Iironga 19
19
ONTOPORUA 19.
Eenkondo dohapu ha Karunga nongejo haapagani mu Efesus
1Nopua ningi manka Apollo a ri ku Korint, Paulus oku’endahenda iirongo jokombanda#19:1 Okutja iirongo mbi ri ri kokure nefuta. nde te ja ku Efesus. Huno a hada aarongua jamue.
2Ongashi a ti ku jo: “Ne omua tuumba Ombepo Ondjapuki, sho mu’iteera?” Nde jo taa ti ku he: “Sse inatu uva nandodiro nge oku na Ombepo Ondjapuki.”
3He ta ti: “Ne ano omua tshatshua etshatsho rini?” Jo oja ti: “Etshatsho rja Johannes.”
4Paulus ta ti: “Johannes okua tshatsha aantu etshatsho rjehidirururo, nde te ja rombuere nokutja oje nokuiteera ngu te mu randura, nokutja OJesus.”
5Sho j’uvire shoka, oja tshatshua medina rja Muene Jesus.
6Ndere Paulus, sho e ja tenteke omake, jo oja namberua k’Ombepo Ondjapuki, ja popi omaraka, nde taa shunganeke.#19:6 Omboka oja tuumba esakramete rjekoreko.
7Mboka ajeshe oja ri aarumentu je cike pomurongo na jaari.
8He ta hi mosinagoga ta popi nehinekero eemuedi ndatu, noku j’uvicira noku ja fatururira otshirongo tsha Karunga.
9Ndere jamue#19:9 Okutja jamue jaajuda. sho j’ikukutike, inaa hara okuiteera, nde taa njana ondjira ha Muene miipaci jaantu, he okua topoka na jo, ta kuca aarongua, nde t’uvica keshe esiku moskola homurumentu Tirannus.
10Otsho a ningi eemvo mbari. Ndere ajeshe mba ja rumbu mu Asia, aajuda naapagani taj’uvu ohapu ha Muene.
11Ndere Karunga okua rongica eke rja Paulus iironga iinjengandunge jo iinene.
12Nena iipuguro neemnja dokorutu rue oda tentekua kaavu, nde uo uuvu au j’eca, neembepo eembuineji oda zi mo.
13Ndere jamue jaajuda mba j’endagura ja f’eempure, oj’erekere okutumbura edina rja Muene Jesus kombanda ha mboka ja ri neembepo eembuineji ja ti: “Otandi mu ganene mu Jesus ngu t’uvicua ku Paulus.”
14Mokati ka mboka je tshi ningire omua ri uo ojana aamati uunuari jomupristeri omukuruntu guaajuda, Skevas.
15Ndere ombepo ombuineji oha jamukura ha ti: “Ondi tshi Jesus, ngaje ndi tshi uo Paulus, ndere ne on’oore?”
16Ndere omuntu ngu a ri nombepo ombuineji okue ja nukire, nde ta sindi jaari, na sho e ja monica uudigu ueenkondo de, jo ja hondapo, ja zi mondjugo ndjoka nomarutu gouara, ja toshorua iiraro.
17Shoka otsh’uvika no kaajuda no kaapagani ajeshe mba ja ri mu Efesus. Ajeshe oja tira. Ndere edina rja Muene Jesus orj’ambererua pombanda.
18Naahiteeri ajeshe oje ja, j’okorora shoka ja ninga.#19:18 Omboka ja tuumba esakramente rjomiihokororo.
19Ojendji jomumboka kua ja ninga iironga juupure, oj’eta omambo gauo#19:19 Okutja omambo guunganga. nde taje ga fike po miipaci jaantu ajeshe. Opua jarurua eendjere dago, nde da ningi iimariva joodenari omajovi geemrongo ntano kumue.#19:19 Iimariva mbi jeedenari 50,000 oja fa iimariva iiponda ejovi rimue nomacere uunutatu.
20Otsho ohapu ha Karunga ha koko unene, nde tahi orora eenkondo daho.
21Shoka atshishe sho tsha rongua, Paulus oku’idiradira momuenjo gue okuha ku Jerusalem, nge a piti tango mu Makedonia no mu Akaia nde ta ti: “Nge ngaje nda kara ko, ondi nokutara uo na Roma”.
22Okua tumu ku Makedonia jaari jomaakuaci je, Timoteus na Erastus. He muene a kara manka omasiku gamue mu Asia.
