Yiburu 10
10
1Sinsaŋŋa abe ka wie ŋaai le sum ŋa nye la, yisuŋta, daa ŋa dega. Sinsaŋŋa de a sak kama ayen ku a fɛ kama ayen nuruba a jam Wen jigi daa meena, ale bena meena a nye kaabka. Alege kaabka de meena ale kan baga a nye ate nuruba a welema la, Sinsaŋŋa, ŋaai ale va ka kaabka de meena a tom la, an baga a nye dila mɛ. 2Ŋa dan baga a nye ka dila nna, nuruma ate ale a nye kaab kaai la, ba te basi kama. Dila nyiŋla, nuruma a dan kaab dila a yaa deri welema, ba te kan ŋman baga ale seba ayen wabaata boro. 3Ku be ale ka diila, bena meena kaabka de a teeri nuruma ka ba wabaataŋa wie. 4Niiga ale bua ziita an baga duisi wabaata a basi.
5Dila nyiŋ ale, soa ate Kirisita ale jan jam tɛŋzuk de la, wa weeni ayen, <<Fi kan yaali ayen ba a ko ŋanta a te fu yaase ba pai tiirita a te fu. Alege fi gomsi ka nyiŋ a te mu. 6Ku kan te fu suipeentiga ale ba ale a ko duŋsa a ju si kuŋkuŋ tii zuk ate ba a kaab fu la. Ku kan te fu suipeentik mɛ ale kaab kaai ate ba a nye ayen ka duisi ba wabaataŋa a basi la. (Yiila 40:6-8) 7Be nya mi ale nna, <Wen, ayen m tom fi ale a yaali diila, ase ba ale poom ŋmarisi mi wie Sinsaŋŋa Gbaŋka po diila.> >> 8Wa liŋ weeni kama ayen, <<Ku kan te Wen suipeentik ale ba kaabka ale ba tiiritaŋa ale ba ale a ko ŋan baai ju a te wa la, ale kaab kaai ate ba a nye ayen ka duisi ba wabaataŋa a basi la.>> Nyaŋa de meena ba be va ka Sinsaŋŋa ale a weeni diila a nye. 9Wa yaa ŋman weeni ayen, <<Be nya mi ale nna, Naawen ayen m tom fi ale a yaali diila.>> Dila nyiŋla, Wen yuk kaab kpagsaŋa a basi kama alege pai Yeezu Kirisita kaabka zaani kaab sila naŋkula po. 10Yeezu Kirisita ale jam tom Wen ale a yaali diila, ale soa ate tama meena a yaa va wa ale pai wadek nyiŋka a nye kaabka bunyi dekki la nyiŋ a yaa welema.
11Kaabteerɔma meena a tom kaabka tuimaŋa ka daa meena. Ba be a nye kaab kala dekdega a paari ka diichoa. Alege kaabka de kan duisi wabaata a basi. 12Yeezu Kirisita be nye kaabka ka bunyi dekki wabaata nyiŋ. Kaabka de abe kasim ta pagrim a boro ka dila taam wuu. Wa ale ga nye dila nueri la, wa yaa kali Wen juga geŋ, zula jigini. 13Dula jigini, wa yaa limisi ka da dii dai ate wa dachaasaŋa le chim wa yɔm la. 14Wa ale nye kaabka bunyi dekki dila la, a basi kama ate nuru baai ate Wen soa la, a kan maa ta kaasuŋ taam wuu. 15Wen Chiika dek abe siak kama ayen nya kude a sum ka wensie ale Wen ale weeni dii ayen, 16<<Nɔiyeŋ kaai ate mi le nye ale ba da ŋaai le cheena la, ale mi le pai m sinsaŋŋa a nyo ka ba suiniima po, abe m ŋmarisi ŋa ba zuima po.>> 17Wa ŋman weeni gum du ayen, <<M abe kan ŋman teeri ba wabaataŋa ale ba wakaasimaŋa diipo diipo.>> 18Dila nyiŋla, ba wabaataŋa a dan nya vɔŋteka, ku an poom ŋman magsi ayen ba nye kaabka a duisi ba wabaataŋa a basi.
