Marko 10
10
Yesu gwîy lò kow ónga ndòdha ró
(Mat 19:1-12; Lwk 16:18)
1Yesu kâ fú nga bbà, ka rà Yuddeya mí ngòw ò ndèymí Yorddani mí pbèydha ní ju-ddà mí dzisángó nga là djò. Bíy ní bbalè mí njuw njûw ì à dè ddíyàchú ndèymí à gwîy ndrǔ, gbè à dêy njěy wánì nganà níchú.
2Njàddí Farisayo ní kpa shì à dè ndèymí ndrǔ jì tdè ì kí à. Ndrǔ dhîy, “Tdra mà dhò, Musa-ngá yǎdha ǔw ŋà kpatss̀-ní-li ndǒ ków ónga nděyngá dza-yà nà?”
3Yesu ngù lò, lò dhíydha nà, “Musa bbú nyì dhò ŋá yǎdha?”
4Ndrǔ tdrà, “Musa ùw tdè kpatss̀-ní-li dhò à ndíy ków ónga ndòdha mí ndíydha-ní-lò, à dǐy ndanà nděyngá dza-yà gu.”
5Yesu tdrà ndrǔ dhò, “Musa ndîy nyì dhò í yǎdha, ddiydhò nyì gwíydha tdè klǒw. 6Chú, à nga ndèy dziylíy ka tdyà tdè mí nga djúddù, gbè Ddrǎ-ngá ndíydha-ní-lò tdrà níchú, ‘Ddrà tdyà kpatss̀-ní-li ndèymí ɦìytss-ní-li nà.’#10:6 Lò-tsò ngàdha 1:27. 7‘Í lò dhò, kpatss̀-ní-li rà djǎnì bbà ndèymí yânì nà ndèymí à rà ndèy gba dza-yà nà, 8ndèymí ndrǔ rwo tú rà ngu ddì nì li-rónga ní.’#10:8 Lò-tsò ngàdha 2:24. Fú ddiy dhò, ndrǔ nì ngǎ rwo ddíyàchú, chú ddì. 9Ddrà gbâ ddìngaó nì ddiy, nzǐ li rò ndǒ ǒnga.”
10Ndrǔ ngû dza ò mí nga nà, Yesu kodjú kpa dhîy à cha à tdrà tdè nì lò ró. 11À tdrà ndrǔ dhò, “Kpatss̀-ní-li cha ndèy dìy nděyngá dza-yà nì, ndèymí à kòw ngéy ní ɦìytss, fúnì fú li njèy cherr, ddiydhò à ddù ngǎ ndèymí déy ní ków mí li nà. 12Fú ddì nì tuw nà, ɦìytss-ní-li cha ndèy bbà nděyngá dza-dja nì ndèymí à kòw ndèy ngéy ní kpatss̀-ní-li dhò, fúnì fú li njèy cherr, ddiydhò à ddù ngǎ ndèymí déy ní ków mí li nà.”
Yesu bbû bû dùdú ní nzòw djú
(Mat 19:13-15; Lwk 18:15-17)
13Njàddí bbalè mbà tdè dùdú ní nzòw Yesu dè, ndaní à léy ndèy dhokpa ndrǔ djú. Chú Yesu kodjú kpa chò fú bbalè tsò. 14Yesu njà fú ddiy mí nga nà, thǒw lòw à ndèymí à tdrà ndèy kodjú kpa dhò, “Nyì bba dùdú ní nzòw rǎ ma dè, ndèymí nzǐ nyì cho ndrǔ tsò, ddiydhò Ddrà mí pey-mí-nga nì fǔchú ní ndrǔ dhî. 15Manì nyì dhò dìchú ní lò tdrǎ, ndèy rà nzǐ Ddrà mí pey-mí-nga kwo gbè dùdú ní nzòw níchú nì li, rà tsùw ddìkpe nzǐ òmà.” 16Yesu kâ nzòw mbu, à lêy ndèy dhokpa ndrǔ djú ndèymí à bbû ndrǔ dhò bû.
Ndèy dhokpa ó ddiy nà nì li
(Mat 19:16-30; Lwk 18:18-30)
17Yesu tde ndèymí bbiydha tsò ngǎ ddíyàchú ro, ddì nì kpatss̀-ní-li kòw, ndèymí à kwò ndèy tdyòw-tey à nyú djú, ndèymí à dhîy à, “Lǎní Li-gwíydha-dja, ma kà ná ma njěy ddu, ndaní ma chǔw ndanà ndru-tey ró nì djiy?”
18Yesu dhîy à, “Ddudhò nyi ní ma iy lǎní li ní? Li rò nì ngǎ cha ndèy nì lǎní nì, Ddrà chúddì. 19Nyi tsì yǎdha ŋà, ‘Nzǐ hwi bbalè, nzǐ nyi ddǔ ngǎ ndèy nì nyìmí ków mí li nà, nzǐ tduw nga, nzǐ tdra mbwa mí lò njàddí li ró. Nzǐ kwó njà li mí ddiy mbwa nà, njey djǎ-nyi ndèymí yâ-nyi dò.’”#10:19 Ngbídha 20:12; Yǎdha 5:16-20.
