Madcos 12
12
Utsi chiacbimbuen neshcashunquidon icsambuen naid chiaid
(Mat. 21.33-46; Duc. 20.9-19)
1Adshumbic utsi chiacbimbuen Esusën naden tauaquin chuipanëdash: Tied icbon aton tiedën ubauidquio nitsinshun daquënë uashumbic iuecshun sinacsho bedshun chinnu, quequin chintetsen nacnemposh. Aden nacnenshumbic: Uba ampenushe, queshun isec tsadte shubumpi abucquio icnuc shubu uaposh. Aden aid shubu uashic: Nidnu, quequin abi tied neshcashunquido: Ista, quequin chianec icbo nidposh.#12.1 Isadaidbo chiec nebi, quequin Isa. 5.1-7 Esusën aden chuipanëdash.
2Adanec nidash nidaid utsi yacno iuec tabadquin: Nëen cun uba sinashe. Umbi: Cuna nëidtedi nec, quequin aido chiondaidtedi bedtan, quequin aton iuabo nidmeposh. 3Adoac nidec tied yacno chosho issun tied icbo neshcashunquidon cuesquin mëyantanquin bedmiambobi aucbidi chomeuaposh. 4Adoacsho isboshombic: Uba bedtan, quequin iua utsitsen nidmeuaposh. Adoac tied yacno chosho icsambuen chuishunquin mamënshuntanquin menenquio icquin mapino cuestanquin mëyanshun aidtsen aucbidi chomeuaposh.
5Adoacsho issumbic: Cun uba bedtan, quequin aton iua utsitsen nidmeuaposh. Aidi tied icbo neshcashunquidon cuessunneposh. Adoacsho issun tied icbon adenuidi aton iuabo dadpen nidmiaid abi tied neshcashunquidon utsi utsien cuesquin mëyanquimbi utsi utsien cuessun secaposh.
6Aden nacsho isash tied icbo nadposh: Nëid cun madombo abentsëcquiobi nec. Umbi tantiaidquio nec. Aidi tsiuec cun tied yacno nidmembi. Adoac chosho issun: Tied icbon madombo nec, queshun bëdambuen istsiash icnushe, queshun aton madombotsen nidmeposh.
7Aden nidmiac ancuenquio chosho isash: Tied icbon madombo choeque. Is. Aton papa uënësan aton papa yacpadec icbo icuanushe, queshun tied icbo nuquimbo icnun aidi cuessunnenuna, quecuededposh tied icbo neshcashunquido.
8Adec onquetanquin aton icbon madombotsen bedshun cuessunnetanquin daquënë uaquin tsicatiaid mabudacquin neposh. 9Aden naid chuituidac ¿atotsi tied icbon napatsiash? quequin mibitedishun tantiec. Tantia. Chuinu. Abibi aton tied yacno nidshun abi neshcashunquid icsambocquido icsho abitedi cuessun secashun aton tied neshcashunquid utsibotsen aton tied yacno tabadmendac, quepanëdash Esus.
10Aden chuishumbic Esusën: ¿Nuquin Papan dada uamiampid isbanamboda ictio? Naden chiaid iqueque. Tantia.
Buintad bëdambocquid istuidash: Nëidquio shubu uaquin nitsinnun tenu, quetiadquidi isuidposh.
Aden buintad isuidaidi utsin teshun shubu uaquin aidba nitsinaid iquendac.#12.10 Nuquin Papan Chomiaid icshobi tantienquio yaid Esus nec, quequin chiampid nec.
11Adosho issun: Adombuenshenda Nuquin Papan napec, quiash: Bëdamboshë iquebi, nuqui quependac,
quequin dada uapampic,#12.10-11 Cuëd. 118.22-23 tantiaquin nëid daëd dada uapanëdash. Chotaquën onqueten Cuëd. 118.22-23 isbanta. quepanëdash Esus.
12Aden utsi chiacbimbuen chuibanec Esus onquesho tantiash: Ubitedishun nabambuedquio chuibanec nec, quequin tantiec isadaidbon chuiquidon Esus bedshun mëyanmetiadquio icpanëdash. Adquido icnubi Esus onquesho tantiec matses dadpenquio tabadpanëdash. Adquid dadpen icsho isash dacuëdcuededec: Esus nëbi bedmenuna, quenquio yec nidannepanëdash isadaidbon chuiquido.
