Matyu 26

A̱cha̱chet A̱yahudawa La̱p A̱nu ba̱ Hyat Yesu

(Ma̱r 14:1-2; Luk 22:1-2; Yon 11:45-53)

1Nang Yesu ntyak shei a̱mgba̱m á̱lyiat nani a̱ni, a̱ si̱ nyia̱ ma̱ng mman ta̱m nggu na, 2“Ma̱nang nyi ndyen a̱ni, á̱ bwat mam feang nia á̱ song A̱yet Ghwut Mman Isi̱rela mi̱ Khwo wu. A̱wot á̱ na bwuk ma̱ng Nggwon A̱tyubishyi, da̱nian á̱ ka kpang nka da̱ a̱team a̱khwu.”

3Di̱n jen a̱ja a̱cha̱chet a̱yaapris ma̱ng á̱niet khwop á̱niet si̱ tung mi̱ gaat a̱gba̱ndang pris, a̱tyu nang á̱ ku ngyei Ka̱yafat a̱ni. 4Ba̱ si̱ la̱p a̱nu da̱nian ba̱ ka tya̱ra̱m Yesu, ba̱ ta̱bat gu da̱ bang á̱ hyat. 5Huhwa ba̱ si̱ la̱p nyia̱, “Ku myim zi̱ ta̱bat gu mi̱ jen song A̱yet Ghwut Mman Isi̱rela mi̱ Khwo ja bah, kalak á̱kpa á̱niet ka ba̱ doot jhya̱.”

Á̱ Koot Yesu A̱sham A̱myia̱ ma̱ A̱keang Ba̱ta̱ni

(Ma̱r 14:3-9; Yon 12:1-8)

6Nang Yesu ku nshya̱ Ba̱ta̱ni a̱mali Siman a̱tyu a̱ ku byia̱ gbap di̱n jen jhyang ji̱ swak a̱ni. 7Nang Yesu nshya̱ di̱ ya kyayak a̱ni, a̱byii̱k a̱ghyang si̱ kin neet a̱ bai ma̱ng a̱sham sha̱p a̱myia̱ nang á̱ nyia̱ ma̱ng a̱la̱basta a̱ni. A̱myia̱ na na̱ shya̱ mami nji a̱ni, byia̱ swam nyinyang. Na̱ si̱ yet a̱si̱ kurum ba̱t, a̱ si̱ koot Yesu ndyo a̱pyia̱.

8A̱wot nang mman ta̱m Yesu na ndi a̱nia a̱ni, ba̱ si̱ fa̱k a̱lyia̱ ya. Ba̱ si̱ ngai ma̱ng a̱byii̱k wu nyia̱, “Yihwa mbyia̱ nang á̱ mbyian a̱sham a̱myia̱ kurum kani a̱nia? 9Ku myim si̱ á̱ lyap a̱myia̱ nani mi̱ kurum ba̱t, a̱wot á̱ ka̱u á̱kunak kurum hu!”

10Nang Yesu ndyen a̱di̱dam mba wu a̱ni, a̱ si̱ nyia̱ ma̱ng a̱mba, “Yihwa mbyia̱ nyi nngai ma̱ng a̱byii̱k wuni a̱nia? A̱ nyia̱ nung a̱tan ta̱m wa za̱m! 11Kuzang jen, nyi ni̱ shya̱ ndung ma̱ng á̱kunak na, nyi beang baa. A̱wot nung, n na nshya̱ ma̱ng a̱nyin kuzang jen bah. 12Nang a̱byii̱k wuni nkoot a̱myia̱ nani mi̱ vam nung hu a̱ni, a̱ nyia̱ a̱nia a̱ nfwuong jen nang á̱ na nniat nung wa a̱ni. 13N tak nyin a̱tsak a̱lyiat, kuzang a̱vwuo mi̱ swanta hu nang á̱ na nshei A̱sham Nkhang kani a̱ni, kyang hu a̱byii̱k wuni nyia̱ a̱ni, á̱ na jhyung ngguu á̱ bu mbwoi nkhang a̱tan ta̱m nang gu nyia̱ nung ndyo a̱ni.”

