Yiburu 11
11
1Siaka ka wari dii ate nuru ta yiila ale seba chak mɛ ayen di sum ka wensie yaase di le sum nye alege, wa an baga a nya wanni diema la. 2Ku jam ka ba siaka nyiŋ ate Wen jam basi ate dila po demma seba ayen wa sui peenti ale ba kama.
3Ka siaka ale soa ate ti seba ayen ka Wen ale biisi a yaa nye wenŋmazuk ale tɛŋ ale ŋan baai meena wuu ale bo ba po la. Dila nyiŋ ate ti baga a nya ŋan baai ale boro nna la. Ti be an baga a nya ŋan baai ate wa pai nye ŋantaŋa de meena la. 4Ku jam ka siaka nyiŋ ale soa ate Abel jam te Wen kaab maŋ a gaam Keen ale jam pai jabuui mɛ a nye kaabka la. Be ka Abel siaka de nyiŋ abe ale soa ate Wen sui peenti ale wa ayen wa ka wayɔrisima nyɔnɔ. Ti seba nya kude kama dii nyiŋla, Wen dek sui jam peenti ka nalimnyiini ale wa tiirimu. Be ka wa siaka de nyiŋ ale soa mɛ ate ti a wi wa yuenni jinla ase wa diem vua kama la.#11:4 Piilimka 4:10 5Ku jam ka siaka nyiŋ ale soa ate Ɛnok an kpi la. Wen jam goanti nye kama ate wa yiti jueli wenŋmazuk ayen wa kan kpi. Nuru abe an jam baga a nya wa. Wen Gbaŋka abe weeni sak ti kama ayen wa nye ate ka Wen sui peenti ale wa ale ge ate wa yaa pai wa a ta jueli la.#11:5 Piilimka 5:24 6Nuru waai karo a baga a nye ate Wen sui a peenti ale wa alege kula nyɔnɔwa a ka siaka ale wa. Dii nyiŋla, waai ale pai wadek a te Wen la, ku a fɛ kama ayen wa ta siaka ayen wa boro kama. Wa be a te baai ale a gisi wa la ka tiirim. 7Ku be jam ka siaka mɛ nyiŋ ale soa ate Nowa baga wom Wen ale jam kaam wa a magsi chaab ale wie ŋaai le ŋa nye chum diipo la. Wa siaka nyiŋ ale soa ate wa jam lak tue wom, a yaa nye ŋaaruŋ ayen wa vari wa ale wa dɔkdemma meena a basi. Wa siaka de nyiŋ abe ale soa ate nurubiik tɛŋzuk de a jam nya chivie, ale ge ate Wen wi wa ayen wayɔrisima nyɔnɔ.#11:7 Piilimka 6:13-14
8Ku jam ka siaka nyiŋ ale soa ate Abrayam zuli Wen nɔi a nyini cheŋ tɛŋ kaai ate Wen jam puulim ayen wa le pai te wa la. Abrayam yaa basi wa tɛŋka a yaa nyini a cheŋ alege poom zɛ juijui dek chekki ate wa jam a cheŋ la.#11:8 Piilimka 12:1-2 9Siaka de nyiŋ ate wa jam bo tɛŋ kaai ate Wen puulim ayen wa le pai te wa la. Wa jam bo ka po ase ka nichaanɔ la. Wa ale wa dɔkdemma jam a goa ka viita po ase Aizik ale Jekob ate Wen jam puulim ale ba ate ba mɛ jam bo viita po diila. 10Dii nyiŋla, Abrayam jam a limisi ayen wa jo ka wenŋmazuk yeri dii ate Wen sɛ te wa la. Yeeŋa de kan maari a lo. 11Ku jam ka siaka nyiŋ ale soa ate Abrayam, waai ale jam kpaŋ nna yegayega a moata kum la, a te wa powa Saara, waai mɛ ale jam kpaŋ nna yegayega a gaam biam taam la puuk. Dii nyiŋla, Abrayam jam ta siaka kama ayen Wen ale jam puulim ayen wa le nye dii a te wa la, wa le nye kama. 12Abrayam be jam sum nya ka ŋaaŋbisa a piisi nna yegayega ase chiŋmarisaŋa la, ale piisi mɛ nna ase beli tintain busuŋ la. Nuru an poom baga a chiini ba.#11:12 Piilimka 12:1-2
13Nyaba de meena ate m biisi ba wie la kpi kama ale ba siaka alege ba an tuesi ŋan baai ate Wen puulim ayen wa le te ba la. Alege siaka nyiŋ ba nya kama ayen ŋanta dua ka jigi nna niŋniŋa ate ba jam a nye ase ba jam paari ku jigini kama la. Ba be jam siak kama ayen ba ka nicham tɛŋzuk de. Ba yenni dek abe bo ka jigi yoŋ. 14Nuru baai abe ale a poli ase nna la, bala chaab a sak kama ayen ba kasim a gisi ka badek tɛŋ ayen ba kali. 15Ba be dan kasim a poli ka tɛŋ kaai ate ba pai basi ŋaaŋ la wie, ba ta suik kama a pilim a ŋmani? 16Aaya, wanni ale, ba kasim a yaali ale ka ninmuna tɛŋ kaai ale gaam ba tɛŋka la. Daa jigi yoŋ tɛŋzuk de, ka wenŋmazuk ale la. Dila nyiŋla, chivie ka Wen ale ba ale wi wa ayen ba Wen yaa. Dii nyiŋla, Wensie wa sɛ ka yeri te ba.