20Fú kpatss̀ tdrà, “Li-gwíydha-dja, ma tdè drá mí nga djúddù, ma tdyòw í yǎdha wá.”
21Yesu njà nga chěy à dè jǐ nà ndèymí à tdrà, “Ddì nì ddiy tdèy nga ndèy nyi dhò. Ra ndèymí nyi dzź nyi nì ndanà nì ddiy ónga ndèymí nyi bbú mí mb zòw-djá dhò. Ya nyi njèy fǔchú, nyi ra dey léydha ní ddiy nà rakpa ò. Fú ddiy-dzzdjú, ra ndèymí nyi ká ma dyòw.” 22Fú kpatss̀ rr̀ fú lò mí nga nà, à nyú djú nga tèy ndèymí à rà zòw nà, ddiydhò à tdè ndèy dhokpa ó ddiy nà.
23Yesu njà nga gbrǔ ndèy kodjú kpa dè ndèymí à tdrà ndrǔ dhò, “À ní klǒw ŋàbù ì dhokpa ó ddiy nà nì bbalè dhò, tsùwdha nà Ddrà mí pey-mí-nga ò!”
24Yesu kodjú kpa ónga ꞌwìy tdè fú lò dhò, chú Yesu ndrr̂ tdè ndèy tdràdha nà, “Màtsá nzǒw, à ní klǒw ŋàbù tsùwdha nà Ddrà mí pey-mí-nga ò! 25À nì vu-ká-vu ngàmíyà dhò tsùwdha nà sìndánì-nyú òluw à da ndèy dhokpa ó ddiy nà nì li dhò, tsùwdha nà Ddrà mí pey-mí-nga ò.”
26Yesu kodjú kpa ónga ꞌwìy wá fú lò nà ndèymí ndrǔ dhîy ì ì kà-òluw, “Ya à nì dìchú, áyì kǎ ndey ndèy pa?”
27Yesu njà nga chěy ndrǔ dè ndèymí à ngù lò, “Í nì nì klǒw bbalè dhò chú ngǎ Ddrà, wánì ddiy ká nì Ddrà dhò.”
28Petro kâ lò tdrà, “Nja, mà bbà ddiy wánì nyi dyòwdha dhò.”
29Yesu tdrà ndrǔ dhò, “Manì nyì dhò dìchú ní lò tdrǎ, cha ì bba nì ìdhí bba ǐngí djúní ǐngí víní ǐngí yânì ǐngí djǎnì ǐngí nzòw ǐngí nza ma dhò ndèymí Hwî mí Lò-ɦéy dhò, 30rà chùw drǒ í njanja nì ddu ó. Ndrǔ rà bba chùw drǒ dàkì ddì ngà nà, ndèymí djúní, víní, ɦíyní, nzòw, ndèymí nza ndèymí nzadha nà ddí. Ndèymí ndèy rà shì nì nga dhò, ndrǔ rà ndru-tey ró nì djiy chùw. 31Chú, bíy nì bbalè cha ì nì njitsó nì rà ngu luwtò ndèymí cha ì nì luwtò nì ndrǔ rà ngu njitsó.”
Yesu tdrà lò ndèymí dhi djú gbow nì mî
(Mat 20:17-19; Lwk 18:31-34)
32Yesu ndèy kodjú kpa nà tdè rǎ Yerusalemu ò. Yesu dà tdè ndrǔ njìò, ndèymí ndrǔ ónga ꞌwìy. Cha ì mà tdè luwtò Yesu mà dzzdjò nì ndrǔ tdè nyí nà. Yesu tdûw dri ndèy djú rwo nà nì ndèy kodjú kpa ddíyàchú nga gidjò ndèymí à tèy cha ndèy nì rǎ ndèy njèy ndèy ró nì lò. 33À tdrà ndrǔ dhò, “Nyì rr, mà nì rǎ Yerusalemu ò, ndèymí ka rà ma Ndrǔ-Ddùw dhotèy bbu Ddrǎ-ngá dyǎ-djá djú kpa dè ndèymí Musa-ngá yǎdha mí li-gwíydha-djá nà. Ndrǔ rà dhi tdèy ma djú ndèymí ndrǔ rà ma bbu ngǎ ì nì Yahuddi-ddúw ní nì ndrǔ dhokpa ò. 34Ndrǔ rà ma tsò gbù, sa hwì ma rò, ma dhèy shí nà, ndrǔ rà ma hwì, chù ddu gbow nì ó, ma rà ngu djiy ní dhi óddù.”
