Ester 2
2
Asuero yelotaque jaga'me dalaĝae jaliaĝana
1Ca'li yenoĝodegue gaa'me noloqo'ote, male qaya jo'me lalemataic ñe'me Asuero, qalaĝaja maliaĝa netouetac jajo'me Vasti: netouena da'me ja no'en jo'ne 'yetec ca'li jajo'me nataq'aen da'me mach'e lamajoĝonaĝac qaedi ja yitaĝa ue'tajop joñe'me. 2Chane'eja jogaa'me lecochaĝa'u jo'ne yatenaĝanaĝayaqa yitaĝa dojedapegue' ñe'me Asuero, enaa'j:
«Am jaliaĝanec, 'noota qom qoyelaque gaa'me q'añolel jo'ne uayamaqael qaedi qonauetequena. 3'Noota qom auauo'oe gaa'me adecochaĝa'u yemeda gaa'me ale'u lael qaedi nauegueta gaa'me q'añolel jena'me jenjo' adejaliaĝaiqui, neteda'ña di'me 'lachaqa't gaa'me yauodipi. Qama'le ñe'me Hegai yataqata netelalo jo' qomle, nach'eñe jo'ne yataqata a'uamaqaten da'me yelolegue gaa'me yauodipi, qama'le e'n qomle yataqata onaĝael jogaa'me. 4Yem qama'le auelaque jaga'me yataqachiñe onaĝae, qaedi nach'aga auen jaliaĝana dalaĝae, qama'le nemeneguet jajo'me Vasti.»
Jenjo' yataqata 'yamaqaten ñe'me jaliaĝanec Asuero, qama'le naq'aeta joga'me qoya'uo ca'li.
Ester novita joga'me nejaliaĝaiqui
5Di'me Susa 'uo ca'li joñe'me judío jo'ne chiyoĝoguet di'me Benjamín, jo'ne lenaĝat da'me Mardoqueo, c'oĝot jodi'me Jaír, jo'ne c'oĝot di'me Simí, jo'ne c'oĝot di'me Quis. 6Chiyoĝogueta gaa'me lelataqa ca'li jodi'me Nabucodonosor, jaliaĝanec di'me Babilonia, jo'ne yaueguelo ca'li, nach'e ena'am di'me jaliaĝanec Jeconías, ca'li nomat di'me Jerusalén. 7Mardoqueo 'uo ca'li jañe'me liaqata jo'ne lenaĝat Hadasá, nataq'aen lenaĝat laqaya jo'ne Ester. Janjo' mach'e lec'oqote' gaa'me netejoqo't ñe'me Mardoqueo, qalaĝaja japelo', qa'a yele'u ca'li dia'me let'al. Chane'eja Mardoqueo yataqata nauela't qama'le e'tem c'oqote. Ester yataqata onaĝae chayovida'a nalo'ta't joga'me 'loyaĝac.
8Qama'le da'me qonoma'a joga'me lamajoĝonaĝac ñe'me Asuero, jalcote gaa'me q'añolel qoyaueta joñe'me nejaliaĝaiqui. Male ñe'me Hegai yataqata netelalo naa'me q'añolelpi, qama'le joote 'uo jañe'me Ester. 9Hegai ca'li yauana qama'le yataqata 'yamaqaten. Chane'eja paja'a damaĝajoĝolegue qaedi qoye'et qoyiyoĝolegue da'me davioĝon jo'ne yelo'teguet da'me onaĝaic, nataq'aen da'me yataqata qoyiqui'yaĝan jaga'me, chayovida'a damaĝajoĝolegue jogaa'me siete namaĝajel jo'ne onaĝael qaedi yataqata qoyelo'oguet jañe'me Ester, nataq'aen qoyachaue joga'me onaĝaic emec jo'ne uaue gaa'me yauodipi.
10Ester yataqata ja 'yaĝatetac joga'me chiyoĝogue uotaĝa joga'me noic uotaĝa ga'me layi, qa'a joñe'me Mardoqueo dojapegue' ca'li da'me ja jetaque ta'le qoyayaten da'me dojo'. 11Yemeda naa'me noloqo'ote, ñe'me Mardoqueo yec'ata nataq'aen ueta'ña nale joga'me dajoya'ya ga'me ueteda'a gaa'me yauodipi, qa'a jetaque yayaten jaga'me Ester qom 'noota, chayovida'a joga'me qo'yetec nale.