Yahuda Isi̱ka̱riyoti Shim a̱ Lyap Yesu

(Ma̱r 14:10-11; Luk 22:3-6)

14A̱jawa Yahuda Iska̱riyoti, a̱tyo nyiung mami mman ta̱m swak ma̱ a̱feang na si̱ ghwut a̱ nat da̱ a̱vwuo a̱cha̱chet a̱yaapris ba. 15A̱ si̱ lyip ba nyia̱, “A̱mang wa nyi na tan nung, ka̱ n tyia̱ nyin Yesu mbwak?” Ba̱ si̱ fang tswá kurum zi̱nariya swak ntat, ba̱ si̱ tan gu. 16Neet di̱n jen a̱ja si̱ nat á̱zanson, Yahuda si̱ nwuo chat vak nang gu na mbwuk ma̱ng Yesu a̱ni.

Yesu ya Kyayak Ngaan ma̱ng Mman Ta̱m Nggu na

(Ma̱r 14:12-21; Luk 22:7-13,21-23; Yon 13:21-30)

17A̱tuk mam nyiung A̱yet Ya Burodi Sang Yit, huhwa mman ta̱m Yesu na si̱ bai da̱ a̱vwuo gu, ba̱ si̱ lyip gu nyia̱, “A̱tyoli, a̱ji wa a chat zi̱ njhyi ang kyayak di̱n jen A̱yet ji?”

18Yesu si̱ nwuak ba shim nyia̱, “Nyi nat a̱zanson ma̱ a̱keang Urusha̱lima da̱ a̱vwuo a̱tyok a̱ghyang. Nyi tak gu nyia̱, ‘A̱tyu tyiet wu nyia̱, “Jen nung ji bai kpa̱mkpaan. N chobai n gya kyayak A̱yet hu dundung ma̱ng mman ta̱m nung na a̱mali ang ka.” ’ ” 19Mman ta̱m na si̱ nyia̱ ma̱nang Yesu ntak ba ba̱ nyia̱ a̱ni. Ba̱ si̱ jhyi kyayak A̱yet hu a̱ja.

20Nang jenshyung nnyia̱ a̱ni, Yesu si̱ swan a̱ ya kyayak A̱yet hu dundung ma̱ng mman ta̱m swak ma̱ a̱feang nggu na. 21Nang ba̱ shya̱ di̱ ya kyayak A̱yet hu a̱ni, Yesu si̱ nyia̱ ma̱ng a̱mba, “N tak nyin a̱tsak a̱lyiat, a̱tyo nyiung ma̱ nyin na bwuk ma̱ng a̱nung.”

22Mman ta̱m na si̱ nwuo a̱fi̱fa. Ba̱ si̱ ta̱bat lyi̱ri̱m gu a̱nyanyin nyia̱, “A̱tyoli, a̱tsak a̱lyiat nung gwa kee?”

23Yesu si̱ nwuak ba shim nyia̱, “A̱tyu a̱ zwup burodi wu cha̱chaat ma̱ng a̱nung mi̱ kham jhyung ji a̱ni, nggu wa na bwuk ma̱ng a̱nung. 24Ku yet ta hwa, Nggwon A̱tyubishyi ka̱ nkat ma̱nang á̱ ndyuut tazwa nka a̱ni. A̱mgba̱m ma̱ng a̱nia, ku swan a̱tyu a̱wa a̱ yet jat ji nang á̱ na mbwuk ma̱ng Nggwon A̱tyubishyi ka a̱ni za̱m! Ka̱ á̱ wa byin a̱tyu a̱wa bah, si̱ ku lan!”

25A̱wot Yahuda Isi̱ka̱riyoti, a̱tyu a̱ na bwuk ma̱ng Yesu a̱ni, si̱ nyia̱, “A̱tyu tyiet, a̱tsak a̱lyiat nung gwa kee?”

Yesu si̱ nyia̱ ma̱ng a̱nggu, “A hyia̱ na.”