Yakobbo màgò Yohana nà kwô Yesu
(Mat 20:20-28)
35Yakobbo màgò Yohana nà, Zibiddayo mí ddúwní kâ shì Yesu dè. Ndrǔ tdrà, “Li-gwíydha-dja, njàddí ddiy rò nì nèy mà nì jǐ nyi njěy mà dhò nì.”
36Yesu dhîy ndrǔ, “Mí ddiy ní ddu?”
37Ndrǔ ngù lò, “Ya nyi dòw nyìmí thìynga djú nyìmí ddrǒngó-ní-nga mí Pey-mí-nga ò ro, mà nì jǐ nyi léy mà dǒw nyi nà, ddì li nyìmí ví òluw nì nga là djò ndèymí njàddí li nyìmí gǔw mí nga là djò.”
38Yesu tdrà ndrǔ dhò, “Nyì tsì nzá nyì nì dhiy nì ddiy. Nyì dhó ney dyá ní nzadha mí kǒpù mbù cha à kà ma mbǔ nì? Nyì dhó ney bàtízò lòw cha à kà ma lǒw nì bàtízò jì nà?”
39Ndrǔ ngù lò, “Ney mà dho.”
Yesu tdrà ndrǔ dhò, “Dìchú nyì rà mbrr̀ ma kà ma mbrř nì dyá ní nzadha mí kǒpù ndèymí bàtízò lòw cha à kà ma lǒw níchú. 40Chú ma nì ngǎ klôw nà vúdha nà áyì rà dòw màtsá ví òluw nì nga là djò ndèymí gǔw nà. À nì Ddrà cha ndèy rà í nga bbu cha ndèy thì tdè ì nì ndrǔ dhò.”
41Njàddí dri nì à kodjú kpa rr̀ í ddiy mí nga nà, thǒw lòw ndrǔ Yakobbo mà ró gò Yohana nà. 42Fú ddiy dhò, Yesu îy ndrǔ ddìngaó wá ndèy dè ndèymí à tdrà, “Nyì tsi cha ì ka lêy ngǎ ì nì Yahuddi-ddúw ní nì ndrǔ djùkpa ddàdha-djá nì klôw nà ìdhí bbalè djú, ndèymí ndrǔ dhí li-djùkpa ddàdha-djá nì dzò ní klôw nà cha ì nì ì djùkpa ddǎ nì ndrǔ djú. 43À kà nzá à déy fǔchú nyì kàó. Ya ndèy jì ndèy ngú ddrǒngó nyì kàó nì li, à kà fú li déy nyìdhí nokpa ní, 44ndèymí ndèy jì ndèy déy nji li ní nì li, à kà fú li déy piy wánì ndrǔ dhò. 45Ma Ndrǔ-Ddùw ma rà dziylíy djò ngǎ ka njěy ma dhò, chú ma njěy bbalè dhò ndèymí ma bbú màtsá djiy, ndaní ma ngá bíy ní bbalè.”
Yesu djì Bartimayo nyú ndèy mûw nì
(Mat 20:29-34; Lwk 18:35-43)
46Yesu ndèymí ndèy kodjú kpa nà shì tdè Yeriko mí ddrǒngó ní bba ò. Cha ndrǔ tdè fú ddrǒngó ní bba bbǎ ro, bíy ní bbalè mí njuw dyòw ndrǔ. Ndèy nyú mûw nì kpatss̀ dòw tdè tuw gitéy. À děy bbalè kwò, ndaní ndrǔ bbú ndèy dhò mb. À ró dho tdè Bartimayo, ndèymí à tdè Timayo mí ddùwnì. 47À rr̀ tdè Nazareti ó Yesu nì dǎ ndèy ro, à lòw swa, “Yesu, Pey Dawuddi mí Ddùwnì,#10:47 Pey Dawuddi mí Ddùwnì. Nja klǒw nì lò-hwo ndèy tey nà. njey ma zòw!” 48Bíy ní bbalè tdrà à déy chíy. Chú à swâ dà ní dà nga djòluw, “Pey Dawuddi mí Ddùwnì, njey ma zòw!”
49Yesu dèy ndèymí à tdrà, “Íy à.”
Ndrǔ îy ndèy nyú mûw nì kpatss̀. Ndrǔ tdrà, “Nzǐ njey do, ngbí nyi ru, à nì nyi iy.”
50Fú ddiy dhò, à bblà ndèy ró rù djú ru, à î ndèy ru ndèymí à rà Yesu dè.
51Yesu dhîy à, “Nyi ní jǐ ma njěy ddu nyi dhò?”
Ndèy nyú mûw nì kpatss̀ ngù lò, “Li-gwíydha-dja, ma nì jǐ ma njǎ nga.”
52Yesu tdrà à dhò, “Ra, nyìmí ùwdha lêy nyi rónga djì ŋà.”
Ndùw à lòw nga nja ndèymí à dyòw Yesu tuw ò.
Chwazi Kounye ya:
Marko 10: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved