Skip to content
Logo Aplikasyon Bib

1 Pedro 4

4
Chrokjuichꞌeheni ixra̱ Díos éxi tjinkaon chꞌan
1Méxra̱ éxi Cristo kjuasóte ti cuerpo kuènté chꞌan, la xi̱kaha kja̱xinra, kjónté chrókjuasótiara la chrókóxakuanhñara kixin ti nkexro tjasóte ti cuerpoé la ó kuíto̱he ti ijie̱. 2Méxra̱ ti na̱xa̱ tjejotsjehéra ntihi la chrókꞌuejora éxi tóxríhi̱n Díos, jehya éxi ti nkehe tóxríhanra. 3Itsjé nánó kuékꞌejora éxi ti sin na̱xa̱ chónhña Díos, la kꞌuékjenka̱yáxinra ti nkehe jínahña, kꞌuékjásinra ijie̱, kꞌuéchontara ókjé chojnichjin, kꞌuékjásinra kia la kꞌuékokoanra, la ko kꞌuékjájo̱nra la ko kꞌuékinkachónkira ti nkehe tsíkjano̱ña. 4A̱ndá ijie la ti sin kuékꞌitonra la chrakon sin kixin í chꞌehyara ti nkehe jínahña. Méxra̱ imá tꞌándaxíhanra sin. 5Kjánchó jehe sin tichánxi̱n tsochronka sin ti ijie̱ chónta sin ti ó tso̱chjina sin nkayakon ti nkexro sinchekito̱exín ijie̱ kuènté ti chojni tjejóchón la ko chojni tsíkꞌen. 6Méxra̱, kja̱xin ti sin ó ikꞌuén la kuíhin sin ti itan ni̱xin kixin chrókuitekaon sin chrókꞌuejó sin éxi tjinkaon Díos, la kjónté ti na̱xa̱ kꞌuejó sin chjasintajni la kuito̱exín ti iji̱é sin, kjuasóte sin la ko ikꞌuén sin éxi tóhen kaín chojni, kjánchó tsꞌejóko sin Díos.
7Ó kuichjina ti tsjeje̱ chjasintajni, méxra̱ nkojína chrókꞌuejora la ko chrókꞌuejotsjehera, chrónixjehéra Díos. 8#Pr. 10:12.*La ti nkehe a̱ntsí tjetoan la chaxín chrótjue̱héra kichuara, kixin tíha mé tsꞌitjáñaxín kaín ti ijie̱ chontehera kichuara. 9Chrokjuájonra kjuachaxin chrókuíto̱he ti sin tinkáchónki Díos ti ndo̱ara la ninkehó chrókjóntahyara sin. 10Nkojnkora chrókjuáko̱xinra ti kjuachaxin tjáhara Díos la chrókjuínki̱tsara kichuara éxi ti ixra̱ kꞌuayéhéra. 11Ti nkojinra tsonixjara itén Díos la chaxín chrónixjara éxi tjenixín ti Xroon itén Díos. A̱ndá ti nkojinra tsjínki̱tsara kichuara la chaxín chrókjuáko̱xinra ti kjuachaxin tjáhara Díos. Kaín ti ixra̱ chrókjui̱chꞌera, la chróchje̱héra Díos kjuasáya kixin tinkachónkira Jesucristo, ti nkexro tsꞌáyéhe̱ kaín kjuasàya la ko chónta ti kjuachaxin nkochríxín. Mé xi̱kaha tso̱hen.
TsjasĂłtexĂ­ni ti tinkĂĄchĂłnkini Cristo
12Kíchóni, chrókóxakuanhñara kjónté ijnko kjuaxikaon ijié chrókjuasótiaxínra kixin ticháxi̱n xi̱kaha tso̱hanra. 13Ícha jína chrókócháhara kjónté tsjasótiara kixin xi̱kaha kjuasótexín Cristo ti iji̱éni. Ndá xi̱kaha imá tso̱cháhara ti ó tsꞌikonra ti kjuachaxin ijié tsi̱ka̱o Ìnchéni ti ó tsokjan chꞌan. 14Chrókócháhara kjónté tꞌándaxíhanra chojni kixin tinkachónkira Cristo kixin ti kjuachaxin kuenté Ncha̱kuén Díos la tꞌayakohanra. Jehe sin la tꞌándaxíhi̱n sin Ìnchéni, a̱ndá jahara a̱ntsí chrókjuíkosáyehéra chꞌan. 15Ti nkojinra tjejotjasótiara la jehya chrókjuasótiaxínra kixin kjuàyara, kueéra o̱ ichrén nkehe jínahña kjui̱chꞌera o̱ kjia̱téra nkojín kjuanínkaon kuènté ókjé chojni. 16Ti nkojinra chrókjuasótiara kixin tinkachónkira Cristo la chrókósuàhyara. Ícha jína chróchje̱héra kjuasáya Díos kixin tinkachónkira ihni̱é chꞌan.
17Ndá ijie ó ikui ti tsito̱exín iji̱éni la tíha tsoxrankíxixín ti sin kꞌóna xje̱en Díos. A̱ndá ti tsoxrankíxixín tsito̱exín ti iji̱éni la ti sin titekakonhña Díos la, ¿xá nkexrín tsꞌatsínka sin? 18#Pr. 11:31.*A̱ndá ti sin jína tsito̱exín iji̱é sin kixin á jína ti xra̱ kjuíchꞌe sin ndá tsaá sin, la ti sin jínahña chónta ijie̱ la, ¿xá nkexrín tsꞌatsínka sin? 19A̱ndá ti nkexro tjasóte éxi tjinkaon Díos la chrókuíto̱ehya sin chrókjua̱ko̱xi̱n sin ti nkehe jína la chrókjuajon sin a̱sén sin chrókꞌuayakohen Díos kixin jehe chꞌan kjuíchꞌéna chꞌan ti jehe sin la nkochríxín jína chꞌan.

Š 2016, Wycliffe Bible Translators, Inc. All rights reserved.

Aprann plis bagay sou El Nuevo Testamento, Salmos y Proverbios
Chapit Avan yo
Chapit suivan