Yesu Kpaat A̱tsan Ya Kyayak A̱di̱dam A̱khwu Nggu

(Ma̱r 14:22-26; Luk 22:15-20; 1A̱ko 11:23-25)

26Nang ba̱ nshya̱ di̱ ya kyayak hu a̱ni, Yesu si̱ kyiak burodi sang yit wu, a̱ si̱ gwai A̱gwaza. A̱ si̱ kpa̱ra̱m burodi wu di̱ gbi̱ngba̱ra̱m, a̱ si̱ nwuak mman ta̱m nggu na, nyia̱, “Nyi ngga, nyi ya, mat kidee vam nung ji jaji.”

27Ma a̱nia wa, a̱ si̱ kyiak a̱sa̱khwot sum a̱na̱p na ma̱ a̱kashyi wu, a̱ si̱ gwai A̱gwaza a̱ si̱ nwuak ba nyia̱, “Kuzang a̱yin ma̱ nyin gu swuo ma̱ a̱kashyi a̱ni. 28Di, a̱sa̱khwot sum a̱na̱p na yet kidee a̱sok nung nia. Na̱ yet a̱si̱ nang nda̱p a̱li̱ka̱uli, nang á̱ neap na̱ yet za̱nang chi a̱ka̱tuk nyia̱ á̱niet ma̱ a̱di̱di̱t a̱ni. 29N tak ma̱ng a̱nyin a̱tsak a̱lyiat, n bu si̱ mi̱n swuo a̱sa̱khwot sum a̱na̱p nani bah, si̱ a̱tuk nang n bye nswuo na a̱fai dundung ma̱ng a̱nyin mi̱ Tyok A̱tyia̱ nung hu a̱ni.”

30Nang ba̱ mbwom a̱bwom dyep A̱gwaza ka á̱ tyak a̱ni, Yesu ma̱ng mman ta̱m nggu na si̱ ghwut, ba̱ si̱ nyeak á̱ nat di̱n Tsok Za̱itun#26:30 Za̱b 113‒118..

Yesu Tak Á̱zanson nang Bitut na Fwuo Lyen gu

(Ma̱r 14:27-31; Luk 22:31-34; Yon 13:36-38)

31Nang ba̱ shya̱ di̱n vak á̱ naat di̱n Tsok Za̱itun ji a̱ni, Yesu si̱ nyia̱ ma̱ng a̱mba, “A̱tyetuk a̱fwun kani, a̱mgba̱m nyin, nyi na tyong nyi ghwon nung. Ma̱nang á̱ ndyuut mami A̱lyiat A̱gwaza na a̱ni nyia̱, ‘N na hyat a̱tyu chok zón seap wu. A̱wot a̱sorong zón seap ka na seang.’

32“A̱wot ka̱ á̱ ba ta̱ngam nung ma̱ng swuan ma̱ á̱niet ba̱ ka̱n kwi a̱ni, n na nkhwat a̱son nyin nat mi̱ fam a̱byin Ga̱lili, n si̱ myim ma̱ng a̱nyin a̱ja.”

33Bitut si̱ nyia̱ ma̱ng Yesu, “Ku a̱mgba̱m á̱niet ba lak khwi ang hu, nung, n na mak kai ang ghwon bah!”

34A̱jawa Yesu si̱ nyia̱ ma̱ng a̱nggu, “Bitut, a̱tsak a̱lyiat n tak ma̱ng a̱nwan, a̱tyetuk a̱fwun a na fwuo lyen nung a̱ka̱tat, a̱gbak a̱ sii du tyiap.”

35Bitut si̱ nyia̱ ma̱ng a̱nggu, “Kaai A̱tyoli! Ku n na khwu wa da̱nian ang, n si̱ mi̱n mak fwuo lyen ang bah!” Ma a̱nia wa a̱mgba̱m á̱kum mman ta̱m ka si̱ nhyia̱.