Chuiquid tapambo piucquid menete chiaid
(Mat. 22.15-22; Duc. 20.20-26)
13Adec nidshun padiseobobëd icquidobëta Edodesbëd icquido istuidshun: Nëidon icsambuen chuimetsiash, queshun Esus yacno nidmepanëdash. 14Aden nidmiac Esus yacno choshon abentsëcshun Esus naden chuipanëdash: Bëdambuen chuiquid mibi nec. Adembidi muesambo icquin Nuquin Papan chiacpadec bëdambuec tabadte mimbi abimbo chuibampoc. Matses dacuëdënenquio icquin Nuquin Papan Chiaidquio mimbi chuipoc. Adquid icquin ubi chui. Tantianu. Piucquid shocosh tsasicquid bec cho, quequin bedshunquid isadaidpembon chuiquid tapambo Sesad cuëmëdquid nec. ¿Ada aid meniac bëdambo icpec? ¿Adambi aid menepe? quepanëdash Esus caic.
15Adoaquien: Ubi icsambuen chuimenuec adec onquec, quequin ambibi tantiash: ¿Atotsi queshun ubi aden icsambuen chuimetiadquio ique? quetanquin: Piucquid tsasicquid abentsëc bec cho. Isnu, quepanëdash Esus.
16Adsho tantiashun piucquid tsasicquid abentsëc chictanquin menepanëdash. Aden meniac sananquin ismec: ¿Tsutsibimbuec bëisadquid iquec? ¿Tsuntsin cuëmëdquid nëidën dada uaid iqueque? Chui. Tantianu, capanëdash Esusën. Adoaquien: Isadaidpembo chuiquid tapambo Sesad nec, quepanëdash.
17Adsho tantiashumbien: Ai, aidëna neque. Aid: Bec cho, quesho meneta. Adembidi Nuquin Papa Nuquin Icbombo icquin: Naden nata, cac aidën chiacpadombuen nabanta, capanëdash Esusën.
Aden chuisho tantiash tantiadempambo yec tabadec: Bëdambuembien chuipec, quec tabadcuededpanëdash.
Uënësaid uincuenmete chiaid
(Mat. 22.23-33; Duc. 20.27-40)
18Adnubien saduseobotsen Esus yacno chochopanëdash. Aido: Uënësaid uincuentiapimbo iquec, quequin tantiaquido yec chochoshon naden chuipanëdash: 19Moisesën chuiquin dada uampid nad iqueque. Chuinu. Tantia. Chido bedshun bacuë tishmiabi yec dada uënësacsho issun aton utsin aid chidobidi bedshun: Cun buchi padon bacuëbo nibëdeque. Aidën madobimbuecnuc tishmenu, quequin tishmequid, quequin chuipampic, quepanëdash. 20Aden chiampid icnuc abëta tishaido dada 7ted iccuededpanëdash. Aidted dada icnuc bëyuc tishaidën aton chido bedshun bacuë tishmiambobi uënëspanëdash. 21Adsho issun abi tsibanquidën aid chidobidi bedshun bacuë tishmiabi yec uënëspanëdash. Adembidi abi tsibanquidën abi tsibanquidënquien 22aton buchi uënësan aid chidobidi bedshun bacuë tishmiambouidi uënësbudnepanëdash. Adec dadatedi uënësbudniambic chidotsen uënëspanëdash. 23Adec uënësacsho Nuquin Papan uënësaido uincuemete uëshën uincuenmiac ¿mitsicquidën chido aid ictsiashe? En chui. Tantianu, capanëdash saduseobon.
24Adoaquien Esusën: Mibitedishun icsambuen tantiec. Nuquin Papan Chiaidquio tantienquio icquin Nuquin Papan nadatiambo icquin nabanquin uincuenmete mimbi tantienquio iquec. 25Nad iqueque. Tantia. Chuinu. Uënësaid uincuenash Nuquin Papa yacno tabadquin dadan chido bedtiapimbo iquendac. Adembidi chidon dada bedmetiapimbo iquendac. Adquid icnuc abucuësh Nuquin Papabëd icquidobimbuec matses iquendac. 26Adembidi uënësash uincuente ma tantianu, queshun ¿Moisesën dada uampid isquin tantiamboda ictio? Aidën cutempi abibi nëdënquedosho istanec nidtuidnubien nadec Nuquin Papa onquiampampic: Min tsusedpa Abadauanën Papa caid yec Isaquën Papa caid yec Acobon Papa caid yec quequid nebi, quequin Nuquin Papan chuisho tantiapampic.#12.26 Buan. 3.2-6 tantiaquin Esusën aden chuipanëdash. 27Aidi uënësaidën papa caidpenquio Nuquin Papa nec. Abi icquidon Papa caid Nuquin Papa nec. Mimbi bëdambuen tantienquio iquec, quepanëdash Esus.#12.27 Buan. 3.6 tantiaquin Esusën adopanëdash.
Naden nata, quequin chiaid ¿mitsicquid natequidquio icpec? quequin chiaid
(Mat. 22.34-40)
28Adec Esusbëd saduseobo onqueshobien Moisesën chiampid tantiamequid abentsëcshun tantiapanëdash. Bëdambuen Esusën saduseobo chuisho tantiash aidtsen: Umbitsen tantianu. Chui. Nuquin Papan: Naden nata, quequin Moises dada uamiampid dadpen iquec. Adquid icnuc ¿mitsicquid abentsëc nasho Nuquin Papan: Bëdambuenshë naic, capatsiash? quepanëdash Esus chiec.
29Adoaquien Esusën: Tantia. Chuinu. Nuquin Papan: Naden nata, quequin nëidba Moises dada uamepampic: Tantia, isadaidbo, Nuquin Icbo Nuquin Papa Abentsëcquiobi nec. 30Adquid icsho aidën chiacpadombuen nabanquin Aiduidtsëqui tantiaquiota. Adecbidi: Ubi bunacpadec icnu, quenquio yec: Nuquin Papa bunacpadquiec icnu, quec chieshtoenquio yec bëdambuec tabadta.#12.29-30 M.I.Ch. 6.4-5 tantiaquin nëid dada uapanëdash. 31Adembidi Nuquin Papa: Bëdambuen naic, camenuen mibibi min dada datantiadacbimbuen utsibotsen tantiaquiota, quequin chiacpadombuen nac bëdamboshë iquendac, quepanëdash Esus.#12.31 D.N.Ch. 19.18 tantiaquin nëid dada uapanëdash.
32Adoaquien Moisesën chiampid tantiamequid nadpanëdash: Abimbo mimbi chioc. Nuquin Papa abentsëcquiobi iquec. Aidpadquid utsi nibëdec.#12.32 M.I.Ch. 4.35 tantiaquinc Isa. 45.21 tantiaquinc Oseasën Dada uaid tantiaquinc caquin nëid dada uapanëdashe. Isbanta. 33Adembidi: Adquid icsho aidën chiacpadombuen naquin Nuquin Papa tantiaquiota. Adecbidi: Ubi bunacpadec icnu, quenquio yec: Nuquin Papa bunacpadquiec icnu, quec chieshtoenquio yec bëdambuec tabadta. Adembidi min dada mibibi datantiadacbimbuen utsibotsen tantiaquiota, quequin chiampidtedi nasho Nuquin Papan: Bëdamboshë iquec, catsiash. Aden naisa: Nuquin Papa bëdambuen ismequin cuna pichicamenun menenu, quesho Nuquin Papan bëdambuen istiapimbo iquendac, queuapanëdash.#12.33 M.I.Ch. 6.5bëta D.N.Ch. 19.18 tantiaquin nëid dada uapanëdash.
34Aden bëdambuen chuisho tantiash: Nuquin Papan namiacno anoentsëqui choacbimbuen mimbi bëdambuen tantiec, capanëdash Esusën.
Aden chuisho tantiash: Esus icsambuen chuimenu, quetiapimbo utsibo yampanëdash.
