĩ ĩana, ayenda kũmũsũvĩa Vaũlo ndakoawe, nĩwamasiĩĩie maikeke ũu mavangĩte. Nĩwaumisye mwĩao ala meesĩ kũthambĩa meyĩkye kĩw'ũnĩ mbee na maithambĩa mainganĩsye, 44na ĩndĩ namo ala angĩ maitũmĩa mbwaũ kana ilungu ingĩ sya meli. Kwa nzĩa ĩsu kĩla mũndũ nĩwavikie ũtee wa ũkanga nesa vate thĩna.
Pilihan Saat Ini:
:
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
BIBLE SOCIETY OF KENYA © 2011