Yesu Naai A̱gwaza mi̱ Gesa̱mani

(Ma̱r 14:32-42; Luk 22:39-46)

36A̱wot Yesu si̱ ya a̱son ma̱ng a̱chyet dundung ma̱ng mman ta̱m nggu na. Ba̱ si̱ nyeak á̱ nat di̱n tsok mi̱ sop a̱ka̱kwon za̱itun nang á̱ ngyei Gesa̱mani a̱ni. A̱wot a̱ si̱ nyia̱ ma̱ng a̱mba, “Nyi swan a̱ji, n nat a̱jaau, n ka naai A̱gwaza.” 37A̱ si̱ shyei a̱ nat a̱zanson ndung ma̱ng Bitut, ma̱ng mman Za̱ba̱di na a̱feang, bibya yet Yakubu ma̱ng Yoona. A̱wot a̱ si̱ fa̱k byian fwuo, a̱ si̱ nwuo a̱fi̱fa. 38A̱jawa Yesu si̱ nyia̱ ma̱ng a̱mba, “N shya̱ mi̱ fwuo byian ba̱t, á ngyei n na nkhwu. Nyi swan a̱ji cham, nyi yok kai nda bah.”

39A̱ si̱ doot mba a̱ ghwon. A̱ si̱ laai neap ti̱taa, a̱ si̱ kpaat a̱khwukhwut a̱ta̱gurup a̱ghyi ba a̱byin, a̱ si̱ naai A̱gwaza nyia̱, “A̱tyia̱ nung wu! Ka̱ ku myim ang, ti̱n nung a̱kashyi swuo a̱bung wuni! A̱mgba̱m ma̱ng a̱nia, yok nyia̱ kyang hu nang n chat wa a̱ni bah. Nyia̱ kyang hu ku myim ang wa a̱ni!”

40A̱jawa Yesu si̱ bwuok a̱ ba̱ shya̱ nang mman ta̱m nggu na khat nda. A̱ si̱ lyip Bitut, nyia̱, “Nyi khat nda nia kee? Nyi si̱ mi̱n swan cham ndung ma̱ng a̱nung, da̱ a̱bada̱dei njen ma̱ chunchwiit baa? 41Nyi swan cham. Nyi bu naai A̱gwaza, kalak nyi ba̱ kwa di̱n jen mak ji. Mat, fwuo hu chat nyia̱ kyang ku myim a̱ni. A̱wot vam hu swan ma̱ bobwot a̱bwot di̱ nyia̱ hu!”

42Yesu si̱ bu ghwon mbaa, a̱ si̱ bwuok a̱ nat naai A̱gwaza da̱ a̱ka̱feang ka, a̱ si̱ nyia̱, “A̱tyia̱ nung, ki̱ a si̱ mi̱n kyiak a̱kashyi swuo a̱bung wuni a ghwon nung bah, si̱ nang n swuo nggu. Yok, a nyia̱ kyang hu nang a chat wa a̱ni.” 43A̱ si̱ bu bwuok a̱ bai da̱ a̱vwuo mman ta̱m ka. A̱ si̱ shya̱ nang ba̱ ni̱ khat nda na, mat nda na ku ba̱ng mba ba̱t. 44A̱ si̱ bu ghwon mbaa, a̱ si̱ nat a̱ bu naai A̱gwaza da̱ a̱ka̱tat ka. Swáng á̱lyiat naai ji, si̱ yet mi̱ kyang nyiung hwa.

45A̱ si̱ bu bwuok, a̱ ba̱ shya̱ mman ta̱m na, a̱ si̱ nyia̱ ma̱ng a̱mba, “Nyi ni̱ ya a̱son mi̱ nda na fwung waa? Kaai, nyi doot, jen ji nyia̱! A̱wot nyi li la! Ma̱ninika, á̱ nwuak Nggwon A̱tyubishyi mbwak á̱ka̱tuk á̱niet. 46Nyi doot, zi̱ chong! Di, a̱tyu lyap nung wu wa wu!”

