Ebikolwa by'Abatume 2
2
Okwidha kwa Mwoyo Mutukuvu
1Agho olunaku lwa Pentekote bwe lwatuuka, Abeegeresebwa boonaboona baali beesololeiza mu kifo kirala.#Lev 23:15-21; Ma 16:9-11 2Mu kiseera ekyo kyene, ghaabaagho okuwuuma okuva mu igulu nga kuli ng'oti kwa kiwunga ow'amaani, era kwaidhuza endhu yoonayoona mwe baali batyaime. 3Baabona enimi ng'edh'omuliro, nga dheetengeike ku buli mulala 4era boonaboona baidhula Mwoyo Mutukuvu baatoolera okwogera mu nnimi edhindi, nga Mwoyo bwe yabaghanga okwogera.
5Mperaano, mu Yerusalemu mwalimu Abayudaaya, n'abaava mu maghanga goonagoona agali ghansi gh'eigulu, nga basaadha baidhumbize ba idiini. 6Kale ni okuwuuma okwo bwe kwabaagho, eikuukuubira lyesoloza era batabulwa inho, kuba buli mulala yabawulira nga boogera mu lulimi lwe lwene. 7Baayasaamirira era beewuunhia nga bakoba bati: âBano boonaboona aboogera ti Bagalilaaya? 8Kisoboka kitya ife buli mulala, okubawulira mu lulimi lwe oluzaaliranwa? 9Abaparithi, Abamedi, Abelami ab'omu Mesopotamia, ni mu Buyudaaya, ni mu Kappadokia, ni mu Ponto, ni mu Asia. 10Ni mu Furugia, ni mu Panfilia, ni mu Misiri, ni mu biketezo bya Libya ebiriinaine Kurene, ng'otaireku n'Abaroma abageni 11Abayudaaya n'abamaghanga agandi abaakyuka, Abakurete n'Abawarabu, twenatwena twabawulira nga boogera eby'amaani Katonda by'akoze mu nnimi dhaife!â 12Baayasaamirira boonaboona era baasoberwa, beebuuzagania bati: âKino kitegeeza ki?â 13Aye abandi baakoba bati: âAbo batamiire mwenge musu!â
Okwogera kwa Petero ku Pentekote
14Agho Petero yaayemerera, ng'ali ghalala n'eikumi n'omulala, yaakangula ku mamiro yaabakoba ati: âImwe abasaadha Abayudaaya n'imwe mwenamwena ababa mu Yerusalemu, mumanhe kino era muntegere ku matu. 15Bano ti batamiivu nga bwe mudhuuba, kuba dhiri bwa saawa isatu edh'enkyo. 16Aye kino Yoeli omulanzi kye yalanga ati,
17âKatonda akoba ati ku nkomerero kino n'ekiribaagho:#Yoe 2:28-32
Ndiyugha ku bantu boonaboona Mwoyo wange.
Batabane baimwe ni baghala baimwe baliranga ekiribaagho,
n'abaisuka baimwe balibonekerwa,
n'abakaire mu imwe baliroota ebirooto.
18Mu nnaku edho, abagheereza bange abasaadha n'abakazi,
ndibayughaku Mwoyo wange,
baalanga eby'okubaagho.
19Ndiraga ebyewuninkiriza eyo ghaigulu mu igulu,
n'ebyewuunhio ghansi ku nsi.
Ghalibaagho omusaayi, omuliro, n'omwosi ogunioka.
20Endhuba erizikira,
Omwezi gwamyuka oti musaayi,
memale olunaku lwa Musengwa olukulu era olw'ekitiisa lwatuuka.
21Era buli alyeta eriina lya Musengwa alirokolwa.â
22âImwe abasaadha Abaisiraeli, muwulire ebibono bino: Yesu ow'e Nazarethi, n'omusaadha Katonda ye yakakalisa mu imwe n'eby'amaani, n'ebyewuninkiriza, n'obumanhiso, bye yamukozesanga mu imwe, era nga beene imwe bwe mwidhi. 23Ono yabagheebwa nga Katonda amaze okukiteesa n'okukimanha, era imwe mwakozesa ababi okumwita nga bamukomerera ku musalaba.#Mat 27:35; Mar 15:24; Luk 23:33; Yoa 19:18 24Aye oyo Katonda yamuzuukiza yaamutoola mu bulumi obw'okufa, nga tikisoboka oyo kusigala mu maani ga kufa#Mat 28:5-6; Mar 16:6; Luk 24:5 25kuba Daudi yamwogeraku ati,#Zab 16:8-11
âMusengwa namulingiriranga buli lunaku,
kuba andi ku mukono gwange omusaadha ndobe kulugaaluga.
26Agho ni omwoyo gwange gwasangaala,
n'olulimi lwange lwasagamba
n'omubiri gwange guwuumuliire mu kusuubira;
27kuba oyo talireka mwoyo gwange mu kuzikirira,
waire okuleka omutuukirivu we okuvundira mu magombe.
28Wandhegeresa engira edh'obulamu,
ndisangaala nga nkuli mu maiso.â
29âBaganda bange, ndidha kwogera ku dhaadha Daudi nga titya. Yafa yaaziikibwa n'amagombe ge gali ghano n'okutuusa olwaleero. 30Kale ni yali mulanzi yaamanha Katonda kye yeelayirira mwene ng'amusuubiza ati mulala ku baidhukulu be beene alityama ku kityamo kye.#Zab 132:11; 2 Sam 7:12-13 31Kye yalengera naayogeraku, kwali kuzuukira kwa Kurisito, kuba tiyalekebwa mu magombe waire omubiri gwe okuvunda. 32Yesu ono, Katonda yamuzuukiza, era twenatwena tuli badhulizi b'ekyo. 33Mperaano, bwe yamala okuniinisibwa ku mukono omusaadha ogwa Katonda, era n'okufuna Mwoyo Mutukuvu, eyamusuubizibwa Katonda Lata, n'okutugha ekirabo kino kye muli kubona era kye muli kuwulira. 34Kuba Daudi tiyaniina mu igulu, aye mwene oyo n'eyakoba ati:#Zab 110:1
âMusengwa Katonda yakoba Musengwa wange ati:
Tyama ku mukono gwange omusaadha,
35okutuusa bwe ndita abazigu bo ghansi gh'ebigere byo.â
36âKale ni, endhu ya Isiraeli yoonayoona emanhe aghazira kubuusabuusa, nga Katonda yafuula, Yesu oyo ye mwakomerera ku musalaba, Musengwa era Kurisito.â
37Ebyo bye baawulira byabafumita ku myoyo, baakoba Petero n'Abatume abandi bati: âBaganda baife, tukole ki?â 38Petero yaabakoba ati: âMwenenie, buli muntu abatizibwe mu liina lya Yesu Kurisito, ebibi byaimwe bisoniyibwe, era mwidha kufuna ekirabo kya Mwoyo Mutukuvu 39kuba ekisuubizo kya Katonda kyaimwe n'abaana baimwe, n'abo boonaboona abali eghala, boonaboona Musengwa Katonda waife oyo b'aba ng'ayese.â 40Era yaayongera okubakobera ebindi kamaala, yaabakubiriza ng'abakoba ati: âMwewonie ebikolwa eby'oluse luno olubi.â
41Abo abaasangaalira ebibono bye, baabatizibwa, era ku lunaku olwo, ku baikiriza kweyongeraku abantu ng'enkumi isatu. 42Beekalangulira mu kwegeresebwa kw'Abatume, ni mu kwisa ekirala, mu kumegula omugaati, ni mu kusaba.
Obulamu obw'abaikiriza
43Abatume baakola ebyewuunhio kamaala n'obumanhiso, era buli muntu yaatya Katonda. 44Abaikiriza boonaboona baabanga ghalala, n'ebyaibwe byonabyona nga babita ghalala.#Bik 4:32-35 45Baatundanga eitaka n'ebyaibwe, ebyavangamu baabigabananga boonaboona, nga bajiira ku bwetaavu bwa buli muntu. 46Baafubanga buli lunaku okuba aghalala mu isinzizo, era baajanga mu ndhu dhaibwe okumegula omugaati. Emere nga bagiriisa isanhu na kwisania 47nga basaaka Katonda, era abantu boonaboona nga babenda. Buli lunaku, Musengwa yaaja ng'abongeraku abaalokolwanga.
Chwazi Kounye ya:
Ebikolwa by'Abatume 2: Sog
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Baibuli Ekibono kya Katonda Š The Bible Society of Uganda, 2014