Aromayi 5

Bwugbafu n awyetui

1Ntucenu, shikwonyi yi kwu ɓəgyikpmaya ɓwa dna ń gaiciyaga nyi, yi n bwugbafui lo ń Shekwoyii ntu Dagayi Yeisu Kirisiti ɓo. 2Dna n əwo nu n yi kwu aduba ɓwa n gaiciyagai dna ń shebmyashi n yi kpe gnyi n kwo nu nsaiye nyi. Njesnu yi gbma, yii gyigbe dna ń awyetu Shekwoyi latu nya nu. 3Kwo to ɓwasnu lo nlonu m, ama yi nya agbmada lo ce fyi ń əyi azhnìgye, ntuge yi kpəlo nge azhnìgye ɓe n əmìfyii; 4əmìfyi kwo ɓe n alui; jesnu alu ɓa ɓe n awyetui. 5Njesnu awyetu ta dna yi vnyinkwo m, ntuge Shekwoyi wo la əwo yeye zefyi n əyi adu n Zafnu Gyigyiyii, əza ń a lá wo ga yi nyi.

6Fye gyewye, n ɓwasnu n əsai bmyabmya, əsa ń yi ɓə yee zhi ntna kalá, Kirisiti wa fyí ntu atnashekwoyi dnawoyi ɓo. 7Kwo dnaɓo lo əzaho wa fyí ntu n ɓəfyeceyi ɓo, kwo shikwonyi əzaho ɓa myi wa ye waa fyí ntu əza manai ɓo. 8Ama Shekwoyi ɓə wu yi əwohni yeye nlai nu: əsa n yi ɓə yee zhni aleifyizhniyi, Kirisiti wa fyí ntu əyi ɓo.

9Shikwonyi yi kwu ɓəgyikpmaya ɓwa nsaiye n əwo amii nyi, wo taa gna yi gnyignyiya nu n Shekwoyi minagyi napyei dna n əwo m! 10Ntuge ngye əsa ń yi ɓə yee zhni Shekwoyi anuwnuyi, a ɓə kwu əyi aɓəwnado n woi ntu əwo Nugwnu əfyí ɓo. To, nsayi, shi a kwu əyi aɓəwnado nyi, yi ɓaa ɓwa gnyignyi n gna dudu dna n əwo wyewyeyi! 11Dəye nu to ɓwasnu nlonu m, ama yi je gbma, yii gyigbe dna ń Shekwoyi, ntu n əyi Dagayi Yeisu Kirisiti ɓo, n ya ɓwa je yeɓədo nsaiye ntu əwo ɓo nu nyi.

Əfyí dna n Adamwu jesnu wyewyeyi dna n Kirisiti

12Ntucenu, n ɓwasnu shi leifyi ɓə loɓe anyi ntu zaknayi ɓo nu, jesnu əfyí kwa ɓe ntu leifyi ɓo nyi; dna ń zokwo ye nu, ń əfyí ɓə ɓe da aza vnyanya, ntuge aza vnyanya ɓə kwu leifyi zhni.

13Ɓəhnihnii kwu kpe nge leifyi ɓə dna n anyì to ai ga owa m. Ama a ta zhni a ba leifyi dna əza aba ń owa to nyi m. 14Dudulonu, əfyí ɓə ya begyi, ənya ń kwo laka ń Adamwu əsa kwoi ɓe Mwusa əsa, kwoi kpe n aza n ɓa to ɓə zhni leifyi n ɓəgbetu gnanaznui, ngye she Adamwu ɓə zhni nyi m. Adamwu nu ɓə zhni əfye, ga əza yi n wo ɓə ɓe nyi.

15Ama nyaga to wu ngye leifyi nu m. Ntuge ngye bəgyé ɓə kwu fyí ntu zaknayi leifyi ɓo, a gye kwo ɓa gna dudu nu Shekwoyi shebmyashi ɓədo n nyagai n kwo ɓe ntu zaknayi shebmyashi ɓo, Yeisu Kirisiti, n kwo ɓa zheya lo aza bəgyé aba! 16Kwo ge a ɓa mwi Shekwoyi nyaga ədo, n əɓoi n kwo ɓə gbmiɓe n zaknayi leifyi nyi m: Owada ɓə vyi leifyi gbmanyi, kwa ɓe n knyiznui, ama nyaga ɓə vyi aleifyi bəgyé kwa ɓe n ɓogyikpmayai. 17Ntuge ngye n zaknayi leifyii nu, n əfyí ɓə gyibe ntu zaknayi yi ɓo, akpəge aza yi n ɓa ɓá gwo Shekwoyi shebmyashi nyaga nunui ɓədo n nyaga ɓəfyecezhni nyai, ɓa ɓá gyibe dna n anyìgyi ntu əza gbmanyi ɓo, Yeisu Kirisiti!

18Ntucenu, ngye shi leifyi gbmanyi ɓə ɓe n knyiznui ga aza vnyanya, ntulonu cè zaknayi ɓəfyecezhni ɓə ɓe n ɓəgyikpmayai jesnu n wyewyeyii ga aza vnyanya. 19Ntuge shi kwo ɓə ɓwasnu ń zaknayi tnaɓəgbetuvyi ɓo nu, ń aza bəgyé ɓə kwu zè aleifyizhniyi nyi, ntulonu cè, n ɓəvyii zaknayi nya nu, n a ɓa kwu bəgyé zè aɓəfyeceyi.

20A ɓə ɓe n owai nabai n leifyi ɓa gna mwamwa nu. Ama aba ń leifyi mwamwaɓe, shebmyashi kwa gna mwamwa nu n du 21nabai n ɓwasnu she leifyi ɓe wnu aɓoya dna ń əfyí, n ɓwajesnu lonu cè ń shebmyashi ɓa zhniaɓo aba ntu ɓəfyecezhni ɓo n kwo ɓe n wyewyeyi nyalonyalo nyai dna ń Yeisu Kirisiti əyi Dagayi.

Chwazi Kounye ya:

Aromayi 5: GNB

Pati Souliye

Kopye

Konpare

Pataje

Ou vle gen souliye ou yo sere sou tout aparèy ou yo? Enskri oswa konekte

Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi

Apmazhni n gbegai nu. Ɓəznu vnyanya wnafyi lo n anyìvnyanya.

Gbagyi Contemporary Bible™, New Testament

Aprann plis bagay sou Gbagyi Nyizeyenya Baibwulu: Shekwoyi Ɓədagbma

Aromayi 5

Vèsè popilè nan Bib la ki soti nan Aromayi 5

Vèsè popilè nan Bib la ki soti nan
Aromayi 5