Á̱ Ta̱bat Yesu

(Ma̱r 14:43-50; Luk 22:47-53; Yon 18:3-12)

47Nang Yesu nshya̱ da̱ a̱lyiat na a̱ni, ba̱ si̱ kan di Yahuda Iska̱riyoti, a̱tyo nyiung mi̱ mman ta̱m swak ma̱ a̱feang na, nang gu kwak a̱son a̱ chobai ndung ma̱ng á̱kpa á̱niet ma̱ a̱di̱di̱t, ba̱ ba̱ng tswát ma̱ng shán. Bibya nang a̱cha̱chet a̱yaapris ma̱ng a̱yaagwak tyiet doka ma̱ng á̱niet khwop á̱niet ba, ku ta̱m ba̱ ka ta̱bat Yesu. 48A̱wot Yahuda Iska̱riyoti, a̱tyu a̱ yet a̱bang a̱byin wu a̱ni, ku mi̱ nda̱p ma̱ng a̱mba nyia̱, “A̱tyu n na vwuk n byiat a̱ni, nggu wa nyi na ta̱bat.” 49Nang Yahuda neet a̱ bai da̱ a̱vwuo Yesu a̱ni, a̱ si̱ kin nyia̱, “A̱tyu tyiet, n byiat ang!” A̱ si̱ vwuk guu.

50Yesu si̱ nyia̱ ma̱ng Yahuda, “A̱kpa̱ndang nung, nyia̱ kyang ku bai ma̱ a̱nwan a̱ni.” Á̱niet ba si̱ kin bai, ba̱ si̱ ta̱bat Yesu. 51A̱jawa a̱tyo nyiung mami mman ta̱m nggu na si̱ kin khwat tswat nggu ji, a̱ si̱ ntyap fufwuo a̱khwo a̱gba̱ndang pris hu a̱ ti̱n.

52Yesu si̱ nyia̱ ma̱ng a̱nggu, “Bwuok ma̱ng tswat ang ji, tyia̱ mi̱ kwa nji hu! Mat konyan wa khwat tswat a̱ si̱ nyia̱ ta̱m ma̱ng a̱nji a̱ni, jija na yet jat a̱khwu nggu. 53Ku myim nyi lyen nang n mbyia̱ a̱wat n dyip A̱tyia̱ nung wu, a̱wot gu kin nta̱m ma̱ng a̱nung á̱niet nzwang a̱yaata̱m tswá ba̱ yet chyikwop ma̱ a̱di̱di̱t a̱di̱t#26:53 Lyuut cha̱chaat: “Lijon swak ma̱ a̱feang.” Wa̱i a̱lyiat: Lijon. Ji̱ yet susot á̱niet nzwang swak ma̱ a̱feang A̱romawa. Kuzang lijon ku byia̱ á̱niet nzwang chyikwop swak ma̱ a̱feang nia. a̱ni, ba̱ ka chok zi̱t za̱m. 54A̱wot ka̱ n nyia̱ a̱nia ma̱ninika, á̱ na nyia̱ ni wa, A̱lyiat A̱gwaza na na̱ mbai cha̱chaat, na̱ nyia̱ ku yet ta hwa ku li a̱nia a̱ni?”

55A̱jawa Yesu si̱ nyia̱ ma̱ng á̱kpa á̱niet ka, “Nyi ghwut ma̱ng tswát ma̱ng shán, nyi si̱ bai ta̱bat nung, a ngyei n gyet a̱tyu a̱ kwak a̱son á̱niet a̱tsaai a̱ni a? Kuzang mam n ni̱ shya̱ dundung ma̱ng a̱nyin tyiet A̱mali Nwuat Za̱nang A̱gwaza ka, da̱ nyin nyi ta̱bat nung bah.#26:55 Luk 19:47; 21:37. 56A̱wot ku yet ta hwa A̱lyiat A̱gwaza na nang á̱ lyuut tazwa nung a̱ni na̱ bai da̱ a̱nu ka ma̱ cha̱chaat.” A̱jawa mman ta̱m Yesu na si̱ kin kai nggu á̱ ghwon, ba̱ si̱ tyong.