12Naa'me q'añolel nalo'tagueta gaa'me doce auoĝoyaqa da'me yataqata qo'ye't qaedi onaĝael, qa'a naq'aeta da'me mach'e naeda'ac ca'li: gaa'me seis auoĝoyaqa nach'e eta't qoyiyoĝolo'te ga'me lo'oc jena'me laeta jaga'me mirra,#2:12 Laeta jaga'me mirra: yoĝoqui 'me davioĝon jo'ne li'i jaga'me epaq mirra. qama'le jogaa'me noloqo'ote laqaya' qoyiyoĝolo'te ga'me davioĝon jo'ne en 'noota ga'me lo'oc. Yem da'me dojo' qama'le naa'me q'añolel male qoya'uo joga'me laloqo't qaedi dajoyeda'aguet ñe'me jaliaĝanec Asuero. 13Onole'tape gaa'me q'añolel nale dajoyeda'aguet joñe'me jaliaĝanec, yaediñe naa'me leuo nataq'aen jaga'me li'yoĝodaqate jo'ne jetaque yaeñi, da'me ue'ta ga'me yauodipi 'lemec. 14Jaga'me q'añole yec'ata ñe'me nejaliaĝaiqui nale javit; nale 'yoĝoñi laqaya qama'le qoyauegue joga'me yauodipi 'lemec laqaya jo'ne mach'e yelolegue ñe'me Saasgaz, jiyaĝaua laqaya ca'li yataqata 'yamaqaten ñe'me Asuero. Naajo' q'añolel, qom ja 'yamaqate'n ñe'me jaliaĝanec, nataq'aen ja qonenaĝategue ga'me lenaĝat da'me yitaĝa qoyiyaĝana, qama'le ja yitaĝa ta'le 'viyelaĝata da'me dajoyeda'aguet ñe'me jaliaĝanec.
Ester male qoyen jaliaĝana
15Jodi'me let'a jañe'me Ester qa'a lenaĝat da'me Abihail, netejoqo' ñe'me Mardoqueo, jo'ne en c'oqote ca'li yeleu di'me Abihail. Ca'li qauaye jañe'me Ester da'me male yec'ata joñe'me jaliaĝanec Asuero, qama'le gaa'me leuo jo'ne en yaediñe ca'li ñe'me Hegai, nach'eñe jo'ne yelolo'te ca'li gaa'me yauodipi. Qama'le yataqata qo'yamaqaten yemeda jogaa'me neteloqo't. 16Chane'eja male qoyaue'uo ñe'me jaliaĝanec Asuero ca'li auoĝoic décimo jo'ne lenaĝat Tébet,#2:16 Tébet: auoĝoic jo'ne décimo joca'li, jo'ne nayi yelo'teguet ga'me diciembre laeñi chayovida'a ga'me enero laeñi. uo'e jo'ne séptimo ga'me lejaliaĝac. 17Qama'le ñe'me jaliaĝanec Asuero yataqata noqopita jañe'me Ester, ja ena'ama gaa'me 'uaediñe loua', qama'le yataqata 'yamaqaten jañe'me, etapega napacalo'te yemeda gaa'me q'añolel laqaya'. Chane'eja paja'a yanaye jaga'me noqop'a, qama'le en jaliaĝana, tayi jajo'me Vasti.
18Ua'a ca'li ñe'me Asuero ya'uo joga'me neualayaĝac let'adaic qaedi yema qo'nonaĝachigui jañe'me Ester, qama'le yiyaĝanalo yemeda gaa'me jaliaĝanaqa jo'ne lecochaĝa'u nataq'aen gaa'me najoĝola'te jo'ne yelodelegue di'me lejaliaĝaiqui. Nataq'aen noqojaĝañi yema ga'me nejetenaĝanaĝac, chayovida'a e'n onaĝayaqa gaa'me neme' jo'ne mach'e chiyoqodayi joga'me jaliaĝanec.
Mardoqueo noma'a joga'me jetaque qo'yetec ñe'me jaliaĝanec jetaque qoyalat
19'Uo jo'me nolo' ca'li yitaĝa yema'a't naa'me q'añolel, qama'le ñe'me Mardoqueo ueta'uet joga'me jom ga'me lejaliaĝaiqui ñe'me Asuero. 20Ester yataqata yoqo'cha ñe'me Mardoqueo jo'ne naquetaje'mec ca'li jaqayi, qama'le nach'e eta't maliaĝa quetalegue jenjo'. Qaya'te yayaten joga'me layi uotaĝa joga'me noic jo'ne chiyoĝogue ca'li, qa'a ñe'me Mardoqueo dojapegue' ca'li qaedi ja nenaĝategue jena'me jenjo'.
21Qama'le jaajo' noloqo'ote ca'li ñe'me Mardoqueo ueta'uet ga'me jom ga'me nejaliaĝaiqui, 'uo ga'me ua'a ca'li domachiyalo jo'me Bigtán nataq'aen jo'me Teres, coico laje' jo'ne yelodelegue ga'me ladiiuo ga'me 'nomataqa' ñe'me jaliaĝanec. Naajo' dalematatedapega ca'li ñe'me jaliaĝanec, qama'le dojetedapiye da'me jetaque yala't. 22Ca'li domachiya da'me dojo' joñe'me Mardoqueo, qama'le t'aqataĝanem jañe'me jaliaĝana Ester, jo'ne paja'a t'aqataĝanem ñe'me jaliaĝanec Asuero. 23Ñe'me jaliaĝanec en qonaloqoten jena'me 'uo, qama'le ca'li male yayaten da'me yataqata eja, damaĝajoĝolo'te qaedi naajo' dos qoyecoñededajeguem. Qama'le da'me dojo' qoyediñe ca'li, qa'a ñe'me jaliaĝanec en ualegue jajo'me nede jo'ne lae't gaa'me ledii's gaa'me jaliaĝanaqa ca'li.
Chwazi Kounye ya:
Ester 2: TDO
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Biblia en Toba del Oeste © Sociedad Bíblica Argentina, 2014, 2019.