2 Samoɛl 2
2
Ba cheɡ Devid kora Juda harɛ ta
1A habɔɔ la, Devid bɔɔ Korowii ŋɔ, “N Naa Korowii, mɛɛ won la ka so Juda bwɛɛre nɔ bɛl ta naa?”
Anee Korowii chaŋo ŋɔ “Ɔɔh.”
Asɛ Devid berɛ bɔɔ ŋɔ, “Bwɛ besoo ta nɔ?”
Anee Korowii ŋɔ, “Ka so Hɛbrɔn.”#Jos 15:13
2Anomanta, Devid ne o haahna banɛ, Ahinoam waa le Jesreel, ne Abiɡel waa ɛ Nabal luhaah dɛ le Kaamɛl la iro, dɛ kaa Hɛbrɔn. 3O berɔ kpɔ laa tena baa ja o nɛɛ la ne bɛlbwa haah ne o bii, asɛ ba ka so Hɛbrɔn ne bwɛɛre aa baro la ta. 4Belaa Juda baala ba Hɛbrɔn bela, dɛ ba fuɡe noo do Devid nyu ta, dɛ cheɡo Juda harɛ ta kooro.#2Sa 5:1-5
Devid aa baa no kɛ Jabes Gelead baalaa huɡe Kooro Sɔɔl la,#1Sa 31:11-13 5o tomɛ toroma Jabes Gelead baala la be ŋɔ, “Korowii swee heyaa andɛɛɡa kɛ haa nyin he dɔɔ Kooro Sɔɔl dɛ huɡo nɔ. 6Kórowii sune he nɛ, dɛ́ cha heya. N ɡee sune he nɛɛ, dɛ́ cha heya waa haa ɛa nɔ wa. 7He bɛ ɔmɛ, hé che kiŋkiŋ, Kooro Sɔɔl waa ɛ he dɔɔ la sewɔ, asɛ Juda dea tena fuɡe noo do n nyu ta, dɛ cheɡ mɛ kora ta.”
Ba cheɡ Esbɔsɛt kora Israel harɛ ta
8Nɛr bibaa Abna waa ɛ Kooro Sɔɔl laa nomoa la lawɛ Kooro Sɔɔl bibaa baa dɛ yerɔ Esbɔsɛt ɡale Jɔɔdan Moo la, dɛ ba o ne Mahanaim.#1Sa 14:49-50 9Abna cheɡo kora ta wɛɛ nyiŋi Gelead ne Asuri ne Jesreel ne Efrem ne Bɛnjamen dɛ Israel harɛre bwa ta.
10Kooro Sɔɔl bibaa Esbɔsɛt aa baa di kora la, dɛ o di bene fifraanaarɛ. Bene anɛ ɡboo o di kora.
Kɛ dɛ Juda dea tena te teŋɛ Kooro Devid nɛ. 11Kooro Devid di kora Hɛbrɔn Juda dea harɛ ta bene anuanɛ korobie anumɛl.
12Awola bɛl, Nɛr bibaa Abna ne Esbɔsɛt nomonome iro le Mahanaim dɛ ba bwɛjen Gebeɔn ta. 13Asɛ Joab baa dɛ yerɛ o nya Seruya, ne Kooro Devid nomonome ir le ka chem ba tam bɛl waa chɔ Gebeɔn nyoa. Kooro Devid ne o nɛra soɡe tam la baŋ bɛl, asɛ banɔ la ɡe so o baŋ bɛl.
14Belaa Abna ŋɔ Joab be ŋɔ, “Gel ya yerɛ bonɔɔna le baŋ bɛlbwa ta ba, bá yo ya siwi ta.”
Ate, Joab chaŋe ŋɔ, “A wer.”
15Ate, baala fi dɛ banɛ le Esbɔsɛt ne Bɛnjamen dea, ba ne baala fi dɛ banɛ ba ɡe aa le Devid be pera yo. 16Bɛlbwa hamɛ o dɔŋ nyu kpoŋe, ba kpɔ keri tɔɡɛ dɔŋa baŋ bɛla, asɛ ba nɛra fifraanɛ dɛ banaarɛ la bwa chole dɛ serewe. Anomanta, ba dɛ yerɛ bela Hɛlkat Hasurim o do Gebeɔn harɛ ta.