Yesu Yong A̱zaghyi A̱gba̱ndang A̱tung Sot A̱cha̱chet A̱yahudawa

(Ma̱r 14:53-65; Luk 22:54-55,63-71; Yon 18:13-14,19-24)

57Á̱niet ba̱ ku ta̱bat Yesu a̱ni, ba̱ ku nat ma̱ng a̱nggu mi̱ gaat a̱li Ka̱yafat, a̱gba̱ndang pris wu, nang á̱niet tyiet doka ma̱ng á̱niet khwop á̱niet ba ntung a̱ni. 58A̱wot nang Bitut ni̱ khwi Yesu ti̱taa, a̱ si̱ ntat didyaat gaat a̱gba̱ndang pris hu. A̱ si̱ nwuo a̱ swan ma̱ng á̱niet chok a̱vwuo ba, da̱nian a̱ ka li si̱sak ji á̱ na ntyak ma̱ng Yesu a̱ni.

59A̱cha̱chet a̱yaapris ba, dundung ma̱ng a̱mgba̱m sot a̱cha̱chet A̱yahudawa ji, ba̱ si̱ nwuo chat sheda á̱niet ba̱ na bat Yesu a̱ka̱laa a̱ni, da̱nian ba̱ ka shya̱ ta̱fwat nang ba̱ na nhyat gu a̱ni.

60A̱wot sot a̱cha̱chet A̱yahudawa ji si̱ chat á̱niet sheda bwoi a̱ka̱laa, ba̱ na tyia̱ Yesu a̱bun a̱ni. Á̱niet ma̱ a̱di̱di̱t si̱ ghwut ba̱ nwuak sheda. A̱wot sot a̱cha̱chet A̱yahudawa ji, ba̱ si̱ shya̱ á̱niet ba̱ na nwuak tangka̱i sheda ku na tyia̱ Yesu a̱bun a̱ni bah. A̱mgba̱m ma̱ng a̱nia, á̱niet a̱feang si̱ ghwut á̱ yong a̱zanson. 61Ba̱ si̱ nwuak sheda nyia̱, “A̱tyu wuni nang á̱ ngyei Yesu a̱ni nyia̱, ‘Ka̱ n doot n bi̱ri̱m A̱li Nwuat Za̱nang A̱gwaza ka. A̱wot n bu nok ka mami mam tat.’#26:61 Ma̱r 14:58; Yon 2:19. ”

62A̱jawa a̱gba̱ndang pris wu si̱ doot a̱ yong, a̱ si̱ nyia̱ ma̱ng Yesu, “A na nwuak shim tazwa a̱lyiat nang á̱niet bani bat ang a̱ni baa? Yihwa a byia̱ na hyia̱, a nkwi a̱pyia̱ ang di̱ a̱lyiat nang á̱ bat ang a̱ni?”

63A̱wot Yesu si̱ ya a̱son mi̱ swan nyonywang. A̱gba̱ndang pris wu si̱ nyia̱ ma̱ng a̱nggu, “N chat a shyi da̱ a̱lyoot A̱gwaza, a̱ byia̱ swuan a̱ni, tak ma̱ng a̱nzi̱t a̱tsak a̱lyiat. Nwan wa yet Kristi wu, A̱gwam nang A̱gwaza kup gu tyok a̱ni a? Nwan wa bu yet Nggwon A̱gwaza kaa?”

64Yesu si̱ nwuak a̱gba̱ndang pris wu shim nyia̱, “A hyia̱ a̱tsak a̱lyiat. A̱wot n tak ang, kyiak ma̱nini si̱ nat á̱zanson, nyi na li Nggwon A̱tyubishyi ka̱ swan da̱ a̱gba̱ndang chuk tyok a̱zayak A̱gwaza, a̱wot nang gu bwuot ma̱ á̱ni̱nian neet mi̱ kyai tswazwa a̱ chobai!#26:64 Dan 7:13.”