23Nde pomasiku ngano epijagano kari shi etshona, orja tukurukire ondjira ha Muene.
24Oshoka Demetrius, omuhambudi guotshisilveri, ngu a hambura notshisilveri uutempeligona#19:24 Uutempeligona uutshona mbu oua fa otempeli onene ha Diana mu Efesus. Kua ua zarua ng’iigeti jaapagani okukerera iishuna. ua Diana#19:24 Diana okutja edina rja tshimue tshiikarunga ojindji jaapagani. nokua monic’eenkurungu eriko enene niironga mbika.#19:24 Eenkurungu di da kuaca Demetrius pokuambura uutempeligona mbu uutshona. Aapagani oja futicirue iimariva ojindji poku u randa.
25Doka okue di gongere puamue naarongi mba ja ronga iironga ja tja ngaaka a ti: “Jarumentu, omu tshi tshi, nokutja eriko rjetu orja zi miironga mbi.
26Ndere omu uete ne mua uva uo nokutja Paulus tuu nguka t’idirururica he ta piramenica ongundu onene haantu, ha mu Efesus ike, okonjara mutshirongo atshishe tsha Asia, sho ta ti: ‘Kaje shi ookarunga mba ja rongua nomake.’
27Ha sse ike tu ri mondjira hokukanica otshitoporua tshetu,#19:27 Okutja otshitoporua tsheriko rjauo, oshoka aantu inaa randa ue iinima mbika nge ja ningi aakriste. aaue, otempeli ha Diana omunene otahi ka dinua, nehadimo rje otari shimbike okusharakana, ngoka tuu ngu ta simanekua mu Asia atshishe no muujuni aushe.”
28Sho j’uvu doka, oj’udirire ondjashi, ja kudire j’igida ja ti: “Omunene tshiri Diana haaefesi!”
29Notshirando atshishe otsha vundakanicua. Ajeshe oja tondokere keshara rjuudano, ja kokororere ko aamakedonia Gajus na Aristarkus, aakareri ja Paulus.
30Ndere Paulus sho a hara kuenda mokati kaantu, aarongua inaje mu eca.
31Nomarenga uo gamue gomu Asia, go ookuume ke, oga tumu ku he, ge mu indire, ka he ko keshara rjuudano.
32Jamue oj’igida dika, jamue dijaka. Jo ja ri otshigongi tsha dungakana. Ojendjijendji kaa ri je tshi shi tshe ja gongarica.
33Nena mongundu haantu omua shirua Aleksander ngu a hundurirua komesho kaajuda. Alexander okue ja anda, he e ja mueneke, ta ara kurombuera aantu eehapu dehipopiro.#19:33 Aajuda oja tira uo ondjashi haapagani. Aleksander omujuda na ninge omupopiri guauo. He ke shi omupopiri gua Paulus.
34Sho je mu dimburura nokutja he omujuda, ajeshejeshe oj’igida muure eestunde mbari ngashi neui rimuike ja ti: “Omunene tshiri Diana haaefesi.”
35Ndere omutshangi#19:35 Okutja omutshangi guerenga rjotshirando. okua rotica ongundu haantu a ti: “Jarumentu ne aaefesi, omuntu ngu oku ri peni ine tshi tshiua nokutja otshirando tsha Efesus otsho otshikareri tsha Diana omunene, omona omukadona gua Jupiter?#19:35 Aapagani mboka oja amberera iikarunga jiirombo ojindji. Ndere Jupiter okua ambererua ng’omukuruntu guiikarunga ajishe.
36Motshinima shika, sho katshi nomarudi. Nena ano tsh’opara okumuena, ne kamu ronge iironga mbi kaji namutse nandungu.
37Oshoka omua eta huno aantu mboka, mba inaa fura motempeli, jo inaa njana karungakadona keni.
38Ndere Demetrius naarongi je neenkurungu di da gama ku he, nge je neendjuma nomuntu guontumba, nena sse otu nomasiku gokupangurica nomarenga aapanguri. Pu jo naa popacane.
39Ne jene nge omu notshinima tshirue, ano onatshi ucue motshigongi tshoveta.
40Sse jene otatu vuru okupeua ondjo hepijagano rjonena, oshoka kapu na gurue a tukurukica evundakanico ndika, tu mu pe ondjo.” 41Sho a popi doka okua rareke otshigongi.
Omission Heklesia Ekatolika, 1951. Namibian Catholic Bishops Conference.