17Ku jam ka siaka nyiŋ ate Abrayam a pai wa nidoabinni Aizik a nye kaabka Wen ale jam nye wa a nya la. Abrayam ale waai ate Wen a jam puulim ale wa la, alege wa jam gomsi ayen wa pai wa nidoabinni meena a nye kaabka. #11:17 Piilimka 22:1-10 18Wen jam weeni wa ayen, <<Ka Aizik nyiŋ ate fi le nya ŋaaŋ biik sii ate m puulim la. (Piilimka 21:12) 19Abrayam be jam ta siaka kama ayen Wen baga a nak nuruba kama a yiti kum po. Dila nyiŋla, daam dan ka ku wensieŋa jigini, ti baga a weeni kama ayen Abrayam ŋman tuesi Aizik ka kum nisima po. 20Ku jam ka siaka nyiŋ ale soa ate Aizik weeni ayen chum da dii dai, Jekob ale Iisɔ le nya niaka kama.#11:20 Piilimka 27 21Ku jam ka siaka ale basi ate Jekob te Josefi nidoabilisaŋa wanyi wanyi niaka ale ge kpi. Wa jam pai ka wa tachekka a chɔgsi wadek a yiti kali wa gaduokku zuk a yaa puusi Wen a te ba niaka.#11:21 Piilimka 47:31, 48:15-16 22Ku jam ka siaka nyiŋ ale soa ate diipo ate Josefi a jam moata kum la wa biisi magsi chaab ale diipo ate Izirali demma ale jam basi Ejipiti tɛŋka abe ba kuli la. Wa jam maa weeni ba le ba nye wa dii ase wa nin kpi ate Izirali demma basi Ejipiti a kuli la.#11:22 Piilimka 50:24-25
23Ku jam ka siaka ale basi ate Moosis kowa ale wa mawa ale biak wa la, a pai wa suk ate ku paari chiisa sita. Ba ale jam nya ale biika ka bimaŋ la, yɔgsum jam ka ba ate ba zɛri Ejipiti Naawa sinsaŋŋa. 24Ku be jam ka siaka ale soa ate biika Moosis ale ga chim nueri la, wa zɛri ayen wa daa Ejipiti Naawa lie biiga. 25Wa jam a yaali ayen ka wa dan maa nam ale Wen nuruma a zunchoŋ gaam wa nin dɛ masim ale biem alege ku kan beni. 26Wa jam poli kama ayen fi dan nya chivie Kirisitawa nyiŋ, waai ate Wen le tom ate wa jam la nyiŋ, a zunchoŋ ka nna yegayega a gaam Ejipiti jigsika meena. Wa jam a poli dila kama dii nyiŋla, wa nina jam muni ale ka tiirim buui ate wa le nya la.#11:26 Nyinika 2:2-12 27Ku jam ka siaka ale soa ate Moosis basi Ejipiti tɛŋka alege yɔgsum an jam yik wa ale naawa suipuurumu. Wa kasim jam ta popola ale siaka kama ale Wen, waai ate nurubiik an baga nya wa la. 28Ku jam ka siaka ale soa ate wa weeni nuruma ayen ba nye Gaambasika Tigini ŋandiintaŋa abe ba pai ziimu a misimisi diinaŋa noaŋa ate maarɔ, waai ale a ko nuruba la a dan jam, wa kan ko nidoabili sii ate Izirali demma liŋ biak la.#11:28 Nyinika 12 29Ku jam ka siaka ale soa ate Izirali demma a baga va Nyakpiem Mɔnuŋku po a cheŋ taam jueli nna ase ba jam a tabi ka tɛŋ kosik zuk alege daa nyiam po la. Ejipiti demma ale jam tomsi ayen ba maa va taam la, nyiamu yaa deri chali jam lim ba a basi du.#11:29 Nyinika 14:16-17
