Deuteronomio 19
19
Tiacaca cuaara quiiria coonu quijiara maja na namishaanura jaara miaquere
1-2“Pueyaso jaara nia miaquejotere nia paraa quiarijia tama nojori jiyacajinijijaaja, naajuhuaj jaara tari nia jiyatere cuno jiya camaruhuarajuhuaj, naa nia miiri: Tari cuno jiya camaruhua nia quishacari tii quijiaca tiacaca camaruhuajuhuaj, niocua jiuujianaraca cuno tiacacajinijinio cojuare Pueyasora. 3Cuno naa nia riuriosano tiacacani, niocua maninia nocua jeecanere nocua neteja nuu. Naajuhuaj, cuno jiya, Pueyaso na niquitionutaniya niajaniyani, cunoori jiuujianaraca raquiquiara raquiriojotasaanutaniya niaara. Niaa jaara jiitiariquia naa coopue jiuujiaajiara tiacacatej cunoori jiyanohua maninia. Naaratej, tamonu niajaniyajinijinio jaara narta pueyano more, cuaara niquiriyatu cuno tiacacajinia neteera maja na namishaanura. 4Naa na quiniuucua cuno tiacajiniatej, naacuatej na naata nequesoreesaanu casaara narta pueyano na mooreeni. ¿Seetanujuanaa na juaaniutia na moreetee, maja soj? 5Naa maaraja: jaara na muenecona jiniji jare cajitia, jaara shitiquii neyonaacuaji, na cojinia jareeri. Naa miiniuniquitij, cunoori maja miaquenu. Niajaniyajinijinio jaara naa miiritij, cuaara cuno niquiriyatu jiuujianaraca tiacajinia neteera tii na rishiniuria juhuajaniya. Jaara naa mashiritij, majaari naa narta pueyano na miiniuucua na namishaanu quiniutianiya. 6Saniniuujia, niquiriyatu cuno jiuujianaraca tiacajinijinio jaara cateca quiyaquiri ritia tiiria nia netenura tii nia rishiniuria, cunoori cocuaatia. Juurunu tarajanuniquijia quia nuhuajiyaree, nucocojua quia coqueseeri, tiijia quia moseeri jiyanohua na macaaniuucua. Naa nocua naminia miishanoniquitij, cunoori maja maninia. Na niishiyaquiniutia najuhuana moree narta pueyanoori. Naa nojori puecootoonuucuatej, cunoori seetanujuanaa maja na paracaatioonuucua.
11“Nio cutaraari jiyanohua tamaatiaaja. Tamonu pueyano jaara narta pueyano paracaya, na mosocoriquiano na shanacujuquiaajaariuhuaj, jaara socua na naacure, na moreeri. Naa na miiniu nuhuajitij, juucua neteyaree niquiriyatu cuno jiuujianaraca nia curosano tiacajiniaari tii na quiniuria, na jiyanishacari jiyanooshaanutaniya naasucuaari. 12Saniniuujia, tama na tiacajinijinio jiyaniijianucuaari na pueya na quiatenutaniya. Jaara quiasaare, na mosano juurunu tapueyocuaca niquitiosaareerijia nojori monura saniniuujia nojuaja. 13Pueyanaa, majaari naa sacuaraatia miijia pueyanoocua taraajetunutej. Niocua na pueturiquia monujuanaatej. Niaa jaara naa miiriquiatej, niaari naacua pishojonutaniya najuhuana sesa niyashijiaca pueya puecoojuacatej. Niaa jaara naa maninia miiriquiatej, puetunu nia cojetasano casaajanaari maninia niaara quiniutianiya.
14“Tari nia quishacari niaarano nia Camarnu Pueyaso niquitiosano jiyajinia, majaari nia shuriucua quinia jiya riutiocojonu nocuaji. Niocua tama nia jiya cojuajaca quiriquiajaaja taa nia serotasaaquiaari tariucuacaanucuajani.
Tojiyaquishoo cutaraari niquiriyatu pueyano tonujusacari tamonuucuara
15“Nio nia niishirijuhuaj: saaja niquiriyatu pueyano jaara tonujuriquia pueyano miishanojiniji sesa, majaari na naata niishishaanu seetanujuanaatee, maja soj. Naa niquiriyatu pueyano tonujusacari puetunu sesa casaa miishanojinijitij, cunoori maja maninia. Maninia cutaraari pueyamaanu saquiriojotasano, querajaa, jiuujianaraca soj.
Chwazi Kounye ya:
Deuteronomio 19: arl
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 1986, 2008, Wycliffe Bible Translators, Inc. All rights reserved.