17Belaa laa chole sibeɡra ne awola, asɛ Kooro Devid baala la pɔ Abna ne Israel tena la nɛ.
18Dɛ Seruya bibaala batoro lɔ bela. Banee Joab ne Abisae dɛ Asahɛl.#1We 2:16 Dɛ Asahɛl won chwae kɛŋɔ kweɡla ken. 19O chwao ti Abna, o ta kee nyiŋi diɡ kɛɛ ɡal. 20Abna baa ke nyiŋi dɛ nao, dɛ ŋɔ, “Henee nɔ naa, Asahɛl?”
Asɛ o chaŋe ŋɔ, “Ɔɔh, menee.”
21Belaa Abna berɛ ŋɔ, “Bɛ chwa teŋɛ n nɛ, chwa teŋɛ laa tena la bɛl nɛ dɛ́ ka lɛ o dɔmkwa.” Kɛ Asahɛl ta noɛ, dɛ ta chwa teŋɛ o nɛɛ ɡɛ.
22Abna berɔ ŋɔ o be ŋɔ, “Bɛ chwa teŋɛ n nɛɛ ɡɛ. Bɛ ɡɛ ɛ, ásɛ n ba kpoe. A ba ɡɛ naa, ɛrɛɛ mɛɛ ba wona nyiŋi he dɔɔ Joab siwi ta nɔ?”#2Sa 3:27
23Kɛ Asahɛl vɛoh dɛ ta teŋɛ o nɛ, asɛ Abna ta o lampea la habɔɔ, asɛ o mun daa la ka yaɡɛ o tea dɛ vah le o nyaŋ ta. Buɡ la ta, o chole chɔ dɛ sewɛ. Nomɛlbwa valɔ ba tel bela aa, o yon che dɛ́ nyiŋi.
24Kɛ Joab ne Abisae ti Abna, wee aa ba dɛ jo la, ba baa tel deŋɡare bɛl baa dɛ yerɔ Ama ta. O bɛne bwɛɛ bɛl baa dɛ yerɔ Gia ŋwɛnɛ, dɛ kaa Gebeɔn harɛpɛɛ waa chɔa kaa ta. 25Ate, Bɛnjamen dea baala ba bar Abna cheme. Ba boa ba nyoa, asɛ dɛ ka che deŋɡare bɛl doa.
26Anee Abna ŋɔ Joab be ŋɔ, “A chɛ kɛ yá yo dɛɛ la ɡɛ naa? Haa jemɛ kɛŋɔ bambichɔɡa nee aa ba bala ba tɛ yaa aa? Harɛ beŋkpoŋ nɛraa yan, saŋ besoo hɛɛ ba ɡela he nɛra ɡel chwae dɛɛ ti yaa ɔ?”
27Anee Joab chaŋe ŋɔ, “N ŋwɛɛ Korowii waa lole saŋ bɛlbwa kɛŋɔ, dɛ ken laa he bol aa, n nɛra la fe ɛɛ ti heyaa ka tel kere chɔɔ.”
28Belaa Joab hoh bɛla a baɡle kɛ o laa tena la ɡel Israel tena la tii, ba ta yoi kpa.
29Awola jwaana la bwa Abna ne o laa tena la valɔ kpɔ Jɔɔdan Fɛlembɔjen bini, mɔɔ dɛ ɛɡɛ le o baŋ. Tɔ aa pera chɔɔ la, ba valɔ dɛ ba le Mahanaim.
30Joab aa ɡel Abna tii la, o boa o laa tena la bwa nyoa, dɛ na kɛŋɔ ba bini fi dɛ banuanaarɛ sewɔ dɛ ja Asahɛl nɛ. 31Dɛ Kooro Devid laa tena la kpoo Abna laa tena lafraatoro fifraanumɛl baa le Bɛnjamen dea. 32Joab ne o laa tena kpɔ Asahɛl, dɛ ka huɡo ba lolanar bwebɔɔ waa lɔ Bɛtlɛham bini. Asɛ ba valɛ awola jwaana la bwa, dɛ ba tel Hɛbrɔn bɔr chaahna saŋ.
Chwazi Kounye ya:
2 Samoɛl 2: mzw
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.