1 Tesalonik 2
2
Puólí pú Póol Tesaloníik
1Panɔ́ muɛ́tí paandimán nuémenyen, nutimotúkóli sɛ́kísɛ́ki. 2Kɔ́ɔk ɛ́ɛ́ pɛ́mɛ́kɛ́t etúénesi iŋɛ́n na kutúsikan Filip, tuapia pipíondínyí ɔtɛ́m á Támbákɛ́ɛ túnútían insɔ́m yi indámb ɛ́ kikɛtɛ́kɛtɛ́ɛ kí muyu. 3Tukal túásɔ́ tipá tú kisupɔ́, tútipá túólinon kí iŋilí sí kilɔk, tútipá tú nunɛ́m. 4Támbák ɛ́ɛ́n ɛ́ɛ́ tunyi panyimíkánan ɛ́ɛ́ túpéke nukál núɛyí; tutipá tuamba ɛ́ɛ́ pɛɛnd túɔyɔ, maná Támbákɛ́ɛ, wɔ́ ulááŋanɛ́ itɛ́m síásɔ́. 5Púnyiɛ́ tɛ puɔ́s tutimapia tukál tú pitɔ́ndɔ, nuémenyien, tɛ imbítákítín síásɔ́ timapá ɛ́ɛ́ túnúnyíánɛn, Támbák. Émenyen, 6Tɛ puɔ́s tutimambit ɛ́ɛ́ pɛɛnd tútáman imbɔk, tɛ kuanɔ́, tɛ kupɔsɔ́k pólotí, 7naání kɔk ɛ́ɛ́ tusíápá kukaŋimɛt asi petúmí pé Kilíis. Tuápá kɔk káánɔ́ ɛ́ kikɛtɛ́kɛtɛ́ɛ powónón na makánákana, aná ɔ́ndɔ́kɔnɛ́ pílatanɛ́ paán. 8Tuápian makánákana mɛ́nyiɛ́ tutisíánúfá yá insɔ́m yi indámb i Támbák, maná tɛ́ kusɔ́t kúásɔ́ kúmuɛ́t, á kiákí nuápá nukanyi imfíí káásɔ́ ó pusíó. 9Paandimán, nuapítááka muyú múásɔ́ na kuánd kúásɔ́: tukɔtɔ neneputúk nɔnɔpuɔ́si ɛ́ɛ́ tutiɛlɛ́ kinúá kíánɔ́, aká tumaápá tunúɔyɔn nukál nú Támbák. 10Naanɔ́ na Támbák nunyɛ petétúnyí páásɔ́ ɛ́ɛ́ nunamá enú tuɔ́nyísɔ́tɔn káánɔ́ ɛ́ kikɛtɛ́kɛtɛ́ɛ ápá indɛ́ndɛ́nɛ tɛ kipalalá ké eŋis yá Támák. 11Panɔ́ muɛ́tí nuémenyen ɛ́ɛ́ tuɔ́sɔ́tɔn na siki mɔɔndɛ káánɔ́ kɔ́ ɔlɔŋ ɛlɛɛ́ ne sí nɔ muɔ́nɔ́. 12Tuánúákan ilúndɛ, na kupíkányɛk no kunúówon ɛ́ɛ́ núɛndɛ aná Támbák ɔ́ɔ́yɔɔnɛ́ɛ, wɔ́ unúpílanɛ ɛ́ɛ́ nukɔ́l niap kɛ́ɛ́yɛ́ é pufuŋ ne nuúmu núɛyí.
Kuátap kú pe Tesaloníik
13Púupú tuekenyié Támbákɛ́ɛ ilémbie kati kuándɛ: aká numaátáp nukál nú Támbák enú tu mɔɔ́núɔyitɛn, nutimaátap nú ɛlɛɛ́ nukál nú mɔɔnd, maná enú nunyiɛ́ kémuémue, nukál nú Támbák, núkɔtɔnɛ́ káánɔ́ panɔ́ peétépí. 14Paandimán nuapikusikan kí ilɔŋ sí peétépí pá Támbák sí nyiɛ́ Yúúte, é Yésus Kilíis, ó pusíó ɛ́ɛ́ panɔ́ kákánɔ pɔtɔŋtɔ́ŋ énúénési iŋɛn, yáaná Pɛyúútɛn meénésí pɔ́ iŋɛn. 15Pɔ́ Pɛyúútɛn pɔ́mɔɔ́n Ɔkɔ́n Yésuse ne peémímekélíe má támbák, pétúsésitenyi kákásɔ, Támbák tipá wɔyɔ pɔ́, pányi pokóyikoy pá mɔɔnd kitikit, 16pátipá páamba ɛ́ɛ́ túɔyɔn pá kati pe Yúútɛ́nɛ nukál nú Támbák é kutúkun pɔ́, akáánɛ́ kɔk pówónyosi pifal píɔp pɛ́ɛlɛnɛ́ á kisikɛl kitikit. Maná ekuesúkín Támbák ónyótin pɔ́ ilópi.
Póol ɔ́pílɔ́ɔ́ŋɔ kuond Tésaloníik
17Paandimán, tuaátúkan naanɔ ɔ́ mɔnɔ́ kisikɛl, kaáyɛ́ ké eŋis maná mekúye kí itɛ́m, tuápíkányikan ɛ́ɛ́ túɛ́sinúɛ́n, á kiákí tuɔ́pílɔ́ɔ́ŋɔ nɔ́ táásɛ. 18Tuɔ́pílɔ́ŋɔ́ kuol kuanɔ, niŋúɛ muɛ́t Póole yapímak pisikɛl kutek, maná sáátan wuatuaka kipindikɛ. 19Á kiákí panɔ́ nunyiɛ́ pipíondínyí itɛ́m píású, anyamɔ́ wásu, nɛ kupímɛ́lɛ kúkaányípá indanyáa yáásɔ́ ké eŋis yí Ɔkɔ́n Yésus aká woónyóloné. 20Ɛ́ɛŋ, panɔ́ nunyiɛ́ nuúmu na anyamɔ́ wasɔ́.
Chwazi Kounye ya:
1 Tesalonik 2: yav
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 2026, CABTAL