65A̱jawa a̱gba̱ndang pris wu si̱ sam a̱yaatoot nggu ba mat a̱lyia̱ ya. A̱ si̱ nyia̱, “Nyi fa̱k lihyat! Yihwa mbyia̱ nang zi̱ bu nchat sheda ghyang? Ma̱ninika, a̱mgba̱m nyin meang, nyi fa̱k lihyat nang gu nyia̱ A̱gwaza ndyo a̱ni!” 66A̱wot a̱gba̱ndang pris wu si̱ lyip ba nyia̱, “Yihwa nang nyi li?”

Ba̱ si̱ nwuak shim nyia̱, “A̱ bwuo a̱bun, a̱ maai a̱khwu!” 67A̱jawa ba̱ si̱ tang Yesu a̱ta̱mpyia̱ ma̱ a̱ghyi, ba̱ si̱ tu ngguu. Á̱ghyang á̱niet si̱ tsot gu di̱n kpang. 68Ba̱ si̱ mang nggu a̱lyem nyia̱, “Nwan Kristi! Tyai nzi̱t a̱tyu a̱ lwi ang a̱ni!”

Bitut Fwuo Lyen Yesu

(Ma̱r 14:66-72; Luk 22:56-62; Yon 18:15-18,25-27)

69Ma̱ a̱cha̱chaat njen a̱wa, nang Bitut nswan mi̱ didyaat gaat a̱li a̱gba̱ndang pris hu a̱ni, nggwon neam a̱ghyang ka̱ yet a̱khwo a̱ni, si̱ kin neet a̱ bai, a̱ ba̱ nyia̱ ma̱ng a̱nggu, “A ku mun shya̱ dundung ma̱ng Yesu a̱tyu Ga̱lili wu!”

70A̱wot Bitut si̱ fwuo a̱zaghyi konyan nyia̱, “N fi̱k kyang hu nang a lyiat a̱ni bah!”

71Nang gu ntat a̱zanu didyaat ka a̱ni, nggwon neam a̱ghyang ka̱ yet a̱khwo a̱ni si̱ li ngguu, ka̱ si̱ bu nyia̱ ma̱ng á̱niet ba̱ shya̱ a̱ja a̱ni, “A̱tyu wuni ku mun a̱ shya̱ dundung ma̱ng Yesu a̱tyu Na̱za̱ra̱t wu!”

72Bitut si̱ bu fwuo ma̱ng shyishyi nyia̱, “N shyi, nang n dyen a̱tyu wuni bah!”

73Á̱ si̱ labeang bah, á̱niet ba̱ yong a̱ja a̱ni si̱ neet á̱ ba̱ nyia̱ ma̱ng Bitut, “A̱tsak a̱lyiat, a yet a̱tyo nyiung ma̱ a̱mba za̱m! A̱lyem nwap fam a̱byin Ga̱lili ang kikya tyai ang!”

74Bitut si̱ ya a̱son mi̱ shyishyi nchi̱ri̱ng nyia̱, “Shyishyi ji ya nung, ka̱ n bwoi a̱ka̱laa nia! N dyen a̱tyu wuni bah!”

Mi̱ di̱ yong a̱hwa a̱gbak si̱ kin tyiap kiki.

75A̱jawa Bitut si̱ kin jhyung a̱lyiat nang Yesu ku hyia̱ ma̱ng a̱nggu a̱ni, nyia̱, “A na fwuo lyen nung a̱ka̱tat, a̱gbak a̱ sii du tyiap.” Bitut si̱ ghwut nta didyaat gaat hu. A̱ si̱ ta̱bat a̱nak, a̱ si̱ twei ba̱t ma̱ng a̱lyia̱ byian.

Chwazi Kounye ya:

Matyu 26: TyapNT

Pati Souliye

Kopye

Konpare

Pataje

Ou vle gen souliye ou yo sere sou tout aparèy ou yo? Enskri oswa konekte

Aprann plis bagay sou A̠lyiat A̠gwaza na di̠n Tyap: A̠li̠ka̠uli A̠fai

Matyu 26

Vèsè popilè nan Bib la ki soti nan Matyu 26

Vèsè popilè nan Bib la ki soti nan
Matyu 26