¿Tsuntsin mado Quidistu nepec? quequin chiaid
(Mat. 22.41-46; Duc. 20.41-44)
35Adnubien Nuquin Papa tabadte shubu dapa tsicatiaidën puduedash tabadquimbi Esusën Nuquin Papan dada uamiampid chuibanquimbi naden chuipanëdash: ¿Atotsi queshun Moisesën chiampid tantiamequidon: Nuquin Papan Chomiaid Quidistu Mesias caid nuquin tsusedpa Dabidën mado nendac, quequin chuipec?#12.35 Mado quequin Dabidën tsiuecquid nec, quequin bëdambuen tantiaquin chuiquidon chuipanëdash. Abitedi chienquio icquin nëidtedishun chiaid isbanta. Isa. 9.2-7 tantiaquin Isa. 11.1-10 yec Ede. 23.5-8 yec Ede. 33.15-17 yec Ese. 34.23-24 yec Ese. 37.24 yec quenuc isbanta. 36Tantia. Chuinu. Nuquin Papan Mayan Bëdan tantiamiac Dabidëmbi naden chuipampic:
Icbo Dapan cun Icbo naden chiec:
Cun abiuc tsadec abitedishun Icbombo icnush nëmbo cho.
Mibi chieshënquidobi dëniacmeshun: Cun Icbo nec, abitedimbo mibi camenu, quequin Dabidën chuiquin dada uapampic.#12.36 Chotaquën onqueten dada uaid Dabid Cuëd. 110.1 isbanta. 37Cun mado cainquio icquimbi cun Icbo capampic Dabidën. Aden chiampid icnuc ¿Atotsi queshun mimbi: Dabidën mado nec, quequin tantiape?#12.37 Esusën chiaid tantiate bunquin Mat. 22.45 ista. capanëdash Esusën.
Aden chiec onquesho tantiashun: Bëdambuen chiec, quequin matses dadpenshun bëdambuen tantiapanëdash.
Moisesën chiampid tantiamequidon chuisho tantienda, quequin chiaid
(Mat. 23.1-36; Duc. 11.37-54; 20.45-47)
38Aden chuibanquimbi Esusën nadopanëdash: Moisesën chiampid tantiamequidopadquid iquenda. Aido nadquio iqueque. Tantia. Chuinu. Chuiquidbimbuec isadsho ma matsesën ubi bëdambuen isnu, quiash aton dashcute ënapen icquid dasiuidtednequid aido nec. Adecbidi: Chuiquidbimbuec icsho ma matsesën ubi bëdambuen isquin chuinu, quiash matses dadpen tabadacno capuquid nec. 39Adombuembidi tantiec: Ma matsesën ubi isnu, quiash Nuquin Papan Chiaid chuibante shubun puduedash tsësiobobëd tabadec. Adombuembidi tantiec: Ma matsesën ubi isnu, queuash pebededacno puduedash chuiquidon tsadte nec, caidënquio tsadte bunec. 40Aido nianten shubun icquid ampeshunquid nec. Adembidi: Bëdambocquid nec, camenuen iuec onquequin Nuquin Papa chiec. Adquid Nuquin Papan cumapenen cuidtequidombo nendac, quepanëdash Esus.
Nuquin Papa tantiaquin nianten meniaid
(Duc. 21.1-4)
41Uëshë utsimbi piucquid sandote tabëcacno choash Esus isec tsadpanëdash. Nuquin Papa tabadte shubu dapa tantiaquin nëidën nacnentsiash, quequin atona dadpen icquidon piucquid dadpen bëbëshun sandobansho isec tsadpanëdash. 42Adec tsadquin isaqui atona nibëdquid niante choquin aton piucquid tsasicquidëmpi daëd ictsëcquidi#12.42 Ambi tantiaid bednu, quequin aton piucquid tsasicquidëmpi daëd ictsëcquidi menenu, cac: Padi Daëdpactsëcquid mimbi meniac menetiapimbo iquec, catsiash. sandopanëdash. 43Aden aton piucquid sandosho issun abëd icquido chomeshun naden Esusën chuipanëdash: Abimbo chuinu. Tantia. Nianten: Cun piucquid nibëdec, quenquio icquin Nuquin Papa tantiaquioquin sandoquidquio nec, aden utsibon sandoenquio icnubi. 44Utsibon aton piucquid dadpen abi icnubi uesenquio icquin sandobededosh. Adquidpenquio niante nec, quequin tantiembi. Adembidi: ¿Tedtsimbi dayun uapeba? quenquio icquin atona daëdquiobi ictsëcquidi nibëdquio icnuc uesquioquin nianten sandosho isombi, quepanëdash Esus.
Chwazi Kounye ya:
Madcos 12: mcfNT
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2023, Wycliffe Bible Translators, Inc. All rights reserved.