30Ku jam ka siaka ale soa ate Jeriko tɛŋka parika ate ba sɛ gilim ka la a lo. Izirali demma jam cheŋ gilim ka, ka daa ŋayopɔi ale ge ate ka lo. 31Ku jam ka siaka nyiŋ ale soa ate Arayab, waai ale jam ka nidoa yaalik nna yegayega la, an jam maa kpi ale baai ale jam kan siak a te Wen nɔi la. Dii nyiŋla, wala ale jam vari nuru baai ate Izirali demma jam tom ayen ba ga mak nya ba dachaasaŋa, Jeriko demma la, a basi.#11:31 Josua 2:1-21, 6:1-25
32M be le ŋman biisi ka wana ale wana wari ya? M te baga a biisi nuruba ba chaab wie kama, ase mbala meena ate m biisi la, alege niŋ ŋman karo ate m le nye dila. Alege ba chaab boro kama ase Gidiyon ale Barak ale Samson ale Jepeta ale Deevid ale Samuel ale Wen biisiteerɔma la. 33Be ka siaka nyiŋ ate nyaba de meena a nye kpaliŋsa ale tɛŋsa a nak dɛ, a fɛ ate wensie boro, a nya Wen ale puulim ale ba ayen ba le nya diila, a nye ate gbeŋma a baga lik ŋa noa, 34a kpimsi bolim kpienta, a chali liisi gebik woŋ sii ate ba jam ayen ba pai ko ba la. Ba jam wobsa kama alege tulim nya pagrim. Ba jam ta pagrim ka nna yegayega tugurisa po a yaa nak satɛŋsa tugurik tɔŋdɔba dɛ. 35Nipooba gela baai ale ta siaka la nyiŋ ale soa ate ba mabisa ba gela baai ale kpi la a yaa yiti kum po. Ba gela mɛ a jam zɛri kama ayen nuruba kan basi ba namsika alege siak ayen ba namsi ba a ko, ayen ku basi ate ba yiti kum po a ta nyuvuri maŋ. 36Nuruba jam nye ba gela mɛ a la, a miiri ba, a pai chɔrima bobi ba a ta ba ga lik. 37Ba gela mɛ, ba yuk ba ale tana, a pai gebisa a gebi ba buye, a pai gebik woŋsa a ko ba gela mɛ. Ba gela mɛ a jam a jo ka piisa ale bua gbaŋsa, ba gela mɛ a jam chim ka ŋanjaksa nna yegayega, nuruba namsi ba gela a te ba tuem. 38Ku an poom ŋman magsi ayen tɛŋzuk de demma a ŋman ta nuruma de chaab ba suŋsuŋŋa. Ba kasim jam bo ka sagni po a nyiem cheŋ a basi du, nna ase nicham la. Ba jam maa bo ka guuta zuima, ale pina vie po, ale maari a goa vie po mɛ.
39Nya bade meena siaka nyiŋ abe ale soa ate Wen jam weeni ayen wa sui peenti ale ba kama alege, ba an jam nya Wen ale jam puulim ayen ba le nya jabuui la. 40Dii nyiŋla, Wen daam poom poli ayen wa nye ka wamaŋ ate di gaam dila a te ti. Wa be poli kama ayen wa kan nye ate nuru bala kan ta kaasuŋŋoa, ase ka wa nin pai tama mɛ a gum chaab ale bala, ale wa yaa nye dila.
Chwazi Kounye ya:
Yiburu 11: BWU
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 2023, Ghana Institute of Linguistics, Literacy and Bible Translation