19Dila nyiŋla, m suata Yeezu ziimu ale lo tɛŋ ate wa kpi la nyiŋ abe ale soa ate ti baga a jo <<Weleŋsa Yegayekka Jigini>> ale ge kan chali yɔgsum. 20Garuk panni ate ba jam pai lik dɔkku nɔnni la a yaa lak kama ate ti va ka suik kuui ale vua la a jo dula. Yeezu abe pai ka wadek nyiŋka tagri jigi dila a te tama. 21Ti be ta ka kaabteerɔ kpioŋ ate wa a nya Wen yenni zuk. 22Ni be basi ate ti forisi paari Wen ale suiniim yɔrisima ale siak kaai ate ti seba chak ayen ti ale ta siaka ale jaab waai la sum ka wensie. Ti forisi paari wa ale suiniima ŋaai ate Kirisita sugri ate popola kan ŋman a daani ti la. Ti forisi paari wa ale nyiŋ sii ate ba pai nya buui ale kan ta daŋta a so si la. 23Ni basi ate ti ŋmasi yik nalimnyiini ti yiila ŋaai ate ti ta la, dii nyiŋla, ti baga a ta siaka kama ayen Wen ale puulim ayen wa nye diila wa le nye kama. 24Ni basi ate ti ta chaab wie, a maari chaab ate ku basi ate ti ta yaalika ale nuruba a tom tuimaŋsa. 25Ni kan basi ate ti basi chaab tuka ase nuruba gela ale kasim a nye diila. Alege ni basi ate ti a deŋsi chaab kpa nalimnyiini a gum du, ase ni ale nya ale da dii danni ate ti Naawenni le jam la a moata kama la.
26Dii nyiŋla, kaab ka choa a ŋman karo ayen ka duisi ti wabaataŋa a basi ase ti nin potim seba alege kasim a tom wabaata a cheŋ alege seba ayen ti wom wensieŋa kama. 27Alege baai ale kan siak Wen nɔi la, bala be a limisi ale yɔgsum, buusa ŋaai ale ŋa jam la, ale bolim ŋiak kaai le bu dɛ ba la. 28Nuru waai abe ale a zɛri Moosis Sinsaŋŋa ale a weeni diila, ba dan bo wa buusa ale seerɔba baye a yaase seerɔ boari ate wa lo, ba deri a ko wa kama. Ba bola kan ta jiirim ale magadek mɛ la ale wa. 29Dila nyiŋla, waai abe ale potim a zɛri Wen nɔi la, ku a sak ase wa an pai ka Wen Nidoabinni chim ka nuru la, wa pai Nidoabinni nɔiyeŋka ziimu buui ale duisi nuru wala wabaataŋa a basi la chim ka wakayiok, wa a le ka Wen Chiika waai ale va ŋmanteka nyiŋ a nye wamaŋsa a te nuruba la. Nama be poli nya nuru wala choa waalika le ka soa dii a magsi wa nya la. 30Tama dek be seba ayen Naawen ale weeni nna. Ti be seba wa ale ka diila kama, wa weeni ayen, <<Ku ka mi wari ate m nye wari tuni baai ale a tom biem tuima la. M be le nye kama.>> (Teerika 32:35) Ti be seba waai mɛ abe ale weeni ayen, <<Ti Naawen le bo wa nuruma buusa.>> (Teerika 32:36) 31Ku le pagra ka nna yegayega ase Wen dii ale vua la a nin weeni ayen wa le te fu waalika.
32Ni teeri ku ale jam ka dii ni jigi la. Va ŋala po ate ni tagri va Wen la, ni nam ka wie nna yegayega po alege, ni an jam te ninammu suik ate bu baga ni. 33Da dii dai nuru nyiem ale yik ni a ta nyini peelim a le ni, a nye ate ni a nam. Da dii dai mɛ ni nyiem gomsi ka nidek ayen ni pai nidek a gum baai ate nuruba a nye ba dila la po. 34Ni maa jam ta jiirim ale nuru baai ate ba yik lik la kama. Nuruba be ale tuesi ni jaabuuri meena la, ni diem ta suipeentik kama a duŋ ni sue. Dii nyiŋla, ni jam seba kama ayen ni ta ŋanta kama ate ba gaam bala nalimnyiini. Ba be kasim boro ka dila taam wuu. 35Dila nyiŋla, ni kan pai ni sebchakka a yuk basi, ku ta ka tutuna kpiema a cheena. 36Ku a fɛ kama ayen ni ta chichiiba ate ni baga tom Wen ale a yaali diila ate ni nya wa ale puulim ayen wa le nye dii a te ni la. 37<<Dila nyiŋ, ku kan beni gaam taam, ale ge ate waai le wa jam la a jamu, wa kan beni. 38Mi wayɔrisima nyɔnɔwa le ta siaka kama ate wa vuuk. Alege, ba wanyi a dan nyini mi ŋaaŋ a ŋmani, m sui kan peenti ale wa.>> (Yabakkuk 2:3-4) 39Alege tama daa baai ale a ŋmani wa ŋaaŋ a yaa cheŋ a bɛ suiku po la. Ti ka baai ale ta siaka ale wa a yaa nya varibasika la.
Chwazi Kounye ya:
Yiburu 10: BWU
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 2023, Ghana Institute of Linguistics, Literacy and Bible Translation